YÃMB zoe n wʋma bõang sẽn gomd bɩ? Yaa vẽeneg tɩ y zɩ n wʋme, bala rũmsã pa gomd ye. La Biiblã wilgdame tɩ bõang a ye n gome. Bɩ d ges sẽn yɩ to-⁠to.

Israɛll nebã ra kolga Kanaã tẽngã n dat n kẽ. La Moaab rĩm a Balak ra zoeta Israɛll nebã, b sẽn yaa wʋsgã yĩnga. A kɩtame tɩ b bool sɩlem soab a ye sẽn boond t’a Balaam, t’a na n kãab Israɛll nebã wẽnga. A Balak yeela a Balaam t’a sã n tõoge, a na n kõ-a-⁠la ligd wʋsgo. A Balaam sɩd zomba a bõangã n na n kẽng a Balak nengẽ.

La a Zeova ra pa rat t’a Balaam kãab a nebã wẽng ye. Rẽ n so t’a tʋm malɛk ne sʋ-​wok t’a na n gɩd a Balaam sorã zugu. A Balaam ra pa ne malɛkã ye. La a bõangã yẽ ra ne-⁠a lame. Rẽ n so tɩ bõangã bao n na n lak n bas sorã, n wa mak n kong n gãand sorã zugu. A Balaam sũurã puugame t’a na n pãb bõangã ne rasaare.

A Zeova kɩtame tɩ bõangã gom ne a Balaam. A yeel-⁠a lame yaa: ‘Mam maana yãmb bõe tɩ yãmb pãbd maam woto?’

A Balaam leoka bõangã yaa: ‘Yaa fo sẽn lebg tõatã. M sã n da tar sʋʋga m kodgd-⁠f lame.’

Tɩ bõangã yeel yaa: ‘Mam zoe n maana yãmb woto sɩda?’

T’a Balaam leok tɩ ayo.

T’a Zeova na n yaool n kɩt t’a Balaam yã malɛkã sẽn yas sorã zug ne sʋʋga. Malɛkã yeela a Balaam yaa: ‘Bõe yĩng tɩ fo pãbd bõangã? Mam waame n na n gɩd foo tɩ f ra tɩ kãab Israɛll nebã wẽng ye. Fo bõangã sã n da pa lak n bas sorã, m da na n kʋ-⁠f lame la m bas bõangã.’

T’a Balaam yeel yaa: ‘Mam kongame. M da pa mi tɩ foo n yas sorã zug ye.’ Malɛkã basa a Balaam t’a looge. La a Balaam kẽnga a Balak nengẽ. A baas n makame n na n kãab Israɛll nebã wẽnga, la a Zeova kɩtame t’a ning Israɛll nebã bark naoor a tãab fãa.

A MOIIZ da rat n naaga Israɛll nebã n tɩ kẽ Kanaã tẽngã pʋgẽ. A yeela a Zeova woto: ‘Mam kotame tɩ f bas maam tɩ m kẽng n tɩ ges tẽn-​neer ning sẽn be Zʋrdẽ kʋɩlgã poorã.’ La a Zeova leok-⁠a lame yaa: ‘Ra le gom yel-​kãngã yell ne maam ye.’ Yãmb mii bũmb ning sẽn kɩt t’a Zeova yeel woto wã bɩ?

Tẽeg-⁠y t’a Moiiz ne a Aarõ pa yeel Israɛll nebã tɩ yaa a Zeova n kɩt tɩ koomã yi pĩigã pʋgẽ ye. B yeelame tɩ yaa bãmb n maane. Dẽnd b pa waoog a Zeova ye. Yaa rẽ yĩng la a Zeova sẽn yeel tɩ b pa na n kẽ Kanaã tẽngã.

A Aarõ kũumã kiis a wãn poore, a Zeova yeela a Moiiz yaa: ‘Peeg a Zozue n kẽng n tɩ yaas maan-​kʋʋd a Eleazaar la nebã taoore, n yeel-⁠b t’a Zozue n na n lʋɩ b taoor masã.’ Wala yãmb sẽn ne fotã zugã, a Moiiz kell n maana a Zeova sẽn yeel-⁠a bũmb ningã.

Rẽ poore, a Zeova yeela a Zozue yaa: ‘Nang pãnga, keng f sũuri. Tɩ bõe, yaa foo n na n tall Israɛll nebã n kẽ tẽng ninga mam sẽn da wẽen tɩ mam na n kõo bãmbã. La mam bee ne foom.’

Rẽ poore, a Zeova yeela a Moiiz t’a rʋ tãng ning sẽn be Moaab tẽngã pʋgẽ tɩ b boond tɩ Nebo wã zugu. A sẽn dʋ wã, a yãa Kanaã tẽngã sẽn yaa neer to-⁠to wã. A Zeova yeel-⁠a lame yaa: ‘Tẽng ningã mam sẽn da wẽen ne a Abrahaam ne a Izaak la a Zakoob tɩ m na n kõo b yagensã la woto. Mam kɩtame tɩ f yã-a, la f pa na n kẽ a pʋgẽ ye.’

A Moiiz kii Nebo tãngã zugu. Rẽ t’a ra tara yʋʋm koabg la pisi, la a ra ket n tara pãnga, t’a ninã me ket n ne sõma. A Moiiz kũumã sãama nebã sũy wʋsg tɩ b yãbe. La b sẽn paam t’a Zozue na n lʋɩ b taoorã yɩ-⁠b-⁠la noogo.