Pagbã sẽn ta a Zeezi yaoogẽ wã n mik tɩ yaa vɩʋʋgã, sɩd yɩɩ lingr meng-menga. A Maari Madelɛn zoeeme n na n tɩ togs “a Sɩmo Pɩyɛɛr ne karen-biig a to wã a Zeezi sẽn dag n nongã.” Yaa tʋm-tʋmd a Zã. (Zã 20:2) La pagb a taabã sẽn pa yaoogã noorã yãa malɛka. Yaoogã pʋg me, malɛk a to n da be be n “yer fu-pɛɛlga.”—Mark 16:5.

Malɛk a ye yeela pagbã yaa: “Bɩ y ra yɛɛs ye. Mam miime tɩ yãmb baooda a Zeezi b sẽn ka da-pɩk [“ra-luk,” MN] zugã. Bãmb ka be ka ye. Bala, b vʋʋga wa b sẽn dag n yeelã. Wa n ges-y zĩig ning b sẽn dag n gãe wã, la y kẽng tao-tao n tɩ togs b karen-biisã tɩ b vʋʋgame n bas kũum. La ade, b renga yãmb taoor Galɩle.” (Matye 28:5-7) “Pagbã yii yaoogẽ wã n zoe ne yɛɛsg la rigbu,” n na n tɩ togs karen-biisã.—Mark 16:8.

Rẽ t’a Maari yãa a Pɩyɛɛr ne a Zã, n sesdẽ la a gomd ne-ba. A yeel-b lame yaa: “B yiisa Zu-soabã yaoogẽ wã, la tõnd ka mi b sẽn tɩ bĩng-b zĩig ning ye.” (Zã 20:2) A Pɩyɛɛr ne a Zã zoeeme n loog yaoogẽ wã. A Zã sẽn da tʋʋl n yɩɩdã, a yɩɩ pipi n ta. A lɩk n yãa pɛɛlã, la a pa kẽ ye.

La a Pɩyɛɛr sẽn ta wã bala, a kẽeme. A yãa pɛɛlã, la peend ning b sẽn da tall n lud a Zeezi zugã. A Zã me pʋglame n kẽ, n yaool n na n tẽ a Maari goamã. Baa ne a Zeezi sẽn da zoe n togs-bã, b baa a ye pa bãng tɩ Wẽnnaam vʋʋg-a lame ye. (Matye 16:21) Karen-biisã lebg n kuilame, n pa mi b sẽn maand ye. La a Maari sẽn lebg n wa yaoogẽ wã, yẽ kell n paa be.

Rẽ tɩ pagb a taabã ra zoet n na n tɩ togsa karen-biisã t’a Zeezi vʋʋgame. A Zeezi seg-b lame n yeel-b yaa: “Mam pʋʋsda yãmba.” B wõgemda a taoor n ‘waoog-a.’ La a Zeezi yeel-b lame yaa: “Da zoe-y rabeem ye. Kẽng n tɩ yeel-y m ba-biisã tɩ b kẽng Galɩle. Yaa be la b na n yãnd maam.”—Matye 28:9, 10.

Tẽn-digimdgã sẽn da maan yaoogẽ wã ne malɛgsã sẽn pukã, sodaas nins sẽn da gũud yaoogã ‘riga ne rabeem n lebg wa kũum.’ B nensã sẽn wa n yẽege, b kẽnga tẽngã pʋg n tɩ “togs maan-kʋʋdbã kãsem-dãmbã bũmb nins fãa sẽn maanã.” Maan-kʋʋdbã ne nin-kẽembã yãa taaba, la b kõo sodaasã ligd tɩ b ra togs ned ye. B yeel-b lame tɩ b yeel tɩ “bãmb gũsame t’a Zeezi karen-biisã wa zuk kũumã” ne yʋngã.—Matye 28:4, 11, 13.

B sã n da kõ Rom sodaag tʋʋmd t’a bas n gũsi, b tõe n kʋ-a lame. Rẽ n so tɩ maan-kʋʋdbã yeel gũudbã tɩ “gʋvɛrneerã sã n wʋme, [b sẽn yag tɩ gũudbã gũsame wã,] bãmb mensã na n goma ne-a n tõog t’a ka maan bãmb bũmb ye.” (Matye 28:14) Sodaasã reega ligdã n maan wa maan-kʋʋdbã sẽn yeelã. Rẽ kɩtame tɩ yelg zʋɩf-rãmbã sẽn be zĩis ninsã fãa tɩ b zuka a Zeezi kũumã.

A Maari Madelɛn ra ket n bee yaoogã sɛɛg n yãbda. A wa n sulg n gesa yaoogã pʋga, n yã malɛgs a yiib sẽn yer fu-peels n zĩ zĩig ning b sẽn da gãneg a Zeezi wã. A ye ra zĩi zugã zĩigẽ, t’a to wã zĩ nao wã zĩigẽ. B soka a Maari yaa: “Paga, yaa wãn tɩ fo yãbda?” A leokame, n yeele: “Yaa b sẽn dɩk m Zu-soabã tɩ m ka mi b sẽn ning-b zĩig ningã yĩnga.” A Maari sẽn wẽnemde, a yãa ned a to. Yẽ me sok-a-la wa malɛgsã sẽn sok-a wã, la a paas woto: “Ãnda la fo baooda?” A Maari sẽn tẽed tɩ yaa tɩɩsã gũudã, a yeelame: “M soaala, sã n yaa yãmb n dɩk-b bɩ y togs maam yãmb sẽn bĩng-b zĩig ning tɩ m na tɩ rɩk-ba.”—Zã 20:13-15.

A Maari ra pa mi t’a ra gomda ne a Zeezi sẽn vʋʋgã ye. La a Zeezi wa n boolame tɩ “Maari.” Wakat kãnga, a bãngame tɩ yaa a Zeezi, bala a goma wa a sẽn da minim n gomd ne yẽ to-to wã. Dẽ la a Maari kelem ne sũ-noog n yeele: “Rabuni,” sẽn dat n yeel tɩ “karen-saamba.” A sẽn zoet a Zeezi na n wa kell n loog saasẽ wã, a gãd-a lame. La a Zeezi yeel-a lame yaa: “Ra sɩɩs-m ye, bala, mam nan ka rʋ m ba nengẽ ye. Kẽng m ba-biisã nengẽ n tɩ yeel-b tɩ mam dʋʋda m ba sẽn yaa yãmb ba wã nengẽ, mam Wẽnnaam sẽn yaa yãmb Wẽnnaamã nengẽ.”—Zã 20:16, 17.

A Maari zoeeme n kẽng zĩig ning tʋm-tʋmdbã ne karen-biis a taabã sẽn da tigmã, n tɩ yeel-b tɩ yẽ “yãnda Zu-soabã.” Rẽ tɩ pagb a taabã ra zoe n togs-b-la b sẽn yã bũmb ningã. (Zã 20:18) Baasgo, tʋm-tʋmdbã tagsame tɩ pagbã goamã “yaa zʋbsgo, la b ka tẽ-b ye.”—Luk 24:11.

Karen-biisã ket n bee sũ-sãang pʋgẽ Nizã rasem 16 sẽn yɩ hat daarã. B pa wʋmd yaoogã sẽn yaa vɩʋʋgã võor ye. (Matye 28:9, 10; Luk 24:11) Baraar zaabre, a Keleopaas ne karen-biig a to n yi Zeruzalɛm n debd Emayuus sẽn zems kilo piig la a ye.

Sorã zugu, b ra gomda bũmb ning sẽn maanã yelle. La sãan n wa n paam-ba, n kell n tũud-b n kẽnda. A sok-b lame tɩ “yaa bõe yell la b gomd ne taab la b kẽnda.” A Keleopaas leokame yaa: “Yãmb y yembr bal n be Zeruzalɛm n ka bãng bũmb ning sẽn maan be rasmã noorã?” La sãanã sokame: “Yaa bõe yelle”?—Luk 24:17-19.

Karen-biisã leokame: “Yell ning sẽn paam Nazarɛt dao a Zeezi wã.” B paasame yaa: “Tõnd da tẽedame tɩ yaa bãmb n na n fãag Israyɛlle.”—Luk 24:19-21.

A Keleopaas ne a tũud-n-taagã togsa sãanã bũmb ning me sẽn maan baraarã. B togs-a lame tɩ pagb kẽer n kẽng a Zeezi yaoogẽ wã n mik tɩ yaa vɩʋʋgo, la b yã yel-solemde, bala malɛgs n puk n yeel-b t’a Zeezi vʋʋgame. B yeel-a lame me tɩ neb kẽer n kẽng yaoogẽ wã n tɩ “mik tɩ bũmbã fãa yaa wa pagbã sẽn dag n togsã bala.”—Luk 24:24.

Karen-biis a yiibã goamã wilgdame tɩ b pa wʋmd bũmb ning sẽn maanã võor baa bilfu. La sãanã wilg-b lame tɩ b tagsgã pa zems ye. A yeel-b lame yaa: “Neb yam sẽn ka weke, yãmb ka tẽed bũmb nins fãa Wẽnnaam no-rɛɛsdbã sẽn togsã tao-tao ye! Dẽ yĩnga, Kiris dag n ka tog n nams a woto n yaool n deeg b naamã sɩda?” (Luk 24:25, 26) Rẽ poore, a maaga a yĩng n bilg bũmb wʋsg sẽn be Gʋls-sõamyã pʋgẽ n gomd Kirisã yelle, tɩ b wʋm a võor sõma.

So-toagdb a tãabã wa n kolga Emayuus, la karen-biis a yiibã ra ket n dat n kelga sãanã goam n paase. Rẽ n so tɩ b pẽdg-a “t’a pa ne-ba, bala, yʋng kolgame la wĩndgã dat n kẽeme.” A sakame. B naaga taab n na n dɩ. La sãanã rɩka burã n pʋʋs Wẽnnaam barka, n kao n kõ-ba. Zĩig pʋgẽ, b bãngame tɩ yaa a Zeezi, la a menema b taoore. (Luk 24:29-31) Rẽ masã la b bãng vẽeneg t’a Zeezi vʋʋgame.

Karen-biis a yiibã sũy yɩɩ noog wʋsgo, hal tɩ b gom bũmb ning sẽn maanã yelle, n yeel woto: “Bãmb sẽn dag n gomd ne tõnd sorã zug la b bilgd tõnd gʋls-sõamyã, tõnd ka paam sũ-no-kãseng sɩda?” (Luk 24:32) B yika tao-tao n leb Zeruzalɛm, n tɩ yã tʋm-tʋmdbã ne karen-biis a taabã. Nand meng t’a Keleopaas ne a tũud-n-taagã togs bũmb ning sẽn maanã, b wʋma neb a taabã sẽn yeel yaa: “Hakɩɩka! Zu-soabã vʋʋgame la b vẽnega b meng ne a Sɩmo.” (Luk 24:34) Rẽ poore, karen-biis a yiibã togsa a Zeezi sẽn vẽneg a meng ne bãmbã. Hakɩɩka, bãmb me yã-a-la ne b nifu.

A Zeezi puka roog ningẽ b sẽn da be wã, tɩ b fãa yɛɛse. Bala b ra soga roogã kʋɩlensã, b sẽn zoet zʋɩf-rãmbã yĩnga. La a Zeezi puka b sʋka, n maag a yĩng n yeel-b yaa: “Bɩ laafɩ zĩnd ne yãmba.” B fãa yɛɛsa wʋsgo, hal n “tẽed tɩ b yãnda kɩɩma.” A Zeezi sẽn na n kẽn koomã zugã me, b tagsa woto.—Luk 24:36, 37; Matye 14:25-27.

Sẽn na yɩl t’a karen-biisã bãng tɩ pa kɩɩma, la tɩ sɩd yaa yẽ, a Zeezi wilg-b lame tɩ yẽ tara yĩn-nemse. A wilg-b-la a nusã la a naoã, n yeel-b yaa: “Bõe yĩng tɩ yãmb yɛɛsdẽ, la yaa bõe tɩ y sãmbd y sũyã pʋsẽ a woto? Ges-y mam nusã la m naoã. Yaa maam bala, sɩɩs-y maam n gese. Kɩɩm ka tar nemd wall kõab wa mam sẽn tarã ye.” (Luk 24:36-39) Karen-biisã sũ-noogã pa tõe n bãng n bilg ye. Baasgo, b ra ket n maanda sãmbs bilfu.

A Zeezi maana bũmb a to n na n sõng-b tɩ b bãng tɩ sɩd yaa yẽ. A sok-b-la “b sã n tara rɩɩb be sẽn na rɩ.” B kõ-a-la zĩm-sẽedgo, la a reeg n dɩɩme. Dẽ poore, a yeel-b lame yaa: “Yaa woto la mam sẽn da togs yãmb mam sẽn dag n ket n be ne yãmbã: ‘Ra yaa tɩlɛ tɩ bũmb nins fãa sẽn gʋls a Moyiis tõogã pʋgẽ, la Wẽnnaam no-rɛɛsdbã sɛb pʋsẽ, la yɩɩn-sõamyã pʋgẽ n gomd mam yellã paam pidsgu.’ ”—Luk 24:41-44.

A Zeezi sõnga a Keleopaas ne a tũud-n-taagã tɩ b wʋm gʋls-sõamyã võore. So-kãngã a sõnga neb nins fãa sẽn tigmã me woto. A yeel-b lame yaa: “B gʋlsame n yeel tɩ Kirisã tog n namsame, la tɩ b na n vʋʋg n basa kũum rasem a tãab daare. La tɩ sẽn sɩng ne Zeruzalɛm, b na n moona yam tekr koɛɛg buudã fãa sʋk ne bãmb yʋʋr tɩ b tõe n paam yel-wẽnã sugri. Yãmb yaa bõn-kãng kaset-dãmba.”—Luk 24:46-48.

Baraarã, tʋm-tʋmd a Toma pa tõog n tigim ne karen-biis a taabã ye. B sẽn wa n yã-a wã, b yeel-a-la ne sũ-noog yaa: “Tõnd yãnda Zu-soabã!” La a Toma yeel-b lame yaa: “Mam sã n ka yãnd kutã bãn b nusẽ wã, mam sã n ka tʋm m nug-bil kutã bogd pʋgẽ, la m sã n ka tʋm m nug bãmb lʋgrẽ wã, mam kõn tol n tẽ ye.”—Zã 20:25.

Rasem a nii poore, karen-biisã le tigma taab roog pʋga, n sog kʋɩlensã. So-kãngã wã, a Toma ra bee ne-ba. La a Zeezi puka b sʋka, ne yĩn-nemse, n pʋʋs-b woto: “Bɩ laafɩ zĩnd ne yãmba!” A wẽnemd n yeela a Toma yaa: “Tẽeg f nug-bilã ka. Ges mam nusã. Tẽeg f nugã n tʋm mam lʋgrẽ wã me, la f tẽ n da yɩ ka-tẽeb soab ye.” A Toma yeelame: “Mam Zu-soaba la mam Wẽnnaam!” (Zã 20:26-28) Hakɩɩka, a Toma kɩsa sɩd masã t’a Zeezi sɩd vʋʋgame, n yaa malɛk sẽn tar pãnga, a soab ning Wẽnnaam a Zeova sẽn tʋmã.

A Zeezi yeela a Toma woto: “Yaa fo sẽn yã maamã yĩng la fo tẽeda. Bark bee neb nins sẽn ka yã n yaool n tẽedã zutu.”—Zã 20:29.