Yaa neb a nii bal n põs sa-​kãsengã. La tarẽ-n-​tarẽ, nebã wa n lebga wʋsgo. Yaa yʋʋm kobs-​tã la pis-⁠nu la a yiib sa-​kãsengã loogr poor la a Abrahaam rog-​yã. Wẽnnaam pʋlm-⁠a lame t’a na n paama bi-​ribl sẽn boond t’a Izaake. D na n yãa Wẽnnaam sẽn sɩd pids a pʋlengã to-⁠to. A Izaak paama kamb a yiibu, a Ezayu ne a Zakoobe. Wẽnnaam da nonga a Zakoobe.

A Zakoob paama kom-​dibli 12, la kom-​pugli me. Kom-​dibli wã sʋka, bãmb piig n da pa nong b yao a Zozɛfe, tɩ kɩt tɩ b koos-⁠a t’a tɩ lebg yamb Ezipti. Kaoosg zugẽ, a Zozɛf lebga nin-​kãseng Ezipti. Kom n wa n zĩndi, t’a Zozɛf na n mak a kẽem dãmbã n ges b sã n toeema zʋgo. Tarẽ-n-​tarẽ, b wa n boonda a Zakoob zakã neb tɩ Israɛll neba. La yʋʋm kobs-⁠yi la pis-⁠wɛ a Abrahaam rogmã poore, b fãa yik n kẽnga Ezipti.

Israɛll nebã vɩɩmda Ezipt yʋʋm kobs-⁠yi la piig la a nu. A Zozɛf kũumã poore, b lebga yembse. Sẽn wa n beẽ-n-​beẽ, biig n dog tɩ b pʋd a yʋʋr t’a Moiizi. Yaa yẽ la Wẽnnaam wa n tʋm t’a tɩ yiis Israɛll nebã Ezipti. Kibay nins fãa sẽn be babg a yiib soabã pʋgẽ wã zĩnda yʋʋm kobs-​nii la pis-⁠nu la a yopoe pʋgẽ.

A NOWE ne a zaka rãmb yii koglgã pʋgẽ masã. Yãmb mii a Nowe sẽn maan bũmb ning pipi bɩ? A kõo Wẽnnaam kũuni. A kõo Wẽnnaam rũms n na n pʋʋs-a barka, a sẽn kɩt tɩ yẽ ne a zaka rãmb põsã yĩnga. Yaa rẽ la y sẽn ne fotã zugã.

La a Zeova sũur yɩɩ noog bɩ? N-ye. A pʋlma a Nowe t’a ka na n le sãam nebã ne sa-​kãseng ye.

Rẽ poor bilfu, tẽngã kʋɩɩme t’a Nowe ne a zaka rãmb tõe n le vɩɩmd a zugu, tɩ nin-​wẽns ka le beẽ ye. Wẽnnaam ninga a Nowe ne a zaka rãmb barka, la a yeel-b woto: ‘Rog-y kamb wʋsgo, tɩ nebã lebg wʋsg tẽngã gill zugu.’

La tõe tɩ nebã sã n wa bãng tɩ sa-​kãseng n da ni, b na n yɛɛsame n tẽed tɩ woto buud na n le wa zĩndi. Rẽ n kɩt tɩ Wẽnnaam maan bũmb sẽn na yɩl tɩ nebã tẽeg t’a pa na n le kɩt tɩ sa-​kãseng ni n sãam nebã ye. Yãmb mii a sẽn maan bũmb ning bɩ? A kɩtame tɩ saag gomtɩʋʋg puki.

Saag sã n ni n yoog tɩ wĩntoogã yi, saag gomtɩʋʋgã nong n pukdame. Saag gomtɩʋʋg tara kulɛɛr toor-​toore, tɩ yaa neere. Yãmb zoe n yãa saag gomtɩʋʋg bɩ? Yaa rẽ la sẽn be fotã zugã.

Wẽnnaam yeela a Nowe woto: ‘Mam pa na n le sãam nebã fãa la rũmsã ne sa-​kãseng ye. Mam na n ninga m saag gomtɩʋʋg sawatẽ wã. Saag gomtɩʋʋgã sã n puki, mam na n tẽegã kãabg ning m sẽn maanã.’

Yãmb sã n yã saag gomtɩʋʋgo, segd n tẽega yãmb bõe? A segd n tẽega yãmb tɩ Wẽnnaam kãabame t’a pa na n le sãam nebã ne koom ye.