Sak a 1

Koees sẽn yit saasẽ

BIIBLÃ tõr sɩd yaa koɛɛg sẽn yit saasẽ. Yaa tõnd saasẽ Ba wã n kõ-a tõnd d zãmsg yĩnga. La sẽn zems yʋʋm 2 000 la woto, koees a yiib sẽn ka wõnd a taab la malɛk taas-yã. Malɛg-kãng ‘sẽn be Wẽnnaam taoorã’ yʋʋr la a Gabriyɛlle. Bɩ d bao n bãng bũmb ning sẽn kɩt t’a wa tẽng zug naoor a yiibã.

Ra yaa yʋʋmd a 3 soab sẽn deng Kirist zãmaanã. A Zeova maan-kʋʋd yʋʋr sẽn boond t’a Zakari yir da bee Zide tãensẽ wã. Zĩ-kãng ra ka zãr wʋsg ne Zerizalɛm ye. Yẽ ne a pag a Elizabɛt ra kʋʋlame. La b ka paam dogem ye. Wakat ra taame t’a Zakari ra segd n tɩ maan a maan-kʋʋd tʋʋmdã Zerizalɛm wẽnd-doogẽ wã. Zĩig pʋgẽ, a yãa a Gabriyɛll sẽn puk wisda yõogr tẽn-kugr dɩtgo.

A Zakari pɛleng yɩkame. La a Gabriyɛll kenga a pɛlg n yeel-a: “Zakari, da zoe rabeem ye, tɩ bõe, Wẽnnaam leoka fo pʋʋsgo. Fo pag a Elizabɛt na n doga biribla, la bɩ f pʋd a yʋʋr t’a Zã.” A Gabriyɛll paasame t’a Zã “na n yɩɩ Zusoabã nin-kãsenga” la t’a na n “segla nin-buiid a Zeova yĩnga.”—NW.

La a Zakari sẽn ges yẽ ne a pagã sẽn da kʋʋl to-to wã, a ra ka tẽed tɩ b le tõe n paama biig ye. Rẽ n so t’a Gabriyɛll togs-a woto: “Gese, fo na n lebga muka, n ka le tõog n gom hal tɩ ta daar ninga bõn-kãens sẽn na n pidsã, fo sẽn ka tẽ mam goamã yĩnga.”

Wakat kãnga, neba sẽn be yɩngã ra sɩngame n sokd b mens bũmb ning sẽn kɩt t’a Zakari kaoos wẽnd-doogã pʋgẽ wʋsg woto wã. La a sẽn wa n yi wã, a ra ka le tõe n gom ye, n maand bilsg ne a nus bala. Rẽ, neba bãngame t’a yãa yel-solemde.

Rẽ poore, a Zakari tʋʋmdã wẽnd-doogẽ wã wakat saame t’a kuili. La a yirã kuilb poor bilf bala, a Elizabɛt sɩd rɩka pʋga. Kiis a nu, a Elizabɛt kell n paa zakẽ wã n ka yit ye, n gũud a biigã rogem.

Kaoosg zugẽ, a Gabriyɛll leb n pukame. La ãnd soab la a gom ne? Yɩɩ pa-kul yʋʋr sẽn boond t’a Maari, sẽn yit Nazarɛt tẽngẽ wã. So-kãngã yaa koe-bʋg la a taas-yã? Kelg-y-yã! “Wẽnnaam bark bee ne foom, la gese, fo na n dɩka pʋg n dog biribla, n pʋd a yʋʋr t’a Zezi,” woto la a Gabriyɛll togs a Maari. La a paase: “A na n yɩɩ nin-kãsenga, la b na n boond-a lame tɩ Sẽn-ka-to biiga. . . . [Yẽ na n dɩɩ naam a Zakoob zakẽ daar fãa, la a Rĩungã] ka na n sɛ abada.”

D tõe n kɩsa sɩd t’a Gabriyɛll sũur yɩɩ noog a sẽn paam tɩ yaa yẽ n taas koe-kãensa wã. D na n karma yɛl sẽn tɩ loe ne a Zã la a Zezi n paase. La d karengã pʋgẽ, d na n bãnga bũmb ning sẽn kɩt tɩ koe-kãensã sẽn yi saasẽ wã tar yõod wʋsg woto wã. 2 Tɩmote 3:16; Luk 1:5-33.

▪ Koe-bʋs a yiib sẽn tar yõod wʋsg n yi saasẽ n wa?

▪ Ãnda n taas koeesã, la ãnd dãmb la b taas-ba?

▪ Bõe yĩng tɩ koe-kãensa tẽeb yaa toogo?

Sak a 2

B waoog-a lame t’a nan ka rog ye

MALƐK a Gabriyɛll rag n togsa a Maari t’a na n doga biribl sẽn na n lebg Rĩm wakat fãa yĩnga. Rẽ poore a Maari sok-a lame: “Bõn-kãng na n yɩɩ wãn n zĩnd tɩ mam nan ka mi raoa?”

A Gabriyɛll togsa a Maari woto: “[vʋʋsem sõng] na n waa fo zugu, la Sẽn-ka-to pãng na n buii foom. Woto yĩnga, bi-sõng ninga fo sẽn na n dogã, b na n boonda yẽ tɩ Wẽnnaam Biiga.”

Sẽn na yɩl t’a Maari tõog n tẽ a koɛɛgã a Gabriyɛll yeelame: “Gese, fo kẽema a Elizabɛt me rɩka pʋg a kʋʋlem wakate, la a na n doga biribla. B ra yetame t’a yaa kiiri la a tara kiis a yoob pʋg masã. Tɩ bõe, bũmb ka be Wẽnnaam sẽn ka tõe ye.”

A Maari tẽe a Gabriyɛll gomdã. La a leoka a Gabriyɛll tɩ bõe? Ad a sẽn yeele: “Mam yaa Zusoaba tʋm-tʋmd poaka. Bɩ y kɩt t’a yɩ woto ne maam wa yãmb sẽn yeelã.”

A Gabriyɛll sẽn looge, pa kaoos la a Maari segl a meng n na n tɩ ges a Elizabɛt ye. A Elizabɛt ne a sɩd a Zakari yir da bee Zide tãensẽ wã. Nazarɛte, a Maari sẽn beẽ wã ne zĩ-kãng ra yaa rasem a tãab bɩ a naas kẽnde.

A Maari sẽn ta a Zakari zakẽ wã, a kẽeme, n pʋʋs nebã. Dẽ, vʋʋsem sõng pida a Elizabɛt t’a yeel a Maari: “Wẽnnaam ninga fo zug bark pagba fãa sʋka. La fo biiga yaa bark biiga. A yɩɩ wãn tɩ m Zusoaba ma wa wat m nengẽ? Tɩ bõe, gese, mam sẽn wʋm fo pʋʋsgã, biiga sẽn be mam pʋgẽ wã lebgame sũ-noog yĩnga.”

A Maari sẽn wʋm dẽ, a talla mi-beoog n yeel woto: “Mam pẽgda Zusoaba ne m sũur fãa. La mam sɩɩgã paama sũ-noogo Wẽnnaam mam fãagda yĩnga, bãmba sẽn ges b tʋm-tʋmd poakã a talemd pʋgẽ wã yĩnga. Tɩ bõe, sẽn sɩng masã, zãmaan fãa neba na n yeelame tɩ bark bee mam zugu. Tɩ bõe, Wẽnnaam Sẽn-tõe-yã fãa maana bõn-kãsems mam yĩnga.” Baa ne a sẽn paam zu-no-kãngã wã, a Maari rɩka waoogrã fãa n kõ Wẽnnaam, n yeele: “Bãmb yʋʋr yaa sõngo, la bãmb zoeta neb nins sẽn zoet bãmbã nimbãaneg wakat fãa.”

A Maari kell n talla Wẽnnaam pẽgre, ne yɩɩll sẽn yaa bãngr-gomd vʋʋsem sõng sẽn vẽnege, n yeel woto: “Bãmb wilga b pãng ne b kanga, la bãmb sãeega tɩtaam dãmbã. Bãmb luba rĩm dãmba la b zẽka nin-talse. Bãmb kɩtame tɩ kom sẽn tar-b rãmba tɩg ne bõn-noodo. La bãmb kɩtame tɩ arzɛgs rãmba loog zaalem. Bãmb sõnga Israɛll nebã sẽn yaa b tʋm-tʋmdbã. Bãmb tẽega a Abrahaam ne a yagensã yell wakat fãa n maan-b neer wa b sẽn da yeel tõnd yaab rãmbã.”

A Maari zĩnda ne a Elizabɛt sẽn zems kiis a tãabo. La yaa vẽeneg t’a Elizabɛt rogmã sẽn da kolgã yĩngã, a Maari sẽn zĩnd ne-a wã sɩd sõng-a-la wʋsgo. Pʋg-kãensã b yiibã sẽn yaa wẽn-zoɛtbã ra tʋta ne Wẽnnaam sõngre. Rẽnd sɩd yɩɩ sõma, b sẽn tõog n zĩnd ne taab sasa kãngã sẽn yɩ bark wakat b vɩɩmã pʋgẽ wã!

Yãmb yãa b sẽn waoog a Zezi to-to t’a nan pa rog mengã bɩ? A Elizabɛt bool-a lame tɩ “m Zusoaba,” tɩ biigã sẽn da be a pʋgẽ wã lebg ne sũ-noog a Maari sẽn da wa n wa be pipi wã. La wa d sẽn na n yã taoorã, neb a taab pa waoog a Maari ne biigã a sẽn na n dogã ye. Luk 1:26-56.

▪ Bõe la a Gabriyɛll togs a Maari sẽn na yɩl t’a tõog n bãng a sẽn na n dɩk pʋgã to-to?

▪ Wãn-wãn la b waoog a Zezi t’a nan ka roge?

▪ Yɩɩn-bʋg sẽn yaa bãngr-gomd la a Maari yɩɩl n pẽg Wẽnnaam?

▪ Wakat a wãn la a Maari zĩnd ne a Elizabɛte, la bõe yĩng tɩ ra zems t’a Maari zĩnd ne a Elizabɛt wakat kãnga?