A Zeova Kaset rãmbã yaa kiris-neb bɩ?

N-ye. Tõnd yaa kiris-neba. Ad bʋʋm a wãn sẽn wilgd rẽ:

• Tõnd modgdame n dɩkd a Zeezi togs-n-taare, la d tuud a sẽn wilg tõnd bũmb ninsã neere.—1 Pɩyɛɛre 2:21.

• Tõnd tẽedame tɩ yaa ne a Zeezi maasem bal la ned tõe n paam fãagre. Bala, “Wẽnnaam ka kõ ned yʋʋr a to ninsaalbã sʋk dũniyã zug tɩ tõnd tõe n tũ n paam fãagr ye.”—Tʋʋmã 4:12.

• Neb nins sẽn lebgd a Zeova Kaset rãmbã reegda lisg a Zeezi yʋʋr yĩnga.—Matye 28:18, 19.

• Tõnd pʋʋsda Wẽnnaam a Zeezi yʋʋrã maasem yĩnga.—Zã 15:16.

• Tõnd tẽedame t’a Zeezi yaa ninsaal buud fãa Zu-soaba.—1 Korẽnt-rãmbã 11:3.

La bũmb toor-toor n welgd tõnd ne tũudum a taab nins sẽn yet tɩ b yaa kiris-nebã. Wala makre, tõnd tẽedame tɩ Biiblã wilgame t’a Zeezi yaa Wẽnnaam Biiga, n pa be tãablem pʋgẽ ye. (Mark 12:29) Tõnd pa tẽed tɩ ninsaal tara sɩɩg sẽn pa kiidi, d pa tẽed me tɩ Biiblã wilgame tɩ Wẽnnaam na n namsa nin-wẽnsã bugmẽ wakat sẽn kõn sa, wall tɩ neb nins sẽn lʋɩt taoor tũudmã pʋgẽ wã segd n tara naam yʋ-bɛd sẽn wilgd tɩ b yɩɩda b taabã ye.—Koɛɛg soaba 9:5; Ezekɩyɛll 18:4; Matye 23:8-10.