Siglgã taoor lʋɩtb Sull lɛtre
D saam-biis la d saam-bi-pogse:
1 YAA ne sũ-no-kãseng la d gʋlsd-y lɛt-kãngã. D pẽgd-y-la y sẽn ket n tar nonglem la y maand modgr ningã yĩnga. Yãmb mengã na n yãa Annuaire 2003 wã pʋgẽ tɩ bõn-sõma wʋsg la d tõog n maan rɩẽ tʋʋmd yʋʋmdã pʋgẽ. D leb n tõog n dɩka sẽn yɩɩd lɛɛr milyaar n maan d moonegã la neb zãmsg tʋʋmdã, n sõng nebã sẽn na yɩl tɩ b pẽneg a Zeova. Rẽ yĩnga ka waoogr ne-do, d sẽn paam n yaa d saasẽ Ba wã sẽn yaa Wẽnnaam sẽn tar ziirã tʋmd-n-taasã sɩda?—1 Kor. 3:9.
2 D sẽn get tʋʋmdã sẽn watã, d kɩsa sɩd tɩ y na n ket n dɩkda togs-n-taar ne yẽesem la tẽeb ning Wẽnnaam sõgen dãmbã sẽn talle, tɩ b gom dẽ yell Biiblã pʋgẽ wã. Wala makre, tʋm-tʋmd a Poll ra tʋlla ne yãgb n maan a sẽn tõe tɛk tɩ Rĩungã yɛl kẽng taoor n paase. Wõnda yaa yaoolem yʋʋmd ning a sẽn zĩnd Efɛɛzã la a gʋls pipi lɛtr ning a sẽn tool Korẽnt kiris-neb tigingã. A gʋlsa woto a sẽn da magd n na n maan bũmb ning rẽ poor bilfã wɛɛngẽ: “Mam na n paa Efɛɛz hal tɩ ta Pãntekote; Tɩ bõe, kʋɩlen-kãseng paka mam taoore tɩ m maan tʋʋmd sẽn be nafre, la bɛɛba yaa wʋsgo.”—1 Kor. 16:8, 9.
3 A Poll ra magdame n na n kẽng Masedoan la Korẽnte. La a yãame t’a sã n da pa Efɛɛz bilf n paase, a ra ket n tõe n maana tʋʋmd sẽn be nafre. A Poll ra ka ned sẽn gãt yɛlã dem-dem n ka toeemdẽ ye. A yãame tɩ sor da pakame n kõ-a t’a tõe n maan tɩ Rĩungã yɛl kẽng taoor zĩig ning a sẽn da beẽ wã takɩ, t’a maneg a mengã tʋʋmd na-kẽndr tɩ zems ne rẽ. Kʋɩlen-kãseng paka a Poll taoor t’a tõe n maan tʋʋmd sẽn be nafre, t’a ra tʋll ne yãgb n tʋm ne rẽ sõma.
4 Sẽn na yɩl maan dẽ, a ra segd n tʋma wʋsgo, n moon koe-noogã la a keng Efɛɛz tigingã neb tẽebo. Kaoosg zugẽ, a Poll yeela Efɛɛz tigingã kãsem dãmba: “Mam ka kong tɩ togs yãmb bũmb nins fãa sẽn na n sõng yãmba ye. La mam ka zoe rabeem tɩ moon koɛɛga la tɩ zãms yãmb neba sʋka la rot pʋsẽ ye. Mam kɩsa kaset ne Zʋɩf rãmba la Gɛrk rãmba tɩ b tek yam n kos sugri n tũ Wẽnnaam n tẽ tõnd Zusoab a Zezi.”—Tʋʋ. 20:20, 21.
5 Woto me, d saam-biis la d saam-bi-pog-nongdse, yãmb wʋsg tũnuga ne sor sẽn pak n kõ-yã n maan tʋʋmd sẽn be nafre. Rɩẽ tʋʋmd yʋʋmdã pʋgẽ, yaa koe-moondb 798 938 n tõog n manes b yɛlã sẽn na yɩl n maan so-pakrã tʋʋmde. Yãmb sʋka, neb kẽer toga sor n kẽng zĩ-zãrsẽ n na n tɩ tʋm wala misioneer dãmba. Y yelgda koe-noogã ne yẽesem la y kengd tigims tẽebo. Neb a taab zãmsa buud-gomd a to sẽn na yɩl n sõng neb sẽn gomd buud-gom-zẽng bãmb babgẽ wã. Sẽn paase, yãmb sʋka neb n manes b yɛla, sẽn na yɩl n tɩ moon zĩis tigims sẽn ka moondẽ bɩ zĩig ning raab sẽn yaẽ kãseng n yɩɩdã. Neb kẽer meng mikame tɩ kʋɩleng sẽn yaa kãseng pakame tɩ b tõe n maan tʋʋmd sẽn be nafr lekoll dãmbẽ, tʋʋm zĩisẽ, bɩ zĩis nins b sẽn tõe n kõ kaset tɩ yɩ sõma ne telefõnnã. Dũniyã gill zugu, yɛl wʋsg neb sẽn vɩɩmd n yã wilgdame tɩ Wẽnnaam nin-buiidã, kamb la kãsemb fãa, baooda soay ne b sũyã fãa n taasd nebã sɩdã zĩig fãa.
6 Kɩs-y sɩd t’a Zeova nee modgr ning y sẽn maandã la a sũur nooma wʋsg ne rẽ. Biiblã yeelame: “Wẽnnaam yaa tɩrga, la bãmb kõn yĩm yãmb tʋʋmda ne y nonglma yãmb sẽn wilg bãmb yʋʋra yĩnga” ye. (Heb. 6:10) Ket-y n baood soay sẽn na yɩl n sõng tɩ baleng yɩlemdã kẽng taoore. Tõe tɩ yãmb kẽer tõog n paas y moonegã tʋʋmd pãnga. Tõnd fãa tõe n modgame n maan tɩ d moonegã tʋʋmd yɩ sõma n paase.
7 D yãta kɩɩsg moonegã tʋʋmd d sẽn pidsdã pʋgẽ. Tẽeg-y t’a Poll sẽn da wa n gʋls tɩ kʋɩleng sẽn yaa kãseng n pak t’a tõe n maan tʋʋmd sẽn be nafrã poore, a ra paasame: “Bɛɛba yaa wʋsgo.” Sã n yaa ne a Polle, Zʋɩf rãmb la buud a taab neb ra bee bɛɛb kãensã sʋka, bãmb kẽer zaba ne a Poll vẽeneg-vẽenega, t’a taab soos n na n maan-a wẽnga.—Tʋʋ. 19:24-28; 20:18, 19.
8 Tõnd me segda yɛl woto rũndã-rũndã. Zãmaan-wẽngã sãoong sẽn kolgdã, d miimi tɩ kɩɩsgã me na n paasame. A Sʋɩtãan “sũ-puugra yaa kãsenga,” la sẽn yɩɩd fãa yaa ne neb nins sẽn balemd a Zeova wã. (Wil. 12:12) Ra tol-y n yĩm-y tɩ ya a Sʋɩtãan la ‘dũniyã naab’ ye. A Zezi yeela a karen-biisã: “Yãmb sã n yaa dũniyã rẽnda, dũniyã na nong a meng rẽnda. La yãmb ka dũniyã rẽnd ye, la mam tũusa yãmb dũniyã neba sʋka; yaa woto n kɩt tɩ dũniyã kis yãmba.”—Zã 14:30; 15:19.
9 D rɩka sard kãn-kãe n ka na n bas tɩ ned ba a ye koms tõnd tẽebã ne Wẽnnaamã bɩ n kɩt tɩ d maag d moonegã tʋʋmd pʋgẽ ye. D miimi tɩ neb n na n ket n zabd ne tõnd vẽenega, la neb kẽer me n na n soosd n dat n maan-d wẽnga. Ne rẽ fãa, d na n ket n pẽdgda ne Rĩungã koe-noog moonego, n kɩs sɩd t’a Zezi na n sãama a Sʋɩtãan ne a kʋʋngã wakat ning a Zeova sẽn yãkã. Bɛɛbã ka tõog n kɩt tɩ tʋm-tʋmd a Poll bas moonegã ye, rũndã-rũndã me b leb n ka tõe t’a Zeova sõgen dãmbã bas moonegã ye. Baa ne a Sʋɩtãan sũ-puugrã la dũniyã kisgri, a Zeova vʋʋsem sõngã ket n tʋmda ne pãng n sõngd a nin-buiidã. Ad yaa sũ-noog menga, d sẽn ne tɩ neb nins sẽn moond koe-noogã sõor zẽk n taa 6 304 645!
10 Tõnd pʋʋsdame tɩ y ket n tũnugd ne soay nins y sẽn paamdã n kɩtdẽ t’a Zeova Rĩungã sẽn tar ziirã tʋʋm ket n kẽngd taoore. D sẽn ket n ‘naagd taab’ n balemd Wẽnnaam Sẽn-ka-to a Zeova wã sasa, bɩ y bãng tɩ d nonga yãmba la tɩ yãmb ned kam fãa yell pak-d lame.—Sof. 3:9, NW.
Yãmb saam-biisã,
A Zeova Kaset rãmbã Siglgã taoor lʋɩtb Sulli