Isaija

64 Mank ċarratt is-sema u nżilt,

Ħalli l-muntanji jitheżżu minħabba fik.

 2 Mank inżilt bħan-nar li jqabbad il-friegħi nexfin

U jgħalli l-ilma,

Kieku l-għedewwa tiegħek kienu jsiru jafu b’ismek,

U l-popli kienu jirtogħdu quddiemek!

 3 Meta għamilt affarijiet tal-għaġeb li lanqas għaddew minn moħħna,

Int inżilt, u l-muntanji theżżu quddiemek.

 4 Minn żmien twil ilu, ħadd ma semaʼ, ta kas,

Jew ra Alla ħliefek,

Li taġixxi għal dawk li jistennewk bil-paċenzja.

 5 Int ilqajt lil dawk li jagħmlu dak li hu sew bil-ferħ

Dawk li jiftakru fik u jagħmlu li trid int.

Int kont irrabjat ħafna,

Għax aħna bqajna nidinbu għal ħafna żmien.

 6 Kollha kemm aħna sirna bħal xi ħadd mhux nadif,

U l-affarijiet tajbin kollha li għamilna huma bħal biċċa maħmuġa.*

Aħna se ninxfu bħall-weraq,

U l-iżbalji tagħna se jġorruna bħar-riħ.

 7 M’hemm ħadd li qed ifaħħar lil ismek,

U ħadd mhu qed jipprova jfittex l-għajnuna tiegħek,

Għax int ħbejt wiċċek minna,

U tħallina niġu fix-xejn* minħabba l-iżbalji tagħna.

Aħna t-tafal, u int Dak li tagħmel il-fuħħar;*

Aħna lkoll xogħol idejk.

 9 Ġeħova, tirrabjax iżżejjed

U tibqax tiftakar l-iżbalji tagħna għal dejjem.

Sijon saret deżert

U Ġerusalemm art abbandunata.

11 It-tempju qaddis u glorjuż* tagħna,

Fejn kienu jfaħħruk missirijietna,

Ġie maħruq bin-nar

U l-affarijiet kollha li kienu għal qalbna saru ħerba.