GES-Y Israɛll nebã sẽn dʋʋgd Zʋrdẽ kʋɩlgã tɩ yaa koɛɛnga! Yʋʋmdã sasa kãng yaool n yaa saas wakat tɩ kʋɩlgã ra pid ne koom. La ka wã, koomã fãa loogame tɩ yaa koɛɛng tɩ Israɛll nebã tũud be n loogdẽ, wa Mog-​miuugã pɩʋʋgr sasa wã. La koomã fãa kẽe yɛ? Bɩ d gese.

Israɛll nebã sẽn wa n na n dʋʋg Zʋrdẽ kʋɩlgã, a Zeova kɩtame t’a Zozue yeel nebã woto: ‘Maan-​kʋʋdbã na n talla kãabg koglgã n lʋɩ yãmb taoore. B sã n sagl b naoã Zʋrdẽ kʋɩlgã pʋgẽ, koomã na n yalsame.’

Maan-​kʋʋdbã rɩka kãabg koglgã n lʋɩ nebã taoore. B sẽn ta Zʋrdẽ kʋɩlgẽ wã, b kell n kẽe koomã pʋgẽ. Koomã ra zoeta wʋsgo, la b sẽn sagl b naoã koomã pʋgẽ wã bal la koomã sẽn sɩd yalse. Ad yaa yel-​solemde! A Zeova kɩtame tɩ koomã sẽn da zoet n watẽ wã kell n yalse. Rẽ poor bilf bala, kʋɩlgã lebga koɛɛnga.

Maan-​kʋʋdb nins sẽn da zãad kãabg koglgã tɩ yalsa kʋɩl-​koɛɛngã tẽn-​sʋka. Yãmb pa ne-⁠b fotã zug sɩda? B sẽn yals kʋɩlgã tẽn-​sʋkã, Israɛll nebã fãa tõog n pɩʋʋg n loogame.

Nebã fãa sẽn pɩʋʋg n sa wã, a Zeova kɩtame t’a Zozue yeel rap 12 woto: ‘Kẽ-y kʋɩlgã sʋk n yãk kug piig la a yiib zĩig ning maan-​kʋʋdbã sẽn yasã, n tall n tɩ rʋʋg zĩig ninga yãmb sẽn na n gãand rũnda yʋngã. Yãmb kambã sã n wa sok yãmb tɩ kug kãensã võor yaa bõe, bɩ y leok-⁠b yaa: “Wakat ning b sẽn tall a Zeova kãabg koglgã n na n tɩ rʋʋg Zʋrdẽ kʋɩlgã, koomã yalsame. Yaa kug kãensã n na n tẽeg yãmb yel-​solem-​kãngã yell wakat fãa.” ’ A Zozue me wʋka kug 12 n tɩ rʋʋg maan-​kʋʋdbã sẽn da yas zĩig ning kʋɩlgã pʋgẽ wã.

Rẽ poore, a Zozue yeela maan-​kʋʋdb nins sẽn da zãad kãabg koglgã tɩ b yi Zʋrdẽ kʋɩlgã pʋgẽ. B sẽn yi wã bal la koomã sẽn leb n sɩng zoeese.

BÕE n kɩt tɩ Zeriko lalsã lʋɩtẽ? Wõnda bõmb n lʋɩ b zutu. La wakat kãng tɩ bõmb la bug-​raad meng ka be ye. Dẽnd yaa a Zeova n maan yel-​solemd tɩ lalsã lʋɩtẽ. Bɩ d ges sẽn yɩ to-⁠to.

A Zeova yeela a Zozue yaa: ‘Bɩ foo ne f sodaasã gilg tẽngã vugr daar fãa, tɩ ta rasem a yoobe. Zã-y kãabg koglgã n gilg tẽngã. Bɩ maan-​kʋʋdb a yopoe tall bard a yopoe n lʋɩ kãabg koglgã taoor n peebdẽ.’

‘La rasem a yopoe daarã, bɩ y gilg tẽngã naoor a yopoe. Rẽ poor bɩ maan-​kʋʋdbã peeb bardã wʋsgo, tɩ ned kam fãa zẽk a koɛɛg n kaas wʋsgo, tɩ tẽngã lalsã na n lʋɩɩme.’

A Zozue ne Israɛll nebã maana wa a Zeova sẽn yeelã. Rasem a yoobã fãa b sẽn wa n gilgd tẽngã, ned baa a ye ra pa gomd ye. Ra yaa bardã peebg la kẽnã bʋʋr bal la b wʋmda. Wẽnnaam nebã bɛɛb sẽn da be Zeriko wã segd n yɛɛsame. Yãmb nee wĩ-miuugã sẽn yag fenetrẽ wã bɩ? Yaa ãnd roog fenetre? Yaa a Rahaab. A maana rap a yiibã sẽn yeel-⁠a t’a maanã. A zakã rãmb fãa bee ne-⁠a a roogã pʋgẽ n gũudẽ.

Rasem a yopoe daarã, b sẽn gilg tẽngã naoor a yopoe wã poore, b peeba bardã tɩ sodaasã kaas tɩ lalsã lʋɩ. A Zozue yeela sodaasã yaa: ‘Kʋ-⁠y tẽngã nebã fãa, la y yõog tẽngã la bũmb nins fãa sẽn be a pʋgẽ wã bugum. Tall-⁠y wanzuri wã ne sãnemã la zũudã ne kutã bal n wa a Zeova sɛk-​roogã pʋgẽ, tɩ b bĩng laogã bĩngr zĩigẽ.’

A Zozue yeela rap a yiibã sẽn da wa n ges Zeriko tẽngã tɩ b kẽng a Rahaab roogẽ wã n tɩ yiis yẽ ne a buudã fãa. A Rahaab ne a zakã rãmb põsame, wa rap a yiibã sẽn da pʋlm-⁠a wã.