7, 8. Yel-manesem bʋg sẽn da yaa yell wʋsg la Efɛɛz tigingã ra tara, la wãn to la d tõe n mao ne yell a woto?

⁷ Ne rẽ fãa, kiris-nebã sẽn da be Efɛɛzã ra tara zu-loe-kãsenga. A Zezi yeelame: “Yell ninga mam sẽn tar ne yãmba, yaa tɩ yãmb basa yãmb pipi nonglem.” Tigingã neb ra segd n vʋʋga nonglem ning b sẽn da tar pipi ne a Zeova wã. (Mark 12:28-30; Efɛɛz rãmba 2:4; 5:1, 2) Tõnd fãa segd n gũusame n da wa bas nonglem ning d sẽn tall ne Wẽnnaam pipi wã ye. (3 Zã 3) Yaa wãn to masã, yɛl wala arzɛk tʋlsem la yõ-noogrã pʋgb sã n wa sɩngdẽ n dat n tall pãng wʋsg tõnd vɩɩmã pʋgẽ? (1 Tɩmote 4:8; 6:9, 10) Sã n wa yaa woto, d segdame n pʋʋs sõma-sõma n kos Wẽnnaam sõngre, sẽn na yɩl n ledg tʋlsem kãng ne nonglem sẽn tar pãng ne a Zeova, la ne mi-beoogo, bũmb nins fãa yẽ ne a Biriblã sẽn maan n kõ tõndã yĩnga.—1 Zã 4:10, 16.

11. Wãn to la d tõe n kɩt tɩ tigingã tall nonglem ne a Zeova n paase?

¹¹ Efɛɛz rãmbã basa b pipi nonglmã tɩ maage, la yaa wãn to, bũmb sẽn wõnd woto sã n wa maand tiging pʋgẽ rũndã-rũndã? Bɩ tõnd ned kam fãa sõng n kɩt tɩ tigingã nebã tall nonglem ne a Zeova n gom a nonglem tʋʋmã yelle. D tõe n wilga d mi-beoog ne Wẽnnaam sẽn tall nonglem ninga, n dɩk a Biribl nongrã n kõ tɩ yɩ rondã. (Zã 3:16; Rom dãmba 5:8) Sã n zemsame, d tõe n goma Wẽnnaam nonglmã yell d leoorã la d sõssã d sẽn kõtã pʋsẽ tigissẽ wã. Tõnd tõe n wilga d mengã nonglem ne a Zeova n pẽg a yʋʋrã koe-moonegã pʋgẽ. (Yɩɩl Sõamyã 145:10-13) N-ye, tõnd goamã la d tʋʋma tõe n maana yɛl wʋsg n vʋʋg bɩ n paas tigingã pipi nonglem.