Baa mam sẽn da yaa yãn-zoɛtã, m lebga misioneere

Mam doga yʋʋmd 1951 Viyɛn sẽn be Otris soolmẽ wã. Mam doagdbã ra yaa katolik-rãmba. Mam da yaa yãn-zoɛta, la m da tẽeda Wẽnnaam, n da pʋʋsd wakat fãa. Mam sẽn n wa n tar yʋʋm a wɛ wã, m baaba sɩnga Biiblã zãmsg ne a Zeova Kaset rãmbã. Pa yã n kaoos la m ma me sɩng zãmsg ye.

Pa yã n kaoos la d lebg Doblĩng tigingã sẽn be Viyɛnnã neb ye. Tõnd zakã rãmb ra naagda taab n maand bũmb wʋsgo. D ra naagda taab n karemd Biiblã la d zãmsd-a, n kẽnd tigissã la d sõngd n tʋmd tigis-kãsemsã sasa. Hal m yãadmẽ wã, m baaba sõnga maam tɩ m wa nong a Zeova wʋsgo. Sɩd me, a ra pʋʋsda wakat fãa n kotẽ tɩ maam ne m yao-bi-puglã lebg so-pakdba. La wakat kãng tɩ mam ra pa rat rẽ ye.

M KẼESA M MENG ZÃNG A ZEOVA TƲƲMDÃ PƲGẼ

M deega lisg yʋʋmd 1965, m sẽn wa n tar yʋʋm piig la a naasã. Ra yaa toog ne maam tɩ m sõs ne neb m sẽn pa mi koe-moonegã sasa. M da wae n tagsdame tɩ kom-bɩɩs a taabã sãoo maam, n da rat tɩ b nong maam ne m sũurã fãa. Rẽ n so tɩ m lisgã poor bilfu, m yõga zood ne kom-bɩɩs sẽn pa tũud a Zeova. Baa b tũud-n-taarã sẽn da noom maamã, m da miime tɩ m pa segd n be ne neb sẽn pa a Zeova Kaset rãmb wakat fãa ye. La m da pa tõe n bas b tũud-n-taarã ye. Bõe n sõng maam?

Wakat kãnga, saam-bi-poak a ye n wa tõnd tigingẽ wã t’a yʋʋr boondẽ t’a Dorothée. A sẽn da moond koɛɛgã zak-zak ne yẽesem to-to wã ra nooma maam. Mam yʋʋmã ra yɩɩd-a-la bilfu, la mam da pa moond koɛɛgã woto ye. Mam yeela m meng yaa: ‘Mam roagdbã yaa a Zeova Kaset rãmba, la a Dorothée yaa a ye n tũud a Zeova. A ra geta a ma wã sẽn yaa bãadã yelle, la baa ne rẽ a ra yit n moonda koɛɛgã wakat fãa.’ A mak-sõngã kɩtame tɩ m dat n tʋm a Zeova tʋʋmdã wʋsgo. Pa yã n kaoos la maam ne a Dorothée lebg zo-rãmb n naagd taab n moond koɛɛgã ye. D reng n lebga sõngr so-pakdba, n wa naag taab n lebg wakat fãa so-pakdba. A Dorothée sẽn da nong koɛɛgã moonegã yĩnga, ma-me wa n nonga koɛɛgã moonego. A sõnga maam tɩ m paam m pipi Biibl karen-biiga. M wa n moonda koɛɛgã zak-zak la zĩis a taab n pa le yɛɛsd wʋsg ye.

Mam sẽn lebg wakat fãa so-pakdã poore, saam-biig sẽn yi Kanada n wa tõnd tigingã pʋgẽ t’a yʋʋr boondẽ t’a Heinz. A ra kẽnga be n na n ges a kẽem sẽn yaa a Zeova Kaset soaba, n bãng sɩdã. B yãk-a lame t’a lebg zall so-pakd n tʋm-a tõnd tigingẽ wã. Mam sẽn yã-a wã bala, m yam kẽ-a lame. La a ra rat n lebga misioneere, tɩ mam yaool n da pa rat rẽ ye. Rẽ n so tɩ sɩngrẽ wã, m pa maan t’a bãng tɩ m yam kẽ-a lame ye. La mam ne a Heinz wa n bao n bãnga taab n kẽ kãadem, n naag taab n yɩ so-pakdb Otris.

D YAKA YAM N NA N LEBG MISIONEER-DÃMBA

A Heinz ra nong n gomda ne maam a sẽn tʋll n lebg misioneerã yelle. Baa a sẽn zɩ n pẽdg maamã, a ra wae n sokda maam sogsg sẽn na yɩl tɩ m yam kẽ rẽ. Wala makre, a ra wae n sokda maam yaa: “Sẽn mik tɩ d pa tar kambã, d pa tõe n tʋm a Zeova tʋʋmdã n paas sɩda?” Mam sẽn da yaa yãn-zoɛtã yĩnga, m da yɛɛsdame n pa rat n lebg misioneer ye. Yaa sɩd tɩ m lebga so-pakda, la m da getame tɩ lebg misioneer yɩɩda m nugu. La a Heinz ra ket n gomda rẽ yell ne sũ-mare. Sẽn paase, a sõnga maam tɩ m tags m sẽn tõe n sõng neb a taab to-to wã yelle, n yɩɩd bũmb ning sẽn kẽesd maam rabeemã. A saglsã sõng-m-la wʋsgo.

Bilf-bilfu, m wa n dat n lebga misioneere. Rẽ n so tɩ d gʋls n kos n na n kẽng Galaad lekollã. La filiyallã taoor lʋɩtã sagla maam tɩ m zãms Ãngilindã n paase. M sẽn modg n na n zãms Ãngilindã yʋʋm a tãab poore, b tʋma tõnd Sɛrbo-korwat buud-gomdã tiging a ye sẽn be Salsbʋrg sẽn yaa Otris tẽngã pʋgẽ. Rẽ linga tõnd wʋsgo. Yʋʋm a yopoe pʋgẽ, d moona neb nins sẽn gomd Sɛrbo-korwat buud-gomdã. M sɩdã lebga tigims sull yel-gɛt yʋʋmd tõr tɩ d ra gilgd n kaagd tigimsã. Sɛrbo-korwat buud-gomdã zãmsg ra yaa toog wʋsgo, la d ra tara Biibl karen-biis wʋsgo.

Yʋʋmd 1979 wã, b tʋma tõnd tɩ d kẽng Bulgari n tɩ maan wa d wa n na n gilg n gesa tẽngã. Rẽ tɩ b gɩdga koɛɛgã mooneg be. Rẽ n so tɩ d pa moon koɛɛgã ye. D solga sɛb b sẽn gʋls tɩ yaa kɩds-kɩds n tɩ kõ saam-bi-pogs a nu wã sẽn da be Sofia sẽn yaa Bulgari na-tẽngã pʋgẽ wã. M da yɛɛsda wʋsgo, la a Zeova sõnga maam tɩ m tõog n tʋm tʋʋmdã. M da neeme tɩ saam-bi-pog-kãens tara raood ne sũ-noog baa ne b sẽn da tõe n yõg-b n kẽes bãens roogã. B mak-sõngã kõo maam raood tɩ m yãk yam n na n tʋm tʋʋmd ning fãa a Zeova siglgã sẽn na n kõ-ma.

D le gʋlsame n kos n na n kẽng Galaade. La so-kãngã, b sakame. D ra tagsdame tɩ d na n kẽnga Etazĩni n tɩ maan lekollã ne Ãngilindu. La yʋʋmd 1981 sɩpaolg kiuugã, siglgã paka Galaad lekoll a to Alemayn filiyallã sẽn be Wiesbadɛn tẽngẽ wã. Rẽ n so tɩ d paam n maan lekollã ne Alema sẽn yaa buud-gomd m sẽn wʋmd sõma wã. B tʋma tõnd yɛ?

B TƲMA TÕND TẼNG ZABR SẼN BEẼ

B yeela tõnd tɩ d kẽng Kenya. D sẽn ta Kenya wã, Betɛllã soka tõnd d sã n na n sak n kẽnga Ugãnda sẽn yaa Kenya tẽn-yakã. La yʋʋm piig sẽn deng rẽ, a zenerall Idi Amin lʋɩɩ sodaas taoor tɩ b reeg naamã ne pãng Ugãnda. Yʋʋm nins sẽn pʋglã, a sẽn da rɩt naamã ne toolmã kɩtame tɩ neb tusa ki, tɩ neb milyõ-rãmb nams wʋsgo. La yʋʋmd 1979 wã, a Idi Amin bɛɛbã tõog-a lame t’a zoe n yi tẽngã. Tõe tɩ y zoe n miime tɩ m da yɛɛsdame n pa rat n kẽnge, zabrã sẽn da be be wã yĩnga. La Galaad lekollã sasa, b wilgd-d lame tɩ d teeg a Zeova. Rẽ n so tɩ d sak n na n kẽnge.

Ugãnda nebã vɩɩm ra yaa toog wʋsgo. Goosneema wã ra pa tõe tɩ nebã paam koom, kʋʋrã la bũmb a taab sẽn yaa tɩlɛ ye. Ned ra pa tõe n bool a to ne telefõn ye. Neb n da tãood taab ne bug-raad la b zuud neb a taabã teedo, sẽn yɩɩd fãa yʋngo. Rẽ n so tɩ zĩigã sã n da sobge, nebã ra pagda b mens rotẽ, n saagdẽ tɩ ned pa na n wa kẽ n zu teed wall n kʋ-ba, hal n pʋʋsdẽ menga. Baa ne zu-loeesã, Ugãnda saam-biisã ra ket n tũuda a Zeova ne sũ-noogo.

Yʋʋmd 1982, mam ne a Heinz taa Kãmpala sẽn yaa Ugãnda na-tẽngã. D zĩnda saam-biig a Sam Waiswa ne a pag a Christina zakẽ wã kiuug a nu. B ra tara kamb a nu tɩ neb a naas me sẽn da kĩ ne-b ra be b zakẽ wã. Saam-biig a Waiswa ne a zakã rãmb ra wae n dɩta vugr daar fãa. Rẽ kɩtame tɩ d ra neẽ tɩ b sɩd yaa neb sẽn nong sãamb reegre. D sẽn zĩnd ne saam-biig a Waiswa ne a zakã rãmbã kɩtame tɩ d bãng bũmb wʋsg sẽn sõng-d kaoosg zugẽ. Wala makre, d bãnga d sẽn tõe n dɩk koom bilf n so la d kok ko-kãng n peg we-kɛɛngã zĩiga. Yʋʋmd 1983, maam ne a Heinz paama roog Kãmpala sak a ye bi-be-tʋʋm sẽn pa waoogẽ.

Koɛɛgã mooneg be ra noom-d-la wʋsgo. M tẽrame tɩ kiuug a ye, d pʋɩɩ periodik-rãmb tus a naas la zaka. La nebã n da kõt-d sũ-noog n yɩɩda. B ra nonga Wẽnnaam la b sakd n gomd Biiblã yelle. Tõnd ned kam fãa ra wae n tara Biibl karen-biis piig n dabd piig la a nu. D rɩka yam wʋsg d Biibl karen-biisã nengẽ. Wala makre, baa b sẽn da kẽnd nao n wat tigissã b zɩ n yẽgme, n da tar sũ-noog wakat fãa.

Yʋʋmd 1985 ne yʋʋmd 1986, zab a yiib n zĩnd Ugãnda. D ra wae n yãta kamb sẽn yaa sodaas sẽn gɩd sorã, n zãad bug-ra-bɛda. Wakat kanga, d sã n da yi n na n bao neb nins sẽn dat n kelg koɛɛgã, d ra pʋʋsda a Zeova n kotẽ t’a kõ-d yam la sũur pʋgẽ bãane. A Zeova reega d pʋʋsgã. D sã n da yã ned a woto buudu, naoor wʋsgo d yĩmda rabeemã yelle.

D ra moonda sãambã me. Wala makre, d zãmsa Biiblã ne pag ne a sɩd sẽn yit Tatarstan sẽn yaa Risi soolmã tɩ b yʋʋr boondẽ t’a Murat ne a Dilbar Ibatullin. A Murat ra yaa logtore. Yẽ ne a pagã saka sɩdã n ket n tũud a Zeova hal n tãag rũndã. M le wa n paam n sõsa ne a Tatjana Vileyska sẽn yaa pag sẽn yit Ikrɛnnã. Wakat kãng t’a ra baood n kʋ a mengã. A Tatjana lisgã poore a leba Ikrɛn. A wa n tɩ sõngd n lebgda d sɛbã.a

B TƲM-D-LA ZĨIG A TO TƖ PA YƖ NANA YE

Yʋʋmd 1991 wã, maam ne a Heinz leba Otris n na n tɩ vʋʋs bilfu. D sẽn wa n be be wã Otris Betɛllã bool-d lame n togs-d tɩ b tʋm-d-la Bulgari. Kominist-rãmbã naam sẽn lʋɩ Erop yaangã poore, Bulgari tẽngã taoor dãmb kõo a Zeova Kaset rãmbã sor tɩ b tõe n tʋm b tʋʋmã. M zoe n yeelame tɩ maam ne a Heinz ra solga sɛb n kẽ tẽn-kãng b sẽn wa n gɩdg a Zeova Kaset rãmbã tũudmã. La masã b tʋma tõnd beenẽ tɩ d tɩ moon koɛɛgã.

B yeel-d lame tɩ d ra lebg n leb Ugãnda ye. Rẽ n so tɩ d pa lebg n leb Ugãnda n na n tɩ wʋk d teedã bɩ n pʋʋs d zo-rãmbã wẽnd-na-taas ye. D kẽnga Alemayn Betɛllẽ wã tɩ b kõ-d mobill tɩ d rɩk Bulgari sore. B kɩtame tɩ d tɩ teel koe-moondb pisi sull sẽn be Sofia.

D maoo ne zu-loees a taab Bulgari. Pipi, d ra pa wʋmd b buud-gomdã ye. Sẽn paase, yaa La vérité qui conduit à la vie éternelle sebrã ne Biiblã kibay sebrã bal n da be Bulgari buud-gomdã pʋgẽ. Ra yaa toog ne-d me tɩ d sɩng Biibl zãmsg ne neda. Baa ne zu-loeesã, d sul-bilã neb ra moonda koɛɛgã ne yẽesem. La Ortodogs tũudmã rãmb sũur da pa noom d sẽn moondã, n sɩng-d namsgo.

Yʋʋmd 1994, b le gɩdga a Zeova Kaset rãmbã tũudmã n yeel tɩ b yaa tũudum sẽn yaa wẽnga. B yõga saam-biis kẽer n page. Zʋrnall-dãmbã pʋsẽ la telẽ wã, b yeelga zirẽ-beed wʋsg a Zeova Kaset rãmbã zugu. B yeelame tɩ b kʋʋda kamba, la tɩ b pirsda taab tɩ b kʋʋd b mense. Kɩtame tɩ koɛɛgã mooneg lebg toogo. D ra wae n segda neb sũy sẽn yik sẽn tãsd tõndo. B ra mi n boola polɩɩs-rãmbã wall b wʋkd bũmb toor-toor n lobd tõnd menga. Yɩl n tõog tɩ d sɛbã kẽ tẽngã pʋgẽ ra yaa toogo, tɩ yɩl n paam zĩis n luwaas n maan tigissã me ra pa nana ye. D tigis-kãseng a ye sasa menga, polɩɩs-rãmbã wa n sãeeg-d lame. Maam ne a Heinz ra zɩ n yã kisgr a woto buud ye. Ra yaa toor fasɩ ne Ugãnda nebã sẽn da nong neb la b ra nong n kelgd koɛɛgã. Bõe n sõng tõnd tɩ d pa koms raood wʋsgo?

D sẽn da nong n be ne d tẽed-n-taasã ra kõt-d-la sũ-noog wʋsgo. B sũur da nooma b sẽn bãng sɩdã la d sẽn da sõngd-bã. B ra nonga taab la b teend taaba. Zu-loe-kãensã fãa sõng-d lame tɩ d bãng tɩ sẽn wa n yaa tʋʋmd ning fãa la b kõ-do, d tõe n paama sũ-noogo, d sã n ket n nong neba.

La yʋʋm a wãn poore, yɛlã wa n toeemame. Yʋʋmd 1998 wã, b le kõo a Zeova Kaset rãmbã sor tɩ b tõe n tʋm b tʋʋmã. Pa yã n kaoos la d lebgd sɛb wʋsg Bulgari buud-gomdã pʋgẽ ye. Yʋʋmd 2004, b paka filyallã ro-paalle. Rũndã-rũndã, tigims pis-nu la a yopoe n be Bulgari, tɩ koe-moondbã sõor yaa tus a yiib la kobs wɛ la pis-nu la a tãabo. Yʋʋmd 2024, neb tus a yoob la kobs naas la pis-yopoe la a nu n wa a Zeezi kũumã tẽegre. Wakat n zĩnd tɩ yaa saam-bi-pogs a nu bal n da be Sofia tẽngã pʋgẽ. La masã tigims a wɛ n be be. Maam ne a Heinz tõe n yeelame tɩ d sɩd yãa ‘sẽn da yaa-a bilfã sẽn lebg tusri.’—Eza. 60:22.

D MAOO NE ZU-LOEESE

Bãas n nams-m wʋsgo. Naoor wʋsg la logtoɛɛmbã ges maam n yeel tɩ m tara kãnsɛɛre. Vugri, b yãame tɩ kalkõtã kãnsɛɛr n yõk maam. B tɩpa maam ne tɩpg buud b sẽn boond tɩ radiyoterapi. Sẽn paase, b talla maam n kẽng Ẽnd n tɩ maan opeerasiõ sẽn kaoos lɛɛr piig la a yiibu. Opeerasiõ wã poore, mam zĩnda Ẽnd Betɛllẽ wã n wa paam laafɩ tɩ d leb Bulgari.

Logtoɛɛmbã wa n bãngame me tɩ bãag b sẽn boond t’a Huntington bãag n tar a Heinz. Yaa bãag sẽn pa wae ned roagd sẽn longd-a. Bãagã kɩtame tɩ kẽnã la goamã ra yaa toog ne-a. Kɩtame me t’a ra maand bũmb kẽer tɩ pa tũ ne a raab ye. Bãagã sẽn da paamd pãngã, m da segd n maana bũmb wʋsg n sõng-a. Yɛlã mi n loog-m lame, tɩ m maand yɩɩr ne sẽn na n baas to-to wã. La saam-biig sẽn yaa bi-bɩɩg yʋʋr sẽn boond t’a Bobi n da nong n wat n dɩkd a Heinz tɩ b yit koɛɛgã moonego. A Bobi ra pa zoet yãnd ne a Heinz sẽn pa tõe n gom sõma, la a sẽn mi n maand bũmb kẽer tɩ pa tũ ne a raabã ye. M sã n da wa pa tõe n sõng a Heinz fãa, a Bobi ra sõngd-m lame. Yaa sɩd tɩ maam ne a Heinz yãka yam n pa rog kamb dũni-kãngã pʋgẽ ye. La tõnd nifẽ, a Bobi yaa biig a Zeova sẽn kõ-do.—Mark 10:29, 30.

A Heinz ra tara kãnsɛɛr me. Bʋko, m sɩdã m sẽn da nong wʋsgã maana kaalem yʋʋmd 2015. Sẽn yaa yẽ n da sõngd maam wakat fãa sẽn na yɩl tɩ m da maan yɩɩrã, a kũumã poore m da yɛɛsda wʋsgo. Yɩɩ toog wʋsg ne-m tɩ m tõog n zĩnd m yembre. M tagsda a yell wʋsgo, tɩ yaa wa a ket n vɩɩme. (Luk 20:38) M daar fãa tʋʋmã sasa, m mii n wa tẽega a gom-noodã la sagl-sõma nins a sẽn da kõt-ma yelle. M sũur yaa noog d sẽn paam n naag taab yʋʋm wʋsg pʋgẽ n tʋm a Zeova tʋʋmdã.

M SŨUR YAA NOOG WƲSG A ZEOVA SẼN TEEND-MA

Yaa vẽeneg t’a Zeova teel-m-la m zu-loeesã fãa sasa. A sõng-m lame tɩ m bas m yãn-zoeerã n tõog n lebg misioneer sẽn nong neba. (2 Tɩm. 1:7) A Zeova maasem yĩnga, maam ne m yao wã kẽesa d meng a tʋʋmdã pʋgẽ. Rũndã-rũndã, a sɩdã yaa tigims sull yel-gɛta, tɩ b gilgd Erop soolmẽ wã n kaagd tigims nins sẽn gomd Sɛrb buud-gomdã. A Zeova reega pʋʋsg ning m baaba sẽn da pʋʋsd yʋʋm wʋsg pʋgẽ wã.

Mam sẽn zãmsd Biiblã kɩtame tɩ m yam gãe bãane. M sã n wa tar zu-loeese, m manegd n pʋʋsa ne m sũur fãa wa a Zeezi sẽn maanã. (Luk 22:44) Bũmb a ye a Zeova sẽn tũnugd ne n leokd m pʋʋsgã, yaa a sẽn kɩt tɩ m neẽ tɩ saam-biis la saam-bi-pogs nins sẽn be tõnd tigingã pʋgẽ wã nong-m lame, la b maand-m neerã. B wae n boonda maam b zagsẽ wã tɩ d sõsd ne taaba, la b mi n yet maam tɩ b nong-m lame. Rẽ kõt-m-la sũ-noog wʋsgo.

M wae n tagsda kũum vʋʋgrã yelle. M wae n mamsda m roagdbã sẽn yas b roogã noor n yaa neeb wa b sẽn da yaa to-to b yi-kãadmã daarã. M nee m yao wã sẽn segend rɩɩbo. M nee a Heinz sẽn yas a wed-moaag sɛɛgẽ. Mam sẽn mamsd woto wã kɩtame tɩ m pa tar tags-kɛg ye. Kɩtame me tɩ m sũur maneg n noom ne a Zeova.

M sã n tags m vɩɩmã sẽn yɩ to-to wã, la bõn-sõma nins m sẽn na n paam beoog-daarã yelle, m yetame t’a Davɩɩd sẽn yeel bũmb ning Yɩɩn-sõamyã 27:13, 14 pʋgẽ wã yaa sɩda. A yeelame yaa: “Mam sã n da pa kɩs sɩd tɩ m na n yãa a Zeova sõmblmã nin-vɩɩsã soolmẽ, woto tɩ mam bee yɛ? Teeg a Zeova. Keng f sũur la f tall raoodo. Teeg a Zeova.”