Tʋʋmd sẽn baood tɩ d tall sik-m-menga
1 Wẽnnaam Gomdã sagenda tõnd tɩ d tall ‘sik-m-menga, n da lebs wẽng wẽng yĩng ye, la bɩ d lebs barka.’ (1 Pɩɛ. 3:8, 9) Sik kae tɩ sagl-kãngã tɩ loee ne moonegã tʋʋmd ye. Koe-moonegã pʋgẽ, yɛl n tõe n kɩt tɩ sɩd yɩ toog ne-d tɩ d tall sik-m-menga.
2 Sik-m-mengã sõngda tõnd tɩ d tall sũ-mar yɛl sẽn ka noom tõnd taoore. Moonegã wakate d segda neb sẽn da ka mi tõnd waoongã tiiri, tɩ d miẽ tɩ bãmb kẽer na n talla paoogr manesem ne-do. Rẽndame tɩ d yɩ sik-m-mens rãmb n tõog n ket n moondẽ, baa ne manesem kãensã. Mooneg zĩig sẽn ka nana a yembrẽ, so-pakdb a yiib sẽn yaa saam-bi-pogs moona zak-zak daar fãa, yʋʋm a yiib tõr tɩ ned ba a ye ka sak n kelg-b ye. La b kell n pẽdga ne tʋʋmdã, hal tɩ rũndã tigims a yiib be zĩ-kãnga.
3 D sẽn na n maan to-to paoogrã taoore: Sik-m-mengã na n sõnga tõnd tɩ d rɩk togs-n-taar ne a Zezi, neb sã n wa tar paoogr manesem ne-do. (1 Pɩɛ. 2:21-23) Zak a yembrẽ, saam-bi-poak la pag tʋ-yã, tɩ pagã sɩd me yi n tʋ-a la a rig-a t’a yi zakẽ wã. Saam-bi-poakã kell n laa ne-b bala, la a yeel t’a saagda a na wa n tõog n sõs ne-b nindaare. Saam-bi-poakã manesem yɩɩ pagã ne a sɩdã noogo, hal tɩ b sak n kelg Kaset rãmb a taab sẽn wa b nengẽ raar a to, la b sak n kẽng tigisg Rĩungã Roogẽ. Saam-bi-poak ning bãmb sẽn dag n tʋ wã sẽn da be be wã wa n pʋʋs-b lame, la a kõ-b kaset n paase. Tõnd me tõe n kɩtame tɩ neb nins sẽn ka rat n kelgã tall sũ-bʋgsem ne-d n paase, d sã n ‘tar sũ-maasem la waoogr wʋsgo.’—1 Pɩɛ. 3:15; Yel. 25:15.
4 Lak-y y meng ne tɩtaam: Tõnd Biiblã minim ka segd n kɩt tɩ tõnd get nebã wa b ka ta tõndo, bɩ n gomd n paoogd-b ye. (Zã 7:49) Wall tɩ yɩ woto, Wẽnnaam Gomdã sagenda tõnd tɩ d “da gom ned ba a ye wẽng ye.” (Tɩt 3:2) Tõnd sã n yaa sũ-maasem dãmb wa a Zezi, d kõta neb a taabã yolsgo. (Mat. 11:28, 29) D sã n moond ne sik-m-menga kɩtdame tɩ koɛɛgã be yamleoog n yɩɩda.
5 N-ye, sik-m-mengã sõngda tõnd tɩ d ket n pẽdgd ne moonegã zĩis nins mooneg sẽn yaa toogã. Rẽ tõe n kɩtame tɩ sẽn ka rat-b n kelgã tall sũ-bʋgsem ne-d n paase, la kɩt tɩ Rĩungã koɛɛg tall yamleoog ne neb a taabã n paase. Sẽn yɩɩd fãa, nooma a Zeova, sẽn ‘ningd sik-m-mens rãmbã zut barkã.’—1 Pɩɛ. 5:5.