‘Sak-y a Zeova ne sũ-noogo’

1. Bõe n tõe n kõ a Zeova sõgen dãmbã sũ-no-kãsenga?

¹ Tʋm-tʋmd a Poll gʋlsa woto: “Bɩ y maan sũ-noog daar fãa ne Zusoabã. La mam leb n yetame, bɩ y maan sũ-noogo.” (Fil. 4:4) D sẽn paam n tõe n taas nebã koe-noogã la d sõng b rãmb nins sẽn wõnd piis tẽebã wɛɛngẽ tɩ b wa balem a Zeova wã kõta tõnd sũ-no-kãsenga. (Luk 10:17; Tʋʋ. 15:3; 1 Tes. 2:19) La d sã n mik tɩ wakat ninga d ka tar sũ-noog d koe-moonegã pʋgẽ, bõe la d tõe n maane?

2. D sã n tẽeg sẽn kõ-a tõnd moonegã tʋʋmd yelle, wãn to la rẽ sõngd-d tɩ d tall sũ-noogo?

² Tʋʋmd Wẽnnaam sẽn kõ noor tɩ d maane: Tẽeg-y tɩ ya a Zeova n bobl tõnd koe-moonegã tʋʋmde. N-ye, d sẽn yaa “tʋmd-n-taas ne Wẽnnaam” Rĩungã koɛɛg mooneg la karen-biisã maaneg pʋgẽ wã, yaa waoogr meng n kõ-do! (1 Kor. 3:9) Kirist Zezi sõngda tõnd tʋʋm kãngã d sẽn ka na n tol n le maan n yɩlmã pʋgẽ. (Mat. 28:18-20) Malɛgsã me naaga tõnd n maand tẽeb tigisg tʋʋmd kãseng ning sẽn maand masã wã. (Tʋʋ. 8:26; Wil. 14:6) Gʋlsg Sõamyã n paas yɛl nins Wẽnnaam nin-buiidã sẽn vɩɩmdã wilgda vẽeneg t’a Zeova bee tʋʋm kãngã poorẽ. Woto yĩnga, tõnd sã n moondẽ yaa ne ‘Wẽnnaam noor Kirist tũudmã pʋgẽ Wẽnnaam taoore.’ (2 Kor. 2:17) Ad woto yaa bũmb sẽn kɩt tɩ d segd n tall sũ-noogo!

3. Wãn-wãn la pʋʋsgã tõe n sõng tõnd tɩ d tall sũ-noog Wẽnnaam tʋʋmdã pʋgẽ?

³ Pʋʋsgã yaa tɩlae sẽn na yɩl n sõng tõnd wʋsg tɩ d tall d sũ-noogã Wẽnnaam tʋʋmdã pʋgẽ. (Gal. 5:22) Sẽn yaa ne Wẽnnaam pãng bal la d tõe n maan tʋʋmdã, d segd n kos-a-la a vʋʋsem sõngã ne d sũur fãa, tɩ bala a kõt-a-la neb nins sẽn kot-a wã ne sũ-noogo. (Luk 11:13; 2 Kor. 4:1, 7; Ef. 6:18-20) D sã n pʋʋs d koe-moonegã wɛɛngẽ, na n sõng-d lame tɩ d tall tagsg sẽn zemse, nebã sã n pa kelg tõnd koɛɛgã. Rẽ na n kɩtame tɩ d ket n moond ne raood la ne sũ-noogo.—Tʋʋ. 4:29-31; 5:40-42; 13:50-52.

4. Wãn to la seglg neerã tõe n paas tõnd sũ-noogã koe-moonegã pʋgẽ, la bõe la d tõe n maan n segl d mense?

⁴ Segl-y neere: Bũmb a ye d sẽn tõe n maan n paas d sũ-noogã koe-moonegã pʋgẽ yaa d sẽn na n segend neere. (1 Pɩɛ. 3:15) Ka tɩlae tɩ seglg a woto rɩk sẽk wʋsg ye. Minit a wãn bal seka sẽn na yɩl n lebg n ges saglsã b sẽn kõ yaoolem zʋrno rãmbã kãabg yĩngã, bɩ sɛb kãabg goam nins sẽn zems ne sɛb nins d sẽn geend n na n kãabã. Y tõe n gesa Comment raisonner sebrã bɩ pĩnd Rĩungã Tʋʋmd sɛb n paam sɩngr goam sẽn zemse. Rĩungã koe-moondb kẽer yãame tɩ b sã n gʋls sagl-koees sebr zug n bĩngi, sõngd-b lame. Wakat-wakate, b geta seb-kãng n tẽegdẽ. Rẽ sõngd-b lame tɩ b ka le zoet rabeem, la kõt-b bas-m-yam tɩ b tõe n moon ne raoodo.

5. Wãn to la sũ-noogã nafd tõnd la neb a taaba?

⁵ Sũ-noogã meng tara nafa wʋsgo. A kɩtdame tɩ tõnd koɛɛgã be yamleoog n yɩɩda. Sũ-noogã sõngda tõnd tɩ d tall sũ-mare. (Neh. 8:10; Heb. 12:2) Sẽn yɩɩd fãa, tõnd sẽn maand a Zeova tʋʋmdã ne sũ-noogã waoogd-a lame. Woto yĩnga, bɩ d ‘sak a Zeova ne sũ-noogo.’—Yɩɩl 100:2.

Bũmb ning d sẽn na n yeel n wilg zʋrno rãmbã

Gũusg Gasgã Zĩ-likri, 15

“Sard wʋsg tõnd sẽn dɩkd tara pãn-tusdg sẽn yaa kãseng tõnd vɩɩmã pʋgẽ. Bõe n tõe n sõng-d tɩ d ra rɩk sard sẽn ka zemse? [Bas-y t’a leoke. Rẽ poor bɩ y karem Yelbũna 3:6.] Gũusg Gasg kãngã wilgda noy a naas sẽn tik Biiblã zugu, sẽn tõe n sõng-d tɩ d rɩk sard sẽn yaa sõma.”

Réveillez-vous ! 22 oct.

“Rẽ yĩnga yãmb ka nong n wʋmd n yɩɩd tɩ bãas kẽer n be tɩ tɩt nins sẽn da tõe n tɩp-bã le pa tõe n tɩp-b yɛs sɩda? [Bas-y t’a leoke.] Zʋrnall kãngã wilgda bũmb ning sẽn kɩt tɩ yaa woto wã, la a kõt sagls sẽn wilgd d sẽn tõe n maan bũmb ning n kogl d mense. A leb n gomda Biiblã sẽn kãab tɩ dũni paalg n na n wa tɩ neb ka na n leb n bẽ wã yelle.” Karm-y Ezai 33:24.

Gũusg Gasgã Sɩpaolgo, 1

“Wakat n zĩnd tɩ tõnd ned kam fãa ra teeg ned tɩ wa baas ne sũ-sãamse. Yãmb zoe n soka y meng n ges ‘ned bee y sẽn tõe n teeg bɩ?’ [Bas-y t’a leoke. Rẽ poor bɩ y karem Yelbũna 3:5.] Zʋrnall kãngã wilgda bũmb ning sẽn kɩt tɩ d tõe n tall bas-yard zãng-zãng ne Wẽnnaamã. A leb n wilgda d sẽn tõe n maan to-to n bãng neb nins tõnd sẽn tõe n teegã.”

Réveillez-vous ! 8 nov.

“B sẽn dɩkd petrollã n maand bũmb ninsã paka tõnd vɩɩmã nens fãa la bala. Yãmb zoe n soka y meng n ges vɩɩmã sẽn da na n yɩẽ to-to, bõn-yood toɛy-toɛya b sẽn maand ne petrollã sã n da kaẽ bɩ? [Bas-y t’a leoke.] Zʋrnall kãngã wilgda sẽn yɩ to-to tɩ petrollã wa tall yõod wʋsg masã zamaanã pʋgẽ wã. A leb n wilgda bũmb ning sẽn kɩt tɩ d ka segd n maan rabeem tɩ wakat n na n wa tɩ petroll ka le beẽ wã.”