YÃMB mii pag ning sẽn be fotã zugã bɩ? A yʋʋr la a Rebeka. Rao ning sẽn kẽnd n segd-⁠a wã yaa a Izaak. A na n lebga a Izaak paga. La sɩnga wãn-​wãna?

A Abrahaam da ratame t’a biig a Izaak paam pʋg-​sõngo. A ra pa rat t’a Izaak kẽ kãadem ne Kanaã bi-​pugl ye. Bala Kanaã nebã ra pʋʋsda ziri wẽnnaam dãmba. Rẽ n so t’a Abrahaam bool a tʋm-​tʋmdã n yeel-⁠a yaa: ‘Mam datame tɩ fo kẽng mam buudã neb nengẽ Harã n tɩ bao pag bãmb sʋk n wa kõ m biig a Izaake.’

Tao-​tao bala, a Abrahaam tʋm-​tʋmdã baoa yʋgma piig n na n tog sorã. Harã ra zãra wʋsg ne Kanaã. A sẽn wa n kolgd zĩig ning a Abrahaam buudã neb sẽn beẽ wã, a yalsa bulg noore. Ra yaa zaabre, tẽngã pagb sẽn nong n wat n wiid koomã bulgẽ wã sasa. A Abrahaam tʋm-​tʋmdã pʋʋsa a Zeova n yeel-⁠a yaa: ‘Bɩ f kɩt tɩ pʋg-​sad ning sẽn na n sak n wi koom n kõ maam ne m yʋgma wã yɩ fo sẽn yãk pag ning n na n kõ a Izaakã.’

A sẽn pʋʋsã poore, pa yã n kaoos la a Rebeka wa n na n wi koom ye. A Abrahaam tʋm-​tʋmdã sẽn bõos-⁠a koomã, a kõ-a lame, la a wi wʋsg n kõ yʋgma wã me. Ra pa tʋʋmd sẽn yaa nana-​nana ye, bala yʋgma wã yũuda koom wʋsgo.

A Rebeka sẽn kõ yʋgma wã koom n sa, a Abrahaam tʋm-​tʋmdã sok-⁠a-⁠la a ba wã yʋʋre, la a sok-⁠a n ges a sã n tõe n gãanda b zakẽ wã yʋngã. A leokame t’a ba wã yʋʋr la a Betuɛlle, la tɩ zĩig bee bãmb zakẽ wã t’a tõe n gãande. A Abrahaam tʋm-​tʋmdã ra miime t’a Betuɛll yaa a Abrahaam ba-​biig a Nahoor biiga. Rẽ n so t’a yĩgimd n pʋʋs a Zeova barka, bala a Zeova sõng-⁠a lame t’a ta a Abrahaam buudã neb nengẽ.

Yʋn-​kãng menga, a Abrahaam tʋm-​tʋmdã togsa a Betuɛll la a Rebeka kẽem a Labã tɩ yẽ waame n na n bao pag n kõ a Izaake. B sakame t’a Rebeka tũ tʋm-​tʋmdã n kẽng n tɩ lebg a Izaak paga. La a Rebeka yẽ sakame bɩ? N-⁠ye, a sakame n na n tũ n kuli. Vẽkembeoogã bala, a Rebeka ne tʋm-​tʋmdã zomba yʋgma n na n kẽng Kanaã.

B sẽn ta Kanaã wã tɩ yaa zaabre. A Rebeka yãa rao sẽn kẽnd n watẽ. Ra yaa a Izaake. A sẽn yã a Rebeka wã, a sũurã yɩɩ noogo. A yamã kẽ-a lame, t’a nong-⁠a wʋsgo. A Izaak ma a Saara sẽn ki tɩ yʋʋm a tã la woto, t’a sũurã ra sãam wʋsgo. La a sũurã lebga noog masã.

KOM-​DIBLI a yiibã sẽn be fotã zugã pa wõnd taab ye. Ka sɩda? Yãmb mii b yʋyã bɩ? Sẽn tãood-⁠a tãpã yʋʋr la a Ezayu, tɩ sẽn gãda pesgã yʋʋr yaa a Zakoobe.

A Ezayu ne a Zakoob yaa kinkirsi. Yaa a Izaak ne a Rebeka kamba. A Izaak nonga a Ezayu wʋsgo, bala a yaa tãoos sẽn mi a tʋʋmdã sõma, hal n wat ne nemd wʋsg tɩ zaka rãmb dɩtẽ. A Rebeka yẽ ra nonga a Zakoob n yɩɩda, bala a ra yaa bi-​sõng n pa fir-​fir soab ye.

A Ezayu ne a Zakoob yaab-​raoog a Abrahaam ra ket n vɩɩme. A Zakoob ra nong n kẽnda a nengẽ n kelgd-⁠a t’a gomd a Zeova yelle. A Abrahaam wa n kiime. A sẽn wa n kiidẽ wã t’a tara yʋʋm koabg la pis-​yopoe la a nu, tɩ kinkirsã tar yʋʋm 15.

A Ezayu sẽn wa n tar yʋʋm 40, a kẽe kãadem ne Kanaã kom-​pugli a yiibu. A Izaak ne a Rebeka sũur sãama wʋsgo, bala pʋg-​kãensã ra pa tũud a Zeova ye.

Raar a yembre, a Ezayu sũurã puuga wʋsg ne a yao a Zakoobe. B ba a Izaak ra rat n ninga a bi-​kãsengã barka. Sẽn yaa a Ezayu la kãsmã yĩnga, a ra tẽedame tɩ yẽ n na n paam barkã. La a ra zoe n dɩka a bi-​kãseng pʋɩɩrã n kõ a Zakoob n tek ne rɩɩbo. Sẽn paas me, a Ezayu ne a Zakoob sẽn wa n dogã, Wẽnnaam yeelame tɩ yaa a Zakoob n na n paam barkã. La sɩd yɩɩ woto. Yaa a Zakoob la a Izaak ning barkã.

A Ezayu sẽn wʋm dẽ wã, a sũurã puuga ne a Zakoob hal t’a rat n kʋ-⁠a. A Rebeka sẽn bãng t’a Ezayu rat n kʋʋ a Zakoobã, a yɛɛsame. A yeela a sɩd a Izaak woto: ‘A Zakoob me sã n kẽ kãadem ne Kanaã kom-​pugli wã, mam vɩɩmã ka le tar yõod ye.’

Rẽ poore, a Izaak boola a biig a Zakoob n yeel-⁠a yaa: ‘Ra kẽ kãadem ne Kanaã bi-​pugl ye. Kẽng Harã, f yaab-​raoog a Betuɛll nengẽ, n tɩ bao a biig a Labã bi-​pugl a ye n kẽ kãadem ne.’

A Zakoob saka a ba wã noore, n yik n na n tog so-​wok n kẽng a buudã neb nengẽ Harã.