Kibs-rãmbã fãa tata Wẽnnaam yam bɩ?

A Zeova ratame tɩ d vɩɩmd ne sũ-noogo, la d mi n maan kibs-rãmb menga. La yaa kibs-rãmbã fãa n tat a yamb bɩ? Wãn to la d tõe n wilg tɩ d nonga a Zeova yel-kãnga wɛɛngẽ?

1. Bõe yĩng tɩ kibs-rãmb wʋsg pa tat a Zeova yam?

Tõe tɩ y sã n bãng tɩ kibs-rãmb wʋsg tika zãmsg sẽn pa zems ne Biiblã sẽn yetã, wall tɩ sɩnga ne neb sẽn da tũud wẽn-naandse, na n ling-y lame. Kibs kẽer tara loees ne ziri tũudmã, bɩ naaga ne zĩn-dãmbã yɛla, wall tika nebã sẽn tẽed tɩ ninsaal tara sɩɩg sẽn pa kiidã zugu. Kibs-rãmb a taab me tika tẽeb-ziri zugu, wall tika nebã sẽn tẽed tɩ b sã n maan bũmb kẽere, wata ne zu-noogã. (Ezayi 65:11, MN) A Zeova keoogda a nin-buiidã yaa: ‘Bɩ y lak y mense, la y ra le sɩɩs bõn-dẽgdã ye.’​—2 Korẽnt rãmbã 6:17.a

2. A Zeova tagsg yaa wãn ne kibs nins b sẽn maand n na n kils ninsaalbã?

A Zeova keoogda tõnd tɩ d gũus n da wa ‘dɩk d teegr n teeg ninsaal ye.’ (Karm-y Zeremi 17:5) Nebã maanda kibs kẽer n na n kils nanambse, bɩ sodaase. B maanda kibs sãnda me n na n waoog b tẽngã bũmb kẽere, wala makre, darpo wã, wall n na n tẽeg b tẽngã soog-m-mengã. (1 Zã 5:21) B leb n maanda kibs-rãmb a taab me politikã sigls yĩnga, wall nin-buiidã sigls a taab yĩnga. A Zeova tagsg na n yɩɩ wãna, d sã n waoogd ninsaal bɩ siglg tɩ loog noore, sẽn yɩɩd fãa, nin-kãng wall sigl-kãng sã n kɩtame tɩ nebã tẽed yɛl sẽn pa zems ne a raabã?

3. Yel-manesem-bʋs n tõe n kɩt tɩ kibs pa ta Wẽnnaam yam?

Biiblã pʋgẽ, b gɩdga ‘rã-tɩgrã, reem-yoodã, la yũud rãam n wagsd taabã.’ (1 Pɩyɛɛr 4:3) Kibs kẽer sasa, nebã maandame tɩ loog noore, b tʋmda yoob la raglem tʋʋm a taaba. Sẽn na yɩl n kell n yɩ a Zeova zo-rãmba, yaa tɩlɛ tɩ d kell n zãag d mens fasɩ ne tʋʋm-dẽgd a woto.

D BAO N BÃNG N PAASE

4. Zãag-y y mens ne kibs nins sẽn pa tat a Zeova yamã

Karm-y Efɛɛz rãmb 5:10, tɩ rẽ poor bɩ y leok sogsgã:

• Bõe la d segd n deng n bao n bãnge, d sã n wa tagsd n na n ges d sã n tõe n naag n maana kibs ninga?

• Kibs-bʋs la nebã nong n maand yãmb babgẽ wã?

• Yãmb tagsdame tɩ kibs-kãens tata a Zeova yam bɩ?

Wala makre, yãmb zoe n soka y meng Wẽnnaam tagsg sẽn yaa a soab ne rogem daar tẽegr kibs-rãmbã bɩ? Biiblã pʋgẽ, b zɩ n gom neb sẽn tũud a Zeova sẽn maan b rogem daar tẽegr kibs ye. La b gomda neb a yiib sẽn da pa tũud a Zeova sẽn maan b rogem daar tẽegr kibs yelle. Karm-y Sɩngr 40:20-22 la Matiye 14:6-10. Rẽ poor bɩ y leok sogsgã:

• Bõe n wõnd taab rogem daar tẽegr kibs-kãensã sʋka?

• Y sã n tik Biiblã kiba-kãensã zugu, y tõe n yeelame t’a Zeova tagsg yaa wãn ne rogem daar tẽegr kibs-rãmbã?

Baasgo, tõe tɩ y sokda y meng yaa: ‘M sã n naagd n maand rogem daar tẽegr kibsa, wall kibs-rãmb a taab sẽn kɩɩsd Biiblã goamã, rẽ yĩnga, maanda a Zeova bũmb sɩda?’ Karm-y Yikr 32:1-8. Rẽ poor bɩ y ges VIDEO wã, la y leok sogsgã.

VIDEO: Kibs-rãmb sẽn pa tat a Zeova yam (5:07)

• Bõe yĩng tɩ d segd n bao n bãng sẽn tat a Zeova yamã?

• Wãn to la d tõe n maan rẽ?

D sẽn tõe n maan to-to n bãng kibs sã n tata Wẽnnaam yam

• A tika zãmsg sẽn kɩɩsd Biiblã goam bɩ? Bao-y n bãng-y a sẽn sɩng to-to.

• Kibsã sasa, nebã kilsda ninsaalb bɩ siglsi, wall yaa tẽngã bũmb kẽer wala darpo wã la b waoogd bɩ? Yaa a Zeova la d waoogd n yɩɩd bũmb fãa, la yaa yẽ la d teeg sẽn na yɩl t’a wa welg dũniyã zu-loeesã.

• Kibsã yel-maandɩ wã, la nebã yel-manesmã kibsã sasa wã kɩɩsda noy nins sẽn be Biiblã pʋgẽ wã bɩ? D segd n kell n zãaga d meng ne yoobo, la d tall yel-manesem sẽn yaa sõma.

5. Sõng-y neb a taabã tɩ b nan y sẽn tẽed bũmb ninsã

VIDEO: Wilg-y y sẽn tẽed bũmb ninsã võor ne bʋgsem (2:01)

Karm-y Matiye 7:12, tɩ rẽ poor bɩ y leok sogsgã:

• Sẽn zems ne vɛrse wã goamã, yãmb segd n yeela y zakã neb nins sẽn pa tũud a Zeova wã tɩ b pa segd n maan kibs ninga bɩ?

• Bõe la y tõe n maane, tɩ y zakã rãmb bas b yam tɩ baa y sã n pa na n naag-b n maan kibsa, y nong-b lame la y nand-ba?

A Zeova ratame tɩ d paam sũ-noogo

A Zeova ratame tɩ tõnd ne d zakã rãmba, la d zo-rãmbã mi n naag taab n maan bũmb kẽer tɩ kõ-d sũ-noogo. Karm-y Koɛɛg soab 8:15, tɩ rẽ poor bɩ y leok sokrã:

• Wãn to la vɛrse-kãngã wilgd t’a Zeova ratame tɩ d paam sũ-noogo?

A Zeova ratame t’a nin-buiidã mi n naag taab n kok pemsem, la b maan bũmb a taab tɩ kõ-b sũ-noogo. Ges-y VIDEO wã, tɩ y na n yãame tɩ rẽ yaa bũmb sẽn yaa vẽeneg d tigis-kãsems nins sẽn tigimd tẽns toɛy-toɛy nebã sasa.

VIDEO: D maanda d taabã sãando, d tigis-kãsems nins sẽn tigimd tẽns toɛy-toɛy nebã sasa (5:40)

Karm-y Galat-rãmb 6:10, tɩ rẽ poor bɩ-y leok sogsgã:

• Yaa tɩlɛ tɩ d naag n maan kibs nins nebã sẽn wae n maandẽ wã, n na n paam n ‘maan nebã neer’ bɩ?

• Bõe n na n kõ yãmb sũ-noog n yɩɩda? Yaa y sẽn na n kõ ned kũuni, y sẽn get tɩ y segd n maana rẽ, tɩ bala yaa kibs bɩ, bɩ yaa y sẽn na n yãk yam n kõ ned kũun ne yamleoogo?

• A Zeova Kaset rãmb wʋsg mi n maana bũmb sẽn yaa toor zall b kambã yĩnga, la b pʋd n mi n ling-b n kõ-b kado-rãmba. Y sã n tara kamba, togs-y bũmb kẽer y sẽn mi n maan n kõ-ba.

KƲMSGO

A Zeova ratame tɩ d mi n naagd d zakã rãmb la d zo-rãmbã n maand bũmb kẽer tɩ kõ-d sũ-noogo. La a ratame me tɩ d zãag d mens ne kibs nins sẽn pa tat a yamã.

Lebg-n-gese

• Sogs-bʋs la d tõe n sok d menga, d sã n wa baood n na n bãng kibs ning sã n tata Wẽnnaam yam?

• Wãn to la d tõe n sõng d zakã rãmb la d zo-rãmbã tɩ b wʋm tõnd sẽn yãk yam ning kibs-rãmbã wɛɛɛngẽ wã võore?

• Bõe n kɩt tɩ y miẽ t’a Zeova ratame tɩ d paam sũ-noogo, la d mi n kok pemsem?

BŨMB A TAABA

Kibs-rãmb kiris-nebã sẽn pa maande.

“Bõe yĩng t’a Zeova Kaset rãmbã pa maand kibs kẽere?” (Bee jw.org)

Bũmb a naas sẽn kɩt tɩ d kɩs sɩd tɩ rogem daar tẽegr kibs pa tat Wẽnnaam yam ye.

“Bõe yĩng t’a Zeova Kaset rãmbã pa maand rogem daar tẽegr kibsa?” (Bee jw.org)

Bi-bɩɩg a ye sẽn tall manesem ninga, a karen-bi-taasã sẽn wa n yaand-a a sẽn tẽed bũmb nins Nowɛllã wɛɛngẽ wã yĩnga.

D sẽn tõe n maan to-to, b sã n wa yaand tõndo (2:04)

Kiris-neb bãmb milyõ-rãmb n yãk yam n pa maand Nowɛll ye. Yãmb tagsg yaa wãn ne b yam-yãkrã?

“B paama bũmb yõod sẽn yɩɩda” (Yʋʋmd 2012 yʋʋm-sar kiuug pipi daar Gũusg Gasgã)