Sak 128

A Zezi vʋʋgame

PAGBÃ sẽn ta n mik tɩ yaoogã yaa vɩʋʋgã, a Maari Madelɛn lebg n zoeeme n na n tɩ togs a Pɩɛɛr ne a Zã. La pagb a taabã paa yaoogẽ wã. Pa kaoos la malɛk puk n bool-b tɩ b kẽ pʋgẽ ye.

La pʋgẽ be pagbã yãa malɛk a to, tɩ malɛk a yembr yeel-ba: “Ra zoe-y rabeem ye, tɩ bõe, mam miime tɩ yãmb baooda a Zezi b sẽn ka kũum [da-luka] zugã. Bãmb ka be ka ye. Bãmb vʋʋga wa b sẽn da yeelã. Wa n ges-y zĩig ninga b sẽn da gãneg bãmbã. Kẽng-y tao-tao n tɩ wilg bãmb karen-biisa tɩ b vʋʋgame.” Dẽ, pagbã zoee ne rabeem la sũ-no-kãseng n looge.

Wakat kãng t’a Maari ra tɩ yãa a Pɩɛɛr la a Zã, n togs-b woto: “B yiisa Zusoaba yaooga pʋgẽ, la tõnd ka mi b sẽn gãneg bãmb zĩig ninga ye.” Tao-tao bala tʋm-tʋmdb a yiibã yiimi n sɩng zoeese. A Zã n da tʋʋl n yɩɩda, bala yẽ ra sõmb n yaa bi-bɩɩg n yɩɩda. Dẽ, yẽ n deng n ta yaoogẽ wã. Rẽ tɩ pagbã me ra loogame, tɩ ned ba a ye ra ka le be yaoogẽ wã ye. A Zã zõondame n ges yaoogã pʋg n yã pɛɛlã, la a pa kẽ ye.

A Pɩɛɛr sẽn ta bal la a sẽn be kõomẽ. A yãa pɛɛlã sẽn da rʋra, ne peend ning b sẽn da rɩk n vil a Zezi zugã. Peendã ra kʋʋme n dɩg zĩig a to. A Zã me kẽe yaoogã pʋga, la a tẽe a Maari sẽn togsã. La pa wa a Pɩɛɛr ne a Zã yamẽ t’a Zezi vʋʋgame ye, ba a Zezi sẽn da zoe n togs-b rẽ naoor wʋsgã. Tʋm-tʋmdb a yiibã leba yir ne yam-yuusgu, la a Maari sẽn da lebg n wa yaoogẽ wã kell n paa be.

Wakat kãnga, wa malɛgsã sẽn kõ-b noor tɩ b maanã, pagb a taabã yɩɩ tao-tao n tɩ togs karen-biisã t’a Zezi vʋʋgame. B sẽn da wa n zoet tʋʋll-tʋʋll wa b sẽn tõe tɛk n debdã wakate, a Zezi seg-b lame n yeele: “Mam pʋʋsda yãmba.” Pagbã wõgemda a Zezi taoore, n waoog-a. T’a Zezi yeel-ba: “Bɩ yãmb da zoe rabeem ye. Bɩ y kẽng n tɩ togs m ba-biisa tɩ b kẽng Galile. Yaa be la bãmb na n yã maam.”

Sẽn deng wakat kãnga, tẽn-digimdgã sẽn da maan tɩ malɛgsã pukã, sodaasã sẽn da be be n gũudẽ wã yɛɛsame n lebg wa b kiimi. B sẽn lebs n yikã, b kẽe galʋ-tẽngã pʋgẽ tao-tao n togs maan-kʋʋdbã kãsem dãmb yell ning sẽn maanã. Maan-kʋʋdbã kãsem dãmb ne Zʋɩf rãmbã ‘kãsem dãmb’ yãa taaba, n bao kũun n kõ sodaasã n kɩt tɩ b sĩnd yellã. B kõ-b-la no-kãngã: “Bɩ y yeel tɩ bãmb karen-biisa waa ne yʋngo n zuk kũumã yãmb sẽn gõe wakate.”

Rom sodaag sã n da gũs a tʋʋmd zĩigẽ b ra tõe n kʋ-a lame. Rẽ n so tɩ maan-kʋʋdbã kãab-b woto: “La guvɛrneera sã n wʋm bõn-kãnga [tɩ yãmb gũsame wã], tõnd na n goma ne bãmb tɩ yell da zĩnd yãmb zut ye.” Sẽn mik tɩ kũuna ra yaa wʋsgã, sodaasã maana wa b sẽn yeel-b bũmb ningã. Rẽ kɩtame t’a Zezi kũumã zukr kɩbar sẽn yaa ziri wã yelg wʋsg Zʋɩf rãmbã sʋka.

A Maari Madelɛn sẽn da pa poorẽ yaoogẽ wã sũur da sãama hal wʋsgo. A Zezi ra bee yɛ? A zõondame n ges yaoogã pʋga, n yã malɛgs a yiib ne peels sẽn lebg n puki! Malɛk a yembr ra zĩi a Zezi kũumã sẽn da gãe zĩig ningã zugẽ, t’a to ra zĩ nao wã sẽnẽ. B sok-a lame: “Paga, yaa bõe tɩ fo yãbda?”

T’a Maari leoke: “B rɩka m Zusoaba tɩ m ka mi b sẽn gãneg bãmb zĩig ninga ye.” Rẽ poore a wẽnemd n yãa ned a to sẽn leb n sok-a: “Paga, yaa bõe tɩ fo yãbda?” La nin-kãng le sokame: “Fo baooda ãnda?”

A Maari tagsame tɩ nin-kãng soabã yaa zẽed ning pʋgẽ yaoogã sẽn da be wã gũuda. Rẽ n so t’a soke: “M kẽema, sã n yaa yãmb n dɩk bãmb bɩ y wilg maam yãmb sẽn gãneg bãmb zĩig ninga tɩ m tɩ rɩk-ba.”

Tɩ nedã yeele: “Maari!” La zĩig pʋgẽ, a bãngame tɩ ya a Zezi, bala a goma ne-a wa a sẽn da minim n gomd ne-a to-to wã. Dẽ, a zẽka a koɛɛg n yeel woto: “Rabbuni!” (sẽn dat n yeel tɩ “M Karensaamba!”). Ne sũ-noog sẽn ka koaka, a gãda a Zezi. La a Zezi yeelame: “Da sɩɩs maam ye, tɩ bõe, mam nan ka kẽng m Ba nengẽ nand ye. Zoe n kẽng m ba-biisa nengẽ n tɩ yeel bãmb tɩ mam dabda m Ba sẽn yaa yãmb me Ba wã nengẽ, la m Wẽnnaam sẽn yaa yãmb me Wẽnnaama nengẽ.”

A Maari zoeeme n kẽng zĩig ning tʋm-tʋmdbã la karen-biis a taabã sẽn da tigmẽ wã. Yẽ me togsa a kɩbarã n paas pagb a taabã sẽn da zoe n togs n yeel tɩ b yãa a Zezi sẽn vʋʋgã. Baasg zãnga, wõnda rapã sẽn ka tẽ pagb a taabã, b ka tẽ a Maari me ye. Matɩe 28:3-15; Mark 16:5-8; Luk 24:4-12; Zã 20:2-18.

▪ Pagbã sẽn tɩ mik tɩ yaoogã yaa vɩʋʋgã, bõe la a Maari Madelɛn maan-yã, la bõe la pagb a taabã yã-yã?

▪ A Pɩɛɛr ne a Zã sẽn mik tɩ yaoogã yaa vɩʋʋgã, b manesem yɩɩ wãn-wãna?

▪ Pagb a taabã sẽn da rebd n na n tɩ togs karen-biisã t’a Zezi vʋʋgame wã, ãnda la b seg sorẽ?

▪ Bõe n paam sodaas nins sẽn da gũud yaoogã, la b sẽn tɩ togs yellã maan-kʋʋdbã b manesem yɩɩ wãn-wãna?

▪ A Maari Madelɛn sẽn da wa n be yaoogẽ wã a yembrã bõe n maane, la pagbã sẽn wa n togs karen-biisã kɩbarã b manesem yɩɩ wãn-wãna?

Sak 129

A Zezi sẽn vẽneg a meng sasa a taaba

KAREN-BIISÃ ra ket n bee sũ-sãang pʋgẽ. B ra ka wʋmd yao-vɩʋʋgã võore, b ra leb n ka tẽed kɩbay nins pagbã sẽn togsã ye. Hatã wĩnd-kaoor wẽnde, a Kleopas ne karen-biig a to n yi Zerizalɛm n da rebd Emayus, tẽng sẽn zems kɩlometr 11 ne Zerizalɛm.

B sẽn da kẽnd la b yẽsd ne taab yɛl nins sẽn maan daarã pʋgẽ wã zugã, sãan n wa n paam-ba, n soke: “Yãmb kẽndame n yẽsd ne taab tɩ bõe?”

Karen-biisã yalsame, tɩ b nensã gãnem, la a Kleopas leokame: “Yãmb yaa sãan n zĩ y ye Zerizalɛm la, n ka bãng yɛl nins sẽn maan a pʋgẽ rasma?” (NW ) Tɩ sãana soke: “Yaa bõe yelle?”

Tɩ b leok tɩ yaa “Nazarɛt dao a Zezi yellã.” La b togs woto: “Maan-kʋʋdbã kãsem dãmba ne tõnd tẽn-soaadba yõka bãmb n kɩs tɩ b kao bãmb bʋʋdo tɩ b zems kũum, la b kaa bãmb kũum [da-luk] zugu. Tõnd da tẽedame tɩ yaa bãmb n na n fãag Israɛll.”

A Kleopas ne a tũud-n-taagã wilga yel-lingdem nins sẽn maan daarã pʋgẽ wã, n gom malɛgsã yãab sẽn yɩ yel-solemdã la yao-vɩʋʋgã yelle. La b wilg tɩ b ra pa wʋmd yel-kãensã võor ye. Dẽ, sãana zab-b lame n yeel-ba: “Yãmb bãngr paoodame, la yãmb ka tẽed bũmb nins fãa Wẽnnaam no-rɛɛsdba sẽn togsa naana ye. Ka tɩlae tɩ Kirist sak tood kãense n yaool n deeg b naam la?” Rẽ poore a wilg-b-la Gʋlsg Sõamyã goam kẽer sẽn tɩ loe ne Kiristã võore.

B wa n baas n taa Emayus noore, tɩ sãana maan wa a na n kell n sãagame. La karen-biisã sẽn da rat t’a sõs-ne-b n paasã, b bõos-a-la woto: “Sig-y ne tõndo, tɩ bõe, yaa zaabre la wĩndga rat n kẽeme.” Woto, a paa be n na n dɩ rɩɩbo. A sẽn pʋʋs la a kaoog burã n dɩk n na n kɩs karen-biisã, b bãngame tɩ sɩd-sɩda, sãana ya a Zezi sẽn dɩk ninsaal yĩnga. La rẽ poore a menemame.

Rẽ masã la b bãng bũmb ning sẽn da kɩt tɩ sãana mi yɛl wʋsg woto wã! B yeelame: “Tõnd ka paam sũ-noog kãsenga bãmb sẽn gom ne tõnd sorã zugu, la bãmb sẽn bilg tõnd Gʋlsg Sõamyã sɩda?” Tao-tao bala b yikame n na n zoe n leb hal Zerizalɛm. Be, b tɩ yãa tʋm-tʋmdbã sẽn tigim ne neb a taaba. A Kleopas ne a tũud-n-taagã ka yã n gom la neb a taabã yeel-b ne sũ-noogo: “Hakɩka, Zusoaba vʋʋgame, la bãmb vẽnega b meng ne a Sɩmo.” Rẽ poore karen-biis a yiibã togsa a Zezi sẽn vẽneg a meng ne bãmb me to-to. Woto yaa naoor a naas masã a sẽn vẽneg a meng ne a karen-biis toɛy-toɛy daarã pʋgẽ.

Zĩig pʋgẽ bala a Zezi puka naoor a nu soaba. Karen-biisã sẽn da zoet Zʋɩf rãmbã yĩngã, b ra soga kʋɩlemsã. Ne rẽ fãa, a Zezi kẽeme n yals b sʋka, n yeele: “Bɩ y paam laafɩ.” B yɛɛsame, n tagsdẽ tɩ yaa kɩɩm la b yã-yã. La a Zezi wilgame tɩ yẽ pa kɩɩm ye, n yeele: “Yaa bõe tɩ yãmb yɛɛsdẽ, la yaa bõe tɩ yãmb tagsd woto? Bɩ y ges mam nusa ne m nao wã, yaa maam bala. Sɩɩs-y maam n gese, kɩɩm ka tar nemd ne kõab wa yãmb sẽn yã mam sẽn tara ye.” La tʋm-tʋmdbã yam ra ket n yoodame.

Sẽn na yɩl n sõng-b tɩ b bãng tɩ yẽ sɩd ya a Zezi, a sok-b lame: “Yãmb tara rɩɩb ka bɩ?” Dẽ, b kõ-a-la zĩm sẽedg t’a wãbe. Rẽ poore a yeelame: “Koe-kãngã yaa koɛɛg ninga mam sẽn da togs yãmb mam sẽn da be ne yãmba [sẽn deng mam kũuma], tɩ yaa tɩlae tɩ bũmb nins fãa sẽn gʋls a Moiiz tõoga ne Wẽnnaam no-rɛɛsdba la Yɩɩl Sõamyã sɛba pʋsẽ sẽn wilgd mam yella paam pidsgã.”

A kell n kẽnga taoor ne a sõasgã b sẽn tõe n mak ne Biibl zãmsg a sẽn maand ne a karen-biisã, n yeele: “A gʋlsame tɩ yaa tɩlae tɩ Kirist namse, la b na n vʋʋga dasem a tãab daare, la neb na n sɩnga Zerizalɛm n moon yam tekre ne sugr kosgo la yel-wẽna sugr koɛɛga ne bãmb yʋʋre buuda fãa sʋka. Yãmb yaa bõn-kãens kaset dãmba.”

Bũmb n maan t’a Toma ka tõog n wa tigis-kãngã sẽn tar yõod wʋsgã hatã zaabr ye. Dẽ, rasem a wãnã sẽn pʋglã pʋgẽ, karen-biis a taabã togs-a-la ne sũ-noog woto: “Tõnd yãa Zusoabã.”

T’a Toma kɩɩse, n yeele: “Mam sã n ka yã kuta bogd bãmb nusẽ n tʋm m nug-bil kuta bogd pʋgẽ, la m tʋm m nug bãmb lʋgrẽ wã, mam kõn tẽ ye.”

Rasem a nii zugẽ, karen-biisã ra leb n tigma taab roog pʋgẽ. La so-kãngã a Toma ra bee ne-ba. Baa ne kʋɩlemsã sẽn da sogã, a Zezi leb n wa yalsa b sʋka, n yeele: “Bɩ yãmb paam laafɩ.” La a wẽnemd n yeel a Toma woto: “Ning f nug-bil ka n ges mam nusã. La tẽeg f nugã n tʋm mam lʋgrã pʋgẽ. Da yɩ ned sẽn ka tẽeb ye.”

T’a Toma zẽk a koɛɛg n yeele: “Mam Zusoaba la mam Wẽnnaam!”

“Fo sẽn yã maama yĩng la fo tẽeda?” a Zezi sẽn soke. La a yeele: “Bark bee neb nins zutu sẽn ka yã la sẽn tẽeda.” Luk 24:11, 13-48; Zã 20:19-29.

▪ Sok bʋg la sãan sok karen-biis a yiib Emayus sora zugu?

▪ Bõe la sãanã yeel tɩ kõ karen-biisã sũ-no-kãsenga?

▪ Wãn-wãn la karen-biisã bãng sãana sẽn ya a soaba?

▪ A Kleopas ne a tũud-n-taagã sẽn leb Zerizalɛmã, kɩba-noog bʋg la b wʋm-yã?

▪ A Zezi sẽn vẽneg a meng naoor a nu soab a karen-biisã taoor yɩɩ sasa bʋgo, la bõe n maan wakat kãnga?

▪ A Zezi sẽn vẽneg a meng naoor a nu soabã loog tɩ rab-niinẽ bõe n maane, la wãn to la a Toma baas n sak n tẽ t’a Zezi sɩd vʋʋgame?