Yãmb na n zĩnda be bɩ?
1 Kaset soab sẽn kaoos sɩdã pʋgẽ yeela woto vugri: “Yãmb sã n ka tõog n kẽng tigis-kãsengẽ wã pipi daarã, togs sɩda y bõna wʋsgo!” Bõe yĩng t’a tags woto? Yaa pipi raarã sẽn yaa tẽeb kibs-kãseng a Zeova siglgã sẽn segl n na n kõ-dã sɩngrã yĩnga. (Ezai 25:6) Tõnd sã n zĩnd tigis-kãsengã sɩngrẽ, wilgdame tɩ d saka yɩɩl-gʋlsdã tags-kãngã: “Mam maana sũ-noogo b sẽn yeel maam: ‘Tɩ d kẽng Zusoaba roogẽ.’ ”—Yɩɩl 122:1.
2 La b yaool n mikame tɩ yʋʋm nins sẽn nan looga pʋsẽ, tigims gĩn sul tigis-kãsems kẽerẽ, nebã sẽn wa arzũmã raar sõor pa kolg sẽn wa-b sibrã la hatã sõor ye. Woto rat n yeelame tɩ saam-biisã wʋsg konga tigis-kãsengã sõss sẽn tar Wẽnnaam gomdã tagsa sẽn tar yõod wʋsgo. B leb n konga tũud-n-taar sẽn be yamleoog ne b tẽed-n-taasã.
3 Ra bas-y tɩ y nug-tʋʋmdã gɩdg-y ye: Neb kẽer sẽn ka wat arzũma yaa b sẽn zoet b tʋʋma na n wa sãamã yĩnga. La Kaset rãmb wʋsg mikame tɩ b sã n deng pĩnd n kos b tʋʋmdã taoor soab sore, b sakdame tɩ b wa tigis-kãsengã. Saam-bi-poak sẽn yaa so-pakd tʋʋmd taoor soab sẽn yã t’a rɩka sard sẽn ka vigsd n na n kẽng a tigingã tigiss la tigis-kãsemsã fãa wã, kɩtame tɩ tʋʋmdã taoor soab rɩk raar tõr n zĩnd saam-bi-poakã tigis-kãsengẽ!
4 Y ka segd n tags tɩ y tʋʋmdã taoor soab ka na n sak n kõ-y sore, bɩ n tags tɩ y sã n kong tigis-kãsengã raar a yembre ka yell ye. Segl-y y meng ne y sũur fãa n tũnug ne Gʋlsg Sõamyã n wilg y tʋʋmdã taoor soab bũmb ning sẽn kɩt tɩ tigis-kãsengã kẽngr yaa bũmb sẽn tar yõod wʋsg y Wẽnnaamã baleng pʋgẽ. (Heb. 10:24, 25) Rẽ poor bɩ y tall bas-yard ne a Zeova kãabsã, n miẽ tɩ y sã n ning tẽebã yɛl pipi zĩigẽ y vɩɩmã pʋgẽ, na n sõng-y lame tɩ y paam bũmb ning fãa sẽn yaa tɩlae ne-y laogã wɛɛngẽ.—Mat. 6:33; Heb. 13:5, 6.
5 Bũmb ning sẽn be yõod n yɩɩdã yaa d sẽn na n ‘bãng bũmb nins sẽn yaa sõama n yɩɩdã.’ (Fil. 1:10, 11; Yɩɩl 27:4) Rẽ na n kɩtame tɩ d segl d mens n tõog n dɩ a Zeova segl-kãensã sẽn tar yõod wʋsgã nafa tɩ pidi. Sɩng-y yɛl takɩ maaneg n segend y meng masã, la y rɩk sard kãn-kãe tɩ yãmb na n zĩnda be rasem a tãabã fãa!