Sak a 5

A Zezi rogmã yɩɩ zĩ-bʋgo, la wakat bʋgo?

ROM soolem naab a Sezaar Ogust yiisa noor tɩ ned kam fãa segd n leba tẽng ning a sẽn dogẽ n tɩ gʋls a yʋʋr sõadg yĩnga. Dẽ a Zozɛf kẽnga Betlehɛm, sẽn yaa tẽng ning a sẽn dogẽ wã.

Neb wʋsg waa Betlehɛm n na n kɩt tɩ b gʋls b yʋya. Yaa rũm-doog pʋgẽ bal la a Zozɛf ne a Maari tɩ paam n na n gãande. Yaa zĩ-kãngã b sẽn kẽesdẽ bõens la rũms a taabã la a Zezi rog-yã. A Maari vila a Zezi ne pɛɛl n gãneg-a rũms rɩɩb koglgẽ.

Sɩda, yaa Wẽnnaam n kɩt t’a Sezaar Ogust yiis noor tɩ b sõd nebã. Rẽ kɩtame t’a Zezi tõog n dog Betlehɛm. Biiblã ra reng n togsa hal daar zãr tɩ naab ning b sẽn kãab t’a na n waame wã ra segd n doga tẽn-kãnga.

Ad yʋʋn-kãngã sɩd yɩɩ yʋng sẽn ka wõnd a taaba! Pe-kɩɩmb n da be weoogẽ n gũud rũmsi, tɩ vẽenem sẽn pɩnd yãg be n bui-ba. Ra ya a Zeova ziiri! A Zeova malɛkã togs-b-la woto: “Da zoe-y rabeem ye, mam togsda yãmb koe-noogo sẽn na n wa ne sũ-noog wʋsg neba fãa yĩnga. Ade, yãmb Fãagdã sẽn yaa Zusoaba sẽn yaa Kirist doga yãmb yĩng rũnda a Davɩɩd tẽnga pʋgẽ. Ad ne bãnd ninga yãmb sẽn na n bãng bãmba. Yãmb na n yãa biiga sẽn vil ne peende n gãe rũms rɩɩb koglgẽ.” Zĩig pʋgẽ malɛgs wʋsg a taab n puk n sɩng n yɩɩndẽ: “Pẽgre, Wẽnnaam sẽn be [saasẽ]. Laafɩ bee dũniyã zug neb nins sẽn sak bãmba sʋka.”

Malɛgsã loogr poore, rũm-kɩɩmbã yeela taaba: “Wa-y tɩ d kẽng Betlehɛm n tɩ ges bũmb ninga sẽn maan tɩ Zusoaba wilg tõndã.” Dẽ b kẽnga tao-tao n tɩ yã a Zezi zĩig ning malɛkã sẽn da wilg tɩ b na n yã-a lame wã. Pe-kɩɩmbã togsa malɛkã sẽn da yeel-b bũmb ningã. Woto linga neb nins fãa sẽn wʋm kɩbarã. A Maari ra bĩngda gom-kãensã fãa a sũurẽ la a tagsd b yell wʋsgo.

Rũndã-rũndã neb wʋsg tagsdame t’a Zezi roga yʋʋm-sar kiuug rasem 25. Betlehɛm, yʋʋm-sar kiuugã yaa waood la saag wakate. Yʋʋmdã wakat kãnga, rũm-kɩɩmbã ra ka na n sakẽ n gãand yɩng yʋng ne b rũmsã ye. Sẽn paase, waoodã sẽn da wa n be a piig la a yiibã zugã, Rom naabã ra ka na n saag n kɩt tɩ nin-buiidã tog sor ye, tɩ bõe, nin-buiidã ra zoe n dat n tõdg-a lame. Wõnda a Zezi rogmã ra yaa bõn-bɩʋʋng bɩ zĩ-likr kiuugã pʋgẽ. Luk 2:1-20; Miise 5:1.

▪ Bõe yĩng t’a Zozɛf ne a Maari kẽng Betlehɛm?

▪ Yel-kãsems bʋs n maan a Zezi rogmã daar yʋngo?

▪ Wãn to la d mi t’a Zezi ka rog yʋʋm-sar kiuug rasem 25?

Sak a 6

Biig b sẽn kãab t’a na n waame

A ZOZƐF ne a Maari pa leb Nazarɛt ye, b paa Betlehɛm. La wala Wẽnnaam Tõogã sẽn kõ noor tɩ b maanã, a Zezi rog tɩ rab-niinẽ b kẽes-a-la bãongo. La sẽn paas me, wõnda biribl rogem rasem a nii, b segd n pʋd-a-la yʋʋre. Dẽ, wala malɛk a Gabriyɛll sẽn wilgã, b pʋda b biigã yʋʋr t’a Zezi.

A Zezi rogmã rasem 40 la woto. Yɛ la a roagdbã tall-a n kẽnge? Zerizalɛm wẽnd-doogẽ wã. Zerizalɛm ne bãmb sẽn da beẽ wã ka zãr ne taab ye. Tõogã Wẽnnaam sẽn kõ a Moiizã ra yetame tɩ biribl rogem rasem 40 poore, a ma wã segd n tɩ maana maoong a meng yɩlgr yĩnga.

Yaa woto la a Maari maan-yã. Yaa wal a yiib la a tall n tɩ maan maoongã. Woto wilgdame t’a Zozɛf ne a Maari ra yaa naong rãmba. Tɩ bõe, a Moiiz Tõogã ra yetame tɩ yaa pe-raoog sẽn yaa poll la b segd n dɩk n maan maoongã. La pe-raoog ligd yɩɩda wall ligd zĩig sẽn zãre. La biigã ma wã sã n da ka tõe rẽ, wal bɩ marwal bõoneg a yiib bal da sekame.

Wẽnd-doogẽ wã, nin-kẽem n kolg n deeg a Zezi. A yʋʋr la a Sɩmeõ. Wẽnnaam da reng n togs-a lame t’a na n yãa Kiristã bɩ Mesi wã b sẽn kãab t’a na n waame wã n yaool n ki. Baraare, a Sɩmeõ sẽn wa wẽnd-doogẽ wã, vʋʋsem sõngã kɩtame t’a tees a Zozɛf ne a Maari sẽn da zãad biigã nengẽ.

A Sɩmeõ reega a Zezi, n pʋʋs Wẽnnaam barka, n yeele: “Masã, Zusoaba, yãmb basa y tʋm-tʋmdã t’a loog ne laafɩ wa yãmb sẽn da yeelã. Tɩ bõe, mam nin yãa yãmb fãagre, fãagr ning yãmb sẽn dag n segl neba fãa yĩngã. Yaa vẽenem sẽn vẽnegd bu-zẽmse, la a yaa yãmb Israɛll neba ziiri.”

A Maari ne a Zozɛf sẽn wʋm dẽ wã, ling-b lame. Rẽ poore, a Sɩmeõ ning-b-la barka, la a yeel a Maari t’a biriblã “waa Israɛll neb wʋsg lʋɩɩse la b yikr yĩnga.” A leb n paasame tɩ sũ-sãang na n paama a Maari wala sʋʋg sẽn dɩt sẽn na n kõs ned sũuri.

No-rɛɛs poak sẽn tar yʋʋm 84, tɩ b boond-a t’a Ann me n da be be. Yẽ zɩ n vaal wẽnd-doogẽ wã ye. Wakat kãng bala yẽ me kolgame n sɩng n pʋʋsd Wẽnnaam bark la a gomd ne neb a taabã a Zezi yelle.

Ad yel-kãensã sẽn maan wẽnd-doogẽ wã sɩd nooga a Zozɛf ne a Maari sũyã! Sãmbg kae tɩ woto fãa wilgdame tɩ bi-kãngã sɩd ya a Soab ning Wẽnnaam sẽn kãab t’a na n waame wã ye. Luk 2:21-38; Maankʋʋre 12:1-8.

▪ Israɛlle biribl sã n doge, wakat bʋg la b ra minim n pʋt a yʋʋre?

▪ Israɛll poak sã n da rog biribla, rasem 40 poore bõe la a ra segd n maane, la wãn-wãn la a Maari sẽn maan bõn-kãng to-to wã wilgd a tarmã sẽn yaa to-to?

▪ Wẽnd-doogẽ wã, ãnda rãmb n bãng a Zezi sẽn yaa ned ninga, la wãn-wãn la b wilg rẽ?