Lɛtr sẽn yit Siglgã taoor lʋɩtb Sull nengẽ
Masã tõnd kẽeda yʋʋm kob-gĩnd 21 soabã pipi yʋʋm pʋgẽ, tɩ d tʋll ne sũ-noog n gʋls-yã, ‘d ba-biisa fãa’ sẽn be dũniyã gill zugã, n pẽg-y y tʋʋm toogã yĩnga. (1 Pɩɛ. 2:17) Sẽn pẽneg yʋʋm 2 000 la woto, a Zezi ra sʋkame: “Ninsaal Biiga sã n wa, b na n yãa tẽeb dũniyã zugu?” (Luk 18:8) Yãmb sẽn tʋm ne yẽesem rɩẽ wã wilgdame tɩ tẽeb sɩd bee dũniyã zug hal tɩ sãmbg kaẽ ye! Yãmb kẽer paama paoogr la yaalg y tẽebã yĩnga. Zĩis wʋsg pʋsẽ, y talla sũ-mare, baa ne zabã, sabaab rãmbã, bãasã, bɩ komã. (Luk 21:10, 11) Yãmb sẽn maand tʋʋm tɩrs ne yẽesmã yĩng kɩtame t’a Zezi tõe n ket n ‘yãt tẽeb dũniyã zugu.’ Yaa vẽeneg tɩ rẽ kɩtame tɩ b maand sũ-noog saasẽ!
Sũ-mar tallg toog pʋgẽ ka nana ye. Ges-y tõnd saam-biisã sẽn paam makr ning Azi yaang tẽng a yembr pʋgẽ. Tẽn-kãng pʋgẽ, wakat fãa la bala, b maanda a Zeova Kaset rãmba pãnga. Sẽn pa kaoos pʋgẽ, neb sõor sẽn zems 700 n da tigim taab ne bãan tɩ polɩɩs rãmbã wa kẽ n sãeeg-ba. B gɩdga soayã tɩ neb 1 300 a taab ka tõog n wa tigis-kãsengã ye. Neb kʋʋng sẽn naag ne polɩɩs rãmb n lud b nens n wa pig tigis-kãsengã zĩiga, n yõg tigis-kãsengã neb wʋsg n pãbe, la b yõog tigis-kãsengã zĩiga. Wakat a taaba, tũudum neb sẽn yaa yẽesem sẽn loog noor dãmb n pãb tõnd saam-biisã ne rasab sẽn ka ne põent rãmba.
Manesem a woto sãamda sũur wʋsgo, la ka bũmb sẽn lingd tõnd ye. Vʋʋsem sõng vẽnega tʋm-tʋmd a Poll t’a gʋls woto: “Neb nins fãa sẽn dat n tũ Kirist Zezi ne pʋ-peelma na n paama namsgo.” (2 Tɩm. 3:12) Pipi yʋʋm kob-gĩndẽ wã, b goma kiris-neba wẽnga, n nams-ba, la b kʋ kẽer menga. (Tʋʋ. 5:40; 12:2; 16:22-24; 19:9) Yɩɩ woto me yʋʋm kob-gĩnd 20 soabã pʋgẽ, la sik kae tɩ na n kell n yɩɩ woto yʋʋm kob-gĩnd 21 soabã pʋgẽ me ye. Ne rẽ fãa, a Zeova yeta tõnd woto: “Zab-teed nins fãa neb sẽn maand n na n zab ne fooma ka na n tõog ye.” (Ezai 54:17) Ad wã yaa goam sẽn kɩtd tɩ tõnd tall bas-m-yam! Sɩda, tõnd tara yõod wʋsg a Zeova nifẽ, hal t’a tol n tũnug ne a no-rɛɛs a Zakari, n yeel tɩ ‘ned sã n sɩɩs tõndo yaa wa a sẽn tuk yẽ nifu.’ (Zak. 2:12) A Zeova balemdbã bɛɛb ka na n wa baas n tõog tõnd ye. Yaa baleng yɩlemdã n na n wa baas n tõoge!
Wala makre, tẽng ning yell b sẽn gom zugẽ wã pʋgẽ, a Zeova Kaset rãmbã paama koe-moondb sõor sẽn sãd paals a yiib yʋʋmd 2001 tʋʋmd yʋʋmdã pʋgẽ. N-ye, baa ne namsgã d saam-biisã ket n pẽdgda be ne tʋʋmdã, wala d saam-biisã sẽn maand to-to zĩis a taabã fãa wã. Dũniyã gill zugu, rɩẽ tʋʋmd yʋʋmdã pʋgẽ, rasem a yopoe fãa neb 5 066 n deeg lisg n wilg tɩ b rɩka b mens n kõ a Zeova. Masã nin-paals kãensã naaga tõnd n dɩk sard sẽn ka vigsd sẽn na yɩl n ‘zems n bɩ la b sak Wẽnnaam daabã zãnga.’—Kol. 4:12.
Ges-y yɛl nins sẽn maan Gerɛs wakat sẽn pa kaoos pʋgẽ wã. Baa Gerɛs Egiliizã taoor dãmb sẽn kɩɩs a Zeova Kaset rãmbã wʋsg sẽn na maan yʋʋmã, goosneemã sakame n deeg masã tɩ b yaa “tũudum b sẽn mi tiiri.” Sebr ning sẽn wilg woto wã pʋgẽ, b paasame tɩ Gerɛs Betɛllã zak yaa “zĩig sẽn welg toor Wẽnnaam balengã yĩnga.” D sũur yaa noog tɩ d na n togs-y tɩ rɩẽ tʋʋmd yʋʋmdã wakate, bʋ-kaoodbã kõo tõnd bʋʋm bʋʋd toɛy-toɛy pʋsẽ, tɩ sõngd tõnd tũudmã Alemayn, Bulgari, Etazĩni, Kanada, Rumani, Risi la Zapõ. D pʋʋsda a Zeova bark a sẽn kell n pak kʋɩleng tɩ d tõe n maan tʋʋmdã tẽn-kãensã pʋsẽ wã!
D sã n ges a Zeova sẽn tũnugd ne soay nins n sõngd a nin-buiidã yaoolem day kãensã pʋsẽ wã, d neeme tɩ yẽ la tõnd zoa meng-meng n yɩɩda. D maanda sũ-noog ne zems-n-taar ning d sẽn tar ne-a wã, n miẽ t’a nonga tõndo, n zãmsd tõndo, la a remsd tõndo. N-ye, tõnd tẽebã na n ket n paamda makre. La tõnd tẽebã ne a Zeova sã n yaa kãn-kãe, sõng-d lame tɩ d yals kãn-kãe. A Zak gʋlsa woto: “M ba-biisi, makr toɛy-toɛy sã n paam yãmba, bɩ y geelg bãmb wa sũ-noog bala, tɩ yãmb miimi tɩ yãmb tẽeb makr wata ne sũ-mare.” (Zak 1:2, 3) Sẽn paase, tõnd sã n tar sũ-mar toog taoore, wilgdame tɩ d nonga a Zeova la rẽ kõt-d-la sũ-noog wʋsgo! Saam-bi-nongdse, bɩ y fãa bãng vẽeneg t’a Zeova na n sõnga tõnd ned kam fãa. Tõnd sã n kell n sak a Zeova, a na n sõnga tõnd tɩ d kẽ dũni paalgã pʋgẽ. A ratame tɩ d tõog rẽ.
Woto yĩnga, yãmb fãa d saam-biis la d saam-bi-pogse, kamb la kãsemba, ning-y bark kãsems nins sẽn wat ka la bilfã y yamẽ sõma. Bɩ d tags wala a Poll sẽn gʋls woto wã: “Mam geelgdame tɩ namsg ninga sẽn be masã wã ka zems tɩ mak ne ziir ninga sẽn be taoore n na n puk tõnd yĩnga ye.” (Rom 8:18) Toog buud fãa pʋgẽ bɩ y teeg a Zeova. Ket-y n pẽdgdẽ n da bas ye. Y kõn tol n maan m-bãngẽ abada! Wẽnnaam Gomdã kõta tõnd bas-m-yam tɩ: “Nin-tɩrg na n vɩɩ ne tẽebo.”—Hab. 2:4.
Yãmb saam-biisã,
Governing Body of Jehovah’s Witnesses