Wãn to la d tõe n sõng Kaset rãmbã kẽed-n-taas nins sẽn ka be sɩdã pʋgẽ wã?
1 A Zeova sõgen dãmb wʋsg kẽed-n-taas tara zood manesem ne saam-biisã la b nong tigingã neba, la b yaool n nan ka rat n lebg Wẽnnaam sõgen dãmb ye. Kaset soab a ye sɩd sak n deega woto: “Kẽng n tɩ moon zak-zakã meng tagsg yɩɩ yel-gɩdgd sẽn yaa kãseng ne maam.” Tõeeme tɩ neb a taab segd n maoome n tõog minim wẽnse, bɩ b tagsdame tɩ b ka na n tol n tõog n tʋm Wẽnnaam tʋʋma sẽn yaa wʋsgã wa b kẽed-n-taagã sẽn maandã ye. Wãn to la d tõe n sõng-ba?
2 Wilg-y tɩ b yell pak-y lame: D sã n wilgdẽ tɩ neb a taabã yell pak-d lame la d gũus n bãng yɛl nins yell sẽn pak-bã, rẽ tõe n paka sor tɩ b wa sak sɩdã. (Fil. 2:4) Neb nins sẽn dag n ka sak b kẽed-n-taag tũudum pĩndã nong n gomda Kaset rãmb a taabã sẽn da wilgd nonglem ne-ba yelle. Rao ning goam b sẽn da lebs n dɩk zugẽ wã wilga woto: “A José sẽn yaa tigingã kãsem soabã ra wilga nonglem wʋsg ne maam. M tagsdame tɩ yaa yẽ sẽn da kengd mam daoodã n wa n baas n kɩt tɩ m sɩng Biiblã zãmsg sõma.” Rao a to me tẽrame tɩ saam-biis nins sẽn da nong n wat yẽ zakẽ wã ra modgdame n gomd bũmb nins sẽn pak yẽ wã yelle. A yeelame “tɩ yẽ sẽn da tagsd bũmb ning a pagã tũudum zugã sɩnga toeengo. M paga zo-rãmb ra yaa neb sẽn tar yam wʋsgo, sẽn nong n sõsd yɛl toɛy-toɛy zutu.”—1 Kor. 9:20-23.
3 Kõ-y sõngr vẽenega: D sã n maan d tẽed-n-taasã kẽed-n-taas nins sẽn pa Kaset rãmbã yel-sõmde, noogda b sũyã. (Yel. 3:27; Gal. 6:10) Saam-bi-poak a yembr sɩd mobill n sãam tɩ Kaset soab a ye sẽn yaa bi-bɩɩg tɩ sõng-a. Ra-kãng tẽega rẽ n yeele: “A manesmã sɩd yɩɩ maam noog wʋsgo.” Saam-biig a to rɩka a raar a ye tõr n sõng saam-bi-poak sɩd sẽn ka be sɩdã pʋgẽ n lugl a giryaase. B sẽn da wa n tʋmdẽ la b sõsd ne taabã sasa b yõga zoodo. Semen a yiib zugẽ, rao wã kẽnga saam-biigã nengẽ n tɩ yeel-a: “Masã m segd n toeema m vɩɩmã. Fo na n sakame n zãms Biiblã ne maam bɩ?” Rẽ poore rao wã bɩɩ tao-tao tẽebã pʋgẽ, la masã a lebga Kaset soab sẽn deeg lisgu.
4 D sẽn baood neb nins sẽn zemsã tõnd moonegã zĩigẽ wã sasa, bɩ d ket n sõngd d tẽed-n-taasã kẽed-n-taas nins sẽn ka be sɩdã pʋgẽ wã.—1 Tɩm. 2:1-4.