KANAÃ tẽns wʋsg neb segla b mens n na n zab ne Israɛll nebã. B tẽedame tɩ b na n tõogame. La Gabaõ nebã sẽn da pẽ Israɛll nebã ra pa tẽed woto ye. B miime tɩ Wẽnnaam sõngda Israɛll nebã, la b pa rat n zab ne Wẽnnaam ye. Yãmb mii Gabaõ nebã sẽn maan bũmb ning bɩ?

B maana wa bãmb sẽn vɩ zĩig ningã zãra ne Israɛll nebã sẽn beẽ wã. Bãmb kẽer yeelga fu-​kʋda, la b wid neood-​zagse. B zɩlga b bõensã yol-​kʋda, la b zɩ bur sẽn kʋɩ n puki. B sẽn ta a Zozue nengẽ wã, b yeel-⁠a-⁠la woto: ‘Tõnd yii tẽn-​zãrgẽ n wa ka, bala tõnd wʋmame tɩ b gomd yãmb Wẽnnaam a Zeova sẽn tar pãng wʋsgã yelle. Tõnd wʋma a sẽn maan bũmb ning fãa n kõ yãmb Eziptã. Tõnd taoor dãmbã yeela tõnd tɩ d zã rɩɩb d kẽndã yĩng n wa yãmb nengẽ n wa yeel-⁠y yaa: “Tõnd na n yɩɩ yãmb tʋm-​tʋmdba. La masã, bɩ y pʋlem tɩ y pa na n zab ne tõnd ye.” Yãmb pa ne tõnd futã sẽn ki tɩ d burã kʋɩ n puk sɩda?’

A Zozue ne neb a taabã tẽe Gabaõ nebã. Rẽ n so tɩ b pʋlem tɩ b pa na n zab ne-⁠b ye. La rasem a tãab loogr poore, b bãngame tɩ Gabaõ nebã ra wẽneg n yaa bãmb yagse.

A Zozue sok-⁠b lame yaa: ‘Bõe yĩng tɩ yãmb belg tõnd tɩ yãmb yita zĩ-zãrgẽ?’

Gabaõ nebã leokame yaa: ‘Tõnd wʋmame tɩ yãmb Wẽnnaam a Zeova kãabame t’a n na n kõo yãmb Kanaã tẽngã fãa. Tõnd ra yɛɛsdame tɩ yãmb na n wa kʋʋ tõndo. Rẽ n kɩt tɩ tõnd maan woto.’ La Israɛll nebã kell n pidsa b pʋlengã n pa kʋ Gabaõ nebã ye. B kɩtame tɩ b lebg b tʋm-​tʋmdba.

La Zerizalɛm rĩmã sẽn wʋm tɩ Gabaõ nebã yõga zood ne Israɛll nebã, a sũurã puugame t’a yeel nanambs a naas tɩ b wa sõng-⁠a t’a zab ne Gabaõ nebã. Nanambs a nu wã sɩd naaga taab n na n wa zab ne Gabaõ nebã. Yaa Gabaõ nebã sẽn yõg zood ne Israɛll nebã n kɩt tɩ rĩm dãmbã yik n dat n zab ne-​bã. Rẽ yĩnga Gabaõ nebã sẽn maanã yaa bũmb sẽn zems bɩ? Bɩ d ges sẽn pʋgdã.

GES-⁠Y a Zozue. A gomda ne wĩndgã n yetẽ yaa: ‘Wĩndga, yalse!’ Wĩntoogã sɩd yalsa zug tẽn-​sʋk raarã tõre. Yaa a Zeova n maan woto. D ges bũmb ning sẽn kɩt t’a Zozue ra rat tɩ wĩntoogã yalsã.

Kanaã nanambs a nu wã sẽn wa n naag taab n na n zab ne Gabaõ nebã, Gabaõ nebã tʋma ned t’a tɩ yeel a Zozue yaa: ‘Wa-⁠y tao-​tao n wa fãag-⁠do. Nanambs nins sẽn be tãensã sʋkã tigma taab n dat n zab ne yãmb tʋm-​tʋmdbã.’

Tao-​tao bala, a Zozue ne a sodaasã fãa yikame n na n kẽnge. B kẽna yʋng tõre. B sẽn wa n ta Gabaõ wã, nanambs a nu wã sodaas yɛɛsame n sɩng zoeese. A Zeova kɩtame tɩ sapɩlem bɛd rʋʋg n pãb-⁠b hal tɩ b ki. Sapɩlmã sẽn kʋ neb ninsã yaa wʋsg n yɩɩd a Zozue sodaasã sẽn kʋ wã.

La a Zozue wa n yãame tɩ wĩntoogã rat n kẽeme. A sã n yaool n kẽ tɩ zĩigã sobge, nanambs a nu wã sodaas wʋsg na n paam n zoe n põsame. Yaa rẽ yĩng la a Zozue sẽn pʋʋs a Zeova la a yeel wĩntoogã t’a yalsã. Wĩntoogã sɩd yalsame, tɩ b paam n zab zabrã n tõoge.

Nanambs a taab me n be Kanaã tẽngẽ wã n kis Wẽnnaam nin-​buiidã. A Zozue ne a sodaasã rɩka yʋʋm a yoob n na n zab ne nanambs 31 n tõoge. Rẽ poore, a Zozue pʋɩya Kanaã tẽngã tɩ Israɛll buud nins sẽn da pa tar zĩisã paame.

Yʋʋm wʋsg loogr poore, a Zozue kiime. A ra tara yʋʋm koabg la piiga. Yẽ ne a zo-​rãmbã sẽn da ket n vɩ wã sasa, Israɛll nebã ra tũuda a Zeova noyã. La bãmb fãa sẽn wa n ki wã, nebã yikame n maand sẽn yaa wẽnga, tɩ zu-​loees paam-⁠ba. Rẽndame tɩ Wẽnnaam sõng-⁠ba.