Salm

Għanja taʼ David.

108 Qalbi hi leali lejk, Alla tiegħi.

Jien se nkanta u ndoqq b’qalbi kollha.

2 Jien se nqum qabel ma titlaʼ x-xemx.

Irrid indoqq l-arpa u strumenti tal-korda oħra.

3 Ġeħova, jien se nfaħħrek fost il-popli;

Se nfaħħrek bil-kant* fost il-ġnus.

4 L-imħabba* tiegħek tant hi kbira li tasal sas-sema,

U l-lealtà tiegħek sas-sħab.

5 Uri l-kobor tiegħek fis-sema, Alla tiegħi;

Jalla d-dinja kollha tara l-glorja tiegħek.

6 Eħlisna bil-qawwa tiegħek* u wieġeb it-talba tagħna,

Sabiex dawk li int tħobb jiġu salvati.

7 L-Alla l-qaddis qal:*

“Jien se nifraħ meta nagħti lil Sikem bħala wirt,

U naqsam u nagħti l-Wied* taʼ Sukkot lil min irrid jien.

8 Gilegħad u Manasse huma tiegħi,

Efrajm hu l-elmu* għal rasi,

U Ġuda hu l-bastun li juri l-awtorità tiegħi.

9 Mowab hu l-friskatur fejn naħsel saqajja.

Jien se nitfaʼ s-sandli tiegħi fuq Edom.

Jien se ngħajjat bil-ferħ għax se nirbaħ lill-Filistja.”

10 Min se jiħodni lejn il-belt iffortifikata?

Min se jmexxini s’Edom?

11 Alla tiegħi, int se tagħtina dik ir-rebħa!

Imma int warrabtna

U mhux qed tmexxi l-armati tagħna.

12 Għinna fi żmien taʼ inkwiet,

Għax għalxejn nittamaw li niġu salvati mill-bniedem.

13 Permezz t’Alla, aħna se jkollna s-saħħa,

U hu se jgħaffeġ lill-għedewwa tagħna.