YÃMB nee ãdgã sẽn yãgdã bɩ? Rap nins yãmb sẽn ne fotã zugã yita yaanga. Yaa neb sẽn get ãdsã n togsd yɛlã võore. B yãa ãdgã n pʋgda, n tẽed t’a na n tall-⁠b lame n kẽng nin-​kãseng nengẽ.

Rapã wa n taa Zerizalɛm n sok tɩ biig ning sẽn na n wa lebg Zʋɩf rãmbã rĩma bee yɛ? Yaa Israɛll nebã la b sẽn boond tɩ Zʋɩf rãmbã. Rapã leb n yeelame yaa: ‘Tõnd yãa biigã ãdgã tõnd sẽn wa n be yaangã, la tõnd waame n na n waoog-⁠a.’

A Herood sẽn yaa Zerizalɛm rĩmã sẽn wʋm dẽ wã, a sũurã sãamame. A ra pa rat tɩ ned a to lebg rĩm n deeg yẽ zĩigã ye. A boola maan-​kʋʋdbã kãsem dãmb n sok n ges biig ning sẽn na n wa lebg Zʋɩf rãmbã rĩmã sẽn segd n dog zĩig ninga. B yeel-⁠a lame tɩ Biiblã wilgame tɩ yaa Betlehɛm.

Rẽ poore, a Herood boola rap nins sẽn yi yaangã n yeel-⁠b yaa: ‘Bɩ y kẽng n tɩ bao biigã, la yãmb sã n yã-a bɩ y lebg n wa togs maam, tɩ mam me na n kẽng n tɩ waoog-⁠a lame.’ La a Herood yaool n da rat n bãnga biigã sẽn be zĩig ningã bal n tɩ kʋ-⁠a.

Rapã sẽn wa n yi Zerizalɛmmã, ãdg ning sẽn yãgdã ye pukame. Rapã pʋga ãdgã hal n tɩ ta Betlehɛm tɩ ãdgã tɩ yals biigã sẽn da be roog ning pʋgẽ wã zugu. Rapã sẽn kẽ roogẽ wã, b yãa a Maari ne a Zezi. B zãa kũun n wa kõ a Zezi. La rapã gũs n zãmsame, la zãmsdã pʋgẽ a Zeova yeel-⁠b lame tɩ b pa segd n lebg n kẽng a Herood nengẽ ye. Rẽ n so tɩ b tũ sor a to n leb bãmb tẽngẽ wã.

A Herood sẽn bãng tɩ rap nins sẽn yi yaangã lebg n kulame n pa tũ yẽ nengẽ wã, a sũurã puuga wʋsgo. A yeelame tɩ b tɩ kʋ kom-​dibli nins fãa sẽn be Betlehɛm n tar yʋʋm a yiib la sẽn ka ta woto wã. La a Zozɛf gãand n zãmsame, la zãmsdã pʋgẽ a Zeova yeel-⁠a lame t’a tall a pagã ne a biigã n zoe n kẽng Ezipti. A sɩd yika ne a zakã rãmb n kẽng be. Kaoosg poore, a Zozɛf sẽn wa n bãng t’a Herood kiime wã, a talla a Maari ne a Zezi n leb Nazarɛte. Yaa be la a Zezi bɩ-​yã.

Sã n yaa ne yãmba, ãnd n kɩt tɩ ãdgã puki? Tẽeg-⁠y tɩ rapã sẽn pʋg ãdgã, b reng n kẽnga Zerizalɛm. Yaa a Sʋɩtãan n da rat n kʋ Wẽnnaam biigã, la a ra miime tɩ Zerizalɛm rĩm a Herood me ra na n baoome n kʋ-⁠a. Rẽ n kɩt t’a maan tɩ ãdgã reng n kẽng Zerizalɛmmã. Dẽnd yaa a Sʋɩtãan n kɩt tɩ ãdgã pukã.

GES-⁠Y bi-​riblã sẽn gomd ne kãsembã! Yaa Zerizalɛm wẽnd-​doogã karen-​saam dãmba. Bi-​riblã yaa a Zezi. A tara yʋʋm 12 masã.

A Zezi sẽn da mi Wẽnnaam sõma la a mi bũmb nins sẽn gʋls Biiblã pʋgẽ sõma wã yɛɛsa karen-​saam dãmbã. La a Zozɛf ne a Maari yẽ bee yɛ? Bɩ d gese.

Yʋʋmd fãa, a Zozɛf tallda a zaka rãmb n kẽngd Zerizalɛm tɩ b tɩ maan Pakã. Nazarɛt ra zãra ne Zerizalɛm wʋsgo. Bãmb wakatẽ wã tɩ mobil ne tẽr ka be ye. Nebã wʋsg ra kẽndame, la b rɩkda sẽn na n ta rasem a tãab n yaool n ta Zerizalɛm.

A Zozɛf zakã rãmb lebga wʋsgo. A Zezi ra tara yap sẽn ket n yaa kɩds tɩ b segd n ges b yelle. Rõandã wã, a Zozɛf ne a Maari kẽnga Zerizalɛm ne b kambã n lebg n kuusẽ. A Zezi ra ka be ne-⁠b ye. La b ra tagsdame t’a bee ne neb a taabã sẽn da naag-⁠b n togd sorã. La zaabrã sẽn wa n ta tɩ b yals n na n vʋʋsã, b kell n pa nee a Zezi ye. B soka b roagdbã la b zo-​rãmbã, la bãmb me yeelame tɩ b pa yã-a ye. Dẽnd a Zozɛf ne a Maari leba Zerizalɛm n na n tɩ gẽes a Zezi.

B wa n baas n yã-a lame t’a zĩ ne karen-​saam dãmbã. A ra kelgda b goamã la a sokd-⁠b sogsg wʋsgo. A Zezi bãngrã yɛɛsa neb nins fãa sẽn da kelgd-⁠a wã. La a Maari sẽn ta wã, a yeela a Zezi yaa: ‘M biiga, yaa bõe tɩ fo maan tõnd woto? Gese, maam ne f ba wã ra baooda foo zĩig fãa.’

La a Zezi leokame yaa: ‘Yaa bõe tɩ yãmb da baood maam? Yãmb ka mi tɩ mam segd n zĩnda m Ba roogẽ la?’

Vẽenega, a Zezi ra nong n bee zĩig ning a sẽn tõe n zãms n bãng Wẽnnaamã. Tõnd me segd n maana woto. A Zezi sẽn da be Nazarɛtã, rasem a yopoe fãa, a ra kẽnda zĩig ning nebã sẽn da tigimd taab n pʋʋsd a Zeova wã. A sẽn da kelgd neer wakat fãa wã yĩnga, a bãnga bũmb wʋsg Biiblã pʋgẽ. D rɩk a togs-⁠n-​taare.