Yʋʋmd fãa, a Zeova Kaset rãmb kom-bɩɩs wʋsg n deegd lisgu. F magdame n na n wa reeg lisg bɩ? Sã n yaa woto, f segd n deng n bãnga rɩk f meng n kõ a Zeova la reeg lisgã sẽn dat n yɛɛlga.

• Reeg lisg rat n yeelame tɩ bõe?

• Rɩk f meng n kõ a Zeova wã rat n yeelame tɩ bõe?

• Bõe yĩng tɩ tar yõod tɩ f reeg lisgu?

• Kom-bɩɩs a taab sẽn yete

• Tags-kɛga, la sɩdã

Reeg lisg rat n yeelame tɩ bõe?

Biiblã pʋgẽ, lisg yaa b sẽn na n bõr ned koom pʋgẽ zãnga, la pa b sẽn na n mes-a wall b kɩrgd a zugã koom bal ye. A makda bũmb sẽn tar yõod wʋsgo.

• B sã n wa bõrd-f koomẽ wã, wilgda zãma wã taoor tɩ f pa na n le lʋɩɩs f mengã raab taoor ye.

• B sã n wa yiis foo koomẽ wã, wilgdame tɩ rẽ tɛka, yaa Wẽnnaam daabã la f na n lʋɩɩs taoor f vɩɩmã pʋgẽ.

Fo sã n reeg lisgu, f sak n deega zãma wã taoor t’a Zeova bal n tar sor n na n lugl noy sẽn wilgd sẽn yaa sõma ne wẽng n bake. Sẽn paase, rẽ wilgda vẽeneg tɩ f yãka yam n na n maan a raabã ne yamleoogo.

Ad sokre: Bõe yĩng tɩ f segd n wilg zãma wã taoor tɩ f rat n saka a Zeova f vɩɩmã tõre? Ges 1 Zã 4:19 la Vẽnegr 4:11.

Rɩk f meng n kõ a Zeova wã rat n yeelame tɩ bõe?

Nand tɩ f reeg lisgu, f segd n dɩka f meng n kõ a Zeova. Wãn to?

F pʋʋsda a Zeova, n pʋlm-a tɩ f na n tũ-a-la wakat fãa yĩnga, la f maan a raabã baa yɛlã bɩ nebã manesem sẽn yaa to-to fãa.

Lisgã reegr wilgda zãma wã taoor tɩ f rɩka f meng n kõ a Zeova. A wilgda neb a taabã tɩ f kɩɩsa f mengã raabo, la tɩ masã f vɩɩ a Zeova yĩnga.—Matiye 16:24.

Ad sokre: Fo sã n vɩ a Zeova yĩnga, bõe yĩng tɩ f vɩɩmã na n yɩ sõma? Ges Ezayi 48:17, 18 la Ebre-rãmbã 11:6.

Bõe yĩng tɩ tar yõod tɩ f reeg lisgu?

A Zeezi yeelame tɩ neb nins fãa sẽn dat n lebg a karen-biisã segd n deega lisgu. (Matiye 28:19, 20) Dẽnd kiris-nebã me segd n deega lisgu. Sɩd me, Biiblã wilgame tɩ ned sã n dat fãagre, yaa tɩlɛ t’a reeg lisgu.—1 Pɩyɛɛr 3:21.

La f sã n dat n deeg lisgu, segd n yɩɩ f sẽn nong a Zeova la f rat n pʋʋs-a barkã yĩnga. Fo tagsg segd n yɩɩ wa yɩɩn-gʋlsdã sẽn yeelã. A yeelame yaa: “Bõe la m na n maan n lebs a Zeova, bõn-sõma nins fãa a sẽn maan n kõ maamã yĩnga? Mam na n . . . boola a Zeova yʋʋrã. Mam na n pidsa mam sẽn pʋlem a Zeova bũmb ninsã.”—Yɩɩn-sõamyã 116:12-14.

Ad sokre: Bõn-sõma-bʋs la a Zeova maan n kõ foo, la bõe la f tõe n maan n lebs-a? Ges Tõodo 10:12, 13 la Rom dãmbã 12:1.

Fo sã n tũud Biiblã noyã la f baood Wẽnnaam zoodo, sãmbg kae tɩ f tõe n wa tagsa lisg reegr yell ye. Bõe n na n sõng-f tɩ f bãng tɩ f segl n saa rẽ yĩnga?a

D na n goma bũmb a wãn yelle.

• Bõe la m segd n bãnge?

• Bõe la m segd n maane?

• Kom-bɩɩs a taab sẽn yete

Bõe la m segd n bãnge?

Segl f meng n wa tõog n deeg lisg pa rat n yeel tɩ f rɩk bũmb nins fãa f sẽn zãmsdã ne zugu, wa karen-biig sẽn segend a meng ɛgzame yĩng ye. La na n yɩɩ tɩlɛ tɩ f modg tɩ f “yamã” sõng-f tɩ f maneg n kɩs sɩd tɩ Biiblã sẽn yetã yaa sɩda. (Rom dãmbã 12:1) Wala makre:

• Fo kɩsa sɩd tɩ Wẽnnaam beeme, la t’a segda ne waoogr bɩ?

  Biiblã yetame: “Ned ning fãa sẽn kolgd Wẽnnaam tog n tẽeme t’a beeme, la t’a lebgda neb nins sẽn baood-a ne b sũy fãa wã roanda.”—Ebre-rãmbã 11:6.

  Sok f meng yaa: ‘Bõe yĩng tɩ m tẽed Wẽnnaam?’ (Ebre-rãmbã 3:4) ‘Bõe yĩng tɩ m segd n waoog-a?’—Vẽnegre 4:11.

  Fo rata sõngr bɩ? Ges “Création ou évolution ? (1re partie) : Pourquoi croire en Dieu ?”

• Fo kɩsa sɩd tɩ Biiblã yaa Wẽnnaam Gomd bɩ?

  Biiblã yetame: “Gʋls-sõamyã tõr yaa Wẽnnaam n vẽneg tɩ b gʋlse, la a yõodã yaa zãms neda, wilg ned a kongre, rems yɛla, kibl ned ne tɩrlem.”—2 Tɩmote 3:16.

  Sok f meng yaa: ‘Bõe yĩng tɩ m tẽed tɩ Biiblã goam pa ninsaalb tagsa?’—Ezayi 46:10; 1 Tesalonik rãmbã 2:13.

  Fo rata sõngr bɩ? Ges “Wãn to la Biiblã tõe n sõng-ma?—Pipi babgã: Bao n bãng sẽn be Biiblã pʋgẽ.”

• Fo kɩsa sɩd t’a Zeova tũnugda ne tigingã sẽn na yɩl n pids a raabã bɩ?

  Biiblã yetame: “[Bɩ Wẽnnaam] paam ziir tigingã maasem yĩnga, la Kirist Zeezi maasem yĩng zãmaan woo zãmaana, wakat sẽn kõn sa yĩnga.”—Efɛɛz rãmbã 3:21.

  Sok f meng yaa: ‘M getame tɩ bũmb ning m sẽn zãmsd tigissã sasa wã yita Wẽnnaam nengẽ bɩ, bɩ ninsaalb nengẽ?’ (Matiye 24:45) ‘M roagdbã sã n pa na n tõog n kẽng tigissã, n kẽngdame bɩ? (Sã n mik tɩ f tara sor n tõe n maan dẽ.)’—Ebre-rãmbã 10:24, 25.

  Fo rata sõngr bɩ? Ges “Bõe yĩng tɩ m tog n kẽnd tigissã Rĩungã roogẽ?”

Bõe la m segd n maane?

Pa tɩlɛ tɩ f zems zãng n yaool n tõog n deeg lisg ye. La f segd n wilgame tɩ f sɩd rat n ‘basa sẽn yaa wẽnga, la f maan sẽn yaa sõma.’ (Yɩɩn-sõamyã 34:14) Wala makre:

• Fo tũuda a Zeova noyã bɩ?

  Biiblã yetame: “Kell-y n tall-y sũur-kaset sẽn yaa sõma.”—1 Pɩyɛɛr 3:16.

  Sok f meng yaa: ‘Bõe la mam maan n wilg tɩ m yaa ned “sẽn minim n tagsdẽ tɩ kɩt tɩ m mi sõma ne wẽng n bake”?’ (Ebre-rãmbã 5:14) ‘M tẽra wakat takɩ m sẽn pa bas tɩ m kom-bɩ-taasã tõog tɩ m maan sẽn yaa wẽng bɩ? Mam zo-rãmbã sagend-m lame tɩ m maan sẽn yaa tɩrg bɩ?’—Yel-bũnã 13:20.

  Fo rata sõngr bɩ? Ges “Comment puis-je éduquer ma conscience ?”

• Fo miime t’a Zeova na n soka foo bũmb nins fãa fo sẽn maandã wɛɛngẽ bɩ?

  Biiblã yetame: “Tõnd ned kam fãa na n yalsa Wẽnnaam taoor t’a kao a bʋʋd wa sẽn zems a tʋʋma.”—Rom dãmbã 14:12.

  Sok f meng yaa: ‘M maanda pʋ-peelem ne m menga, la ne neb a taabã bɩ?’ (Ebre-rãmbã 13:18) ‘M sakd n deega m kongr bɩ, bɩ m solgd-b lame wall m dɩk-b n dogl neb a taaba?’—Yel-bũnã 28:13.

  Fo rata sõngr bɩ? Ges “Comment réagir quand je fais une erreur ?”

• Fo modgdame tɩ foo ne a Zeova zoodã pãng paasdẽ bɩ?

  Biiblã yetame: “Bɩ y kolg Wẽnnaam, tɩ yẽ me na n kolga yãmba.”—Zak 4:8.

  Sok f meng yaa: ‘Bõe la m maand sẽn na yɩl n kolg a Zeova?’ Wala makre: ‘M karemda Biiblã wakat fãa bɩ?’ (Yɩɩn-sõamyã 1:1, 2) ‘M pʋʋsda wakat fãa bɩ?’ (1 Tesalonik rãmbã 5:17) ‘M pʋʋsda bũmb takɩ yĩng bɩ? Mam zo-rãmbã yaa a Zeova zo-rãmb me bɩ?’—Yɩɩn-sõamyã 15:1, 4.

  Fo rata sõngr bɩ? Ges “Wãn to la Biiblã tõe n sõng-ma?—Babg a 2: F sẽn tõe n maan tɩ f Biiblã kareng tall yamleoogo,” la “Bõe yĩng tɩ m segd n pʋʋsdẽ?”

SAGLGA: Sẽn na yɩl n sõng-f tɩ f segl f meng n wa reeg lisgu, bɩ f karem Les jeunes s’interrogent. Réponses pratiques, Volume 2, sak 37 wã. Sẽn yɩɩd fãa seb-neng 308 ne 309 wã, zĩig ning b sẽn gʋls tɩ Fiche de réflexion wã.

F sã n tags rɩk f meng n kõ a Zeova la f reeg lisg yelle, f sũurã kiuusdame bɩ? Sã n yaa woto, sõs-kãngã na n sõng-f lame tɩ f tõog f rabeemã.

D na n yãa bũmb a wãna

• M sã n wa maan yel-wẽn-kãseng m lisgã poore, bõe n na n maane?

• La m sã n yɛɛsd ne bũmb nins lisgã reegr sẽn tõe n pak sor tɩ m maanã maanego?

• La m sã n tagsd tɩ m pa segd ne a Zeova tũubu?

• Kom-bɩɩs a taab sẽn yete

M sã n wa maan yel-wẽn-kãseng m lisgã poore, bõe n na n maane?

F sẽn maand yɩɩrã võore: Tõeeme tɩ f mii ned sẽn maan yel-wẽn-kãseng tɩ b yiis-a tigingã pʋgẽ. (1 Korẽnt rãmbã 5:11-13) Tõe tɩ f yɛɛsda bũmb a woto na n wa paam-fo.

“Mam sẽn wa n tags lisg reegr yell pipi, m da yɛɛsda m na n wa maan yel-wẽn-kãsenga. M da tagsda rẽ sẽn na n nams m roagdbã to-to wã me.”—A Rebekah.

Biiblã vɛrse: “Bɩ nin-wẽng bas a manesem-wẽngã. . . . Bɩ a lebg n wa a Zeova nengẽ, t’a na n zoee a nimbãanega.”—Ezayi 55:7.

Tags n gese: B yiisda yel-wẽn-maandb nins sẽn pa tek yam n kos sugrã tigingã pʋgẽ. La a Zeova zoeta neb nins sẽn sikd b mens n tek yam n kos sugr la b sakd kiblgã nimbãanega.—Yɩɩn-sõamyã 103:13, 14; 2 Korẽnt rãmbã 7:11.

Sẽn paase, baa f sẽn yaa ned sẽn pa zems zãngã, f tõe n yalsa kãn-kãe makr pʋgẽ ne Wẽnnaam sõngre. (1 Korẽnt rãmbã 10:13) Baasgo, foo n na n yãk f sẽn na n maan a soaba, pa ned a to ye.

“Mam da zoeta m na n wa maan yel-wẽn-kãseng m lisgã poore. La m wa n bãngame tɩ rẽ sã n gɩdg-m tɩ m pa reeg lisgu, pa zems ye. M bãngame me tɩ m pa segd n bas tɩ m sẽn yɛɛsd bũmb ningã gɩdg-m tɩ m pa maan m sẽn segd n maanã ye.”—A Karen.

Kʋmsgo: F sã n yãk yam n deeg lisgu, f tõe n gila yel-wẽn-kãsems wa a Zeova Kaset rãmb wʋsgo.—Filip rãmbã 2:12.

Fo rata sõngr bɩ? Ges “M maanda wãn n da maan wẽnga?”

La m sã n yɛɛsd ne bũmb nins lisgã reegr sẽn tõe n pak sor tɩ m maanã maanego?

F sẽn maand yɩɩrã võore: Tõe tɩ f mii kom-bɩɩs sẽn bas b zakã rãmb la b zo-rãmb n kẽng zĩ-zãrsẽ, sẽn na yɩl n tʋm a Zeova tʋʋmã n paase. Fo tõe n tagsame tɩ neb a taabã na n datame tɩ fo me maan woto.

“Ned sẽn deeg lisg tara sor n tõe n tʋm a Zeova tʋʋmã wʋsg n paase. La neb kẽer nan pa segl n sa n tõe n maan dẽ, pa rẽ bɩ yaa b yɛlã sẽn yaa to-to wã n kɩt tɩ b pa tõe ye.”—A Marie.

Biiblã vɛrse: “Bɩ ned kam fãa mak a meng tʋʋm n gese, tɩ rẽ la a na n paam bũmb a sẽn tõe n tik n maan sũ-noog a meng yĩng bala, la pa a sẽn na n mak a meng ne ned a to ye.”—Galat-rãmbã 6:4.

Tags n gese: Wall tɩ f mak f meng ne neb a taabã, tags bũmb ning b sẽn yeel Mark 12:30 pʋgẽ wã yelle. Be b yeelame yaa: “Yãmb segd n nonga a Zeova sẽn yaa yãmb Wẽnnaamã ne y sũurã fãa.”

Gũus n ges tɩ b yeelame tɩ f segd n nonga a Zeova ne f sũurã fãa, pa ne ned a to sũur ye. Fo sã n sɩd nong a Zeova, f na n modg n tũ-a-la wa f sẽn tõe tɛka.

“Yaa sɩd tɩ lisgã reegr pa reem yell ye. La a pa zɩɩb me ye. F sã n bao zo-sõma, bãmb me na n sõng-f lame. F sã n sak tʋʋm kẽer a Zeova siglgã pʋgẽ bilf-bilfu, f na n paama sũ-noogo. F sã n bas n pa reeg lisgu, f maana f menga.”—A Julia.

Kʋmsgo: Maan bũmb n wilg a Zeova tɩ f sũur nooma a sẽn wilg t’a nong-f lame wã. Rẽ na n kɩtame tɩ f tʋll n tũ-a wa f sẽn tõe tɛka.—1 Zã 4:19.

Fo rata sõngr bɩ? Ges “Mam yaa ned b sẽn tõe n teeg bɩ?”

La m sã n tagsd tɩ m pa segd ne a Zeova tũubu?

F sẽn maand yɩɩrã võore: A Zeova n yaa yĩngr la tẽng Naabã. Ninsaalbã pa zem baa fʋɩ a taoor ye! Tõe tɩ f sokda f meng a Zeova sã n miime meng tɩ fo beeme.

“Mam roagdbã sẽn yaa a Zeova Kaset rãmbã yĩnga, m da tagsdame tɩ maam ne a Zeova zoodã tika rẽ zugu, la tɩ pa a Zeova n tak maam n wa a nengẽ ye.”—A Natalie.

Biiblã Vɛrse: “Ned baa a ye pa tõe n wa mam nengẽ tɩ sã n pa Ba wã sẽn tʋm maamã n tak-a” ye.—Zã 6:44.

Tags n gese: Fo sẽn tagsd lisg reegr yellã wilgdame tɩ yaa a Zeova n takd foo sẽn na yɩl tɩ f paam a zoodo. Fo na n saka a boollã bɩ?

Tẽeg me tɩ yaa a Zeova n yãkd bũmb ning ned sẽn tõe n maan n paam a zoodo, la pa foo wall ned a to ye. Sẽn paase a Gomdã yetame tɩ f sã n ‘kolg Wẽnnaam, . . . yẽ me na n kolga foo.’—Zak 4:8.

“Fo sẽn mi a Zeova la f yaa a zoa wã wilgda vẽeneg t’a nong-f lame. Dẽnd f sã n wa tagsdẽ tɩ f pa segd ne a Zeova tũubu, bɩ f tẽeg t’a pa tagsd woto ye. Sẽn paase a Zeova n tar bʋʋm wakat fãa.”—A Selina.

Kʋmsgo: Fo sã n maand bũmb ning Biiblã sẽn wilg tɩ ned segd n maaname n wa tõog n deeg lisgã, wilgdame tɩ f zemsa ne a Zeova tũubu. Sẽn paase, tẽeg t’a Zeova n zems ne waoogre.—Vẽnegre 4:11.

Fo rata sõngr bɩ? Ges “Bõe yĩng tɩ m segd n pʋʋsdẽ?”