SOGSG KOM-BƖƖSÃ SẼN SOKDE
Bõe la m tõe n maan tɩ m yãn-zoeerã sa?
Sẽn pa sõma: Yãn-zoeerã tõe n kɩtame tɩ f pa paam zo-rãmb sẽn yaa sõma bɩ n bãng bũmb kẽer neb a taabã nengẽ ye.
Sẽn yaa sõma: Pa wakat fãa la yãn-zoeerã yaa wẽng ye. A songd-f lame tɩ f reng n tags n yaool gome. A songd-f lame me tɩ f yɩ ned sẽn gũusd n get yɛlã, la sẽn kelgd a taabã neere.
Sẽn yaa sõma n yɩɩda: Yãn-zoeerã yaa bũmb sẽn tõe n wa sa. Woto wã, f tõe n maoo ne zu-loees nins yãn-zoeerã sẽn wat ne wã n tõoge. Sõs-kãngã na n sõng-f lame tɩ f bãng f sẽn tõe n maan rẽ to-to.
Bao n bãng bũmb ning sẽn kɩt tɩ f zoet yãndã
Yãn-zoeer tõe n kɩtame tɩ f yɛɛsd n pa rat n yaas ned taoor n sõs ne-a ye. Woto tõe n kɩtame tɩ f getẽ tɩ f yaa f yembre, tɩ yaa wa f zĩi roog sẽn yaa lik pʋgẽ f yembre. F sã n wa bãng bũmb ning sẽn kɩt tɩ f zoet yãndã, f na n yãame tɩ tõe tɩ pa bʋʋm sẽn sek f na zoe yãnd ye. D gom bũmb a tãab sẽn kɩt tɩ neb kẽer zoet yãndã yelle.
Pipi: “M pa mi m sẽn na gom bũmb ning yell ye.”
Sɩdã: Pa fo sẽn yet bũmb ningã la nebã tẽr n tɩ yɩɩd ye. La yaa b manesem sẽn yaa to-to b sã n wa be ne foomã. F sã n modg n maneg n kelgd nebã neere, la f tʋll n bãng neb a taabã sẽn dat n togs foo bũmb ningã, na n sõng-f lame tɩ f tõog f yãn-zoeerã.
Tags n gese: Ãnda la f rat t’a yɩ f zoa? Ned sẽn tar bũmb wakat fãa n na n togs bɩ, bɩ ned sẽn maagd a yĩng n kelgd a taabã?
Yiibu: “Nebã na n tagsame tɩ b sã n be ne maam yaa yam-yiisgu.”
Sɩdã: F yaa yãn-zoɛt tɩ f pa yãn-zoɛt me, nebã pa tõe n pa yã bũmb n togs f zug ye. F sã n bas tɩ nebã bãng f sẽn sɩd yaa ned ningã, na n sõng-f lame tɩ f tõog f rabeemã, la sõng nebã tɩ b tall tagsg sẽn zems fo zugu.
Tags n gese : F sã n tagsdẽ tɩ nebã tara tags-kɛg f zugu, tõe tɩ yaa fo mengã n tar tagsa sẽn pa zems b zugu, n kaood b bʋʋdo.
Tãabo: “M sã n togs bũmb tɩ pa zemse, yãndã na n yõk-m lame.”
Sɩdã: Yel-kãngã buud paamda nebã fãa. F sã n gom n tudgi, n tẽeg tɩ yaa f sẽn pa zems zãngã yĩnga, tõe n sõng-f lame tɩ f tõog f rabeemã.
Tags n gese: F sã n be ne neb sẽn sakd n deeg tɩ nebã fãa tudgdame, pa noom-f sɩda?
Fo miime bɩ? Kẽer tagsdame tɩ b sẽn toond b taabã mesaaz-rãmb wʋsgã yĩnga, b pa yãn-zoɛtb ye. F tõe n yõga zood sõma ne neda, f sã n sõsd ne a soabã vẽeneg-vẽenega, tɩ pa tũ ne mesaaz-rãmb maasem ye. A Seri Turkle sẽn yaa bãngd sẽn tar minim ninsaalbã tagsa la b yel-manesmã wɛɛngẽ wã yeelame: “Yaa foo ne ned sã n ne taaba, n sõsd ne taab n wʋmd taab koees la y bãngd taab sõma n tɩ yɩɩda.”a
F sã n tõog f rabeemã, f pa na n le yɛɛsd n pa rat n sõsd ne nebã neng ne neng ye
F sẽn tõe n maan to-to
Ra rɩkd f mengã n makd ne f taabã ye. Ra yɩ ned sẽn pa mi maag-m-meng ye. F sẽn tog n maan yaa f modg tɩ f yãn-zoeerã booge. Woto na n kɩtame tɩ f paam zo-rãmb sẽn yaa sõma, la f bãng bũmb kẽer b zugu.
“Sõsg pa tɩlɛ tɩ wogle, wall f reeg goamã n yãmb tɩ neb a taabã pa tar b sẽn yet ye. F tõe n togsa a soabã f yʋʋr la f sondre, bɩ n sok-a sogsg a wãn bala.”—A Alicia
Biiblã sẽn yete: “Bɩ ned kam fãa mak a meng tʋʋm n gese, tɩ rẽ la a na n paam bũmb a sẽn tõe n tik n maan sũ-noog a meng yĩng bala, la pa a sẽn na n mak a meng ne ned a to ye.”— Galat-rãmbã 6:4.
Gũusd n getẽ. Ges neb nins pẽnegr sẽn yaa nana wã, la f gũus n ges b sẽn sõsd ne b taabã to-to wã. Bõe la b maand tɩ yaa sõma? Bõe la b maand tɩ pa sõma? Bõe la b maand tɩ noom foo, tɩ f rat n dɩk b togs-n-taare?
“Gũus n ges neb nins sẽn yõgd zood nana-nana ne b taabã sẽn maand toto wã, la f rɩk yam b nengẽ. Ges b manesem sẽn yaa to-to bɩ b sẽn yet bũmb ninga, b sã n wa sõsd ne ned b sẽn da zɩ n yã.”—A Aaron
Biiblã sẽn yete: “Kut n saasd kutu. Woto me, ned n sõngd a zoa t’a toeem n lebg sõma n paase.”—Yel-bũnã 27:17.
Sokd sogsgo. Nebã nong n kõta b tagsg yɛl kẽer wɛɛngẽ. Rẽ wã, f sã n sokd sogsgo, sõngd-f lame tɩ f tõog n sɩng sõsg ne neda. Woto kɩtdame tɩ pa foo la nebã na n get n tɩ yɩɩd ye.
“F sã n deng n segl f menga, boogda f yɩɩrã. Nand tɩ f tɩ tigim ne f zo-rãmbã, f tõe n tagsa bũmb kẽer f sẽn tõe n sõs a zug ne-ba, wall sogsg f sẽn tõe n sok-ba. Rẽ tõe n kɩtame tɩ f sã n wa sõsd ne ned f sẽn pa mi bɩ f ra yɛɛs wʋsg ye.”—A Alana.
Biiblã sẽn yete: “Ra bao-y y mens nafr bal ye. Bao-y y taabã nafr me.”—Filip rãmbã 2:4.
a A goamã sẽn be sebr ning pʋgẽ wã yʋʋr yaa: “Le pouvoir de la conversation a l’heure du numerique.”