SOGSG KOM-BƖƖSÃ SẼN SOKDE
Bõe la m tõe n maan n da le tagsd pag ne rao lagengã yelle?
“M wat n tiig n tagsda pag ne rao lagengã yelle, hal n wa pa le tõe n tags bũmb a to yell ye. Yaa wa ned a to n wẽnd m tagsa wã.”—A Vera.
“Wõnda m pa tõe n yõk m meng n pa tags pag ne rao lagengã yelle, wa m nusã sẽn pa tõe n lebg pɩgs tɩ m yɩkã.”—A John.
Fo-me tagsda wa a Vera la a John bɩ? Sã n yaa woto, sõs-kãngã tõe n sõnga foo.
Bõe yĩng tɩ d pa segd n tagsd pag ne rao lagengã yell wʋsgo?
Bi-bɩɩg a ye yʋʋr sẽn boond t’a Alex yeelame: “M yasb yeela maam tɩ Wẽnnaam ra pa na n kõ tõnd pag ne rao lageng tʋlsmã, a sã n da pa rat tɩ d pids-a ye.”
A Alex yasbã sẽn yeel-a bũmb ningã pa ziri zãng ye. Yaa sɩd tɩ Wẽnnaam kõo tõnd pag ne rao lageng tʋlsmã, la yaa bʋʋm-tɩrg yĩnga. Ninsaalbã sẽn be rũndã-rũndã wã yaa pag ne rao lagengã maasem yĩnga. Woto wã, bõe yĩng tɩ d pa segd n tagsd pag ne rao lagengã yell wakat fãa? Ad bʋʋm a yiibu:
Biiblã wilgame tɩ Wẽnnaam daabã yaa tɩ yaa pag ne rao sẽn kẽ kãadem bal n tõe n kẽ ne taaba.—Sɩngre 1:28; 2:24.
F sã n tũud Wẽnnaam daabã la f nan pa kẽ kãadem, pag ne rao lagengã yell tagsg na n sãamda f sũur bala. Tõe n kɩtame tɩ f pa le tõog f menga, n kẽ ne neda. Neb wʋsg sẽn maan woto wa n maana b bãngẽ.
F sã n modg n pa tagsd pag ne rao lagengã yell wʋsgo, tõe n kɩtame tɩ f bɩɩs yõk-m-menga. Rẽ na n sõnga foo f vɩɩmã nens fãa pʋgẽ.—1 Korẽnt rãmbã 9:25.
Yõk-m-mengã na n sõng-f lame tɩ f vɩɩmã tall bark masã menga, la beoog sẽn wate. Vaeesdb kẽer wilgame tɩ kamb nins sẽn tar yõk-m-mengã sã n wa bɩ, b pa wae n tar laafɩ zu-loeese, ligd zu-loeese, la yell ne tẽngã taoor dãmb ye.a
Bõe yĩng tɩ rẽ yaa toog wʋsgo?
Neb nins d sẽn be ne wã tagsda pag ne rao lagengã yell la b gomd a yell wakat fãa. Sẽn paase, f sã n yaa bi-bɩɩga, f yĩngã wil kẽer toeemdame. Woto fãa kɩtame tɩ yaa toog tɩ f ra tags pag ne rao lagengã yell ye.
“Wõnda bũmb nins fãa b sẽn yiisd teleẽ wã wilgdame tɩ ned sã n kẽ ne rao wall ne pag tɩ b nan pa kẽ kãadem yaa bũmb sẽn zemse, la tɩ pa tõe n wa ne yell ye. Neb wʋsg sã n tagsd tɩ f sã n kẽ ne ned n yaool n pa kẽ kãadem pa tar yelle, yaa nana tɩ fo-me tall tagsg sẽn pa zems rẽ wɛɛngẽ.”—A Ruth.
“Tʋʋmã zĩigẽ, b ra wae n gomda gom-dẽgd pag ne rao lagengã wɛɛngẽ tɩ kɩt tɩ mam wa rat n mak n gese. B ra wae n gomdame tɩ yaa wa yoobã yaa bũmb sẽn zemse, hal tɩ yaa toog tɩ f tags tɩ yaa wẽnga.”—A Nicole.
“F sã n nong n kẽed rezo sosiyo-rãmbã pʋsẽ n get fot-rãmba, tõe n kɩtame tɩ f wa pa le maand gũusg ye. Fot-yɛng bal sẽn wilgd yoob yɛl tõe n kẽe f yamẽ tɩ lebg toog tɩ f yĩm a yelle.”—A Maria.
Woto fãa tõe n kɩtame tɩ f wa tagsd wa tẽn-tʋʋmd a Polle. A yeelame: “Mam sã n wa rat n maan sẽn yaa sõma, sẽn yaa wẽng bee ne maam.”—Rom dãmbã 7:21.
Ra bas tɩ tagsa sẽn pa sõma soog f yamã ye
F sẽn tõe n maane
Tags bũmb a to yelle. Modg n tags bũmb a to sẽn pa pag ne rao lagengã yelle. Wala makre, bũmb f sẽn nong n maandẽ, wall f maan ɛspoor bɩ yĩn-wɩsgre, pa rẽ bɩ bũmb a to sẽn na n toeem f tagsa wã. Pʋg-sad a ye yʋʋr sẽn boond t’a Valerie yeelame: “Biiblã kareng sõngdame. Yaa Wẽnnaam goam n be a pʋgẽ. Rẽ sã n be f yamẽ, yaa toog tɩ f tags bũmb a to yelle.”
Yaa sɩd tɩ f pa tõe n pa wa tags pag ne rao lagengã yell ye. La f sẽn na n tags b yell to-to wã bee ne foo. F sã n data, f tõe n yiis-b-la f yamẽ.
“Pag ne rao lagengã yell sã n wa kẽ m yamẽ, m modgd n tagsa bũmb a to yelle. M baood n bãnga bũmb ning sẽn wat ne tagsg a woto m yamẽ wã me. Wakat ninga, yaa yɩɩll wall fot la m segd n yẽes m aparɛy wã pʋgẽ.”—A Helena.
Biiblã saglga: “Bũmb nins fãa sẽn yaa tɩrse, bũmb nins fãa sẽn yaa yɩlma, . . . bɩ y ket n tagsd bõn-kãens yelle.”—Filip rãmbã 4:8.
Bao tũud-n-ta-sõma. F zo-rãmbã sã n gomd pag ne rao lagengã yell wakat fãa, na n yɩɩ toog tɩ f tall tagsa sẽn yaa sõma.
“M sẽn wa n yaa bi-bɩɩgã, m maoo wʋsg ne m tagsa wã, la yaa m tũud-n-taasã n kɩt tɩ yɩ toog ne-m yɩɩda. F sã n be ne neb sẽn get tɩ yoobã pa wẽnga, f wat n pa le maand gũusg ne f tʋlsmã ye. Pʋd n kɩtdame t’a paamd pãnga, wa raad b sẽn tuiid bugmẽ.”—A Sarah.
Biiblã saglga: “Sẽn kẽnd-a ne yam dãmb na n lebga yam soaba, la sẽn tũud-a yalemb na n paama zu-loeese.”—Yel-bũnã 13:20.
Zãag f meng ne reem sẽn pa sõma. Nebã fãa miime tɩ rũndã-rũndã reem buud toor-toorã b sẽn yiisdã fãa la bal pʋsẽ, b gomda pag ne rao lagengã yelle. A Nicole yeelame: “Sã n yaa ne maam, mizikã n yãngd m tʋlsmã n tɩ yɩɩda. Tõe n kɩtame tɩ m tʋlsmã paam pãng hal tɩ yaa wa sẽn maand kae ye.”
“M wa n sɩngame n get filim-dãmb la bũmb a taab b sẽn yiisd teleẽ wã n wilgd pag ne rao lagengã. Maam ne m na n bãngã tɩ m tagsda pag ne rao lagengã yell wʋsgo. Yɩɩ nana tɩ m bãng bũmb ning sẽn kɩt tɩ m wa tar tagsa a woto wã. Mam sẽn bas n pa le get filim-kãens la bũmb a taab b sẽn yiisd teleẽ wã, m pa le tagsd pag ne rao lagengã yell wʋsg ye. F sã n maand gũusg ne bũmb ning f sẽn kelgdã la f sẽn getã, f na n tõog n maoo ne tagsa sẽn pa sõma wã nana-nana.”—A Joanne.
Biiblã saglga: “B pa segd n pʋd yoob la rẽgd buud baa a ye wall yão-beed yell yãmb sʋk ye.”—Efɛɛz rãmbã 5:3.
Y sẽn segd n bãnge: Neb kẽer tagsdame tɩ pag ne rao lagengã tara yõod wʋsg tɩ b pa segd n yõk b mens ye. B getame tɩ b pʋd n pa tõe n yõk b mens ye. La Biiblã pa yet woto ye. Biiblã wilgame tɩ ninsaal tara tõog n tõe n yõk a menga, n da sak a tʋls-wẽnsã ye.
Biiblã saglga: “Yãmb segd n ket n manegda y tagsa wã tɩ lebgd paalse.”—Efɛɛz rãmbã 4:23.
a Bʋʋm a to me sẽn kɩt tɩ f segd n bɩɩs zʋg-kãngã f sẽn ket n nan pa kẽ kãadmã, yaa tɩ yõk-m-mengã yaa tɩlɛ ne sẽn kẽ-b kãadmã me.