Wãn-wãn to la kiris-nebã tõe n tall zems-n-taar hakɩka?

¹ Bõe n tõe n kɩt tɩ sẽn yɩɩd neb milyõ a yoob sẽn yit tẽns 234 pʋsẽ, la sẽn gomd buud-goam 380 tõog n tall zems-n-taare? Yaa Wẽnnaam a Zeova balengã bal n tõe n kɩt tɩ rẽ yɩ. (Mii. 2:12; 4:1-3) A Zeova Kaset rãmbã mens sẽn vɩɩmd n yã bũmb ningã kɩtame tɩ b miẽ tɩ kiris-neb zems-n-taar hakɩkã yaa bũmb sẽn sɩd be rũndã-rũndã. Tõnd sẽn yaa ‘yãgr a yembr pe-kɩɩm a yembr’ nugẽ wã yĩngã, kɩtame tɩ d rɩk sard sẽn ka vigsd n na n kɩɩs dũni kãngã welg-taab yamã.—Zã 10:16; Ef. 2:2.

² Wẽnnaam daabã sẽn na n sɩd paam pidsgã yaa tɩ bõn-naands nins sẽn tar yamã wa lagem taab baleng hakɩkã pʋgẽ. (Wil. 5:13) A Zezi sẽn mi zems-n-taar a woto yõodã yĩng kɩtame t’a pʋʋs ne a sũur fãa rẽ yĩnga. (Zã 17:20, 21) Wãn to la tõnd ned kam fãa tõe n sõng tɩ zems-n-taar zĩnd kiris-neb tigingã pʋgẽ?

³ Zems-n-taarã sẽn paamd to-to: Kiris-nebã ra ka na n tõog n zems taab tɩ sã n pa ne Wẽnnaam Gomdã la a vʋʋsem sõngã maasem ye. Tõnd sã n tũud bũmb nins d sẽn karemd Biiblã pʋgẽ wã, rẽ pakda sor tɩ Wẽnnaam vʋʋsem sõngã tʋm tõnd vɩɩmã pʋgẽ tɩ gɩdgr kaẽ ye. Rẽ na n kɩtame tɩ d ‘zĩnd vʋʋsem sõng lagem-n-taar pʋgẽ, laafɩ ning sẽn loe-a tõnd ne taabã yĩnga.’ (Ef. 4:3, Kãab-paalgã Koe-noogo) Rẽ kɩtdame tɩ d tall sũ-mar ne taab nonglem pʋgẽ. (Kol. 3:13, 14; 1 Pɩɛ. 4:8) Rẽ yĩnga, yãmb bʋgsda Wẽnnaam Gomdã zug daar fãa, sẽn na yɩl n sõng tɩ zems-n-taar zĩnd bɩ?

⁴ Moonegã la karen-biisã maaneg tʋʋmd b sẽn bobl tõndã lagemda tõnd ne taaba. Tõnd sã n tʋmd ne taab koe-moonegã sasa, ‘n lagemd taab n maood koe-noogã tẽeb yĩnga,’ d lebgda “tʋmd-n-taas sɩda pʋgẽ.” (Fil. 1:27; 3 Zã 8) D sã n maand woto, nonglmã sẽn lagemd tõnd ne taab tigingã pʋgẽ wã pãng paasdame. Bõe yĩng tɩ y ka na n bool ned y sẽn ka moon ne rasmã noor t’a wa yãag-y koe-moonegã pʋgẽ semen kãngã?

⁵ Ad yaa bark meng la d paam-yã, d sẽn be dũni gill saam-biir hakɩk yɛngã pʋgẽ wã! (1 Pɩɛ. 5:9) Neb kʋʋng bãnga dũni gill zems-n-taar kãngã “Pẽg-y Wẽnnaam” tẽn-tẽns tigis-kãsemsã sẽn maand masã wã sasa. Bɩ tõnd ned kam fãa sõng tɩ zems-n-taar kãngã sẽn tar yõodã zĩndi, d sẽn na n karemd Wẽnnaam Gomdã daar fãa, n welgd mo-yõsã ne nonglem, la d ‘lagemd taab’ n moond koe-noogã.—Rom 15:6.

Neb nins sẽn zemsã baoobo

¹ Moonegã tʋʋmd a Zezi sẽn kõ noor tɩ d maanã tõe n yɩɩ tʋʋm-toogo. A yeelame: “Yãmb sẽn kẽ tẽng ninga fãa, a sã n yaa tẽn-kãsenga bɩ tẽn-bila, bɩ y bao ned sẽn zemse.” (Mat. 10:11) La rũndã-rũndã nebã sẽn ka leb n zĩ yir n kaoosdẽ wã, d na n maana a wãn n bao neba sõma?

² Vaees-y y moonegã zĩig n gese: Reng-y n vaees-y y moonegã zĩig n gese. Wakat bʋg la neba be yir n yɩɩda? B bee yɛ wĩntoogo? Rẽ yĩnga daar n be semenã pʋgẽ, bɩ wakat n be raarã pʋgẽ nebã sẽn sakd n deeg sãan nana n yɩɩd bɩ? D sã n maneg d koe-moonegã wakat tɩ zems ne tõnd moonegã zĩigẽ nebã vɩɩm la b yɛla, rẽ tõe n sõng-d lame tɩ d tʋʋmã wom biis wʋsgo.—1 Kor. 9:23, 26.

³ Koe-moondb wʋsg tõog n yãa neb b zagsẽ zaabr pĩnda. Wakat kãng tɩ neb kẽer yam gãandame tɩ b tõe n sak n kelge. Zĩis nins rẽ maaneg sẽn tõeyã, kaset kũun ne telefõnã zaabr me tõe n woma biis wʋsgo. Leebgã zĩisi, la zãmã wã zĩisẽ mooneg leb n yaa soay d sẽn tõe n tũnug ne n taas nebã koe-noogã.

⁴ Kiuug a yembre, tiging a ye pʋgẽ b sẽn da wa n wɩngd wʋsg ne koe-moonegã sasa, b seglame tɩ b tõe n kõ kasetã sibrã la hatã wĩnd-kaoorã baasgẽ, ne arb la arzũm zaabre. B leb n sigla kaset kũun ne telefõn la b maan segls tɩ b tõe n moon leebgã zĩisẽ. Segl-kãensã yãnga neb wʋsg tʋlsem ne koe-moonegã hal tɩ tigingã neb rɩk sard tɩ b na n kell n kẽnga taoor ne segls nins b sẽn zoe n maanã.

⁵ Modg-y ne lebg-n-tɩ-ges rãmbã maanego: Sã n yaa toog yãmb zĩigẽ wã tɩ y yã nebã yir y sã n wa lebg n na n tɩ ges-bã sasa, bɩ y modg tɩ y sã n kẽng a soab nengẽ fãa, baa yaa pipi kẽngrẽ wã, bɩ y zems taab n yãk wakat takɩ n lebg n wa ges-a. Rẽ poor bɩ y modg n sɩd kẽnge. (Mat. 5:37) Sã n zemsame menga, y tõe n kosa a soabã telefõn nimero. Rẽ leb n tõe n sõng-y lame tɩ y paam n sõs ne a soabã yɛsa.

⁶ Tõnd sã n modgd n baood neb nins sẽn zemsã la d lebgd n tʋgd n sõngd neb nins sẽn dat n bãng n paasã, yaa vẽeneg tɩ d na n paama a Zeova barka.—Yel. 21:5.