Siglgã taoor lʋɩtb Sull lɛtre
WALA a Zezi sẽn maanã, tõnd me pʋʋsda ne d sũur fãa tɩ Wẽnnaam “yʋʋrã yɩ ne waoogre.” Tõnd a Zeova Kaset rãmbã sẽn vɩ to-to wã wilgdame tɩ d sɩd tʋlla woto. La d sẽn bãng tɩ Wẽnnaam yʋʋrã yaa a Zeova wã bal pa sek ye. D segd n maana d sẽn tõe fãa n waoog yʋ-kãnga. Vẽenega, ned kam fãa sẽn paam n yaa a Zeova Kaset soabã sɩd yaa zu-no-kãseng menga.—Mat. 6:9; Ezai 43:10.
Wala Yɩɩl Sõamyã 110:3 sẽn yetã, a Zeova nin-buiidã tʋmda tʋʋmd ning a sẽn kõ-b noor tɩ b tʋmã ne yamleoogo. La bõe yĩng tɩ kom-bɩɩs la kãsemb sẽn yaa buud toɛy-toɛy sakd n moond koɛɛgã? Sẽn tɩ yɩɩd fãa, yaa b sẽn nong Wẽnnaam n dɩk b mens n kõ-a wã yĩnga. Tõod 6:5, 6 sagenda tõnd tɩ d nong a Zeova ‘ne d sũurã fãa, ne d yamã fãa la ne d pãnga fãa.’ Nonglem kãng n kɩt tɩ d rɩkd d sẽkã, d pãngã la d tarmã n sõngd n moond Wẽnnaam Rĩungã wa d sẽn tõe tɛka.
Yaa a Zeova sẽn nong ãdem-biisã yĩng la a sẽn kɩt tɩ b moond Rĩungã koe-noog dũniyã gill zugã. A pa rat tɩ ned baa a ye sãam ye, la a ratame tɩ nebã fãa tek yam n lebg n wa b Naandã nengẽ n paam vɩɩm. (2 Pɩɛ. 3:9) A Zeova meng yeela woto: “M ka rat tɩ nin-wẽng ki ye. Mam datame t’a tek yam n bas a manesem wẽngã n vɩɩmde.” (Eze. 33:11) Nebã sẽn ne tõnd tɩ d moond koe-noogã yaa kaset sẽn wilgd t’a Zeova nong-b lame. Sãmbg sẽn ka be, yaa rẽ n paasd d sũ-noogã, d sã n wa moond koe-noogã.
Sẽn paase, tõnd sẽn nand Gʋlsg Sõamyã to-to wã me wilgdame tɩ d sɩd nonga a Zeova wʋsgo. Biiblã sã n da kaẽ, d ra pa na n tõog n bãng Wẽnnaam la d kolg-a wa Zak 4:8 sẽn yet tõnd tɩ d maanã ye. D leb n da pa na n bãng d vɩɩmã võore, la bũmb ning sẽn gũud tõnd beoog daarã ye. D ra pa na n bãng tɩ yaa tõnd yaab a Ãdem n kẽes tõnd yɛlã pʋgẽ ye. (Rom 5:12) D pʋd n da pa na n bãng meng tɩ Wẽnnaam sẽn nong tõnd wʋsgã yĩng kɩtame t’a sak n kõ a Bi-ribl sẽn-ka-to wã t’a yɩ rond tond yel-wẽndã yĩng ye. Ne manesem buud toor-toore, a Zeova kõt-d-la bãngr la yam, la a kɩtdẽ tɩ d wʋmd yɛl kẽer võor sõma. A sẽn kõ tõnd a Gomdã a sẽn vẽneg tɩ b gʋlsã sɩd yaa kũun tɛkẽ! Tõnd sẽn nand kũun kãngã wã kɩtame tɩ d baood sẽk n karemd-a, n zãmsd-a, la d bʋgsd d sẽn karemdã zugu. (Ef. 5:15, 16; Yɩɩl 1:1-3) D ra tol n ges Wẽnnaam Gomdã kareng daar fãa wã wa sẽk sãang ye. Tõnd sẽn nong Wẽnnaamã segd n kɩtame tɩ d nong a Gomdã karengo, bala rẽ n na n kɩt tɩ d bãngd Wẽnnaam n paasdẽ, la d nong-a n paasdẽ me.
Tõnd karma Biiblã n bãng t’a Ãdem sẽn beeg a Zeova wã, a kɩtame t’a yagensã fãa ra pa ye tar saagr yɛs ye. La Wẽnnaam da tõe n manega yellã. A maana fãa sẽn na yɩl tɩ bũmb ning a sẽn sɩng n dat ne tẽngã pidsi, tɩ ãdem-biisã ye paam saagre.—Sɩng. 3:15.
Sãmbg sẽn ka be, tõnd ned kam fãa rata ne a sũur fãa n pẽg Wẽnnaam yʋ-sõngã. D sã n bãngd Wẽnnaam a Zeova n paasdẽ, d ratame me n naagd yẽ ne a siglgã n tʋmdẽ sẽn na yɩl tɩ nebã bãng a yʋʋrã sẽn yaa kãsengã, la b bãng a raabã. D kɩsa sɩd zãng-zãng t’a nonga tõnd la a ningd-d-la bark masã menga, la tɩ d na n wa paam n vɩɩmda wakat sẽn ka sɛt dũni paalgã pʋgẽ.
D saam-biis la d saam-bi-pogse, d ratame n le tẽeg-y tɩ tõnd sẽn yaa Siglgã taoor lʋɩtb Sull nebã, d nong-y-la wʋsgo. D leb n datame tɩ y bãng tɩ d nanda modgr nins y sẽn maand sẽn na yɩl tɩ neb wʋsg wʋm koe-noogã, nand tɩ “to-kãsengã” sẽn kolgã ta. (Wil. 7:14) Yãmb sẽn moond koɛɛgã, y sõngda nin-kãens me tɩ b na n bãng Wẽnnaam la Kiristã, n wa paam vɩɩm sẽn ka satã.—Zã 17:3.
Yãmb saam-biisã,
Siglgã taoor lʋɩtb Sulli