Yãmb mii y tigingã neb fãa yʋy bɩ?
1 Wẽnnaam a Zeova mii ãdsã fãa yʋya. (Yɩɩl 147:4) A Zezi Kirist me mii a karen-biisã fãa yʋya. (Zã 10:3, 14) Rẽ yĩnga yãmb mii y tigingã pʋgẽ saam-biisã fãa yʋy bɩ, bɩ yaa b nens bal la y miyã? Tõnd sã n wa lʋɩ taoor n sõsd ne saam-biisã tigisg wakate, d boond-b-la ne b yʋy bɩ, bɩ d boond-b lame tɩ saam-biis wall saam-bi-pogse? D sã n wa tall Biibl karen-biig bɩ ned a to n wilgd saam-biisã Rĩungã Roogẽ, rẽ yĩnga kẽer la d longd n basdẽ d sẽn pa mi b yʋy yĩng bɩ? Neb a wãn la tõnd pʋʋsd tigingã pʋgẽ n boond-b tɩ saam-biis bɩ saam-bi-pogse d sẽn pa mi b yʋy yĩnga?
2 Sõs-kãngã kõta sagls a wãn sẽn tõe n sõng tõnd tɩ d tẽegd d saam-biisã ne neb nins sẽn nan pa rɩk b mens n kõ a Zeova wã yʋya. Semen fãa modg-y n kẽnd tigissã pĩnda, la y yals bilf tigissã poore, sẽn na yɩl n sõs ne neb a taabã. Daar fãa, bao-y n bãng-y nin-yɛng bɩ neb a yiib yʋy y sẽn pa mi. Sã n tõe bɩ y gʋls a soabã yʋʋr sebr zugu. Y sã n ne yʋʋrã sẽn gʋlsã, sõngd-y lame tɩ y ra yĩm ye. Y tõe n wilga a soabã y yʋʋre, la y sok-a a yʋʋre, walla y kɩt tɩ saam-biig a to tẽeg-yã a yʋʋrã. Rẽ poore, bɩ y sɩng sõsg ne a soabã. Y sã n na n pʋʋs-a la y sõs ne-a, bɩ y boond a yʋʋrã. Modg-y n boond-yã ne a yʋʋrã la y bao n bãng-a sõma. Wala makre y tõe n sok-a-la a zak zĩiga, a sebrã zãmsg sẽn beẽ zĩig ninga, la bũmb a taaba. Y tõe n kelga koɛɛgã mooneg kibay a sẽn tare, la yãmb me togs y rẽnda.
3 Bɩ d fãa modg n bãng nin-paalsã yʋy la d modg n sõng-ba. Sẽn na yɩl n tõog n bãng nin-paalsã yʋy sõma, d segd n bʋʋg-b lame n yeel-b woto: “Maam la a zagla, la fo yʋʋr la bõe?” Rẽ poore, y sẽn bãng a yʋʋrã, y tõe n ket n sõsda ne-a tɩ kɩt t’a pa yɛɛsd a sẽn be nebã sʋk Rĩungã Roog pʋgẽ wã ye.
4 Baa d sẽn pa tõe n yɩ wa a Zeova ne a Zezi sẽn pa yĩmd ned yʋʋr abada sã n pa bãmb n datã, d tõe n bãnga d tigingã neb fãa yʋya. Woto na n kɩtame tɩ tigingã neb lebg wa zak a ye neb sẽn nong taaba.