Kiris-nebã vɩɩm la b tʋʋma tigissã na-kẽndr sebr not-rãmbã
© 2023 Watch Tower Bible and Tract Society of Pennsylvania
TƲƲLG RASEM A 4-10
D SẼN BÃNG BIIBLÃ KARENG PƲGẼ | YƖƖN-SÕAMYÃ 16–17
“Zeova, mam bõn-sõma wã fãa yẽgre”
Kom-bɩɩse, yãmb tõeeme tɩ y vɩɩmã tall barka
BÃNG-Y N YÃK-Y Y SẼN DAT N MAANEGÃ
11 Karm-y Yɩɩn-sõamyã 16:3. A Davɩɩd ra mii zo-sõma sẽn paamd to-to. A ‘sũur da nooma’ ne sẽn nong-b a Zeova wã, n da nong b tũud-n-taare. A bool-b lame tɩ “pʋ-peelem dãmbã,” bala b maoodame n tũud a Zeova noyã, n tar yel-manesem sẽn yaa sõma. Yɩɩn-gʋlsd a to me wilgame tɩ yaa neb a woto sʋk la a yãkd a zo-rãmbã. Ad a sẽn yeele: “Mam yaa neb nins fãa sẽn zoet yãmb la b sakd yãmb no-tũudsã zoa.” (Yɩɩn. 119:63) Wa d sẽn yã sõsg ning sẽn loogã pʋgẽ wã, yãmb me tõe n paama zo-sõma wʋsg sẽn sakd-b a Zeova wã sʋka. Pa tɩlɛ tɩ b yʋʋmã zems yãmb ye.
w14 15/2 29 s. a 4
‘Get-y a Zeova neermã’
A Davɩɩd yeelame yaa: “A Zeova yaa mam pʋɩɩre, mam pʋɩɩr b sẽn kõ maam. A yaa wa bõn-yũudl sẽn kõt sũ-noogo. Yãmb kogenda mam rogem-pʋɩɩrã. B maga zĩis sẽn yaa sõma n kõ maam.” (Yɩɩn. 16:5, 6) A Davɩɩd sũur da yaa noog ne a “pʋɩɩrã,” rat n yeel t’a sẽn paam n tar zood sõma ne a Zeova wã, la a sẽn tũud-a wã. Tõnd me tõe n maoo ne zu-loees wa a Davɩɩde, la d paamda bark buud toor-toore! Bɩ d ket n maand sũ-noog tũudum hakɩɩkã pʋgẽ, n “get a roogã ne sũ-noog” wakat fãa.
Yãmb nee a Zeova y taoor daar fãa bɩ?
2 Yaa vẽeneg tɩ tõnd ned kam fãa sã n karem a Abrahaam, a Saara, a Moiizi, a Ruti, a Davɩɩde, a Ɛstɛɛre, tʋm-tʋmd a Poll la neb a taab yʋy sẽn yi kibaya, d tõe n paama sagls wʋsgo. La d sã n karem neb a taab yʋy sẽn pa tolg n yi me kibaya, na n naf-d lame. D sã n nong n bʋgsd Biiblã kibay zutu, na n kɩtame tɩ d me tõog n yeel woto wa yɩɩl-gʋlsdã: “Mam geta [a Zeova] m taoor daar fãa n ka basdẽ ye. Bãmb bee mam nug rɩtgo, la mam ka na n lak ye.” (Yɩɩl 16:8) Gom-kãensã rat n yeelame tɩ bõe?
3 Naoor wʋsgo, zabr sasa, sodaag fãa zãada a sʋʋgã ne a rɩtgo, la a zãad a gãongã sẽn kokd pẽemã ne a goabgã. Woto yĩnga, a sã n paam t’a soda-taag wa leb a rɩtgã, yẽ soabã gãong n na n kogl a rɩtgã. D sã n tẽr a Zeova yell n maand a raabã, a na n kogend-d lame tɩ yaa wa a be d rɩtgo. Bɩ d ges kibay nins sẽn be Biiblã pʋgẽ wã sẽn tõe n keng d tẽebã to-to, n kɩt tɩ d tẽr a Zeova yell tɩ yaa wa d ‘get-a-la d taoor daar fãa.’
D bʋgs Wẽnnaam Gomdã zug neere
it-2 697
Nin-beelle
B sã n naag Ebre gom-bil ning sẽn yaa ʼi·shohnʹ (Tõo. 32:10; Yel. 7:2), ne ʽaʹyin wã (nifri), a võorã yaa “ninã rao bila.” Woto me, gom-bil ning sẽn yaa bath (bi-pugla) b sẽn lebg Wiisg 2:18 pʋgẽ wã võor yaa “ninã bi-puglã.” Gom-bi-kãensã a yiibã fãa makda nin-beellã. Yɩɩn-sõamyã 17:8 wã pʋgẽ, b naaga gom-bi-kãensã a yiibã taaba (ʼi·shohnʹ bath-ʽaʹyin), sẽn na yɩl tɩ gomdã tall pãnga. A võorã yaa “rao bila, ninã bi-puglã” (“nin-beelle”). Yaa sẽn na n gom d sẽn ne d meng to-to ned a to nin-beell pʋgẽ wã yelle. Nin-kãng soab nin-beellã pʋgẽ, tõnd yaa kɩdga.
Nifrã yell tolg n yaa toogo. Baa zoob-bõoneg bɩ tom sã n kẽ ned nifrẽ, tao-tao bala a bãngdame. B sẽn boond a soab tɩ cornée wã sẽn lut nin-beellã yaa bũmb d sẽn segd n kogle, la d ges a yelle, bala zĩ-kãng sã n paam sãmpogre, wall yaa bãag n yõk-a, tõe n kɩtame t’a soabã pa le ne sõma, pa rẽ bɩ n lebg zoanga. Biiblã pʋgẽ, b gomda “nin-beellã” yelle, n na n wilg t’a yaa bũmb d sẽn segd n kogl neere. Yaa woto me la d segd n kogl Wẽnnaam noyã. (Yel. 7:2) Tõod 32:10 gomda a Zeova sẽn ges Israyɛll nin-buiidã yell to-to wa ba sẽn get a kamb yell to-to wã yelle. B yeta be t’a “kogl-a-la wa a nin-beelle.” A Davɩɩd pʋʋsa Wẽnnaam n kos-a t’a kogl-a la a ges a yell wa a “nin-beelle.” (Yɩɩn. 17:8) A ra ratame t’a Zeova yɩ tao-tao n sõng-a, bɛɛbã sã n wa zabd ne-a. (Ges-y Zaka. 2:8 wã. Be b lebga Ebre gom-bil ning sẽn yaa ba·vathʹ ʽaʹyin tɩ “nin-beelle.”)—Ges-y ŒIL.
TƲƲLG RASEM 11-17
D SẼN BÃNG BIIBLÃ KARENG PƲGẼ | YƖƖN-SÕAMYÃ 18
“A Zeova yaa . . . soab ning sẽn fãagd maamã”
w09 1/5 14 s. a 4-5
Sũ-noog ning a Zeova sẽn kõtã yaa tõnd pãnga
Biiblã pʋgẽ me, b maka a Zeova ne bũmb toor-toor sẽn pa vɩ. B yetame t’a yaa ‘Israyɛll Pĩig kugri,’ “pĩiga,” la “pãng zĩiga.” (2 Sãmwɛll 23:3; Yɩɩn-sõamyã 18:2; Tõodo 32:4) Gom-bi-kãensã sõngda tõnd tɩ d bãng bõe? Wa pĩig kug-bedr sẽn yas kãn-kae n pa tõe n viigã, a Zeova tõe n yɩɩ tõnd koglg zĩig hakɩɩka.
5 Yɩɩn-sõamyã sebrã pʋgẽ, b maka a Zeova ne bũmb toor-toore, n na n wilg a sẽn sɩd yaa Wẽnnaam ning buudã. Yɩɩn-sõamyã 84:11 wã wilgdame t’a “Zeova yaa wĩntoog la gãongo,” bala yaa yẽ n kõt vẽenemã, vɩɩmã, pãnga, la koglgo. Yɩɩn-sõamyã 121:5 wã yetame yaa: “A Zeova yaa maasem sẽn be fo nug-rɩtgo.” Wa maasem sẽn tõe n kogl tõnd ne wĩntoogã zabdmã, a Zeova tõe n kogla neb nins sẽn tũud-a wã ne tood nins zu-loeesã sẽn wat ne wã, n kɩt tɩ b soond a “nugã” bɩ a “pɩgsã” maasmẽ.—Ezayi 51:16; Yɩɩn-sõamyã 17:8; 36:7.
A Zeova sõngda tõnd tɩ d tõogd toog ne sũ-noogo
5 A Ezayi sẽn yeel bũmb ningã tõe n kenga d raood wʋsg rũndã-rũndã. A yeelame: ‘Yãmb sã n kelme, b na n wʋmame, la b na n zoee yãmb nimbãanega.’ (Eza. 30:19) A Ezayi wilgame tɩ d sã n wa kelemd n kot sõngre, a Zeova wʋmdame, la a na n yɩɩ tao-tao n leok-do. A paasame yaa: “Bãmb sã n wʋm yãmb kelemsã bala, b na n leoka yãmba.” Gom-kãensã tẽegda tõnd tɩ d Ba wã rata ne a sũur fãa n sõng neb nins sẽn kot-a sõngrã. D sẽn mi woto wã sõngda tõnd tɩ d tõogd toog ne sũ-noogo.
Wilg-y tɩ y sũur nooma y sẽn paam n tõe n pʋʋs a Zeova wã
1 SẼN naan-a saasã la tẽngã sakame tɩ d tõe n pʋʋsd-a. Woto yaa zu-zẽkr meng-menga. Tags-y n ges-y: D tõe n pelga d pʋg n pʋʋs a Zeova, sẽn yaa wakat ning fãa, la sẽn yaa ne buud-gomd ning fãa. D sã n wa ka laafɩ n be logto-yiri, wall d sã n wa be bãens roogẽ, d tõe n pʋʋsa d saasẽ Ba wã sẽn nong-dã, la d bas d yam t’a na n kelg-d lame. D sũur nooma wʋsgo, d sẽn paam n tõe n maan woto wã.
Bõe n tõe n sõng-d tɩ d tõog n mao ne yɩɩre?
2. D tẽege. D sã n tẽeg zu-loees kẽer d sẽn tõog n mao ne yelle, d bãngdame tɩ sã n da pa tũ ne a Zeova sõngre, d ra pa na n tõog ye. D sã n tags a Zeova sẽn sõng tõndo, la a sẽn sõng pĩnd wẽn-sakdbã to-to wã, d paamda sũur pʋgẽ bãane, la d maneg n kɩs-a sɩda. (Yɩɩn. 18:18-20) Kãsem-soab a ye yʋʋr sẽn boond t’a Zozuwe yeelame: “M sã n pʋʋs a Zeova n kos bũmb t’a leoke, m gʋlsda rẽ sebr zugu. Rẽ sõngda maam tɩ m tẽeg wakat nins m sẽn kos a Zeova bũmb takɩ t’a sɩd kõ-ma.” D sã n sɩd tẽegd a Zeova sẽn maan bũmb nins n sõng-d pĩndã yelle, d manegd n paama pãng n tõog n mao ne yɩɩrã.
D bʋgs Wẽnnaam Gomdã zug neere
it-1 437 s. a 2
Seribẽ-rãmba
A Zeova sã n da wa vẽneg a menga, b gomda seribẽ-rãmbã me yelle. Biiblã yetame yaa: “Mam na n vẽnega m meng ne foo be, la m pa limdã zug n gom ne foo. Mam na n paa seribẽ-rãmb a yiibã sẽn be Kasetã koglg zugã sʋka.” (Yik. 25:22; Sõd. 7:89) A paasame t’a Zeova ‘zĩi seribẽ-rãmbã zugẽ [bɩ sʋka].’ (1 Sãm. 4:4; 2 Sãm. 6:2; 2 Rĩm. 19:15; 1 Kib. 13:6; Yɩɩn. 80:1; 99:1; Eza. 37:16) Makr pʋgẽ, seribẽ-rãmbã ra yaa saar ning a Zeova sẽn zao wã ‘mamsgo’ (1 Kib. 28:18), tɩ b pɩgsã kogend-b so-taokã sasa la sõngdẽ tɩ saarã kẽnd tʋʋll-tʋʋlle. A Davɩɩd yɩɩla yɩɩlle, n gom a Zeova sẽn wa ne tʋʋlem to-to n wa sõng-a wã yelle. A yeelame t’a Zeova “zomba seribẽ n yɩk n watẽ,” wall t’a “zomba malɛk pɩgs n sig tao-tao.”—2 Sãm. 22:11; Yɩɩn. 18:10.
TƲƲLG RASEM 18-24
D SẼN BÃNG BIIBLÃ KARENG PƲGẼ | YƖƖN-SÕAMYÃ 19–21
“Saasã moonda Wẽnnaam ziirã”
Bɩ nebã fãa moon a Zeova ziirã
A ZESE biig a Davɩɩd sẽn yɩ rũm-kɩɩmã bɩɩ Betlehɛm. Naoor wʋsgo, a ra mi n geta saasã sẽn yalem hal wʋsg n pid ne ãdsã yʋngo, zĩigã sẽn wat n yaa sɩddd wã sasa a sẽn da wa n gũud a ba wã rũmsã! Sãmbg sẽn ka be, a tẽega bõn-kãensã sẽn yaa kãsemsã yelle, Wẽnnaam vʋʋsem sõngã sẽn wa n vẽeneg-a t’a gʋls Yɩɩll 19 soabã goam sẽn be rasãndã. A gʋlsame: “Saas wilgda Wẽnnaam ziiri, la sa-gãong togsda bãmb nus tʋʋma. La Wẽnnaam nus tʋʋma rãamd yii tẽnga fãa pʋgẽ, la bãmb goama taa dũniyã tɛk fãa.”—Yɩɩl Sõamyã 19:2, 5.
2 Saasã a Zeova sẽn naan tɩ yaa kãseng hal wʋsgã wilgda a ziirã wĩntoog la yʋng tɩ pa tũ ne noor goam ye. Bũmb nins Wẽnnaam sẽn naanã wilgda a ziirã wakat fãa. Ziir kãng sẽn pukd to-to “tẽngã fãa” neb nifẽ wã kɩtdame tɩ d neẽ tɩ d pa baa fʋɩ ye. La baasgo, Wẽnnaam bõn-naandsã sẽn wilgd a ziirã tɩ pa tũud ne goamã bal pa sek ye. B sagenda ãdem-biis nins fãa sẽn yaa sakdbã tɩ b naag n kõ kaset kãng me ne b no-goamã. Wẽnnaam vẽnega yɩɩl-gʋlsd a yembr yʋʋr b sẽn pa wilgi, t’a taas gom-kãensã a balemdb sẽn tar kɩs-sɩda. A gʋlsame: “Bɩ y kõ [a Zeova] waoogre la y wilg tɩ bãmb tara pãnga. Bɩ y kõ [a Zeova] waoogr sẽn zemsd ziir sẽn yaa bãmb yʋʋr dẽnda.” (Yɩɩl Sõamyã 96:7, 8) Neb nins sẽn tar zems-n-taar sõma ne a Zeova wã sakda sagl-kãngã ne sũ-noogo. La kõ Wẽnnaam waoogr baooda bõe maanego?
Naanegã wilgda Wẽnnaam ziiri!
8 Sẽn pʋgde, a Davɩɩd bilgda a Zeova naanegã bõn-kãseng a to: “Yaa beenẽ [yĩngrã] la bãmb tilg zãnd wĩndga yĩnga. Wĩndga yaa wa pʋg-paal sɩd sẽn yit a roogẽ. Yẽ maanda sũ-noog wa gãndaoog sẽn zoet zoeese. Wĩndga pukda yaang saasẽ n dabd taoore hal tɩ ta a lʋɩɩs tɛka, la bũmb ka be sẽn solg ne a tʋʋlem ye.”—Yɩɩl Sõamyã 19:5-7
9 B sã n dɩk wĩndgã n mak ne ãds a taabã, a bedrmã zemsame bala. Ne rẽ fãa, wĩntoogã yaa ãdg sẽn pa wõnd a taaba, n kɩtdẽ tɩ bũmb nins sẽn zoet n gilgd-a wã wõnd b yaa kɩdse. Sebr a yembr yetame tɩ wĩntoogã zɩslem taa “tẽngã zɩslem naoor 330 000,” sẽn dat n yeel tɩ yaa wĩndgã ne a soolmã fãa zɩslmã fãa la bala. Wĩntoogã sẽn yilemdã tara pãng sẽn takde, tɩ rẽ kɩt tɩ tẽngã yilimd n gilgd-a, t’a zãrmã ne-a ta kɩlometr milyõ 150, n pa zãagd ne-a n yɩɩg rẽ, la a pa pẽnegd-a n yɩɩd me ye. Yaa wĩntoogã tʋʋlem fĩ-fĩi bal n tat tẽngã, la rẽ seka na zã vɩɩmã.
10 Yɩɩl gʋlsdã gomda wĩndgã yell n bilgd-a wa “gãndaoog” sẽn yit yaang n kẽngd nen-taoor daarã pʋgẽ, la sẽn gãanded yʋng ‘zãndẽ.’ Wĩntoogã sã n wa kẽedẽ, f sã n be tẽngã zug n getẽ, yaa wa a kẽeda “zãnd” tẽngr n na n vʋʋse. Yibeoogo, yaa wala a pukda zĩig pʋgẽ n yãgda, “wa pʋg-paal sɩd sẽn yit a roogẽ.” A Davɩɩd sẽn da yaa pe-kɩɩma, a ra mii yʋng waood sẽn zabd to-to. (Sɩngre 31:40) A tẽega wĩntoogã sẽn da wɩngd yẽ yĩnsã ne zĩigã tao-tao wã yelle. Vẽenega, wĩntoogã pa yaad ne a “so-toakã,” a sẽn yit yaang n kẽngd nen-taoorã ye, la wa ‘gãndaoogo,’ a seglame n na n ye tog so-kãngã.
Les merveilles de la création révèlent la gloire de Dieu
Bʋgsd-y-yã a Zeova bõn-naandsã zug neere: A Zezi sagla tõnd tɩ d “ges bõn-yɩgdse,” la d “tags weoog ruluglɛlmã” yell n dɩk yam. (Mat. 6:26, 28) D sã n maand woto, na n paasa d tẽebã pãnga, n kɩt tɩ d kɩs d Naandã sɩd n paase, la d bãng t’a yamã ka koaka, t’a tara pãng n tõe n kogl-do, la t’a nonglmã me ka to ye. D ra bas tɩ dũni kãngã bãngdbã sẽn tõe n maan bũmb ninsã tiis-d ye. Maan-y y sẽn tõe fãa, n tõog n mi n get a Zeova bõn-naandsã sẽn be yamleoog wʋsgã, la y bʋgsd rẽ sẽn wilgd tõnd bũmb nins a Zeova zugã.—Yɩɩl 19:2.
D bʋgs Wẽnnaam Gomdã zug neere
it-1 1093
Ebre, II
B sẽn wʋg Ebre gom-kãensã to-to wã tũuda taaba, la tar pãnga. Gomd a yiib-n-soabã ne b sẽn deng n togs gomd ning pipi wã pa tagsg a yembr ye. Gomd a yiib-n-soabã võor yaa toore, n pʋd n paasd b sẽn yet bũmb ningã pãnga. Yɩɩn-sõamyã 19:7-9 wã goamã wilgda rẽ. B yetame yaa:
A Zeova tõogã zemsa zãnga,
n lebsd n kõt pãnga.
Bũmb nins a Zeova sẽn tẽegd a nin-buiidã zemsa ne teegre,
n kõt sẽn pa tar-a yamã yam.
Noy nins sẽn yit a Zeova nengẽ wã yaa tɩrse,
n kõt sũ-noogo;
A Zeova tõodã yaa yɩlma,
n kõt ned vẽenem.
A Zeova zoees yaa sõma,
n paad wakat fãa.
A Zeova bʋ-kaoor toor-toorã yaa sɩda;
B fãa yaa tɩrse.
Y sã n gũus n gese, y neeme tɩ vɛrse wã gomd a yiib-n-soabã lokda pipi gomdã, tɩ b yiibã fãa tũud taab sõma tɩ gomdã tar pãnga. D sã n ges vɛrse fãa babg a yiib-n-soabã, wala makre b sẽn yeel tɩ “n lebsd n kõt pãnga” la “n kõt sẽn pa tar-a yamã yam,” sõngda karemdã t’a bãng a Zeova ‘tõogã sẽn zems zãngã’ võore, la tɩ ‘bũmb nins a Zeova sẽn tẽegd a nin-buiidã sɩd zemsa ne teegre.’ Goamã sẽn pʋɩ to-to wã yaa wa yɩɩll reesgo. Woto kɩtdame tɩ goamã pa tũud taab bal ye. B sẽn wʋg-b to-to la b sẽn pʋgd taab to-to wã zemsame, tɩ b karengã be yamleoogo. Rẽ n so tɩ b mi n boond gom-kãensã buudã tɩ gom sẽn tũud taaba.
TƲƲLG RASEM 25-31
D SẼN BÃNG BIIBLÃ KARENG PƲGẼ | YƖƖN-SÕAMYÃ 22
Biiblã ra pĩnd n togsa bũmb toor-toor a Zeezi kũumã wɛɛngẽ
B yãa Mesi wã!
16 B ra pĩnd n togsame tɩ na n yɩɩ wa Wẽnnaam basa Mesi wã. (Karm-y Yɩɩl Sõamyã 22:2.) Sɩd me, a Mark yeelame tɩ sẽn wa n zems zafar wakate, a Zezi zẽka a koɛɛg n kelem n yeel tɩ ‘Eloi, Eloi, lama sabaktani?’ A Matɩe paasame t’a sẽn yeelã võor yaa: “Mam Wẽnnaam, mam Wẽnnaam, yaa bõe tɩ yãmb bas maam?” (Mark 15:34) A Zezi sẽn yeel tɩ Wẽnnaam bas-a lame wã, pa rat n yeel t’a ra tagsdame t’a Ba wã bas-a-la fasɩ ye. Bala a ra miime t’a kũumã wakate, Wẽnnaam da na n basa a koglgo, t’a bɛɛbã paam n maan-a b sẽn date. Rẽ kõo a Zezi sor t’a wilg t’a na n kell n saka Wẽnnaam wakat buud fãa. A sẽn zẽk a koɛɛg n yeel woto wã pidsa Yɩɩl Sõamyã 22:2 wã sẽn yeelã.
B yãa Mesi wã!
13 A Davɩɩd ra togsame tɩ b na n yaala Mesi wã. (Karm-y Yɩɩl Sõamyã 22:8, 9.) Sɩd me, a Zezi sẽn da wa n be kũum da-lukã zug n namsdẽ wã, neb n yaal-a. A Matɩe yeela woto: “Neb nins sẽn loogd be wã goma bãmb wẽng n gõms b zut n yeele: ‘Yãmb sẽn tõe n sãam Wẽnnaam doog n leb n me-a rasem a tãab pʋgẽ wã, bɩ y fãag y menga. Yãmb sã n yaa Wẽnnaam Biiga, bɩ y wa sig kũum [da-lukã, MN] zugu.’” Maan-kʋʋdbã kãsem dãmbã ne gʋlsdbã la kãsem dãmbã me yaal-a lame n yeele: “Bãmb fãaga neb a taaba, la b ka tõe n fãag b meng ye. Bãmb sã n yaa Israɛll dĩma, bɩ b sig [da-lukã] zugu, la tõnd na tẽ bãmba. Bãmb da teega Wẽnnaam, bɩ Wẽnnaam fãag bãmb masã, b sã n nong bãmba. Tɩ bõe, b ra yeelame tɩ b yaa Wẽnnaam Biiga.” (Mat. 27:39-43) B sẽn nams a Zezi wã, a tõoga a meng n pa tol n yeel bũmb sẽn pa segd ye. Ad woto sɩd yaa mak-sõng n kõ tõndo.
B yãa Mesi wã!
14 B ra na n maana bãnd n pʋɩ taab Mesi wã fuugu. A Davɩɩd yeela woto: “Bãmb pʋɩta mam fut ne taaba, la bãmb maana bãnd ne mam fuug a ye.” (Yɩɩl 22:19) Sɩd yɩɩ woto. Biiblã yeelame tɩ Rom sodaasã sẽn ka a Zezi ra-lukã zugã poore, b maana bãnd a fuug a ye yĩnga.—Mat. 27:35; karm-y Zã 19:23, 24.
D bʋgs Wẽnnaam Gomdã zug neere
D wilg tɩ d nanda d tigissã sẽn yaa sõng Wẽnnaam nifẽ wã
7 Tõnd tõe n wilga ne manesem kẽer sẽn yaa vẽeneg tɩ d nanda d tigissã. Manesem a ye yaa d sẽn na n naagd neb a taabã n yɩɩnd tigissã sɩngrẽ la b baasgẽ. Yɩɩll-kãens wʋsg goam yaa pʋʋsgo, rẽ n so tɩ d segd n yɩɩl-b tɩ waoog Wẽnnaam. A Poll lebg n dɩka goam nins sẽn be Yɩɩl Sõamyã 22 pʋgẽ wã, n wilg tɩ yaa a Zezi la sẽn yet tɩ: “Mam na n wilga mam ba-biisa yãmb yʋʋre. La mam na n yɩɩlame n pẽg yãmb tẽedba sʋka.” (Hebre dãmba 2:12) Dẽnd wakat fãa d segd n baoo zĩig n zĩnd nand tɩ ned ning sẽn na n lʋɩ-a taoor tɩ tigisgã sɩngã yeel nebã tɩ b yik n yɩɩlle. La d sã n wa yɩɩndẽ, d segd n tagsa yɩɩllã sẽn yet bũmb ningã zug sõma. Bɩ d kɩt tɩ tõnd sẽn yɩɩnd to-to wã wilg tɩ d tagsda wa yɩɩl-gʋlsdã sẽn yeel tɩ: “Mam na n pʋʋsa Zusoaba bark ne m sũur fãa nin-tɩrs lageng ne b tiging pʋgẽ.” (Yɩɩl Sõamyã 111:1) Yɩɩlã sẽn pẽgd a Zeova wã yĩnga, yaa sõma tɩ d wat tigissã pĩnda, la d paad hal n tãag b saabo.
w03 1/9 20 s. a 1
Pẽg-y-yã a Zeova “tigingã pʋgẽ”
Rũndã-rũndã me, b sẽn sigl yɛlã to-to wã kɩtame tɩ kiris-nebã paamd segb buud toor-toor n pẽgd a Zeova “tigingã pʋgẽ,” wa sẽn da yaa to-to pĩnd wẽndẽ wã. Segb a ye d sẽn tar yaa d sẽn paam n tõe n zẽk d nus n leok sogsg nins b sẽn sokd kɛlgdbã tigissã sasa wã. Ra tol-y n maan-y sãambs ne y leoorã sẽn tõe n naf y taabã to-to wã wɛɛngẽ ye. Wala makre, tõnd sã n leok n wilg d sẽn tõe n mao ne zu-loɛɛg to-to, wall n gill zu-loɛɛg ning to-to, sõngda d tẽed-n-taasã tɩ b maneg n dat ne b sũur fãa n tũ Biiblã saglsã. D sã n leok n bilg Biiblã vɛrse rãmb võore, bɩ n gom bũmb d sẽn vaees n yã yelle, tõe n sõnga d tẽed-n-taasã tɩ b maneg n zãmsd Biiblã.
TƲƲL-NIF RASEM A 1-7
D SẼN BÃNG BIIBLÃ KARENG PƲGẼ | YƖƖN-SÕAMYÃ 23–25
“A Zeova yaa mam pe-kɩɩma”
‘A Zeova yaa mam pe-kɩɩma’
A Zeova wilgda a piisã sore: Piis sã n pa tar kɩɩma, b tõe n menema faag-faaga. Sẽn na yɩl n bãng n vɩɩmd tɩ zemse, tõnd me rata sor-wilgri. (Yelbũna 20:24) A Davɩɩd yeelame t’a Zeova tallda a nin-buiidã n kẽngd “yam-maas” la “ko-bundum zĩigẽ.” A paasame t’a kɩtdame tɩ b ‘tũud tɩrlem sore.’ (Vɛrse a 2, 3) Gom-kãensã sẽn tẽegd tõnd pe-kɩɩm sẽn get a piis yell to-to wã wilgdame tɩ d tõe n teega Wẽnnaam zãng-zãnga. D sã n tũud sor-wilgr ning a sẽn kõt-d Biiblã pʋgẽ ne a vʋʋsem sõngã maasmã, d vɩɩmã na n kõt-d-la sũ-noogo, laafɩ la bãane.
‘A Zeova yaa mam pe-kɩɩma’
A Zeova kogenda a piisã: Piis sã n pa tar kɩɩma, b pa tar koglgo, tɩ kɩt tɩ bũmb fãa tõe n yaees-ba. A Zeova yeela a nin-buiidã tɩ b ra maan rabeem, baa b sã n wa “kẽnd tãng long sẽn yaa lik pʋgẽ,” rat n yeel tɩ b sã n wa tar zu-loe-kɛgemse. (Vɛrse a 4) Bala, a gũud-b lame la a sõngd-b menga. A tõe n kõ a nin-buiidã yam la pãng sẽn na yɩl tɩ b tõog n mao ne zu-loeesã.—Yɩɩl Sõamyã 121:1, 2; Zak 1:2-5.
‘A Zeova yaa mam pe-kɩɩma’
A Zeova rɩlgda a piisã: Sẽn na yɩl n paam rɩɩbo, piis teega b pe-kɩɩma. D sẽn segd n bao n bãng Wẽnnaamã me yaa wa rɩɩb d sẽn date, la yaa Wẽnnaam bal n tõe n sõng-d rẽ wɛɛngẽ. (Matɩe 5:3, MN) Zu-noogo, a Zeova yaa kõta, n sõngd a nin-buiidã hal tɩ b bãngd-a sõma. (Vɛrse a 5) Biiblã, n paas sɛb nins sẽn sõngd tõnd tɩ d bãngd Biiblã, wala makre, sebr ning yãmb sẽn karemdã sõngd-d lame tɩ d wʋmd vɩɩmã võore, la d bãngd raab ning Wẽnnaam sẽn tar ne tõndã.
D bʋgs Wẽnnaam Gomdã zug neere
Nong-y tɩrlem ne y sũur fãa
A ZEOVA tũnugda ne a Gomdã la ne a vʋʋsem sõngã n sõngd a nin-buiidã tɩ b tũud “tɩrlem sorã.” (Yɩɩl 23:3) La tõnd sẽn yaa koangdbã yĩnga, d wae n bʋdgdame n basd so-kãngã. Sã n wa yaa woto, yɩl n lebg n wa so-sõngã zugã, rat n yeel tɩ n maan sẽn yaa tɩrgã baooda modgr wʋsgo. Bõe n tõe n sõng-d tɩ d tõog n tũ tɩrlem sorã? D segd n dɩka a Zezi togs-n-taare, n nong tɩrlem.—Karm-y Yɩɩl Sõamyã 45:8.
2 Bõe la b sẽn boond tɩ “tɩrlem sorã”? “Tɩrlem sorã” yaa noy nins a Zeova sẽn gãneg tɩrlmã wɛɛngẽ wã. Hebre wã la gɛrkã buud-goam pʋgẽ, b sã n yeel tɩ f tũ “tɩrlem,” rat n yeelame tɩ f tũ noy b sẽn kõ manesem sẽn yaa sõma wã tallg wɛɛngẽ ne f sũur fãa. A Zeova nin-buiidã sẽn mi tɩ yaa yẽ la tɩrlem soabã yĩnga, b sak n deegame tɩ yẽ n segd n wilg-b manesem sõma nins b sẽn segd n tallã.—Zer. 50:7, MN.
3 Yaa d sẽn na n maood ne d sũur fãa n tũud Wẽnnaam noyã sẽn yaa tɩrsã bal la d na n tõog n ta a yam. (Tõo. 32:4) Yɩl n tõog n maan dẽ, d segd n zãmsa yɛl nins d sẽn tõe n bãng Wẽnnaam a Zeova zugã, ne Biiblã sẽn yaa a Gomdã maasem. D sã n baood n bãngd-a n paasdẽ tɩ kɩtdẽ tɩ d kolgd-a daar fãa, d na n maneg n nonga a tɩrlmã me n paasdẽ. (Zak 4:8) Sẽn paase, d sã n wa rat n yãk yam n maan bũmb sẽn tar yõod wʋsgo, d segd n tũu Wẽnnaam Gomdã a sẽn kɩt tɩ b gʋls ne a vʋʋsem sõngã maasmã sor-wilgri.
TƲƲL-NIF RASEM A 8-14
D SẼN BÃNG BIIBLÃ KARENG PƲGẼ | YƖƖN-SÕAMYÃ 26–28
A Davɩɩd sẽn maan to-to t’a burkĩndã pãng paase
Kẽn-y ne burkĩndi
8 A Davɩɩd pʋʋsame: “Zusoaba, fees-y maam, la y mak maam. Mak-y mam yama ne m sũurã.” (Yɩɩl Sõamyã 26:2) Hebre gom-biig ning b sẽn lebg tɩ ‘yam’ verse kãngã pʋgẽ wã makda nedã tagsa sẽn solgã. Sũurã makda nedã sẽn sɩd yaa a soabã, bũmb nins sẽn tusd-a t’a maand yɛlã, sẽn be a sũurẽ wã la a yamẽ wã. A Davɩɩd sẽn kos t’a Zeova fees-a wã, a ra pʋʋsdame t’a vaees a tagsa wã la a tʋlsmã sẽn solgã n gese.
9 A Davɩɩd bõosame tɩ b maneg a yamã la a sũurã. Wãn to la a Zeova manegd tõnd zʋgã sẽn solgã? A Davɩɩd yɩɩlame: “Mam na n pʋʋsa Zusoaba sẽn sagend-a maamã barka. N-ye, la ne yʋng me mam sũur zãmsda maam.” (Yɩɩl Sõamyã 16:7) Rẽ rat n yeelame tɩ bõe? Rat n yeelame tɩ Wẽnnaam saglsã kẽe a Davɩɩd sũurã wʋsgo, hali n dems a yamã la a sũurã. Tõe n yɩɩ woto ne tõndo, d sã n tũ sagls nins d sẽn paamd ne Wẽnnaam Gomdã, a siglgã, la a siglgã sẽn tʋmd neb ninsã maasmã, la d bas tɩ kẽ d sũurã sõma. D sã n pʋʋsd a Zeova wakat fãa t’a maneg-d woto, na n sõng-d lame tɩ d kẽn ne burkĩndi.
Kẽn-y ne burkĩndi
12 A Davɩɩd goma bũmb a to sẽn paas a burkĩndã pãng yell n yeele: “Mam ka zĩnded ne [pʋ-lik rãmba] ye, la mam ka tũud ne zãmb dãmba me ye. Mam kisgda tʋʋm wẽns maandba tigungu. La mam ka na n zĩnd ne nin-wẽns ye.” (Yɩɩl 26:4, 5) A Davɩɩd ra pa sak n na n zĩnd ne nin-wẽnsã ye. A ra kisa b tũud-n-taare.
13 Yaa wãn to yẽ ne tõndo? Tõnd zãgsdame n pa na n zĩnd ne neb sẽn pa togsd sɩda, ne televiziõ wã, video wã, filim dãmbã la ne ẽntɛrnetã maasem bɩ ne manesem a taab bɩ? Tõnd zãagda d mens ne neb nins sẽn solgd b sẽn sɩd yaa b rãmbã bɩ? Lekollã bɩ tʋʋmã zĩisẽ, kẽer tõe n maana wa b yaa tõnd zo-rãmba, sẽn na yɩl n wa kʋɩɩb-do. Tõnd sɩd ratame n tall zood ne neb sẽn pa kẽnd Wẽnnaam sɩdã pʋgẽ bɩ? Sɩdã kɩɩsdb tõe n maana wa b yaa pʋ-peelem dãmb n yaool n solg b tʋlsmã sẽn yaa kɩt tɩ tõnd bas a Zeova balengã. La yaa wãn to kiris-neb tigingã pʋgẽ, neb kẽer sã n solgd n maand yel-wẽna? Bãmb me solgda b sẽn sɩd yaa b rãmbã. A Jayson sẽn yaa kãsemb sõngd masã wã ra tara zo-rãmb woto a bi-bɩɩlem wakate. Ad a sẽn gom b yell to-to: “Daar a yembre, bãmb ned a yembr yeela maam: ‘Baa tõnd sẽn maand bũmb ning fãa masã koɛɛg kae ye, bala dũni paalgã sã n wa, rẽ tɩ d zoe n kiime. D pa na n bãng tɩ d konga bũmb ye.’ Gom-kãngã kɩtame tɩ mam nek tẽebã wɛɛngẽ. M pa rat tɩ dũni paalgã sã n wa, bɩ mik tɩ m kiime ye.” A Jayson bãnga yam n bas kom-bɩ-kãensã tũud-n-taare. Tʋm-tʋmd a Poll keooga woto: “Da belg-y y mens ye, tũud-n-ta-wẽns sãamda nin-sõamyã.” (1 Korẽnt dãmba 15:33) Ad sɩd yaa yam bũmb tɩ d lak d mens ne tũud-n-ta-wẽnse!
Kẽn-y ne burkĩndi
17 Sɛk-roogã ne a maoongã zĩig ra yaa a Zeova balengã nif Israɛlle. A Davɩɩd pʋʋsa woto n wilg a sũ-noog ne zĩ-kãnga: “Zusoaba, mam nong n kaoosa yãmb doogẽ, zĩig ninga yãmb ziir sẽn be wã.”—Yɩɩl Sõamyã 26:8.
18 Tõnd nong n tigimda zĩis nins d sẽn zãmsd yɛl a Zeova wɛɛngẽ wã bɩ? Rĩung Roog fãa b sẽn siglẽ tẽeb zãmsg sẽn pa vaand yaa baleng hakɩkã nif sakã pʋgẽ. Sẽn paase, tõnd tara d yʋʋmd-yʋʋmd tigis-kãsemsã, d tigims gĩnd tigis-kãsemsã la d daar a yembr tigis-kãsemsã. B tẽegda tõnd a Zeova noyã tigis-kãens sasa. D sã n zãms n ‘nong-b wʋsgo,’ d na n data ne d sũur fãa n kẽng tigissã la d kelg neere, d sã n wa ta be. (Yɩɩl Sõamyã 119:167) Ad sɩd yaa bũmb sẽn kengd tẽebo, d sã n zĩnd ne d tẽed-n-taasã sẽn dat tõnd neerã, la sẽn sõngd tõnd tɩ d ket n kẽnd ne burkĩndã.—Hebre dãmba 10:24, 25.
D bʋgs Wẽnnaam Gomdã zug neere
A Zeova sõngda neb nins sũy sẽn sãamã
15 Yɩɩl gʋlsd a Davɩɩd ra gʋlsa woto: “Mam ba ne m ma sã n bas maam, Zusoaba na n deega maam.” (Yɩɩl Sõamyã 27:10) D sẽn mi t’a Zeova nonga tõnd n yɩɩd d roagdbã sẽn nong-dã sɩd kengda d raoodo! Baa tõnd roagd sã n bas-d bɩ a sã n nams tõnd tɩ zabd-d wʋsgo, rẽ pa tõe n kɩt t’a Zeova pa ges tõnd yell sõma ye. (Rom dãmba 8:38, 39) Ning-y y yamẽ tɩ Wẽnnaam boonda neb nins a sẽn nongã tɩ b wat a nengẽ. (Zã 3:16; 6:44) Baa nebã sẽn maan yãmb bũmb ning fãa, y saasẽ Ba wã nong-y lame!
TƲƲL-NIF RASEM 15-21
D SẼN BÃNG BIIBLÃ KARENG PƲGẼ | YƖƖN-SÕAMYÃ 29–31
Wẽnnaam sẽn kibind tõndã wilgdame t’a nong-d lame
it-1 863 s. 10
Nenga
‘Solg f nengã’ võor yaa toor-toore. Bee ne yɛl nins sẽn kɩt tɩ b togs gomdã. Naoor wʋsgo, Wẽnnaam a Zeova sã n solg a nengã, rat n yeelame t’a reega a barkã, bɩ a pãngã sẽn da be neb nins zutã n bas-ba. A sã n maan woto, tõe n yɩɩ nin-yend bɩ neb sull kɩɩsg yĩnga. Wala makre, yɩɩ woto ne Israyɛll nin-buiidã. (Zoob 34:29; Yɩɩn. 30:5-8; Eza. 54:8; 59:2) Sasa ninga, a Zeova sã n maan woto, tõe n wilgame t’a pa rat n yɩ yãg-yãg n maan bũmb n wilg a sẽn yaa Wẽnnaam buudã, bala a gũuda wakat sẽn zemse. (Yɩɩn. 13:1-3) A Davɩɩd pʋʋsa Wẽnnaam n kos-a yaa: “Wẽnemd f neng n da le ges mam yel-wẽnã ye.” A ra kota Wẽnnaam t’a kõ-a a yel-wẽnã sugri, bɩ a ning-b kɛɛnga.—Yɩɩn. 51:9; ges-y Yɩɩn. 10:11.
w07 1/3 19 s. a 1
Gũ-y-yã a Zeova ne sũ-noogo
B rɩka a Zeova kiblgã sẽn nafd tõnd to-to wã n mak ne tɩɩg biig sẽn bɩt to-to wã. Wẽnnaam kiblgã wɛɛngẽ, Biiblã yetame tɩ kiblgã “womda biis sẽn yaa laafɩ la tɩrlem, neb nins a sẽn zãmsã yĩnga.” (Ebre-rãmbã 12:11) Wa tɩɩg biig bɩʋʋng sẽn dɩkd sẽk to-to wã, sẽn na yɩl n tõog n toeem d yel-manesmã tɩ zems ne zãmsg ning Wẽnnaam sẽn kõt tõndã baooda sẽka. Wala makre, tõnd yel-manesem ning sã n kɩtame tɩ b reeg tʋʋm nins d sẽn da tar tigingã pʋgẽ wã, d sã n sak n gũ a Zeova na n sõngame tɩ d ra koms raood n bas ye. D sã n wa be yell a woto buud pʋgẽ, a Zeova sẽn vẽneg a Davɩɩd t’a togs goam ninsã tõe n kenga d raoodo. Biiblã yetame yaa: “A [Wẽnnaam] sũur sã n puug ne neda, yaa wakat bilf yĩng bala. La a maanda ned ning sẽn tat a yamã neer a vɩɩmã tõre.Yãbr tõe n zĩnda zaabre, la yibeoogo, yaa sũ-noog kaasgo.” (Yɩɩn-sõamyã 30:5) D sã n gũud a Zeova, la d tũud Wẽnnaam Gomdã saglsã la siglgã sẽn kõt tõnd sagls ninsã, d ‘sũ-noog kaasgã’ wakat na n taame.
Sɩd tek yam n kos sugr rat n yeelame tɩ bõe?
18 Ned b sẽn yiis tigingã pʋgẽ sã n dat n wilg t’a sɩd teka yam n kot sugri, a segd n wata tigissã n pa vaandẽ, n tũud kãsem-dãmbã sẽn sagend-a t’a pʋʋsd wakat fãa la a zãmsd Biiblã. Sẽn paase, a segd n modgame n zãag a meng ne yɛl nins sẽn tõe n wa kɩt t’a le lʋɩ a yel-wẽndã pʋgẽ wã. A sã n modg n le paam zood sõma ne a Zeova, a tõe n basa a yam t’a Zeova na n kõ-a-la sugri, la tɩ kãsem-dãmbã na n lebs n deeg-a-la tigingã pʋgẽ. Yaa vẽeneg tɩ kãsem-dãmbã sã n wa baood n na n bãng ned sẽn maan yel-wẽn-kãseng sã n sɩd teka yam n kot sugri, b ningda b yamẽ tɩ yɛlã pa taab ye. B pa yɩt yãg-yãg me n kaood bʋʋd ye.
D bʋgs Wẽnnaam Gomdã zug neere
wp23 N° a 1 6 s. a 3
Pʋʋsgã “Sik-y y yɩɩrã fãa n bas ne-a”
D sã n pʋʋsd a Zeova n gomd ne-a, kɩtdame tɩ d maneg n kɩs sɩd t’a geta d yelle. D na n tagsa wa yɩɩn-gʋlsdã sẽn yeelã. A yeelame yaa: “Yãmb yãa mam namsgã. Yãmb mii mam sũ-sãangã sẽn yaa wʋsg to-to wã.” (Yɩɩn-sõamyã 31:7) D sẽn mi tɩ d sẽn namsdã sãamda a Zeova sũurã, tõe n sõng-d lame tɩ d kell n mao n da koms raood n bas ye. A nee d zu-loeesã yaa sɩda, la pa rẽ bal ye. A wʋmda d zu-loɛɛgã võor n yɩɩd ned buud fãa, la a sõngd tõnd tɩ d paamd belsg la raood kengr ne Biiblã maasem.
TƲƲL-NIF RASEM 22-28
D SẼN BÃNG BIIBLÃ KARENG PƲGẼ | YƖƖN-SÕAMYÃ 32–33
Bõe yĩng tɩ ned sẽn maan yel-wẽn-kãseng segd n vẽneg n togse?
w93 15/3 9 s. a 7
A Zeova maan-neerã sõnga tõnd tɩ d tẽed manegre
7 Ned sã n maan yel-wẽn-kãsems n kɩɩs Wẽnnaam noyã, tõe n yɩɩ toog ne-a t’a vẽneg a yel-wẽnã n togs neda, bɩ a Zeova mengã. Ned sã n be yell a woto pʋgẽ, tõe n baasa wãna? Yɩɩn-sõamyã 32 wã pʋgẽ, a Davɩɩd yeelame yaa: “Mam sẽn wa n sĩndã [wall m sẽn wa n pa vẽneg m yel-wẽndã n togsã], mam kõabã pãng ra boogdame, m sẽn da wẽed sir daarã tõrã yĩnga. Bala wĩndg la yʋngo, yãmb nugã [a Zeova] ra zɩsa mam zugu. Mam pãngã saa wa sɩpaolg wakat tʋʋlg sẽn wẽ koom t’a kʋɩ.” (Vɛrse a 3 ne a 4) A Davɩɩd sẽn da kɩɩs a Zeova wã baoome n na n solg a yel-wẽndã, la a maan a toog kae ne a sũur kasetã sẽn da ningd-a taalã. Sũ-sãamsã tolg n kɩtame t’a pãngã boog wʋsgo, hal t’a ra lebg wa tɩɩg sẽn kʋɩ n pa le tõe n tob ye. Tõeeme meng t’a lʋɩɩ bãaga. Sẽn yaa a soab fãa, a ra pa le tar sũ-noog ye. Yãmb sã n wa be yell a woto buud pʋgẽ, bõe la y segd n maane?
cl 262 s. a 8
Wẽnnaam sẽn “kõt sugr wʋsgo”
8 A Davɩɩd sẽn da tek yam n kos sugrã yeelame yaa: “Mam wa n baas n vẽnega m yel-wẽndã n togs yãmba. Mam pa lud m kongrã ye . . . La yãmb kõo maam sugr m kongrã ne m yel-wẽnã yĩnga.” (Yɩɩn-sõamyã 32:5) Ebre gom-bil ning b sẽn lebg ka tɩ kõ sugrã rat n yeelame tɩ “zẽke” bɩ “tall n looge.” B sẽn lebg-a to-to ka wã rat n yeelame tɩ “zẽk a yel-wẽndã n looge.” Dẽnd a Zeova zẽka a Davɩɩd yel-wẽnã bɩ a tall-b lame n looge. Sãmbg kae tɩ rẽ sõnga a Davɩɩd t’a yam gãande. (Yɩɩn-sõamyã 32:3) Tõnd me tõe n basa d yam zãng-zãng tɩ ne a Zeezi maoongã maasem, Wẽnnaam na n talla neb nins sẽn maan yel-wẽn n kot-a sugrã yel-wẽnã n looge.—Matiye 20:28.
w01 1/6 30 s. a 1
Ned sã n vẽneg a yel-wẽnd n togse, wata ne yolsgo
A Davɩɩd sẽn vẽneg a yel-wẽndã n togsã poore, a ra pa le get a meng wa ned ka võor ye. A Zeova sẽn vẽneg-a t’a togs goam nins Yɩɩn-sõamyã wã pʋgẽ wã wilgdame t’a paama yolsgo, la t’a ra rata ne a sũur fãa n kell n maan sɩd ne Wẽnnaam. Wala makre, a yeela Yɩɩn-sõamyã 32:1 wã pʋgẽ yaa: “Sũ-noog soab la ned ning sẽn paam a beegr sugri, ned ning sẽn paam tɩ b lud a yel-wẽnde.” Baa ned yel-wẽn wẽnem sẽn yaa to-to, a sã n sɩd tek yam n kos sugri, a yellã tõe n baasa neere. A sã n sɩd sak n deeg t’a beega a Zeova wa a Davɩɩde, yaa bũmb sẽn wilgd t’a sɩd teka yam n kos sugri. (2 Sãmwɛll 12:13) A pa segd n bao padems a Zeova taoore, wall n bao n na n ning neb a taabã taal a yel-wẽnã yĩng ye. Vɛrse a 5 wã yetame yaa: “Mam wa n baas n vẽnega m yel-wẽndã n togs yãmba. Mam pa lud m kongrã ye. Mam yeelame: ‘Mam na n vẽnega m beegrã n togs a Zeova.’ La yãmb kõo maam sugr m kongrã ne m yel-wẽnã yĩnga.” Ned sã n sɩd vẽneg a yel-wẽn n togse, a paamda yolsgo. Rẽ n so t’a pa segd n bas t’a sũur kasetã ket n ningd-a taal a pĩnd yel-wẽnã yĩng ye.
D bʋgs Wẽnnaam Gomdã zug neere
Yɩɩl Sõamyã sebrã pipi babg tags-kãsemse
33:6—Zusoabã bɩ a Zeova “noor vʋʋsmã” yaa bõe? Vʋʋsem kãng yaa Wẽnnaam pãngã bɩ a vʋʋsem sõngã a sẽn tall n naan saasã. (Sɩngre 1:1, 2) B boond-a lame t’a noor pemsem, bala, a tõe n tũnuga ne-a wala pemsem sẽn tar pãng n maan bũmb zĩ-zãrgẽ.
TƲƲL-NIF RASEM 29–SIG-NOY RASEM A 5
D SẼN BÃNG BIIBLÃ KARENG PƲGẼ | YƖƖN-SÕAMYÃ 34–35
‘Pẽg-y-yã a Zeova wakat fãa’
D lagem taab n pẽg a Zeova yʋʋrã
11 “Mam na n waooga Zusoaba daar fãa. Mam noor pẽgda bãmba n ka basdẽ ye.” (Yɩɩl Sõamyã 34:2) A Davɩɩd sẽn da zoet n soondẽ wã yĩnga, ra pa segd n yaa nana ne-a t’a paam rɩɩb la bũmb a taab ye. La a sẽn yeel bũmb ning yɩɩllã pʋgẽ wã wilgdame t’a pa bas tɩ zu-loe-kãngã gɩdg-a t’a pa pẽg a Zeova ye. Ad woto sɩd yaa mak-sõng d sẽn segd n tũ zu-loees wakate! D sẽn wa n be zĩig ning fãa, yaa lekollẽ wã, d tʋʋmã zĩigẽ, yaa ne d saam-biisã bɩ koe-moonegã wakat me, bũmb ning sẽn segd n pak tõnd n yɩɩd yaa d pẽg a Zeova. D tara bʋʋm wʋsg n na n maan dẽ. Wala makre, d pa tõe n bãng bõn-neeb nins a Zeova sẽn naan tɩ kõt-d sũ-noogã fãa n sa ye. D we n ges a sẽn tũnug ne a siglgã babg ning sẽn be tẽngã zugã n maan bũmb ninsã! Rũndã-rũndã, a Zeova kɩtame tɩ nin-sakdb tʋm a tʋʋmdã wʋsgo, baa nin-kãensã sẽn pa zems zãngã. Yaa vẽeneg tɩ dũniyã nin-kãsemsã sẽn tõog n maan bũmb ninsã pa tõe n dɩk n mak ne Wẽnnaam sẽn maan bũmb ninsã ye. A Davɩɩd ra gʋlsa woto me: “Zusoaba, ba a yembr ka be wẽnnaam dãmba sʋk n wẽnd yãmb ye, la sẽn zem yãmb tʋʋma ka be ye.” (Yɩɩl Sõamyã 86:8) Rẽ yĩnga, yãmb pa tagsd tɩ gom-kãensã yaa sɩd sɩda?
D lagem taab n pẽg a Zeova yʋʋrã
13 “Mam sũur nooma ne Zusoabã. Naong rãmb na n wʋm n paama sũ-noogo.” (Yɩɩl Sõamyã 34:3) Gom-kãensã pa rat n wilg t’a Davɩɩd ra wukda a meng a sẽn tõog n maan bũmb ninsã yĩng ye. Wala makre, a pa gom a sẽn tõog n maan to-to n belg Gat rĩmã yell n wuk a meng ye. A ra miime t’a sẽn wa n be Gat tẽngẽ wã, yaa a Zeova n kogl-a, la tɩ yaa ne a Zeova sõngr la a sẽn tõog n põsã. (Yelbũna 21:1) Dẽnd a Davɩɩd ra pa pẽgd a meng ye, yaa a Zeova la a ra pẽgda. A sẽn maan woto wã kɩtame tɩ naong rãmbã, rat n yeel tɩ sik-m-mens rãmbã lebg a Zeova zo-rãmba. A Zezi me pẽga a Zeova yʋʋrã, tɩ kɩt tɩ sik-m-mens rãmbã sẽn sakd n deegd zãmsgã lebg a Zeova zo-rãmba. Rũndã-rũndã, sik-m-mens rãmbã wat n naagda kiris-neb nins sẽn paam vʋʋsem sõng zaeebã, tɩ b Zusoab yaa a Zezi wã. (Kolos rãmba 1:18) Sik-m-mens rãmbã sã n wʋmd Wẽnnaam balemdbã sẽn pẽgd a yʋʋrã, la b wʋmd koɛɛg ning sẽn be Biiblã pʋgẽ wã võor ne Wẽnnaam vʋʋsem sõngã maasem, kẽeda b sũyã tɩ b rat n naag kiris-nebã n pẽg Wẽnnaam.—Zã 6:44; Tʋʋma 16:14.
D lagem taab n pẽg a Zeova yʋʋrã
15 “Mam baooda Zusoabã la bãmb leokda maam n yolsd maam ne m dabeema fãa.” (Yɩɩl Sõamyã 34:5) A Zeova sẽn sõng a Davɩɩdã ra yaa bũmb sẽn tar yõod wʋsg a Davɩɩd nifẽ. Rẽ n so t’a yeel tɩ “naong soab boolame, la Zusoaba wʋmame la b fãaga yẽnda ne a tooda fãa.” (Yɩɩl Sõamyã 34:7) Tõnd sã n tigimd ne d tẽed-n-taasã, d tõe n togs-b-la kibay sẽn wilgd a Zeova sẽn sõng tõnd zu-loees pʋsẽ to-to. Rẽ na n kenga b tẽebã, wala a Davɩɩd goamã me sẽn keng neb nins sẽn da be a poorẽ wã tẽebã. A Davɩɩd tũud-n-taasã ra geta a Zeova, tɩ b nensã pɩnd tɩ yãnd ka tar-b ye. (Yɩɩl Sõamyã 34:6) Baa b sẽn da zoet n soond a Sayull yĩngã, b pa zoe yãnd ye. B sẽn da kɩs sɩd tɩ Wẽnnaam bee ne a Davɩɩdã, b nensã ra pɩndame. Woto me, neb nins sẽn nan bãng Wẽnnaam paalmã, n paas neb nins sẽn yaa kiris-neb hakɩk hal sẽn kaoosã fãa teega a Zeova. B mensã sẽn yãt a Zeova sẽn sõngd-b to-to wã kɩtame tɩ b nensã pɩnda, tɩ wilgdẽ tɩ b rat n kell n yɩ sakdba.
D bʋgs Wẽnnaam Gomdã zug neere
Yɩɩl Sõamyã sebrã pipi babg tags-kãsemse
35:19—A Davɩɩd sẽn kos tɩ Wẽnnaam da bas tɩ neb nins sẽn kis yẽ wã wẽgs b nin ne-a wã, a ra rat n yeelame tɩ bõe? Ninã wẽgsg tõe n wilgdame t’a Davɩɩd bɛɛbã sũy ra nooma ne mag-wẽns nins b sẽn da magd a zugã. A Davɩɩd ra kota Wẽnnaam t’a kɩt tɩ rẽ ra yɩ ye.