Bõe la Biiblã yet sabab-wẽnsã wɛɛngẽ?

Biiblã sẽn yete

Pa Wẽnnaam n wat ne sabab-wẽnsã ye. La a geta neb nins sabab-wẽnsã sẽn namsdã yelle. Wẽnnaam Rĩungã na n menesa bũmb nins fãa sẽn kɩtd tɩ ninsaalbã namsdẽ wã, wala makre, sabab-wẽnsã. La nananda, Wẽnnaam belsda neb nins sabab-wẽnsã sẽn namsdã.—2 Korẽnt rãmbã 1:3.

• Bõe yĩng tɩ d tõe n kɩs sɩd tɩ Wẽnnaam pa tũnugd ne sabab-wẽnsã n sɩbgd ninsaalbã?

• Sabab-wẽnsã wilgdame tɩ d vɩɩ yaoolem wakatã bɩ?

• Wãn to la Wẽnnaam sõngd neb nins sẽn namsd sabab-wẽns yĩngã?

• Biiblã tõe n sõng-d lame tɩ d segl d mens sabab-wẽng yĩng bɩ?

• Biiblã vɛrse-rãmb sẽn tõe n bels neb nins sẽn namsd sabab-wẽns yĩngã

Bõe yĩng tɩ d tõe n kɩs sɩd tɩ Wẽnnaam pa tũnugd ne sabab-wẽnsã n sɩbgd ninsaalbã?

Biible pʋgẽ, b wilgame tɩ Wẽnnaam tũnuga ne koom la bugum n sɩbg neba. La sabab-wẽnsã yaa toor fasɩ ne rẽ.

• Sabab-wẽnsã kʋʋda neba, la b komsd sãnda n pa bakdẽ ye. Biible pʋgẽ, b wilgame tɩ yaa neb takɩ la Wẽnnaam sɩbg-yã. Wala makre, Wẽnnaam sẽn wa n na n sãam Sodom ne Gomoorã, a baka nin-sõng a Lot ne a kom-pugli a yiibã n pa sãam-b ye. (Sɩngre 19:29, 30) Wẽnnaam gesa wakat-kãng nebã sũyẽ, n sãam neb nins a sẽn geelg wa nin-wẽnsã bala.—Sɩngre 18:23-32; 1 Sãmwɛll 16:7.

• Sabab-wẽnsã wae n lingda nebã. La Wẽnnaam da keoogda nin-wẽnsã wakat fãa n yaool n sɩbg-ba. Neb nins sẽn da kelgd a keoogrã paamd n põsame.—Sɩngre 7:1-5; Matiye 24:38, 39.

• D tõe n yeelame tɩ ninsaalbã manesem la b tʋʋm-tʋmdɩ kẽer wata ne sabab-wẽnse, la b kengd sãnda. Wãn to? B rẽgemda tẽn-gãongã, koomã la pemsmã. Sẽn paase, b meta rot zĩis tẽn-digimds sẽn tar pãnga, zĩis sa-kãsems sẽn tõe n sãam rotã, la zĩis a taaba. (Vẽnegre 11:18) Ninsaalbã pa segd n ning Wẽnnaam taal b yam-yãkrã sẽn wat ne zu-loees ninsã yĩng ye.—Yel-bũnã 19:3.

Sabab-wẽnsã wilgdame tɩ d vɩɩ yaoolem wakatã bɩ?

N-ye. Biiblã bãngr-goamã wilgame tɩ dũniyã sã n wa rabd a saabẽ, wall yaoolem wakatã sabab-wẽns na n zĩndame. (Matiye 24:3; 2 Tɩmote 3:1) Wala makre, a Zeezi yeela tõnd wakatã wɛɛngẽ yaa: “Kom la tẽn-digimdg na n zĩnda zĩig-zĩiga.” (Matiye 24:7) Ka la bilfu, Wẽnnaam na n menesa bũmb nins fãa sẽn wat ne toog la namsgã, wala makre, sabab-wẽnsã.—Vẽnegre 21:3, 4.

Wãn to la Wẽnnaam sõngd neb nins sẽn namsd sabab-wẽns yĩngã?

• Wẽnnaam tũnugda ne a Gomdã sẽn yaa Biiblã n belsd neb nins sẽn namsd sabab-wẽns yĩngã. Biiblã wilgdame tɩ Wẽnnaam geta tõnd yelle, la tɩ d sã n namsdẽ sãamda a sũuri. (Ezayi 63:9; 1 Pɩyɛɛr 5:6, 7) Biiblã leb n wilgame tɩ Wẽnnaam pʋlmame tɩ wakat n wat tɩ sabab-wẽns pa na n le zĩnd ye.—Ges-y zĩ-gũbr ning gom-zug sẽn yaa: “Biiblã vɛrse-rãmb sẽn tõe n bels neb nins sẽn namsd sabab-wẽns yĩngã.”

• Wẽnnaam tũnugda ne a nin-buiidã n songd neb nins sabab-wẽns sẽn paamã. Wẽnnaam tũnugda ne a nin-buiidã sẽn dɩkd a Zeezi togs-n-taarã n sõngd neb nins sẽn namsd sabab-wẽns yĩngã. B ra pĩnd n togsame t’a Zeezi na n belsa “neb nins sũy sẽn sãamã,” la “neb nins fãa sẽn be sũ-sãang pʋgẽ wã.” (Ezayi 61:1, 2) Wẽnnaam nin-buiidã me modgd n maanda woto.—Zã 13:15.

  Wẽnnaam leb n tũnugda ne a nin-buiidã n sõngd neb nins sabab-wẽns sẽn namsdã tɩ b paamd bũmb nins sẽn yaa tɩlɛ ne-bã.—Tʋʋma 11:28-30; Galat-rãmbã 6:10.

Biiblã tõe n sõng-d lame tɩ d segl d mens sabab-wẽng yĩng bɩ?

N-ye. Baa ne Biiblã sẽn pa sebr sẽn wilgd bũmb ning takɩ d sẽn tõe n maan n segl d mens sabab-wẽng yĩngã, a tara sagls sẽn tõe n sõng-do. Wala makre:

• Reng-y n tags-y n ges-y bũmb ning y sẽn tõe n maan n segl y mens sabab-wẽns yĩnga. Biiblã yetame: “Gũus-m-meng soab yãta yell n solge.” (Yel-bũnã 22:3) D sã n deng n bao n bãng d sẽn na n maanã nand tɩ yell wa, d wilgdame tɩ d yaa yam dãmba. Wala makre, d tõe n segla zoees korg d sẽn tõe n tall n zoe sabab-wẽng sasa, la d sõs ne d zakã rãmb n bãng zĩig ning d sẽn na n seg taab sabab-wẽng sasa.

• Nand-y y vɩɩmã n yɩɩd y paoongã. Biiblã yeelame yaa: “Tõnd pa zã baa fʋɩ n wa dũniyã pʋgẽ, la d pa tõe n zã bũmb n yi me ye.” (1 Tɩmote 6:7, 8) D segd n sak n basa d zakã wall d paoongo, sẽn na yɩl n põs sabab-wẽng sasa. Yɩta sõma tɩ d tẽeg tɩ d vɩɩmã tara yõod n yɩɩd bũmb fãa.—Matiye 6:25.