Eżodu

16 Iktar tard telqu minn Elim,+ u l-​ġemgħa kollha taʼ wlied Israel fl-​aħħar waslet fix-​xagħri tas-​Sin,+ li qiegħed bejn Elim u s-​Sinaj, nhar il-​ħmistax tat-​tieni xahar wara li ħarġu mill-​art taʼ l-​Eġittu.

2 U l-​ġemgħa kollha taʼ wlied Israel bdiet tgerger kontra Mosè u Aron fix-​xagħri.+ 3 U wlied Israel bdew jgħidulhom: “Mhux li mitna+ b’id Ġeħova fl-​art taʼ l-​Eġittu waqt li konna bil-​qiegħda ħdejn il-​borom tal-​laħam,+ waqt li konna nieklu ħobż sakemm nixbgħu, għaliex intom ħriġtuna f’dan ix-​xagħri biex toqtlu lil din il-​kongregazzjoni kollha bil-​ġuħ.”+

4 Imbagħad Ġeħova qal lil Mosè: “Ara! Se nibagħtilkom xita taʼ ħobż mis-​smewwiet;+ u n-​nies iridu joħorġu jiġbru kull wieħed l-​ammont tiegħu minn jum għal jum,+ sabiex ngħaddihom minn prova ħalli nara jekk jimxux mal-​liġi tiegħi jew le.+ 5 U jrid iseħħ fis-​sitt jum+ li jridu jħejju dak li se jiġbru, u dan irid ikun id-​doppju taʼ dak li jiġbru minn jum għal jum.”+

6 Għalhekk, Mosè u Aron qalu lill-​ulied kollha taʼ Israel: “Fil-​għaxija żgur li tkunu tafu li Ġeħova kien li ħariġkom mill-​art taʼ l-​Eġittu.+ 7 U fil-​għodu taraw il-​glorja taʼ Ġeħova,+ għaliex hu semaʼ t-​tgergir tagħkom kontra Ġeħova. U aħna x’aħna sabiex tgergru kontrina?” 8 U Mosè kompla: “Dan jiġri meta Ġeħova fil-​għaxija jagħtikom il-​laħam x’tieklu u fil-​għodu ħobż biex tixbgħu, għaliex Ġeħova semaʼ t-​tgergir tagħkom li qed tgergru kontrih. U aħna x’aħna? It-​tgergir tagħkom mhux kontrina, imma kontra Ġeħova.”+

9 U Mosè ssokta jgħid lil Aron: “Għid lill-​ġemgħa kollha taʼ wlied Israel, ‘Ersqu qrib quddiem Ġeħova, għaliex hu semaʼ t-​tgergir tagħkom.’”+ 10 Imbagħad ġara li, malli Aron kellem lill-​ġemgħa kollha taʼ wlied Israel, dawn daru wiċċhom lejn ix-​xagħri, u, ara, il-​glorja taʼ Ġeħova dehret fis-​sħaba.+

11 U Ġeħova kompla jkellem lil Mosè, u qallu: 12 “Smajt it-​tgergir taʼ wlied Israel.+ Kellimhom, u għidilhom, ‘Bejn inżul ix-​xemx u d-​dlam tieklu l-​laħam u fil-​għodu tixbgħu bil-​ħobż;+ u żgur li tkunu tafu li jien Ġeħova Alla tagħkom.’”+

13 Għaldaqstant ġara li fil-​għaxija beda ġej is-​summien+ u jgħatti l-​kamp, u fil-​għodu kien hemm saff nida madwar il-​kamp.+ 14 Wara ftit, is-​saff nida evapora, u fuq wiċċ ix-​xagħri kien hemm xi ħaġa fina li titfarrak,+ fina bħall-​ġlata+ fuq l-​art. 15 Meta rawha, ulied Israel bdew jgħidu lil xulxin: “Din x’inhi?” Għax ma kinux jafu x’inhi. Għalhekk, Mosè qalilhom: “Dan hu l-​ħobż li Ġeħova takom bħala ikel.+ 16 Din hi l-​kelma li kkmanda Ġeħova, ‘Iġbru ftit minnu, kull wieħed skond kemm jiflaħ jiekol. Għandkom tieħdu kejl taʼ l-​għomer+ għal kull individwu skond l-​għadd taʼ persuni* li kull wieħed minnkom għandu fit-​tinda tiegħu.’” 17 U wlied Israel bdew jagħmlu hekk; u ġabruh, xi wħud ġabru ħafna u xi wħud ġabru ftit. 18 Meta kienu jkejluh bl-​għomer, min kien ikun ġabar ħafna ma kienx ikollu żejjed u min kien ikun ġabar ftit ma kienx ikollu nieqes.+ Kull wieħed ġabar skond kemm kien jiflaħ jiekol.

19 U Mosè qalilhom: “Ħalli ħadd ma jħalli minnu għal fil-​għodu.”+ 20 Imma huma ma tawhx widen lil Mosè. Meta xi wħud kienu jħallu ftit minnu għal fil-​għodu, kien idewwed u jinten;+ u Mosè għadab għalihom.+ 21 U kienu jiġbru minnu kull fil-​għodu,+ kull wieħed skond kemm kien jiflaħ jiekol. Meta x-​xemx kienet tisħon, kien idub.

22 U ġara li fis-​sitt jum kienu jiġbru d-​doppju ħobż,+ żewġ kejlijiet taʼ l-​għomer għal kull persuna. Għalhekk, il-​kapijiet ewlenin kollha tal-​ġemgħa ġew u taw l-​aħbar lil Mosè. 23 U hu qalilhom: “Dan qal Ġeħova. Għada jkun hemm osservanza tas-​Sabat,* Sabat imqaddes lil Ġeħova.+ Dak li tistgħu taħmu, aħmuh,+ u dak li tistgħu tgħallu, għalluh, u ż-​żejjed kollu li jkun fadal erfgħuh għalikom u żommuh sa fil-​għodu.” 24 Għaldaqstant refgħuh għal fil-​għodu, bħalma kien ordna Mosè; u la niten u lanqas rabba d-​dud.+ 25 Imbagħad Mosè qalilhom: “Kuluh illum, għaliex illum hu Sabat+ lil Ġeħova. Illum ma ssibuhx fir-​rabaʼ. 26 Għal sitt ijiem tiġbruh, imma s-​sebaʼ jum hu Sabat.+ Dakinhar ma jkun hemm xejn.” 27 Madankollu, fis-​sebaʼ jum ġara li xi wħud min-​nies ħarġu jiġbruh, imma ma sabu xejn.

28 Għaldaqstant, Ġeħova qal lil Mosè: “Kemm se ddumu tirrifjutaw li tħarsu l-​kmandamenti tiegħi u l-​liġijiet tiegħi?+ 29 Ara! Ġeħova takom is-​Sabat.+ Huwa għalhekk li fis-​sitt jum qed jagħtikom il-​ħobż għal jumejn. Ibqgħu bil-​qiegħda kull wieħed f’postu.+ Ħalli ħadd ma joħroġ minn postu fis-​sebaʼ jum.” 30 U n-​nies osservaw is-​Sabat fis-​sebaʼ jum.+

31 U dar Israel semmiet dan il-​ħobż “manna.” U din kienet bajda bħaż-​żerriegħa tal-​kosbor, u t-​togħma tagħha kienet bħal tal-​ftajjar bl-​għasel.+ 32 Imbagħad Mosè qal: “Din hi l-​kelma li kkmanda Ġeħova, ‘Imlew kejl taʼ l-​għomer minnu bħala xi ħaġa li għandha tinżamm matul il-​ġenerazzjonijiet tagħkom,+ sabiex jaraw il-​ħobż li ġegħeltkom tieklu fix-​xagħri meta kont qed noħroġkom mill-​art taʼ l-​Eġittu.’”+ 33 Għalhekk, Mosè qal lil Aron: “Aqbad ġarra u poġġi fiha għomer manna u qegħedha quddiem Ġeħova bħala xi ħaġa li għandha tinżamm matul il-​ġenerazzjonijiet tagħkom.”+ 34 Sewwasew bħalma Ġeħova kien ikkmanda lil Mosè, Aron qegħedha quddiem it-​Testimonjanza+ bħala xi ħaġa li għandha tinżamm. 35 U wlied Israel kielu l-​manna għal erbgħin sena,+ sakemm waslu f’art abitata.+ Kielu l-​manna sakemm waslu fil-​fruntiera taʼ l-​art taʼ Kangħan.+ 36 Issa għomer hu wieħed minn għaxra taʼ kejl t’efa.