Bũmb fãa waa woto bal bɩ, bɩ Wẽnnaam n naane?

Fo tẽedame tɩ yaa Wẽnnaam n naan bũmba fãa bɩ? Sã n yaa woto, fo pa f yembr ye. Kom-bɩɩs (la kom-kãsems) wʋsg me tẽeda woto. La neb kẽer tagsdame tɩ vɩɩmã la ãndũniyã wa n beeme tɩ pa tũ ne Wẽnnaam maasem ye.

Fo ra miime bɩ? Neb nins sẽn wẽed no-koɛɛm evolisiyõ wã wɛɛngẽ la Wẽnnaam zugã nong n togsda bãmb sẽn tẽed bũmb ninsã. La naoor wʋsgo, b pa mi bũmb ning sẽn kɩt tɩ b tẽed rẽ wã ye.

• Neb kẽer tẽedame tɩ Wẽnnaam beeme la tɩ yẽ n naan bũmb fãa, bala b zãms-b-la rẽ b tũudmã pʋgẽ.

• Neb wʋsg tẽeda evolisiyõ wã, bala b zãms-b-la rẽ lekollẽ wã.

Sõs-kãensã na n sõng-f lame tɩ f maneg n kɩs sɩd ne bũmb ning f sẽn tẽed naanegã wɛɛngẽ wã, la f tõog n gom rẽ yell ne neb a taaba. La nananda, f segd n soka f meng sokr sẽn tar yõodo:

Bõe yĩng tɩ m tẽed tɩ Wẽnnaam beeme?

Bõe yĩng tɩ sok-kãngã tar yõodo? Bala Biiblã sagenda tõnd tɩ d ‘tʋm . . . ne d yamã.’ (Rom dãmbã 12:1) Rat n yeelame tɩ f sã n tẽed tɩ Wẽnnaam beeme, pa segd n tik:

• Fo tagsg zug ye: “M miime bal tɩ pãng soab n be.”

• Nebã sẽn yetã zug ye: “M sẽn beẽ wã, nebã tẽeda Wẽnnaam.”

• B sẽn wub foo to-to wã zug ye: “M roagdbã yeela maam tɩ m tẽ Wẽnnaam. Dẽnd ma-me tẽedame.”

Yaa fo mengã n segd kɩs sɩd tɩ Wẽnnaam beeme, la f tar bũmb f sẽn tõe n tik n wilg f sẽn tẽed rẽ wã võore.

Woto wã bõe n kɩt tɩ fo kɩs sɩd tɩ Wẽnnaam beeme? Fiches de réflexion gom-zug sẽn yaa: “Pourquoi est-ce que je crois en Dieu ?” wã na n sõng-f lame tɩ f maneg n kɩs sɩd tɩ Wẽnnaam beeme. Ad kom-bɩɩs a taab sẽn leok sokrã to-to tɩ tõe n sõng-f me.

“Karen-saambã sẽn wilg tõnd ninsaal yĩngã wilã sẽn tʋmd to-to wã, m bãngame bal tɩ Wẽnnaam sɩd beeme. Tõnd yĩngã will fãa tara a tʋʋmde, baa bõn-kɩdsã menga. Naoor wʋsgo, b fãa tʋmda b tʋʋmdã tɩ tõnd pa mi meng ye. Ninsaal yĩngã sẽn yaa to-to wã sɩd yaa yel-solemde!”—A Teresa.

“M sã n yã etaaz-bedre, batayo-kẽenga, bɩ mobilli, m sokda m meng yaa: ‘Ãnd soab n maan yãoã?’ Wala makre, yaa tɩlɛ tɩ sẽn maan-a mobillã tall bãngre, n tõog tɩ bõn-kɩdsã fãa tʋm sõma, tɩ mobillã tõog n kẽne. Sẽn mik tɩ yaa ned n maan mobillã, dẽnd ninsaalbã me yaa pãng soab n naan-ba.”—A Richard.

“Fo sã n tags tɩ neb nins sẽn tar bãngr n tɩ yɩɩdã rɩka yʋʋm kobse, n yaool n tõog n wʋm bũmb bilf bal võor ãndũniyã wɛɛngẽ, pa zems tɩ f tags tɩ ãndũniyã wa n bee woto bala, tɩ pa tũ ne Naand sẽn tar bãngr sabab ye.”—A Karen.

“M sẽn zãms siãnsã, m bãngame tɩ bũmb kae f sẽn tõe n tik n wilg tɩ evolisiyõ wã yaa sɩd ye. M tagsa bũmb nins fãa sẽn be tẽngã zug tɩ ninsaal yaool n yaa toor ne-bã yelle. Wala makre, ninsaal baood n bãngda a sẽn yaa a soabã, zĩig ning a sẽn yit la a sẽn dabdẽ. Sẽn tẽed-b evolisiyõ wã yetame tɩ woto fãa tara loees ne rũmsi. La b zɩ n tõog n wilg bũmb ning sẽn kɩt tɩ ninsaal yaa toor fasɩ wã ye. Sã n yaa ne maam, f sã n dat n tẽ evolisiyõ wã, baooda modgr n yɩɩd f sẽn na n tẽ tɩ Wẽnnaam beeme.”—A Anthony.

M wilgda m sẽn tẽed bũmb ningã

F karen-bi-taag sã n yaand foo f sẽn tẽed bũmb f sẽn pa ne yĩnga, f maanda wãna? La b sã n wilg tɩ siãnsã tara “bũmb toor-toor b sẽn tõe n tik n tẽ” tɩ bũmb fãa wa n bee woto?

Pipi, kɩs sɩd ne bũmb ning f sẽn tẽedã. Ra yɛɛs wall f zoe yãnd ye. (Rom dãmbã 1:16) Sẽn yɩɩd fãa, ad f sẽn segd n tẽege:

1. F pa f yembr ye. Neb wʋsg n tẽed tɩ Wẽnnaam beeme. B sʋkã kẽer yaa neb sẽn tar bãngr wʋsgo, la sẽn karem n zãage. Wala makre siãnsã bãngdb n be n tẽed tɩ Wẽnnaam beeme.

2. Ned sã n wa yeel t’a pa tẽed Wẽnnaam, wakat ninga, yaa a sẽn pa wʋmd Wẽnnaam sẽn tʋmd to-to wã võor sõma wã yĩnga. Wall tɩ b wilg bũmb ning sẽn kɩt tɩ b tẽed woto wã, b sokdame yaa: “Wẽnnaam sã n beeme, bõe yĩng t’a bas tɩ namsgã beẽ?” Yaa bũmb ning sẽn namsd-bã yell la b tagsd n tɩ yɩɩda.

3. Ninsaalbã miime “tɩ b segd n baoo Wẽnnaam.” (Matiye 5:3) Wala makre b segd n tẽeme tɩ Wẽnnaam beeme. Woto wã ned sã n wa yeel tɩ Wẽnnaam pa be, yaa a soabã n segd n wilg bũmb ning sẽn kɩt t’a yet woto wã.—Rom dãmbã 1:18-20.

4. Tẽ tɩ Wẽnnaam beeme wã pa yalemd ye. Wilgdame tɩ f kɩsa sɩd tɩ vɩɩmã pa tõe n wa be woto bal ye. Bũmb kae sẽn wilgd tɩ vɩɩmã wa n bee woto bal tɩ pa tũ ne Naand sabab ye.

Ned sã n sok-f bũmb ning f sẽn tẽed Wẽnnaam zugã, f na n leokame tɩ bõe? Ad f sẽn tõe n yeele:

Ned sã n yeel yaa: “Yaa sẽn pa karem-bã bal n tẽed tɩ Wẽnnaam beeme.”

F tõe n leokame yaa: “Fo kɩsa sɩd ne rẽ bɩ? Mam yẽ pa kɩs sɩd ne rẽ ye. B soka siãnsã bãngdb tusr la kobs-yoob la zak sẽn be inivɛrsite toɛy-toɛy pʋsẽ n ges b sã n tẽeda Wẽnnaam. B sʋkã, nin-yɛng neb a taab zug n wilg tɩ b tẽedame tɩ Wẽnnaam beeme.a Fo na n yeelame tɩ b pa tar bãngre, b sẽn tẽed tɩ Wẽnnaam beeme wã yĩng bal bɩ?”

Ned sã n yeel yaa: “Wẽnnaam sã n beeme, bõe yĩng tɩ namsgã yaa wʋsg dũniyã gill zugu?”

F tõe n leokame yaa: “Yaa f sẽn pa wʋmd Wẽnnaam sẽn tʋmd to-to wã võore, wall sẽn wõnd a pa maand bũmb n sõngd tõndã yĩng bɩ? [Bas t’a leoke.] Mam bãnga bũmb ning sẽn kɩt tɩ namsgã yaa wʋsgã. La sẽn na yɩl n bãng rẽ, rẽnda f bao n bãng bũmb kẽer Biiblã sẽn yete. F ratame tɩ m wilg-f bɩ?”

Woto buud zoe n paama foo bɩ? Tõe tɩ hal f yãadmẽ, f tẽeda bũmb ning Biiblã sẽn yetã. A yetame: “Wẽnnaam naana saasã la tẽngã.” (Sɩngre 1:1) La tõe tɩ sẽn nan pa kaoose, neb n bao n na n kɩt tɩ f tẽ tɩ b sẽn yeel tɩ Wẽnnaam n naan bũmb fãa wã yaa soalma, la tɩ evolisiyõ wã la sɩda. Fo segd n tẽe b sẽn yetã bɩ? Bõe yĩng tɩ d segd n bao n bãng evolisiyõ sã n sɩd zĩndame?

• Bʋʋm a yiib sẽn kɩt tɩ d segd n bao n bãng evolisiyõ sã n sɩd zĩndame

• Sogsg f sẽn tog n sok f menga

• Kom-bɩɩs a taab sẽn yete

Bʋʋm a yiib sẽn kɩt tɩ d segd n bao n bãng evolisiyõ sã n sɩd zĩndame

1. Siãnsã bãngdb kẽer pa kɩs sɩd ne evolisiyõ wã ye. Baa ne bãngdbã sẽn dɩk yʋʋm wʋsg n maan vaeesg evolisiyõ wã wɛɛngẽ wã, b nan pa yã bũmb b fãa sẽn tõe n tik n sak n deeg tɩ evolisiyõ wã yaa sɩd ye.

   Tags n gese: Siãnsã bãngdb fãa sã n pa wʋmd taab evolisiyõ wã wɛɛngẽ, tɩ yaool n yaa bãmb n tar minim rẽ wɛɛngẽ, fo me pa segd n sok f meng b sẽn yetã sã n tara võor sɩda?—Yɩɩn-sõamyã 10:4.

2. Bũmb ning fo sẽn tẽedã tara yõodo. Bi-bɩɩg a ye yʋʋr sẽn boond t’a Zachary yeelame: “Sã n mikame tɩ vɩɩmã wa n bee woto bala, dẽnd tõnd vɩɩmã, la bũmb nins fãa sẽn be ãndũniyã pa tar yõod ye.” A sẽn togsã yaa gõaag zugu. Baasg zãnga, sã n mik tɩ evolisiyõ wã yaa sɩda, dẽnd vɩɩmã ka võor ye. (1 Korẽnt rãmbã 15:32) La sã n yaa Wẽnnaam n naan bũmb fãa, d tõe n paama sogsg nins d sẽn sokd d mens vɩɩmã wɛɛngẽ, la d beoogã wɛɛngẽ wã leoore.—Zeremi 29:11.

   Tags n gese: Fo sã n bãng sɩdã evolisiyõ wã la naanegã wɛɛngẽ, wãn to la tõe n naf foom?—Ebre-rãmbã 11:1.

Sogsg f sẽn tog n sok f menga

NEB KẼER SẼN YETE: ‘Yaa bõn-kẽeng n pusgi, tɩ yɩ sabab tɩ ãndũniyã bũmb fãa wa beẽ.’

• Yaa ãnda, bɩ bõe n kɩt tɩ bõn-kẽengã pusgi?

• Bʋg la sɩda: B sẽn yeel tɩ bũmb fãa wa n bee woto tɩ pa tũ ne Naand sababã bɩ, bɩ b sẽn yet tɩ Naand n naan bũmb fãa wã la sɩda?

NEB KẼER SẼN YETE: ‘Yaa rũmsã n tall toeeng hal n wa lebg ninsaalba.’

• Sã n yaa rũmsã n tall toeeng n wa lebg ninsaalba, wala makre sã n yaa wãamsã n lebg ninsaalba, bõe yĩng tɩ ninsaalbã yamã la b bãngrã yɩɩd wãamsã hal zĩig sẽn zãre?a

• Bõe yĩng tɩ baa bõn-vɩɩs nins sẽn yaa kɩds n yɩɩdã vɩɩmã sẽn yaa to-to wã yaa yel-solemde?b

NEB KẼER SẼN YETE: ‘Sẽn tẽed-b evolisiyõ wã tara tikri.’

• Ned sã n yeel woto, yẽ mengã maana vaeesg n yã bũmb sẽn wilgd tɩ evolisiyõ wã tara tikr bɩ?

• Neb a wãn n tẽed evolisiyõ wã, b sẽn wʋm bal tɩ b yeel tɩ neb nins fãa sẽn tar bãngrã tẽeda rẽ wã yĩnga?