A Zezi kũumã rasem a tãab poore, a vʋʋgame. La baraar bala, a vẽnega a meng naoor a nu t’a karen-​biisã yã-a. Yaa rasem 40 pʋgẽ la a sẽn da vẽnegd a meng t’a karen-​biisã yãt-⁠a wã. Rẽ poore, a zẽkame n dabd saasẽ t’a karen-​biis kẽer getẽ. A Zezi sẽn dʋ saasẽ wã rasem piig poore, Wẽnnaam kɩtame t’a vʋʋsem sõngã sig a karen-​biis nins sẽn da be Zerizalɛm n gũudẽ wã zugu.

Kaoosg zugẽ, neb sẽn ka nong Wẽnnaam n kẽes tʋm-​tʋmdbã bãense, la malɛk n yiis-⁠ba. Neb a taab me n lob karen-​biig a Etɩɛn kug n kʋ. La d na n yãame t’a Zezi yãka ned a yembr sẽn zĩnd a Etɩɛn kʋʋbã zĩigẽ t’a na n lebg a tʋm-​tʋmda. Nin-​kãng yʋʋr la a Polle. D na n yãame me t’a Zezi kũumã yʋʋm a tãab la pʋɩ-​sʋk poore, Wẽnnaam tʋma tʋm-​tʋmd a Pɩɛɛr t’a tɩ moon a Korney ne a zaka rãmb sẽn ka Zʋɩf rãmbã.

Sẽn na maan yʋʋm 13 rẽ loogr poore, a Poll sɩngame n gilgd tẽnsã n moond koe-​noogã. A so-​toak a yiib-⁠n-​soabã, a Tɩmote tũ-a lame. D na n goma a Poll ne a tũud-⁠n-​taasã sẽn paam sũ-noog ning Wẽnnaam tʋʋmdã pʋgẽ wã me yelle. B wa n kẽesa a Poll bãens Rom, n wa yiis-⁠a yʋʋm a yiib poore. B leb n wa kẽes-⁠a-⁠la bãense, la so-​kãngã wã b kʋ-⁠a lame. Babg a yopoe wã pʋgẽ, d na n goma yɛl sẽn maan sẽn kolg yʋʋm 32 pʋgẽ.

YÃMB mii pagã ne rap a yiibã sẽn be foto wã zugã bɩ? Pagã yaa a Maari Madelɛn. A yaa a Zezi karen-​biiga. Rapã sẽn yer fu-​peelsã yaa malɛgse. A Zezi sẽn ki wã, b mum-⁠a-⁠la yaoog sẽn wõnd ro-​bil pʋgẽ n lebs n pag ne kug-​kẽenga. Yaa be la a Maari sẽn lɩkdã. La a mikame tɩ kũumã ka le be yaoogã pʋgẽ ye. A kẽe yɛ?

A Zezi kũumã poore, maan-​kʋʋdbã yeela a Pɩlat yaa: ‘A Zezi sẽn da wa n ket n vɩyã, a yeelame t’a sã n ki a na n vʋʋga rasem a tãab poore. Woto yĩnga, bɩ y kɩt tɩ b gũ yaoogã t’a karen-​biisã ra zuk kũumã n yaool n yeel nebã t’a vʋʋgame ye.’ Rẽ n so t’a Pɩlat yeel maan-​kʋʋdbã tɩ b tʋm sodaas tɩ b tɩ gũ yaoogã.

La a Zezi kũumã rasem a tãab poore, yibeoogã pĩnda, a Zeova malɛk n wa n bilim kugr ning sẽn da pag yaoogã. Sodaas nins sẽn da gũud yaoogã yɛɛsa wʋsg n pa tõe n le maan bũmb ye. La sẽn yɩ bilfu, b wa n lɩka yaoogã pʋgẽ n mik tɩ kũumã ka be ye. Kẽer n kẽe tẽngã pʋgẽ n na n togs maan-​kʋʋdbã. Yãmb mii maan-​kʋʋdbã sẽn maan bũmb ning bɩ? B sẽn yaa wẽnsã yĩnga, b kõo sodaasã ligd la b yeel-⁠b tɩ b yag ziri. B yeela sodaasã yaa: ‘Yeel-⁠y t’a karen-​biisã waa ne yʋng n zuk kũumã yãmb sẽn wa n gõeyã wakate.’

Pagb a taab me sẽn da yaa a Zezi karen-​biis n yõd n wa a Zezi yaoogẽ wã. La b sẽn ta wã, b mikame tɩ yaoogã yaa vɩʋʋgo. A Maari Madelɛn zoeeme n tɩ togs a Pɩɛɛr ne a Zã. La malɛgs a yiib sẽn yer fu-​peels n puk pagb a taabã taoor zĩig pʋgẽ n sok-⁠b yaa: ‘Bõe yĩng tɩ yãmb baood a Zezi ka? A vʋʋgame. Kẽng-⁠y tao-​tao n tɩ togs a karen-​biisã.’ Pagbã zoee tao-​tao n na n kẽnge. La sorã zugu, rao a ye n yals-⁠ba. Yãmb mii sẽn yaa ned ning bɩ? Yaa a Zezi. A yeela pagbã yaa: ‘Kẽng-⁠y n tɩ togs m karen-​biisã tɩ m vʋʋgame.’

Pagbã sẽn tɩ togs karen-​biisã t’a Zezi vʋʋgame la b yã-a lame wã, b pa tẽ ye. A Pɩɛɛr ne a Zã zoeeme n kẽng yaoogẽ wã n na n tɩ ges b toore, la b taame n mik tɩ yaoogã sɩd yaa vɩʋʋgo, tɩ b lebg n looge. A Maari Madelɛn me da lebg n waame, la a kell n paa be. Yaa wakat kãng la a sẽn lɩk yaoogã pʋgẽ n yã malɛgs a yiibã.

La kũumã sẽn da be yaoogã pʋgẽ wã maana wãna? Wẽnnaam kɩtame t’a meneme. Wẽnnaam ka vʋʋg a Zezi ne a pĩnd yĩngã ye. A vʋʋg-⁠a lame t’a lebg malɛka. La wa d sẽn na n yã wã, a Zezi ra pukda ne ninsaal yĩnga, sẽn na yɩl t’a karen-​biisã yã-a n bãng t’a vʋʋgame.