Biiblã sẽn gomd bũmb ning yell n tɩ yɩɩd yaa Wẽnnaam Rĩungã. Yaa ne Rĩun-kãng maasem la a Zeova na n kɩt tɩ tẽngã lebg arzãn wa a sẽn da sɩng n datã. Wẽnnaam Rĩungã yaa bõe? Bõe n kɩt tɩ d miẽ t’a rĩmã zoe n dɩta naam? Bõe la a zoe n maane? La bõe me la a na n wa maane? Sag-kãngã ne a yiibã sẽn pʋgdã leokda sogs-kãensã.

1. Wẽnnaam Rĩungã yaa bõe? Ãnda la a rĩmã?

Wẽnnaam Rĩungã yaa goosneema Wẽnnaam a Zeova sẽn lugli. A Zeezi Kirist n yaa rĩmã. A bee saasẽ n dɩt naam. (Matiye 4:17; Zã 18:36) Biiblã pʋgẽ, b yeelame t’a Zeezi “na n yɩɩ Rĩma, n dɩ naam . . . wakat sẽn kõn sa.” (Luk 1:32, 33) A Zeezi sẽn yaa Wẽnnaam Rĩungã rĩmã, a na n wa rɩɩ naam neb nins fãa sẽn be tẽngã gillã zugu.

2. Ãnd dãmb n naag a Zeezi n dɩt naamã?

A Zeezi pa rɩt naamã a yembr ye. Biiblã pʋgẽ, b yeelame tɩ “neb sẽn yit buud toɛy-toɛy pʋsẽ, neb sẽn gomd buud-goam toɛy-toɛya, la neb sẽn yit tẽns toɛy-toɛy pʋsẽ . . . segd n dɩɩ naam tẽngã zugu.” (Vẽnegre 5:9, 10) Neb a wãn n na n naag Kiristã n dɩ naamã? A Zeezi sẽn wa tẽngã zugã tɛka, neb milyõ-rãmb n lebg a karen-biisi. Yaa b fãa n na n naag-a n dɩ naam bɩ? Ayo. Yaa neb 144 000 bal n na n kẽng saasẽ n tɩ naag-a n dɩ naam. (Karm-y Vẽnegr 14:1-4.) Kiris-neb a taabã fãa sẽn be tẽngã zugã na n yɩɩ Rĩungã poorẽ dãmba.​—Yɩɩn-sõamyã 37:29.

3. Bõe yĩng tɩ Wẽnnaam Rĩungã sõmblem yɩɩd ninsaalbã goosneema-rãmbã?

Baa ninsaalbã nanambsã sẽn modgd n na n maan bõn-sõma wã, b pa tar tõog n tõe n maan b sẽn datã fãa ye. Sẽn paase, nanambs nins sẽn na n ledg-bã tõe n yaa rat-m-ye rãmba, n pa baood nin-buiidã neer ye. La ned pa na n tol n ledg a Zeezi sẽn yaa Wẽnnaam Rĩungã rĩmã ye. Wẽnnaam “lugla rĩung sẽn pa na n tol n sãame.” (Dãniyɛll 2:44) A Zeezi na n wa rɩɩ naam tẽngã gill zugu. A pa na n bak ned n sõng ye. A Zeezi nonga neba, n yaa maan-neer soaba, la tɩrlem soaba. A na n wa zãmsa nebã tɩ b nong taaba, n maand taab neere, n pa maand taab kɛgr ye.​—Karm-y Ezayi 11:9.

4. Goosneema sẽn tar pãng n na n wa soog tẽngã gilli

A Zeezi tara tõog n yɩɩd ninsaalbã nanambs nins fãa sẽn zĩnd pĩndã. Karm-y Matiye 28:18, tɩ rẽ poor bɩ y leok sokrã:

• Bõe n kɩt t’a Zeezi naamã yɩɩd ninsaalbã naam?

Ninsaalbã goosneema-rãmbã wae n toeemdame. Sẽn paase, goosneema fãa rɩta naam tẽngã babg ning zug bala. La Wẽnnaam Rĩungã yẽ? Karm-y Dãniyɛll 7:14, tɩ rẽ poor bɩ y leok sogsgã:

• Bõe yĩng tɩ Wẽnnaam Rĩungã sẽn ‘pa na n tol n sãamã’ yaa bõn-sõngo?

• Bõe yĩng tɩ Wẽnnaam Rĩungã sẽn na n wa soog tẽngã gillã yaa bõn-sõngo?

5. B segd n ledga ninsaalbã goosneema-rãmbã

Bõe yĩng tɩ Wẽnnaam Rĩungã segd n ledg ninsaalbã goosneema-rãmbã? Ges-y VIDEO wã, tɩ rẽ poor bɩ y leok sokrã.

VIDEO: Wẽnnaam Rĩungã yaa bõe?​—B sẽn kʋrge (1:41)

• Ninsaalbã naamã waa ne zu-loe-bʋse?

Karm-y Koɛɛg soab 8:9, tɩ rẽ poor bɩ y leok sogsgã:

• Yãmb tagsdame tɩ Wẽnnaam Rĩungã segd n ledga ninsaalbã goosneema-rãmbã bɩ? Bõe yĩnga?

6. Wẽnnaam Rĩungã taoor dãmb wʋmda tõnd yɛlã võore

Tõnd rĩm a Zeezi sẽn yɩ ninsaal n zĩnd tẽngã zugã yĩnga, a ‘tõe n kʋma tõnd d pãn-komsmã pʋgẽ.’ (Ebre-rãmbã 4:15) Neb 144 000 a Zeova sẽn yãk tɩ b na n tɩ rɩ naam ne a Zeezi saasẽ wã yaa pagb la rap “sẽn yit buud toɛy-toɛy pʋsẽ, neb sẽn gomd buud-goam toɛy-toɛya, la neb sẽn yit tẽns toɛy-toɛy pʋsẽ.”​—Vẽnegre 5:9.

• Yãmb pa tagsd t’a Zeezi ne a na-rɩt-n-taasã sẽn mi d zu-loeesã, la b mi rẽ sẽn namsd tõnd to-to wã kengda raood sɩda?

7. Wẽnnaam Rĩungã noyã sõmblem ka to ye

Goosneema-rãmbã lugunda noy b sẽn tagsd tɩ na n nafa b nin-buiidã, la kogl-ba. Wẽnnaam Rĩungã me lugla noy a poorẽ dãmbã sẽn segd n tũ. Karm-y 1 Korẽnt rãmb 6:9-11, tɩ rẽ poor bɩ y leok sogsgã:

• Yãmb tagsdame tɩ nebã fãa sã n tũud noy nins Wẽnnaam sẽn luglã, vɩɩmã na n yɩ wãn-wãna?a

• Yãmb tagsdame t’a Zeova tara sor n na n yeel a Rĩungã poorẽ dãmb tɩ b tũ no-kãensã bɩ? Bõe yĩnga?

• Bõe n wilgd tɩ neb nins sẽn pa tũud no-kãensã wã tõe n toeemame?​—Ges-y vɛrse 11.

KƲMSGO

Wẽnnaam Rĩungã yaa goosneema sɩd-sɩd sẽn be saasẽ, n na n wa soog tẽngã gilli.

Lebg-n-gese

• Ãnd dãmb n yaa Wẽnnaam Rĩungã taoor dãmba?

• Bõe n kɩt tɩ Wẽnnaam Rĩungã sõmblem yɩɩd ninsaalbã goosneema-rãmbã?

• Togs-y bũmb kẽer a Zeova sẽn dat tɩ Rĩungã poorẽ dãmbã maane?

BŨMB A TAABA

A Zeezi yeelame tɩ Wẽnnaam Rĩungã bee ned fãa sũurẽ bɩ?

“Wẽnnaam Rĩungã yaa bũmb sẽn be ned fãa sũurẽ bɩ?” (Bee jw.org)

Bõe yĩng t’a Zeova Kaset rãmbã sakd Wẽnnaam Rĩungã n yɩɩd ninsaalbã goosneema-rãmbã?

Yaa Wẽnnaam Rĩungã la b sakda (1:43)

Biiblã pʋgẽ, bõe la b yet neb 144 000 a Zeova sẽn yãk tɩ b na n naag a Zeezi n dɩ naamã wɛɛngẽ?

“Ãnd dãmb n dabd saasẽ?” (Bee jw.org)

Bõe n kɩ tɩ pag a ye b sẽn da pag bãens roog kɩs sɩd tɩ yaa Wẽnnaam bal n tõe n wa ne tɩrlem dũniyã zugu?

“Mam bãnga yel-kɛgã tɩɩm” (Yʋʋmd 2011 sɩpaolg kiuug Réveillez-​vous ! wã)

Wẽnnaam Rĩungã rĩm sɩnga naam dɩɩb saasẽ, yʋʋmd 1914. Yaa wakat kãng tɛk me la ninsaalbã naamã be a yaoolem wakate. Bõe n kɩt tɩ d mi rẽ? Bɩ d ges bãngr-goam nins sẽn be Biiblã pʋgẽ n gomd rẽ yellã, yɛl nins sẽn maand dũniyã zugã, la nebã yel-manesem sẽn yaa to-to yʋʋmd 1914 tɛka.

1. Bõe la bãngr-goam nins sẽn be Biiblã pʋgẽ wã wilgda?

Biiblã sebr ning b sẽn boond tɩ Dãniyɛll sebrã pʋgẽ, b goma sasa b sẽn boond tɩ “wakat a yopoe” yelle, n wilg tɩ wakat kãng baasgẽ la Wẽnnaam Rĩungã rĩm na n sɩng a naamã rɩɩbo. (Dãniyɛll 4:16, 17) Yʋʋm kobs poore, a Zeezi goma wakat kãng yelle, n bool-a tɩ “bu-zẽmsã wakat b sẽn yãkã,” la a wilg tɩ wakat kãng ra ket n nan pa sa ye. (Luk 21:24) Wa d sẽn na n yã wã, wakat a yopoe wã saa yʋʋmd 1914.

2. Yʋʋmd 1914 tɛka, bõe n maand dũniyã gill zugu? Nebã yel-manesem me yaa wãn-wãna?

A Zeezi Karen-biisã sok-a lame yaa: “Bõe n na n yɩ bãnd n wilg tɩ yãmb waame, la tɩ dũniyã rabda a saabẽ?” (Matiye 24:3) A Zeezi leoka sokrã, n togs-b bũmb wʋsg sẽn na n maane, a sã n wa sɩng a naamã rɩɩb saasẽ. Wala makre, a yeelame tɩ zaba, kom la tẽn-digimdg na n zĩndame. (Karm-y Matiye 24:7.) B ra pĩnd n togsa Biiblã pʋgẽ me tɩ nebã yel-manesem sẽn na n yɩ to-to “yaoolem wakatã” na n kɩtame tɩ “vɩɩmã lebg toogo.” (2 Tɩmote 3:1-5) Woto fãa maneg n yaa vẽeneg yʋʋmd 1914 tɛka.

3. Wẽnnaam Rĩungã rĩm sẽn sɩng a naamã rɩɩbã tɛka, bõe yĩng tɩ dũniyã yɛl tar kengre?

A Zeezi sẽn lebg Wẽnnaam Rĩungã rĩmã poor bilf bala, a zaba ne a Sʋɩtãan la a zĩn-dãmbã saasẽ. A Sʋɩtãan pa tõog zabrã ye. Ad b sẽn yeel Biiblã pʋgẽ: “B lob-a-la tẽngã zugu, la b naaga a malɛgsã me n lobe.” (Vẽnegre 12:9, 10, 12) A Sʋɩtãan sũurã puuga wʋsgo, bala a miime tɩ b na n wa sãam-a lame. Rẽ n so t’a kɩt tɩ toog la namsg be tẽngã gill zugu. Rẽ sõngda tõnd tɩ d wʋm yɛlã sẽn maneg n keng dũniyã zugã võore! Wẽnnaam Rĩungã na n wa welga zu-loe-kãensã fãa.

D BAO N BÃNG N PAASE

4. Bãngr-goam n be Biiblã pʋgẽ n wilgdẽ tɩ Wẽnnaam Rĩungã rĩm sɩnga naam dɩɩb yʋʋmd 1914

VIDEO: Wẽnnaam Rĩungã rĩm sɩnga naam rɩɩb yʋʋmd 1914 (5:02)

Wẽnnaam kɩtame t’a Nebukadnezaar sẽn yɩ pĩnd wẽndẽ Babilon rĩmã zãms zãmsdo, n yã bũmb sẽn na n wa maan beoog-daare. Zãmsdã n paas a Dãniyɛll sẽn bilg a võorã to-to wã wilgdame tɩ ra na n pidsa a Nebukadnezaar naamã zugu, la Wẽnnaam Rĩungã zugu.​—Karm-y Dãniyɛll 4:17.a

Karm-y Dãniyɛll 4:20-26, tɩ rẽ poor bɩ y tik bũmb nins sẽn be taablo-rãmbã zugã n leok sogsgã:

• (A) Bõe la a Nebukadnezaar yã a zãmsdã pʋgẽ?​—Ges-y vɛrse 20 ne 21.

• (B) Bõe n na n paam tɩɩgã?​—Ges-y vɛrse 23.

• (D) “Wakat a yopoe” wã baasgẽ, bõe n na n maane?​—Ges-y vɛrse 26.

Zãmsdã tɩɩgã sẽn tar loees ning ne Wẽnnaam Rĩungã

BÃNGR-GOMDÃ (Dãniyɛll 4:20-36)

Naamã sasa

(A) Tɩ-bedre

Naamã saabo

(B) “Lub-y tɩɩgã,” la y bas-a hal tɩ “wakat a yopoe looge”

Naamã lebs n luglame

(D) “Y na n le paama y rĩungã n sooge”

Bãngr-gomdã pipi pidsgã pʋgẽ . . .

• (E) Tɩɩgã makda ãnda?​—Ges-y vɛrse 22.

• (F) Wakat bʋg la a bas naamã rɩɩbo?​—Karm-y Dãniyɛll 4:29-33.

• (G) “Wakat a yopoe” wã baasgẽ, bõe n paam a Nebukadnezaare?​—Karm-y Dãniyɛll 4:34-36.

PIPI PIDSGU

Naamã sasa

(E) Babilon rĩm a Nebukadnezaare

Naamã saabo

(F) Yʋʋmd 606 S.D.Z.R. poore, a Nebukadnezaar lebga gãeenga, n pa tõog n dɩ naam yʋʋm a yopoe ye

Naamã lebs n luglame

(G) A Nebukadnezaar yamã lebg n waame, t’a le sɩng a naamã rɩɩbo

Bãngr-gomdã yiib-n-soab pidsgã pʋgẽ . . .

• (H) Tɩɩgã makda ãnda?—Karm-y 1 Kibay 29:23.

• (I) Wakat bʋg la b bas naamã rɩɩbo? Bõe n kɩt tɩ d miẽ tɩ b ra pa rɩt naam a Zeezi sẽn wa n be tẽngã zugã?​—Karm-y Luk 21:24.

• (K) Wakat bʋg la b lebs n lugl naamã, la yɩ yɛɛnẽ?

YIIB-N-SOAB PIDSGU

Naamã sasa

(H) Israyɛll rĩm-dãmbã sẽn da rɩt naam Wẽnnaam yʋʋr yĩngã

Naamã saabo

(I) B sãama Zerizalɛm. Rẽnd na maan yʋʋm 2 520, ned pa le rɩ naam Israyɛll ye

Naamã lebs n luglame

(K) A Zeezi lebga Wẽnnaam Rĩungã rĩma, n sɩng naam rɩɩb saasẽ

5. Dũniyã yɛl toeema yʋʋmd 1914 tɛka

Ges-y VIDEO wã.

VIDEO: Dũniyã yɛl toeema yʋʋmd 1914 tɛka (1:10)

A Zeezi ra pĩnd n togsa dũniyã yɛl sẽn na n yɩ to-to, a sã n wa sɩng a naamã rɩɩbo. Karm-y Luk 21:9-11, tɩ rẽ poor bɩ y leok sokrã:

• Yel-kãensã sʋka, bʋs la yãmb ne, pa rẽ bɩ n wʋmd tɩ b gomd b yelle?

Tẽn-tʋmd a Poll ra bilga nebã yel-manesem sẽn na n yɩ to-to ninsaalbã naamã yaoolem wakatã. Karm-y 2 Tɩmote 3:1-5, tɩ rẽ poor bɩ y leok sokrã:

• Yãmb neeme tɩ nebã yel-manesmã yaa woto rũndã-rũndã bɩ?

6. Wilg-y tɩ y kɩsa sɩd tɩ Wẽnnaam Rĩungã rĩm rɩta naam

Karm-y Matiye 24:3, 14, tɩ rẽ poor bɩ y leok sogsgã:

• Tʋʋm-bʋg sẽn tar yõod wʋsg n wilgd tɩ Wẽnnaam Rĩungã rĩm rɩta naam masã?

• Bõe la y tõe n maan n naag n tʋm tʋʋm-kãngã?

Wẽnnaam Rĩungã rĩmã rɩta naam masã. Wakat ning a sẽn na n wa soog tẽngã gillã kolgame. Karm-y Ebre-rãmb 10:24, 25, tɩ rẽ poor bɩ y leok sokrã:

• Bõe la tõnd ned kam fãa segd n maane, d “sẽn ne tɩ daarã kolgdame wã yĩnga”?

KƲMSGO

Biiblã bãngr-goamã, n paas dũniyã yɛl sẽn yaa to-to wã wilgdame tɩ Wẽnnaam Rĩungã rĩm rɩta naam masã. D sã n moond Rĩungã koe-noogã, la d kẽnd tigissã, d wilgdame tɩ d kɩsa sɩd ne rẽ.

Lebg-n-gese

• Wakat a yopoe wã yell b sẽn da pĩnd n gom Dãniyɛll sebrã pʋgẽ wã baasgẽ, bõe n maane?

• Bõe n kɩt tɩ y kɩs sɩd tɩ Wẽnnaam Rĩungã rĩm sɩnga naam rɩɩb yʋʋmd 1914?

• Bõe la y tõe n maan n wilg tɩ y kɩsa sɩd tɩ Wẽnnaam Rĩungã rĩm rɩta naam?

BŨMB A TAABA

Bũmb ning kʋdemdã yel-mitba, la neb a taab sẽn yeel dũniyã yɛlã sẽn toeem to-to yʋʋmd 1914 tɛkã wɛɛngẽ.

“Wakat bʋg la dũniyã yɛlã tiig n toeeme?”(Yʋʋmd 2007 Réveillez-​vous ! wã)

Bãngr-gomd ning sẽn be Matiye 24:14 pʋgẽ wã sẽn naf rao a ye to-to.

“Mam da nonga beezbollã n yɩɩd bũmb fãa!” (Yʋʋmd 2017 Gũusg Gasgã N° a 3)

Bõe n kɩt tɩ d miẽ tɩ bãngr-gomd ning sẽn be Dãniyɛll sak a 4 pidsda Wẽnnaam Rĩungã zugu?

“Wakat bʋg la Wẽnnaam Rĩungã rĩm sɩng naam rɩɩbo? (Pipi babga)” (Yʋʋmd 2014 zĩ-likr kiuug pipi daar Gũusg Gasgã)

Bõe n wilgd tɩ “yʋʋm a yopoe wã” yell b sẽn gomd Dãniyɛll sak a 4 pʋgẽ wã saa yʋʋmd 1914?

“Wakat bʋg la Wẽnnaam Rĩungã rĩm sɩng naam rɩɩbo? (Babg a 2)” (Yʋʋmd 2014 sɩpaolg kiuug pipi daar Gũusg Gasgã)

Wẽnnaam Rĩungã rĩm zoe n dɩta naam. Ka la bilfu, a na n toeema bũmb wʋsg tẽngã zugu. Bɩ d gom bõn-sõma kẽer Rĩungã sẽn na n wa maan yelle.

1. Bõe la Wẽnnaam Rĩungã na n maan tɩ laafɩ la tɩrlem zĩnd tẽngã zugu?

A Zeezi sẽn yaa Wẽnnaam Rĩungã rĩmã na n sãama nin-wẽnsã la goosneema-rãmba, Armagedõ zabrã sasa. (Vẽnegre 16:14, 16) Ad bũmb b sẽn pʋlem Biiblã pʋgẽ tɩ na n pids zãng wakat kãnga: “Keta bilf bala, tɩ nin-wẽnsã pa na n le beẽ ye.” (Yɩɩn-sõamyã 37:10) Ne Rĩungã maasem, a Zeezi na n kɩtame tɩ laafɩ la tɩrlem zĩnd tẽngã gill zugu.​—Karm-y Ezayi 11:4.

2. Wẽnnaam raabã sã n wa maand tẽngã zugu, vɩɩmã na n yɩɩ wãn-wãna?

Wẽnnaam Rĩungã rĩm naam sasa, “nin-tɩrsã na n sooga tẽngã. B na n vɩɩmda a zug wakat sẽn kõn sa.” (Yɩɩn-sõamyã 37:29) Mams-y y yamẽ y sẽn na n vɩ dũni pʋgẽ, tɩ nebã fãa maand sẽn yaa tɩrga, n nong a Zeova la b nong taaba! Ned baa a ye pa na n lʋɩ bãag ye. Nebã fãa na n vɩɩmda wakat sẽn kõn sa.

3. Bõe la Wẽnnaam Rĩungã na n maan nin-wẽnsã sãoong poore?

Nin-wẽnsã sãoong poore, a Zeezi sẽn yaa rĩmã na n dɩɩ naam yʋʋm 1 000. Sasa kãnga, a Zeezi ne neb 144 000 sẽn yaa a na-rɩt-n-taasã na n sõnga ninsaalbã sẽn be tẽngã zugã tɩ b lebg neb sẽn zems zãnga, la sẽn pa maand yel-wẽna. Yʋʋm 1 000 saabẽ, tẽngã gill na n lebga arzãna. Nebã fãa na n tara sũ-noogo, b sẽn tũud a Zeova noyã yĩnga. Rẽ poore, a Zeezi na n lebsa a Ba a Zeova naamã. Rẽ, a Zeova ‘yʋʋrã na n paama waoogr’ n yɩɩd pĩndã. (Matiye 6:9, 10) Na n yɩɩ vẽeneg t’a Zeova yaa na-sõng sẽn get a nin-buiidã yell neere. Rẽ poore, a Zeova na n sãama a Sʋɩtãan ne zĩn-dãmbã, la neb nins fãa sẽn yãk yam n kɩɩsd a naamã. (Vẽnegre 20:7-10) Wẽnnaam Rĩungã sẽn na n wa ne bõn-sõma ninsã na n kaoosa wakat sẽn kõn sa.

D BAO N BÃNG N PAASE

4. Wẽnnaam Rĩungã na n sãama ninsaalbã goosneema-rãmbã

Ninsaal sooga a to tɩ wa ne a toogo. (Koɛɛg soaba 8:9) Ne Rĩungã maasem, a Zeova na n kɩtame tɩ zãmbã la wẽgbã sa.

Karm-y Dãniyɛll 2:44 la 2 Tesalonik rãmb 1:6-8, tɩ rẽ poor bɩ y leok sogsgã:

• Bõe la a Zeova ne a Bi-ribl a Zeezi na n wa maan ninsaalbã goosneema-rãmbã, la neb nins sẽn teend-bã?

• Wãn to la bũmb nins y sẽn bãng a Zeova ne a Zeezi zugã kɩt tɩ y maneg n kɩs sɩd tɩ b sẽn na n maanã yaa tɩrga, la zemse?

5. A Zeezi yaa rĩm sẽn ka to

A Zeezi sẽn yaa Wẽnnaam Rĩungã rĩmã, a na n maana bũmb wʋsg sẽn na n naf Rĩungã poorẽ dãmbã sẽn be tẽngã zugã. Ges-y VIDEO wã, tɩ y na n bãnga a Zeezi sẽn zoe n wilg to-to t’a ratame n sõng ninsaalbã, la tɩ Wẽnnaam kõ-a-la tõog t’a tõe n maan rẽ.

VIDEO: A Zeezi wilga Wẽnnaam Rĩungã sẽn na n wa maane (1:13)

Bũmb nins a Zeezi sẽn maan a sẽn wa n be tẽngã zugã wilgda Rĩungã sẽn na n wa maanã. Bõn-sõma nins b sẽn sõdg tẽngrã sʋka, bʋs la yãmb gũud n tɩ yɩɩda? Karm-y vɛrse nins b sẽn sõdgã, n bãng bũmb a taab n paase.

6. Wẽnnaam Rĩungã na n kɩtame tɩ d beoog yɩ neere

VIDEO: D beoog vɩɩmã sẽn na n yɩ noog to-​to wã reng-n-lɛmbga (4:38)

Karm-y Yɩɩn-sõamyã 145:16, tɩ rẽ poor bɩ y leok sokrã:

• Yãmb sẽn mi t’a Zeova na n gesame tɩ bõn-vɩɩg buudã fãa paam a sẽn dat tɩ sekã, y tagsg yaa wãna?

KƲMSGO

Wẽnnaam Rĩungã na n maana bũmb nins fãa Wẽnnaam sẽn dat t’a maanã. A na n kɩtame tɩ tẽngã gill lebg arzãna, n pid ne nin-sõma sẽn na n waoog a Zeova wakat sẽn kõn sa yĩnga.

Lebg-n-gese

• Wãn to la Wẽnnaam Rĩungã na n kɩt t’a Zeova yʋʋrã paam waoogre?

• Bõe yĩng tɩ d tõe n kɩs sɩd tɩ Wẽnnaam Rĩungã na n pidsa bũmb nins fãa b sẽn pʋlem Biiblã pʋgẽ wã?

• Bõn-sõma nins Rĩungã sẽn na n wa maanã sʋka, bʋg la yãmb gũud n tɩ yɩɩda?

BŨMB A TAABA

Armagedõ rat n yeelame tɩ bõe?

“Armagedõ zabrã yaa bõe?” (Bee jw.org)

Ges-y bũmb nins sẽn na n maan “to-kãseng“ ning a Zeezi sẽn yeel tɩ na n zĩndame wã sasã.—Matiye 24:21.

“To-kãsengã yaa bõe?” (Bee jw.org)

Zak rãmb sẽn tõe n naag taab n bʋgs bõn-sõma nins Rĩungã sẽn na n wa ne wã zug to-to.

Tags arzãnã yelle (1:50)

Rao a ye sẽn da kẽesd a meng politikã yɛlẽ kibare. A togsda a sẽn paam a sogsg kẽer leoor to-to. A kibarã gom-zug yaa: “Sogsg wʋsg n da namsd maam.”

“Biiblã toeemda neba” (Yʋʋmd 2012 yʋʋm-vẽkr kiuug pipi daar Gũusg Gasgã)