1925:Yʋʋm koabg la woto

B SẼN DA GŨUD BŨMB NINGÃ PA PIDS YE

Biiblã Zãmsdb wʋsg ra tagsdame tɩ tẽngã na n lebga arzãn yʋʋmd 1925 wã. Bõe yĩnga? Saam-biig a Albert Schroeder sẽn wa n lebg Siglgã taoor lʋɩtb Sull nedã yeelame yaa: “Tõnd da tẽedame tɩ kiris-neb nins sẽn paam vʋʋsem sõngã zaeeb n ket tẽngã zugã na n kenga saasẽ yʋʋm-kãng n tɩ lebg rĩm-dãmba, la tɩ neb sẽn maan sɩd ne Wẽnnaam pĩnd wẽndẽ wa a Abrahaam, a Davɩɩd la neb a taab na n vʋʋgame n lebg nanambs tẽngã zugu.” La sẽn wa n kaoosdẽ tɩ rẽ pa pidsdẽ wã, saam-biis kẽer sũy sãamame.—Yel. 13:12.

Baa Biiblã Zãmsdbã sẽn da gũud bũmb ninsã sẽn pa pidsã, b fãa la bal ra ket n moonda koɛɛgã ne yẽesem. Bilf-bilfu, b wa n bãngame tɩ sẽn tar yõod n yɩɩd yaa kõ kaset n gom a Zeova yelle. D ges b sẽn tũnug ne radio wã to-to n moon koɛɛgã tɩ ta neb wʋsgo, baa zĩ-zãrsẽ.

B PAKA RADIO-RÃMB N PAASE

Biiblã Zãmsdbã sẽn pak WBBR radio wã yʋʋmd 1924 tɩ neb wʋsg kelgdẽ wã yĩnga, b paka radio a to sẽn tar pãng zĩig sẽn pẽ Sikago sẽn be Ilinowa wã. B pʋda radio-kãng tɩ WORD. A Ralph Leffler sẽn sõng n tʋm tɩ b pak radio wã yeelame tɩ waood sasa, neb wʋsg ra bee hal zĩ-zãrsẽ n kelgd radio wã. Wala makre, zak a ye rãmb sẽn be Pilot Ɛstasiyõ sẽn yaa Alaska tẽng sẽn be kɩlo tus a nu la zak zĩigẽ wã kelga radio wã a pakrã poor bala. Rẽ poore, b gʋlsa lɛtr n tool radio wã tʋm-tʋmdbã n pʋʋs-b bark b sõssã sẽn kengd raood la paasd b tẽebã pãngã yĩnga.

Yʋʋmd 1925 yʋʋm-sar kiuug pipi daar Gũusg Gasgã goma radio wã sẽn zãagd zĩig to-to wã yell n yeel yaa: “Radio-kãng naaga Etazĩni radio nins sẽn tar pãng n yɩɩdã sʋka. Nebã tõe n kelga radio wã Etazĩni soolmã fãa pʋgẽ, Kuba, la hal baa Alaska nug-rɩtg babgã. Neb wʋsg sẽn da zɩ n wʋm koe-noogã kelga radio wã n dat n bãng n paase.”

Wakat kãng me, Biiblã Zãmsdb modga wʋsg sẽn na yɩl n tũnug ne radio wã n moon koe-noogã Kanada. Yʋʋmd 1924, b paka radio Saskatoon sẽn be Saskatsewan soolmẽ wã n pʋd a yʋʋr tɩ CHUC. A naaga Kanada pipi radio nins sẽn gomd tũudum yɛl yellã sʋka. Yʋʋmd 1925 wã, yɩɩ tɩlɛ tɩ b bao zĩ-yaleng n toeem radio wã zĩiga. Rẽ n so tɩ sosiete wã ra reem ro-kʋdr Saskatoon n lebs n manege, n wʋk radio wã masĩn-dãmb n kẽng be.

Ne radio wã maasem, neb wʋsg sẽn be Saskatsewan tẽn-bõonesẽ la a tẽn-kɩremsẽ paam n wʋma koe-noogã. Wala makre, rao a ye yʋʋr sẽn boond t’a Graham pagã sẽn zĩnd tẽn-bil a ye pʋgẽ n kelg radio wã poore, a gʋlsame n kos sɛb sẽn tik Biiblã zugu. Saam-biig a George Naish yeelame: “A sẽn gʋls to-to wã kɩtame tɩ d neẽ t’a sɩd rata sõngr ne a sũur fãa. Rẽ n so tɩ d tool-a Études des Écritures sɛbã fãa.” Pa yã n kaoos la a Graham pagã sɩng koɛɛgã mooneg ye. A mooname n zãag wʋsgo.

D WƲMA BŨMB KẼER VÕOR N PAASE

Yʋʋmd 1925 tʋʋlg kiuug pipi daar Gũusg Gasgã talla sõsg sẽn tar yõod wʋsgo, t’a gom-zugã yaa: “La naissance de la nation.” Bõe yĩng t’a tall yõod wʋsgo? Rẽ tɩ Biiblã Zãmsdb ra zoe n miime t’a Sʋɩtãan tara siglga, la t’a siglgã yaa zĩn-dãmbã sẽn be saasẽ wã, ziri tũudmã, leebgã la politikã siglsã sẽn be tẽngã zugã. La “tʋm-tʋmd sẽn tũud sɩd la sẽn tar yamã” tũnuga ne sõs-kãng n sõng saam-biisã tɩ b bãng t’a Zeova me tara siglga, siglg sẽn yaa toor fasɩ ne a Sʋɩtãan rẽndã. (Mat. 24:45) Sẽn paase, tʋm-tʋmdã bilgame tɩ Wẽnnaam Rĩungã lugla yʋʋmd 1914, la tɩ yʋʋm-kãnga, ‘zabrã sẽn zĩnd saasẽ’ wã kɩtame tɩ b rig a Sʋɩtãan ne a zĩn-dãmbã n yiis saasẽ, tɩ b be tẽngã zug masã.—Vẽn. 12:7-9.

Biiblã Zãmsdb kẽer pa sak n tẽ b sẽn bilg yɛlã võor woto wã ye. Tʋm-tʋmdã ra miime tɩ na n yɩɩ woto. Rẽ n so tɩ b yeel sõsgã pʋgẽ yaa: “Sã n yaa toog ne karemdb kẽer tɩ b sak n deeg b sẽn bilg yɛlã to-to Gũusg Gasg-kangã pʋgẽ wã, d sagend-b lame tɩ b maan sũ-mar la b kell n teeg Zu-soabã n ket n tʋmd a tʋʋmdã ne b sũur fãa.”

La a Tom Eyre sẽn da yaa so-pakd n be Gãrãnd Bertayn wakat kãngã wilga Biiblã Zãmsdb fãa la bal tagsg sẽn yɩ to-to ne sõs-kãnga, n yeel yaa: “Saam-biisã sũur da yaa noog ne b sẽn bilg Vẽnegr 12 goamã woto wã. D sẽn bãng tɩ Wẽnnaam Rĩungã lugla saasẽ wã, d sũur ra yaa noog wʋsg tɩ d rat n taas neb a taabã koe-no-kãngã. Kɩtame tɩ d maneg n dat n moon ne yẽesem, la sõng-d tɩ d bãng t’a Zeova na n tũnuga ne a nin-buiidã n maan bõn-kãsemse.”

B BÃNGAME TƖ B SEGD N KÕO KASET N GOM A ZEOVA YELLE

Rũndã-rũndã, a Zeova Kaset-rãmbã mii Ezayi 43:10 goamã sõma. Be b yetame: “A Zeova yetame yaa: ‘Yãmb yaa mam kaset rãmba. N-ye, mam tʋm-tʋmd mam sẽn yãke.’” La sẽn deng yʋʋmd 1925 wã, b ra pa wae n gomd vɛrse-kãng yell tõnd sɛbã pʋsẽ ye. La yʋʋmd 1925 wã tɛka, b sɩnga a yell goam wʋsgo. Yʋʋm-kãnga, Gũusg Gasgã goma Ezayi 43:10 yell naoor piig la a yiib sõss piig la a ye pʋsẽ.

Yʋʋmd 1925 sa-sik kiuugã baasgẽ, Biiblã Zãmsdb talla tigis-kãseng Ẽndiyanapolis sẽn be Ẽndiyana soolmẽ wã. Saam-biig a Joseph Rutherford gʋlsa koɛɛg tigis-kãsengã na-kẽndr sebr pʋgẽ sẽn na n wa-bã yĩng n yeel yaa: “D waa tigis-kãngã n na n . . . paam pãng sẽn yit Zu-soabã nengẽ sẽn na yɩl n leb koɛɛgã mooneg zĩigẽ n tɩ tʋm ne yẽesem, n yɩɩ a kaset rãmba.” Tigis-kãsengã sẽn kaoos rasem a nii wã tõre, b ra sagenda sẽn wa-bã tɩ b tũnug ne segb buud fãa b sẽn paam n kõ kaset n gom a Zeova yelle.

Sa-sik kiuug rasem 29 wã sẽn yɩ sibr daarã, saam-biig a Rutherford wɛgsa sõsg n na n keng kɛlgdbã raood tɩ b moon koɛɛgã ne yẽesem. A sõsgã pʋgẽ, a wilga koɛɛgã mooneg sẽn tar yõod wʋsgã võor n yeel yaa: “A Zeova yeela a nin-buiidã . . . : ‘Yãmb yaa mam kaset rãmba, . . . tɩ mam yaa Wẽnnaam.’” Rẽ poore a wilg-b-la b sẽn segd n maanã vẽenega. A yeelame yaa: “‘Zẽk-y tãb-kaoor buud toɛy-toɛyã yĩnga.’ Neb a taab pa be tẽng a zug n na n zẽk tãb-kaoor buud toɛy-toɛyã yĩng n zʋʋg [a Zeova nin-buiidã,] neb nins sẽn tar a vʋʋsem sõngã tɩ kɩt tɩ b yaa a kaset rãmbã ye.”—Eza. 43:12; 62:10.

Saam-biig a Rutherford sõsgã baasgẽ, a karma no-sɩɩr gom-zug sẽn yaa: “Koɛɛg sẽn wat ne saagre,” tɩ kɛlgdbã fãa wilg tɩ b saka no-sɩɩrã. No-sɩɩrã wilgame tɩ yaa Wẽnnaam Rĩungã bal n tõe n kɩt tɩ d paam bãane, arzɛk hakɩɩka, laafɩ, vɩɩm, lohorem la sũ-noog sẽn pa sate. B wa n lebga no-sɩɩrã buud-goam a wãn pʋgẽ n ẽmpirim seb-vãoog zugu. B pʋɩɩ seb-vã-kãng na maan milyõ pis-naase.

Ra na n maana yʋʋm a wãn tɩ b yaool n toeem b yʋʋrã tɩ lebg a Zeova Kaset rãmba. La b ra zoe n neeme tɩ tara yõod wʋsg tɩ b kõ kaset n goma a Zeova yelle.

B SƖNGA LEBG-N-TƖ-GES-RÃMB MAANEGO

Biiblã Zãmsdbã sõorã sẽn paas dũniyã gill zugã kɩtame tɩ siglgã sagl-b tɩ b ra le pʋɩt sɛbã bala, la tɩ ned sã n kelg koe-noogã sõma bɩ b lebg n tɩ kaag-a. Bulletina wã kõo sagls Koɛɛg sẽn wat ne saagrã seb-vãoog pʋɩɩb wɛɛngẽ n yeel yaa: “Lebg-y n tɩ kaag-y neb nins sẽn deeg Koɛɛg sẽn wat ne saagrã seb-vãoogã.”

Yʋʋmd 1925 yʋʋm-vẽkr kiuug Bulletin wã pʋgẽ, b togsa goam Biibl Zãmsd a ye sẽn be Palano sẽn yaa Tɛgzas tẽngã sẽn togs n yeel yaa: “D mikame tɩ zĩis nins d sẽn tɩ moon naoor wʋsgã, nebã wae n kelgdame n yɩɩd zĩis nins d sẽn zɩ n moonã hal tɩ ling-du. D tɩ moona tẽn-bil a ye sẽn be tõnd moonegã zĩigẽ naoor a nu yʋʋm piig pʋgẽ. . . . Sẽn nan pa kaoose, m ma ne saam-biig a Hendrix le tɩ moona be tɩ b sẽn bas sɛbã sõor yɩɩd pĩndã.”

So-pakd a ye sẽn be Panama gʋlsame n yeel yaa: “Neb wʋsg sẽn pa sak n kelg maam mam sẽn tɩ kaag-b pipi wã toeema yam, mam sẽn kẽng naoor yiib-n-soab bɩ tãab-n-soabã sasa. Rõandã yʋʋmdã, m koɛɛgã mooneg yaa lebg n tɩ kaag neb nins m sẽn da sõs ne pĩndã. M paam n sõsa ne kẽer hal tɩ yɩ noogo.”

BIIBLÃ ZÃMSDB GŨUDA SẼN WATÃ NE YÃGBO

Yʋʋmd 1925 wã baasgẽ, saam-biig a Rutherford gʋlsa lɛtr n tool so-pakdbã n wilg-b bũmb nins b sẽn tõog n maan yʋʋmdã pʋgẽ wã, la a gom tʋʋmd ning sẽn ketã yelle. A yeelame: “Yʋʋmdã sẽn loogã pʋgẽ, yãmb paam n belsa neb wʋsg sũy sẽn sãame. Tʋʋm-kãng kõo yãmb sũ-noogo. . . . Yʋʋmdã sẽn na n sɩng ka la bilfã na n kõ-y-la weer tɩ y kõ kasetã n gom Wẽnnaam la a Rĩungã yelle, la y wilg nebã noy nins a sẽn gãneg tɩ b segd n tũ wã. . . . Bɩ d kell n naag taab n zẽk d koees n yɩɩl n pẽg d Wẽnnaamã la d Rĩmã.”

Yʋʋmd 1925 wã sẽn wa n kolgd saabã, saam-biisã sɩnga magb n na n yalg Burkilin Betɛllã. Yʋʋmd 1926, siglgã sɩnga tʋʋm-kãsengã, tʋʋmd buud b sẽn da zɩ n tʋme.