Bõe n kɩt tɩ d moond koɛɛgã?
1. Yaa ãnd dãmb nonglem yĩng n kɩt tɩ d moond koɛɛgã?
1 Wẽnnaam Rĩungã koe-noogã mooneg n yaa tʋʋmd ning sẽn tar yõod n yɩɩd rũndã-rũndã. Sɩd me, ne tʋʋm kãngã maasem, d wilgdame tɩ d sakda no-kãsems a yiib nins a Zeova sẽn kõ-dã. A yeelame tɩ d nong yẽ a Zeova la d nong d taabã. (Mark 12:29-31) Nonglmã kɩtame tɩ d moond koɛɛgã ne yẽesem.—1 Zã 5:3.
2. Wãn to la d sẽn moond koɛɛgã wilgd tɩ d nonga Wẽnnaam?
2 D sẽn nong a Zeova wã: Yaa d sẽn nong a Zeova sẽn yaa d zoa wã yĩng la d sẽn moond koɛɛgã tɩ wilgdẽ tɩ d be a poorẽ. Na maan yʋʋm 6000 masã, a Sʋɩtãan sãama a Zeova yʋʋrã. (2 Kor. 4:3, 4) A kɩtame tɩ neb tagsdẽ t’a Zeova namsda yel-wẽn-maandbã bugum sẽn pa kiid pʋgẽ, t’a tara mens a tãab tɩ d pa tol n tõe n bãng-a sõma, la tɩ ninsaalbã yell pa pak-a ye. A Sʋɩtãan pʋd n tõogame tɩ wʋsg tẽed tɩ Wẽnd kae ye. Woto fãa kɩtame tɩ d rat ne d sũy fãa tɩ nebã bãng d saasẽ Ba a Zeova sẽn sɩd yaa Wẽnnaam ning buudã. D sẽn modgd n kõt kasetã n wilgdẽ tɩ d bee Wẽnnaam poorẽ wã noom-a lame, la puugd a Sʋɩtãan sũuri.—Yel. 27:11; Heb. 13:15, 16.
3. Bõe yĩng tɩ d tõe n yeel tɩ d sẽn moond koɛɛgã wilgdame tɩ d nonga d taabã?
3 “D sẽn nong d taabã yĩnga”: D sã n taas ned koɛɛgã, d wilga a soab tɩ d nong-a lame. Rũndã-rũndã vɩɩmã sẽn yaa toogã kɩtame tɩ nebã rat koe-noog n kelge. Neb wʋsg yaa wa Niniiv nebã sẽn da yaa to-to a Zonas wakatã. ‘B ka mi b nens’ ye. (Zonas 4:11) D sẽn moond koɛɛgã sõngda nebã tɩ b bãngd b sẽn tõe n maan to-to tɩ b vɩɩmã tall barka, la b paam sũ-noogo. (Ezai 48:17-19) Koe-moonegã kɩtame me tɩ nebã tõe n tẽ tɩ manegr n wate. (Rom 15:4) B sã n kelg la b tũ, b “na n paama fãagre.”—Rom 10:13, 14.
4. Bõe la a Zeova pa na n yĩmi?
4 Bi-sõng pa wilgd a roagdbã wakat-wakat bal t’a nong-b lame ye, yaa wakat fãa. Tõnd me sẽn nong Wẽnnaam la d taabã ne d sũur fãa wã segd n kɩtame tɩ d sẽn paam segb fãa, bɩ d kõ kasetã. D pa segd n tek zak-zak moonegã bal ye. D na n moonda wakat fãa. (Tʋʋ. 5:42) A Zeova pa na n yĩm d sẽn maand woto n wilgdẽ tɩ d nong-a lame wã ye.—Heb. 6:10.