Sak 106

A rɩka makr a yiib ne viyn pʋʋg n puk b bãongo

A ZEZI ra bee wẽnd-doogẽ wã. Tũudmã taoor dãmb ra nan kosa a Zezi t’a togs-b ned ning sẽn kõ-a noor t’a maand yɛlã, t’a Zezi gom n lub-ba. B yamã ra nan ka yuus n sa t’a Zezi sok-ba: “Yãmb tagsg yaa bõe?” Rẽ poore, a rɩka makr n wilg b sẽn yaa neb nins buudu.

A Zezi yeelame: “Dao a yembre n dag n tar a kamb a yiibu. La yẽ goma ne pipi soabã, n yeel t’a kẽng n tɩ tʋm a pʋʋgẽ. La yẽ leokame: M ka na n kẽng ye. La a yam yaool n tekame t’a kẽnge. La yẽ goma ne yiib soabã n yeel yẽnda me woto. La bi kãng leokame: M ba, mam na n kẽngame. La a yaool n ka kẽng ye.” Dẽ a Zezi sok-b lame: “Bãmb b yiiba sʋka, bʋg n maan a ba raabo?”

T’a kɩɩsdbã leok tɩ “yaa pipi soabã.”

Dẽ a Zezi wilgame: “Mam yeta yãmb sɩda tɩ yõor yaood dɛɛgdba ne pʋg-yoaadba na n denga yãmb n kẽ Wẽnnaam [Rĩungã] pʋgẽ.” Sɩda, sɩngrẽ wã yõor yaood dɛɛsdbã la pʋg-yoaadba ra zãgsame tɩ b kõn yɩ Wẽnnaam sõgen dãmb ye. La wala pipi biigã, b wa n teka yam n kos sugr n lebg a sõgen dãmba. La tũudmã taoor dãmb ka maan woto ye. Wala biig a yiib-n-soabã b yetame tɩ b tũuda Wẽnnaam, la, wa a Zezi sẽn togsã: “[Lisd] a Zã waa ne tɩrlem yãmb nengẽ, la yãmb ka tẽ yẽ ye. La yõor yaood dɛɛgdba ne pʋg-yoaadba tẽe yẽnda, la yãmb sẽn yã bõn-kãnga, yãmb yam ka tek tɩ yãmb tẽ yẽ ye.”

Rẽ poore a Zezi wilgame tɩ tũudum taoor dãmb kãensã kongrã pa b sẽn ka tũ Wẽnnaamã bal ye. Ayo, bãmb mensã n pʋd n yaa nin-wẽnse. A Zezi yeelame: “Yir soab a yembre n dag n sel a viyn pʋʋgo, n wẽ yãgr n gũbg-a la a maan vẽ wẽkr koglg a pʋgẽ la a me gãsgo. Dẽ, yẽ bas-a-la ne viyn gũudba tɩ b gũ, la yẽ yi n tog sore. La bõn-bɩʋʋng sẽn ta, yẽ tʋma tʋm-tʋmdb viyn gũudba nengẽ tɩ b tɩ reeg viyn biisi. La viyn gũudba yõka yẽ tʋm-tʋmdba n pãb a yembre n kʋ a yembre n lob a tãab soaba ne kuga. La yẽ leb n tʋma tʋm-tʋmdb a taaba sõor sẽn yɩɩd pĩnd dãmbã. La viyn gũudba maana bãmb me woto.”

‘Tʋm-tʋmdbã’ yaa no-rɛɛsdbã, ‘yir soabã’ sẽn yaa Wẽnnaam a Zeova wã sẽn tʋm a ‘viyn pʋʋgã gũudb’ nengẽ wã. Gũudb kãens yaa Israɛll buudã taoor dãmba. Biiblã pʋgẽ b bilga buudã wa Wẽnnaam ‘viyn pʋʋgo.’

Sẽn mik tɩ “gũudba” namsa ‘tʋm-tʋmdbã,’ la b kʋ-bã, a Zezi wilgame: “La [viyn pʋʋgã soab] yaool n tʋma yẽ biribl bãmb nengẽ n yeele: Bãmb na n waooga mam biiga. La viyn gũudba sẽn yã biigã, b yẽsa ne taab woto: Yaa yõ wã n na n soog a ba wã paoonga fãa. Wa-y tɩ d kʋ-a tɩ paoonga lebg tõnd dẽnda. La bãmb yõka yẽnda n yiis pʋʋgẽ wã n kʋ.”

Masã a Zezi goma ne tũudmã taoor dãmb n sok-b woto: “Viyn soaba sã n wa, a na n maana viyn gũudb kãens bõe?”

Tɩ tũudmã taoor dãmb leoke: “Yẽ na n sãama nin-wẽns kãens ne sãoong sẽn yaa toogo, la a rɩk viyn pʋʋgã n kõ viyn gũudb a taaba sẽn na n kõ yẽ viyn biis bõn-bɩʋʋng wakate.”

B kaoo b mens bʋʋd n ka bãng ye, bala bãmb naaga sẽn ‘gũud-b’ a Zeova ‘viyn pʋʋgã’ sẽn yaa Israɛll buudã. Biis nins a Zeova sẽn da baood tɩ gũudbã kõ wã yaa b tẽ a Biriblã, sẽn yaa Mesi hakɩkã. B sẽn ka tõog n maan dẽ wã, a Zezi keoog-b lame: “Yãmb nan ka karem Gʋlsg Sõamyã sẽn yeta la? [Yɩɩl Sõamyã 118:22, 23 pʋgẽ], ‘Kugr ninga tãn-metba sẽn zãgsã, yẽ n lebg rooga pãng kugri. Yaa Zusoaba n kɩt t’a lebg woto, la a yaa bõn-kãseng tõnd nifẽ.’ Yaa woto yĩnga mam yeta yãmba, tɩ b na n deega Wẽnnaam [Rĩungã] yãmb nengẽ n kõ buud ninga sẽn na n maan tʋʋm sẽn zemse. Ned ninga sẽn na n lʋɩ kug kãng zugu, a na n pogla yẽnda, la kug kãng sẽn na n lʋɩ ned ninga zugu, a na n bedsa yẽnda.”

Gʋlsdbã la maan-kʋʋdbã kãsem dãmb bãngame masã t’a Zezi ra gomda bãmb yelle. Dẽ, b ra rat n kʋ-a lame, sẽn yaa yẽ n tog n ‘soog a ba wã paoonga fãa’ wã yĩnga. Dẽnd b na n deega zu-noog ning Israɛll buudã sẽn da tar n tõe n dɩ naam Wẽnnaam Rĩungã pʋgẽ wã n kõ ‘viyn gũudb’ bu-paalga. Bu-kãng na n woma bi-sõma.

Tũudmã taoor dãmb ra zoeta kʋʋngã, sẽn da get t’a Zezi yaa no-rɛɛsã. Rẽ n so tɩ b ka mak n na n kʋ-a so-kãngã wã. Matɩe 21:28-46; Mark 12:1-12; Luk 20:9-19; Ezai 5:1-7.

▪ Kamb a yiibã a Zezi pipi makrã pʋgẽ makda ãnd rãmba?

▪ Makr a yiib soabã pʋgẽ, ãnda la ‘yira soaba,’ ‘viyn pʋʋgã,’ ‘gũudbã,’ ‘tʋm-tʋmdbã,’ la sẽn na n ‘soog-a a ba wã paoonga fãa?’

▪ ‘Viyn pʋʋgã gũudb’ baasg na n yɩɩ wãn-wãna, la ãnd dãmb n na n ledg-ba?

Sak 107

Kãadem kibs kɩbare

A ZEZI togsa kɩbay a yiib n puk gʋlsdbã la maan-kʋʋdba kãsem dãmb bãongo, tɩ b ra rat n kʋ-a. La a Zezi ra nan ka sa ne-b ye. A leb n kõ-b-la makr a to n yeele:

“[Saasẽ Rĩungã] wẽnda wa rĩm sẽn maan a biig pʋg-peegr kibsa. Yẽ tʋma tʋm-tʋmdba tɩ b tɩ bool neb nins yẽ sẽn da yeel tɩ b wa pʋg-peegr kibsã, la bãmb ka rat n wa ye.”

Wẽnnaam a Zeova la Rĩmã sẽn segl kãadem kibs a Biribl a Zezi Kirist yĩngã. Karen-biis 144 000 b sẽn zae ne vʋʋsem sõngo, n na n wa baas n yɩ pʋg-paal n naag a Zezi n zĩnd saasẽ. Soolem nebã ra yaa Israɛll buudã, b sẽn kẽes Tõogã kaool pʋgẽ yʋʋmd 1513 soab sẽn deng Kirist zãmaana. Bãmb da tara zu-noog n na n lebg “maan-kʋʋdb Rĩungu” (NW ). Dẽ, yɩɩ so-kãng la b ra reng n bool-b kãadem kibsẽ wã.

La wa n yɩɩ yʋʋmd 29 wã sẽn kolg saab la b yeel-b pipi tɩ b wa sak boollã. Yɩɩ wakat kãng la a Zezi ne a karen-biisã (rĩma tʋm-tʋmdba) sɩng Rĩungã moonego. La Israɛll buuda neb sẽn wʋm boollã rĩma tʋm-tʋmdb sẽn sɩng togsg yʋʋmd 29 wã tɛk n tɩ ta 33, b ra ka rat n wa ye. Dẽ, Wẽnnaam le kõo buud ning b sẽn boolã sor yɛsa, wa a Zezi sẽn togsã:

“La yẽ leb n tʋma tʋm-tʋmdb a taaba n yeel bãmb yaa: Bɩ y yeel neb nins mam sẽn da boolã: Gese, mam segla rɩɩb n sɛ, mam kʋʋ niigi ne dũm-nobdse. La bũmb fãa seglame n sɛ, bɩ y wa pʋg-peegr kibsã.” B sẽn yeel-b yiib-n-soab sẽn yaa baasg soab tɩ b wa sak boollã sɩnga yʋʋmd 33 Pãntekot sasa, sẽn yɩ wakat ning b sẽn pʋdg vʋʋsem sõngã a Zezi karen-biisã zutã. B kell n maana booll kãng n tãag yʋʋmd 36.

La Israɛll neb nins sẽn sak boollã ka yɩ wʋsg ye. A Zezi yeelame: “B sẽn ka nand boolga yĩnga, bãmb loogame. Ned a yembr kẽnga a pʋʋgẽ, la a yembr kẽnga a teed koosgo, la sẽn kell-ba yõga tʋm-tʋmdbã n maan bãmb wẽnga n kʋ-ba.” A Zezi paasame: “Rĩma sũur yikame la yẽ tʋma sodaase tɩ b tɩ sãam nin-kʋʋdb kãense n yõog bãmb tẽnga bugum.” Sãoong kãng zĩnda yʋʋmd 70, sẽn yɩ wakat ning Rom nebã sẽn wa n sãam Zerizalɛm zãngã, n kʋ nin-kʋʋdb kãensã.

A Zezi wilga bũmb ning sẽn maan sʋkendã, n yeele: “Dẽ, [rĩma] yeela a tʋm-tʋmdbã: Kibsa seglame n sɛ, la neb nins mam sẽn da boola ka zems ye. Woto bɩ y kẽng [soay nins sẽn yit galʋ-tẽngã], la y sẽn yã neb nins fãa, bɩ y yeel-b tɩ b wa pʋg-peegr kibsã.” Tʋm-tʋmdbã maana woto, tɩ ‘neba pid roog ninga b sẽn maan kibsa a pʋgẽ wã.’

B sẽn yi b sẽn bool b rãmbã tẽngẽ n tɩ bool neb nins soayã zutã tigisg sɩnga yʋʋmd 36. Bu-zẽms neb sẽn pa kẽ bãong b sẽn tigmã sʋka, Rom sodaas naab a Korney ne a zaka rãmb n yɩ pipi. Nin-kãensã sẽn pa Zʋɩf rãmbã tigisg kell n kẽnga taoor n tɩ ta yʋʋm kob-gĩnd 20 soabã pʋgẽ. Bãmb fãa ledga b rãmb nins b sẽn da reng n bool pipi tɩ b zãgs waoongã.

Yɩɩ yʋʋm kob-gĩnd 20 soabã pʋgẽ la roog ning b sẽn maandẽ kibsa pid-yã. A Zezi togsa bũmb ning sẽn maan rẽ poorã, n yeele: “La rĩma sẽn kẽ n na n ges nebã, a yãa rao a yembr beenẽ sẽn ka yeelg pʋg-peegr kibsa fuug ye. Yẽ yeela yẽnda yaa: M zoa, yaa bõe tɩ fo wa ka n yaool n ka yeelg pʋg-peegr kibsa fuugu? La rao kãng ka leok tɩ bũmb ye. Dẽ, rĩma yeela a tʋm-tʋmdba tɩ b sẽb yẽ nao wã ne a nusã n dɩk-a n kẽng n tɩ kẽes lik sẽn be kɛɛnga. Yãbre la yẽn wãbre na n zĩnda be.”

Rao ning sẽn ka yeelg kãadem kibs fuugã makda dũni kiris-nebã sẽn yaa kiris-neb ne yʋʋrã. Wẽnnaam zɩ n sak tɩ b yaa tẽeb Israɛllã neb ye. Wẽnnaam zɩ n zae-b ne a vʋʋsem sõngã tɩ b yɩ Rĩungã rogem-pʋɩɩr dɩtb ye. Dẽ b lob-b-la yɩng likã pʋgẽ, tɩ b paam sãoong be.

A Zezi baasa a makrã, n yeele: “Tɩ bõe, b boola wʋsgo la b sẽn tũus b rãmba yaa bilfu.” N-ye, Israɛll buudã neb wʋsg la b ra bool tɩ b wa lebg Kirist pʋg-paalã sull neba, la bãmb sõor bilf bal la b tũus-yã. Neb 144 000 sẽn paamd keoor saasẽ wã sʋka, sẽn ka-b Israɛll buuda neb n yaa wʋsg n yɩɩda. Matɩe 22:1-14; Yikri 19:1-6, NW; Wilgri 14:1-3.

▪ B rãmb nins b sẽn da reng n bool kãadem kibsẽ wã yaa ãnd rãmba, la booll kãng yɩɩ wakat bʋgo?

▪ Wakat bʋg la b yeel pipi tɩ b wa sake, la tʋm-tʋmdb nins b sẽn tʋm tɩ b tɩ togs boollã yaa ãnda rãmba?

▪ Yiib-n-soabã b sẽn yet tɩ b wa sakã yɩɩ wakat bʋgo, la ãnda rãmb la b bool rẽ poore?

▪ Rao ning sẽn ka yeelg kãadem kibs fuugã makda ãnda rãmba?

▪ Neb wʋsgã b sẽn boolã, la neb bilfã b sẽn tũusã yaa ãnd rãmba?