-
Wãn-wãn la d tõe n sõng n zã Rĩungã roogo?Ãnd dãmb n maand a Zeova raabã rũndã-rũndã?
-
-
Sak 26
Wãn-wãn la d tõe n sõng n zã Rĩungã roogo?
Ɛstoni
Zĩmbabwe
Porto Riko
B sã n yeel t’a Zeova Kaset rãmbã Rĩung roogo, b zoe n pʋda a Zeova yʋʋrã. Rẽ n so tɩ d getẽ tɩ naag n maneg Rĩungã roog bɩ n sõng t’a yɩ yɩlemd n sakd gesg yaa zu-zẽkre, la bũmb d sẽn maand n waoogd a Zeova. Ned fãa tõe n kẽesa a toogo.
Tigissã poore, bɩ y naagd n manegd Rĩungã roogo. Tigsg fãa poore, pagbã la rapã naagda taab n pɩɩsd Rĩungã roog ne yamleoogo. D mi n yãka wakat n pek-a la d maneg-a sõma. Kãsem-soab bɩ kãsemb-sõngd n get tʋʋmdã yelle. La naoor wʋsgo, a tara sebr sẽn wilgd bũmb nins b sẽn segd n maane. Tõe n yɩɩ roogã pɩɩsg la a tẽgbo, goeelsã la feneta wã yẽesgo, we-kɛɛngã zĩig pekr la sagdã lobre, zakã manegr la yɩngã pɩɩsgo. D sẽn wilgd kambã tɩ b tʋmd tʋʋm kẽerã sõngd-b lame tɩ b bãng
tɩ b segd n zãa Rĩungã roog sõma.—Koɛɛg Soaba 4:17.
Bũmb sã n dat manegr Rĩungã roogẽ, y tõe n sõngame. Yʋʋmd fãa, d maagda d yĩng n ges bũmb sã n pa be Rĩungã roogẽ la yɩngã n dat manegre. Woto, d yãta zĩis nins sẽn dat manegrã n maneg tao-tao tɩ roogã ket n yaa sõma, n da wa sãam ligd zaalem ye. (2 Kibaya 24:13; 34:10) Rĩungã rot segd n yɩɩ sõma la yɩlma, bala d Wẽnnaamã waoogr zĩig segd n yɩɩ woto. D sã n naagd n manegd Rĩungã roogo, d wilgdame tɩ d nonga a Zeova ne d sũur fãa, la tɩ d nanda zĩig ning d sẽn kẽnd n waoogd-a wã. (Yɩɩl Sõamyã 122:1) Woto kɩtdame me tɩ neb a taabã pẽgda.—2 Korẽnt dãmba 6:3.
Bõe yĩng tɩ d pa segd n maan laas-laas ne d Rĩungã roog zãabo?
D maanda wãn tɩ d Rĩungã roog yaa yɩlemd wakat fãa?
Mongoli
-
-
Rĩungã roog sɛb bĩngr zĩigã yõod ne tõnd yaa bõe?Ãnd dãmb n maand a Zeova raabã rũndã-rũndã?
-
-
Sak 27
Rĩungã roog sɛb bĩngr zĩigã yõod ne tõnd yaa bõe?
Israyɛll
Repiblik Kɛk
Benẽ
ill Kayima
Yãmb mi n dat n maana vaeesg n paas y bãngrã Biiblã zug bɩ? B goma ned yell Biiblã pʋgẽ, wall yaa zĩig bɩ bũmb a to tɩ y rat n bãng sõma bɩ? Zu-loɛɛg la y tara, n dat n bãng Wẽnnaam Gomdã sẽn tõe n sõng-y tɩ y welg-a to-to bɩ? Sã n yaa rẽ, bɩ y bãng tɩ Rĩungã roog sɛb bĩngr zĩigã tõe n sõng-y lame.
Bũmb nins sẽn tõe n sõng-y tɩ y maan vaeesgã bee be. Tõe tɩ y pa tar sɛb nins fãa a Zeova Kaset rãmbã sẽn yiisã ye. Sɛb wʋsg n yaool n be Rĩungã roog sɛb bĩngr zĩigẽ. Wakat ning me, Biibl dãmb toor-toore, sebr sẽn bilgd gom-biis võore, la sɛb a taab n be be. Nand tɩ tigissã sɩnge, la b saabã poore, ned fãa tõe n maana vaeesg beenẽ. Ordinatɛɛr sã n be be, b tõe n ninga Watchtower Library a pʋgẽ, tɩ f sã n pak-a bɩ f tõe n yã tõnd sɛb buud toor-toor n karme, n tõe n gẽes vɛrse bɩ gom-biig võore, la f tõe n bãng b sẽn wɛgs goam kẽer to-to.
Sõngda Kiris-nebã vɩɩm la b tʋʋma tigsgã karen-biisã. Tigingã sɛb bĩngr zĩigã tõe n sõng-y lame tɩ y segend y sõssã sõma. Yaa Kiris-nebã vɩɩm la b tʋʋma tigsgã yel-gɛt n get sɛba bĩngr zĩig yelle. Yẽ n get tɩ b ningd sɛb nins sẽn yi paalmã, la tɩ b bĩngrã yɩ sõma. Lekollã yel-gɛt wall sẽn zãmsd-a yãmb Biiblã tõe n wilg-y-la y sẽn tõe n maan vaeesgã to-to. La d pa tog n dɩk sebr beenẽ n zã n loog ye. Sẽn paase, d tog n gesa sɛbã yell sõma la d ra gʋls b pʋsẽ ye.
Biiblã yetame tɩ d sã n dat n ‘yã Wẽnnaam bãngrã sẽn yaa to-to,’ d segd n sakame n bao-a ‘wa ned sẽn baood arzɛgse.’ (Yelbũna 2:1-5) Rĩungã roog sɛb bĩngr zĩigã tõe n sõng-y lame tɩ y sɩng rẽ maanego.
Bõe n be Rĩungã roog sɛb bĩngr zĩigẽ, n tõe n sõng-y tɩ y maan vaeesgo?
Ãnd n tõe n sõng-y tɩ y bãng n maan vaeesg sɛbã bĩngr zĩigẽ?
-
-
Bõe n be tõnd sit wɛɛbã pʋgẽ?Ãnd dãmb n maand a Zeova raabã rũndã-rũndã?
-
-
Sak 28
Bõe n be tõnd sit wɛɛbã pʋgẽ?
Fãrens
Poloyn
Risi
A Zezi ra yeela a karen-biisã woto: ‘Bɩ yãmb vẽenem yãg nebã sʋka, tɩ bãmb tõe n yã yãmb tʋʋm-sõmã, la b waoog yãmb Ba sẽn be saasẽ’ wã. (Matɩe 5:16) Sẽn na yɩl tɩ d vẽenemã yãg sõma, d tʋmda ne ẽntɛrnetã la tʋʋm-teed a taaba. Yaa d sit wɛɛbã sẽn yaa www.jw.org pʋgẽ la y tõe n paam a Zeova Kaset rãmbã tʋʋmdã kibaya, la y bãng b sẽn tẽed bũmb ninsã. La bõe n pʋd n be beenẽ?
Ne Biiblã maasem, d leoka sogsg nebã sẽn nong n sokdẽ. D sɩtã pʋgẽ, y tõe n yãa sogsg sẽn tar yõod nebã sẽn nong n sokdẽ, la b leoore. Wala makre, Namsgã na n wa saame bɩ? ne Sẽn ki-bã tõe n sɩd vʋʋgame bɩ? seb-vãadã bee ẽntɛrnetã pʋgẽ ne sẽn yɩɩd buud-goam 600. Y leb n tõe n paama Les Saintes Écritures — Traduction du monde nouveau wã ne sẽn yɩɩd buud-goam 130. Sɛb me sẽn sõngd tɩ d zãms Biiblã, wa Biiblã sɩd yetame tɩ bõe? sebrã, n paas Gũusg Gasgã ne Réveillez-vous ! nins sẽn yi paalmã bee be. Y tõe n karma seb-kãens wall y kelg bɩ y telesarz kẽer ne forma PDF bɩ EPUB. Y tõeeme me n ẽnprim bũmb sẽn be sɛb kẽer pʋgẽ ne buud-gom-zẽnga, n tik rẽ zug n sõs ne ned sẽn gomd buud-gom-kãnga, n dat n bãng Biiblã n paase. Video-rãmb n be mugsã goamã buk wʋsg pʋgẽ. Y tõe n telesarza teyatr dãmb sẽn tik Biiblã zug me n kelg bɩ y gese, pa rẽ bɩ yɩɩn-noodo, n mi n kelgdẽ.
Y paamda kibay sẽn yaa takɩ a Zeova Kaset rãmbã zugu. Tõnd sɩt wɛɛbã pʋgẽ, y tõe n paama kiba-paal ne video-rãmb sẽn wilgd tõnd tʋʋmdã d sẽn tʋmd ãndũni gillã, n paas kibay sẽn gomd a Zeova Kaset rãmbã yelle, la sẽn wilgd b sẽn sõngd nebã to-to sabaab wakate. D sɩtã pʋgẽ me, y tõe n paam n bãnga tigs-kãsems wakat la b zĩisi, la y yã Betɛll dãmb adɛrse.
Ne tʋʋm-te-kãensã maasem, d kɩtdame tɩ vẽenem ning sẽn be Biiblã pʋgẽ wã yãgd dũniyã tɛk fãa, baa tẽns nins sẽn zãr wʋsg tɩ waoodã waoogẽ wã. D pʋʋsd n kotame t’a Zeova “koɛɛgã saag” dũniyã tɛk fãa, a yʋʋrã waoogr yĩnga.—2 Tesalonik rãmba 3:1.
Wãn to la d sit wɛɛbã, www.jw.org sõngd neb wʋsg tɩ b bãngd Biiblã sẽn yet bũmb ningã?
Bõe la yãmb rat n gẽes tõnd sit wɛɛbã pʋgẽ?
-