L-ITTRA TAʼ ĠAKBU

1 Jien Ġakbu, ilsir t’Alla u tal-Mulej Ġesù Kristu, qed nibgħat din l-ittra lit-12-il tribù li huma mxerrdin maʼ kullimkien:

Inselli għalikom!

2 Ħuti, meta tgħaddu minn diversi provi, ikkunsidraw dan bħala xi ħaġa taʼ ferħ 3 għax tafu li meta l-fidi tagħkom tgħaddi minn prova, intom titgħallmu tissaportu. 4 Jekk tkomplu tissaportu, imbagħad se tkunu ttrennjati għalkollox, u se tkunu bla difett fl-aspetti kollha u ma jkun jonqoskom xejn.

5 Jekk xi ħadd minnkom għandu bżonn l-għerf, hu għandu jkompli jitlob lil Alla u se jingħatalu, għax Alla jagħti b’mod ġeneruż lil kulħadd u mhux se jirrabja maʼ* min jitolbu. 6 Però għandu jkompli jitlob bil-fidi mingħajr ma jiddubita, għax min jiddubita hu bħal mewġa tal-baħar li titmexxa mir-riħ ’l hemm u ’l hawn. 7 Infatti, xi ħadd bħal dan m’għandu jistenna li jirċievi xejn mingħand Ġeħova,* 8 għax hu bniedem indeċiż u mhux stabbli f’kulma jagħmel.

9 Imma l-ħu fqir għandu jifraħ* għax Alla se jonorah, 10 u l-ħu sinjur għandu jifraħ għax tgħallem ikun umli. Għax min hu sinjur se jmut bħal fjura. 11 Għax bħalma x-xemx titfaʼ sħana taħraq u b’hekk tnixxef pjanta, jaqgħu l-fjuri tagħha, u ma tibqax tidher sabiħa, hekk ukoll se jispiċċa s-sinjur li jirsisti biex ikollu l-ġid.

12 Ferħan min ikompli jissaporti waqt li jkun għaddej minn prova, għax meta jgħaddi mit-test, hu se jirċievi l-ħajja bħala rigal,* li Ġeħova* wiegħed lil dawk li jibqgħu jħobbuh. 13 Meta xi ħadd ikun għaddej minn sitwazzjoni diffiċli, m’għandux jgħid: “Alla qed jgħaddini minn prova.” Dan għax ħadd ma jistaʼ jħajjar lil Alla jagħmel affarijiet ħżiena, u Alla ma jħajjar lil ħadd biex jagħmel dak li hu ħażin. 14 Imma kull wieħed jgħaddi minn prova meta jiġi ttantat mix-xewqat tiegħu stess. 15 Imbagħad meta x-xewqa ssir kbira ħafna, iġġiegħel lil persuna tagħmel id-dnub,* u dan iwassal għall-mewt.

16 Għeżież aħwa, titqarrqux. 17 Kull ħaġa tajba u kull rigal perfett ġejjin mis-sema, mingħand il-Missier li għamel ix-xemx, il-qamar, u l-istilel. Hu ma jinbidilx bħalma jagħmel dell li jiċċaqlaq. 18 Hu tana l-ħajja meta aħna emminna li l-kelma tiegħu hi l-verità għax dan kien dak li jrid hu. B’hekk aħna stajna nsiru l-ewwel uħud li ġejna magħżulin minn dak li ħalaq.

19 Għeżież aħwa, kunu afu dan: Kull wieħed għandu jkun ħafif biex jismaʼ, imma tqil biex jitkellem u tqil biex jirrabja, 20 għax il-persuna li tirrabja ma tkunx qed taġixxi fi qbil mal-ġustizzja t’Alla. 21 Għalhekk, neħħu kull ħmieġ u kull traċċa taʼ ħażen,* u kunu umli u ħallu lil Alla jqiegħed* il-kelma tiegħu f’qalbkom. Il-kelma tiegħu tistaʼ ssalvakom.*

22 Iżda tkunux uħud li tisimgħu biss, imma għixu fi qbil mal-kelma, għax inkella tkunu qed tqarrqu bikom infuskom b’raġunar falz. 23 Għax jekk xi ħadd jismaʼ l-kelma imma ma jagħmilhiex, dan ikun bħal xi ħadd li jħares lejn wiċċu f’mera 24 u wara jitlaq ’l hemm, u mill-ewwel jinsa x’tip taʼ persuna hu. 25 Mill-banda l-oħra, min jeżamina sew il-liġi perfetta li twassal għal-libertà u jobdiha, mhuwiex xi ħadd li jismaʼ u jinsa, imma wieħed li jobdi l-kelma t’Alla u jkun ferħan li qed jagħmel dan.

26 Jekk xi ħadd jaħseb li qed iqim lil Alla imma ma jikkontrollax* ilsienu, hu jkun qed iqarraq bih innifsu,* u l-qima tiegħu tkun għalxejn. 27 Il-qima* li hi nadifa u mhux imniġġsa mill-ħarsa tal-Alla u l-Missier tagħna hi din: li tgħin lill-orfni u r-romol meta jkunu qed ibatu, u li żżomm ’il bogħod mill-affarijiet mhux nodfa tad-dinja.

2 Ħuti, kif jistaʼ jkun li wara li kellkom il-fidi fil-Mulej glorjuż tagħna Ġesù Kristu qed turu l-preferenzi? 2 Ejja ngħidu li tnejn min-nies jiġu għal-laqgħa tagħkom. Wieħed liebes ċrieket tad-deheb u ħwejjeġ li jqumu l-flus, u ieħor hu fqir u l-ħwejjeġ tiegħu huma maħmuġin. 3 Se tonoraw lil dak li għandu ħwejjeġ li jqumu l-flus u tgħidulu: “Poġġi hawnhekk f’post tajjeb,” u lill-fqir tgħidulu: “Ibqaʼ bilwieqfa” jew, “Poġġi ħdejn il-banketta għal saqajja”? 4 Jekk iva, mela qed tqisu lil xi ħadd aħjar minn ieħor u sirtu mħallfin li tieħdu deċiżjonijiet mill-agħar.

5 Isimgħuni għeżież aħwa. Mhux Alla kien li għażel in-nies li d-dinja tqishom fqar biex ikunu sinjuri fil-fidi? Mhux Alla kien li għażel lil dawn il-foqra biex ikunu werrieta tas-Saltna, li wegħedha lin-nies li jħobbuh? 6 Imma intom ma rrispettajtux lill-foqra. Mhux is-sinjuri li ħaqrukom u kaxkrukom lejn il-qrati? 7 Mhux huma jidgħu* bl-isem sabiħ li bih tissejħu? 8 L-Iskrittura tgħid: “Ħobb lil ħaddieħor bħalek innifsek.” Allura qed tagħmlu tajjeb jekk qed tobdu l-aqwa liġi.* 9 Imma jekk tkomplu turu preferenzi, tkunu qed tagħmlu dnub, u l-liġi tagħmilha ovvja li intom ħatja.*

10 Għax jekk hemm xi ħadd li jobdi l-Liġi kollha imma jiżbalja f’waħda minnhom, ikun kisirhom kollha. 11 Għax dak li qal: “Tagħmilx adulterju,” qal ukoll: “Toqtolx.”* Issa jekk int ma tagħmilx adulterju imma toqtol, tkun qed tikser il-liġi. 12 Ibqgħu tkellmu u aġixxu bħal dawk li se jiġu ġġudikati mil-liġi li teħles in-nies. 13 Għax min ma jurix ħniena se jiġi ġġudikat mingħajr ħniena. Li turi ħniena hu ħafna aħjar milli tiġġudika.

14 Ħuti, x’jiswa jekk xi ħadd jgħid li għandu l-fidi imma ma jurihiex b’dak li jagħmel? Din il-fidi ma tistax issalvah. 15 Ejja ngħidu li ħu jew oħt m’għandhiex biżżejjed x’tilbes* u biżżejjed x’tiekol. 16 X’jiswa li xi ħadd minnkom jgħid: “Mur fil-paċi, u jalla jkollok x’tilbes u l-ikel taʼ kuljum,” imma ma jagħtihiex dak li hemm bżonn biex tgħix? 17 Anki l-fidi, jekk ma tintweriex b’li tagħmel, hi bħallikieku mejta.

18 Minkejja dan, xi ħadd jistaʼ jgħid: “Int għandek il-fidi, u jien nagħmel affarijiet tajbin. Urini l-fidi tiegħek mingħajr ma tagħmel affarijiet tajbin, u jien nurik il-fidi tiegħi b’dak li nagħmel.” 19 Int temmen li hemm Alla wieħed, hux vera? U sewwa tagħmel. Anki d-demonji jemmnu dan u jitriegħdu bil-biżaʼ. 20 Ja bniedem vojt, m’intix tinduna li l-fidi li ma tintweriex b’dak li tagħmel hi għalxejn? 21 Missierna Abraham kien iddikjarat ġust wara li offra lil ibnu Iżakk fuq l-artal. 22 Il-fidi tiegħu ntweriet b’dak li għamel, u b’dak li għamel wera b’mod ċar li hu veru kellu l-fidi.* 23 Allura ġara bħalma tgħid l-Iskrittura: “Abraham fada f’Ġeħova,* u ġie kkunsidrat ġust,” u beda jissejjaħ il-ħabib taʼ Ġeħova.*

24 Mela persuna tiġi ddikjarata ġusta b’dak li tagħmel, u mhux bil-fidi biss. 25 Anki Raħab il-prostituta ġiet iddikjarata ġusta b’dak li għamlet wara li kienet laqgħet għandha l-ispiji u qaltilhom biex joħorġu minn xi mkien ieħor. 26 Fil-fatt, bħalma l-ġisem mingħajr il-ħajja* hu mejjet, l-istess jiġri bil-fidi tagħna jekk ma nagħmlux affarijiet tajbin, tkun bħallikieku mejta.

3 Ħuti, ħafna minnkom m’għandhomx isiru għalliema, għax bħala għalliema aħna għandna responsabbiltà akbar quddiem Alla.* 2 Fil-fatt, kollha kemm aħna nitfixklu* ħafna drabi. Jekk xi ħadd ma jitfixkilx f’dak li jgħid, ikun perfett u kapaċi jikkontrolla* ġismu kollu. 3 Jekk nagħmlu lġiem* f’ħalq iż-żiemel biex jobdina, aħna nkunu nistgħu nikkontrollaw lil ġismu kollu. 4 Anki l-vapuri, għalkemm huma kbar ħafna u jitmexxew minn riħ qawwi, huma jiġu ggwidati minn tmun żgħir ħafna u jmorru fejn ikun irid dak li jkun mat-tmun.

5 Bl-istess mod l-ilsien. Hu parti żgħira mill-ġisem, imma bih tistaʼ tiftaħar ħafna. Anki fjamma żgħira tistaʼ tqabbad foresta kbira! 6 L-ilsien hu bħal nar. Dan hu mimli ħażen u jniġġes il-ġisem kollu. Dan jistaʼ jeqred il-ħajja taʼ xi ħadd u jġib il-qerda bħal Geħenna.* 7 Kull tip t’annimal salvaġġ, għasfur, rettili,* u ħliqa tal-baħar jistgħu jiġu mmansati u ġew immansati min-nies. 8 Imma ebda persuna ma tistaʼ tikkontrolla* l-ilsien. Dan hu bla kontroll, iweġġaʼ, u mimli velenu li joqtol. 9 Bih infaħħru lil Ġeħova,* il-Missier tagħna, u bih nisħtu lin-nies li nħolqu “fis-sura t’Alla.” 10 Mill-istess ħalq joħorġu l-barka u s-saħta.

Ħuti, mhux sew li jsiru dawn l-affarijiet. 11 L-ilma ħelu* u l-ilma morr ma joħorġux mill-istess għajn, hux hekk? 12 Ħuti, tina ma tistax tagħmel iż-żebbuġ, jew dielja ma tistax tagħmel it-tin, hux hekk? Għajn tal-ilma li joħroġ minnha ilma mielaħ ma jistax joħroġ ilma ħelu.

13 Jekk xi ħadd minnkom hu għaref u kapaċi jifhem, hu għandu juri bil-kondotta tajba tiegħu li dak li jagħmel qed jagħmlu bil-ħlewwa li ġejja mill-għerf. 14 Imma jekk għandkom għira kbira f’qalbkom u ħsiebkom fil-ġlied,* m’għandkomx tiftaħru bl-għerf tagħkom. Jekk tagħmlu hekk, tkunu qed tigdbu. 15 Dan mhux l-għerf li ġej minn Alla, imma li ġej mid-dinja, minn dawk li jissodisfaw il-ġisem midneb, u mid-demonji. 16 Għax fejn hemm l-għira u l-ġlied,* ikun hemm ukoll nuqqas t’ordni u kull ħaġa ħażina.

17 Imma min għandu l-għerf t’Alla, l-ewwel nett jgħix ħajja nadifa, imbagħad iġib il-paċi, hu raġunevoli, lest li jobdi, iħenn ħafna, jagħmel dak li hu tajjeb, ma jurix preferenzi, u mhux ipokrita. 18 Barra minn hekk, min imur tajjeb man-nies jgħin biex ikun hemm il-paċi, u b’hekk jagħmel dak li hu sew.

4 Minn fejn ġejjin il-ġlied u l-argumenti li hemm bejnietkom? Dawn ġejjin minn xewqat egoisti li qed jiġġieldu biex jikkontrollawkom. 2 Hu għalhekk li tixtiequ xi ħaġa, imma ma tirċievu xejn. Intom tibqgħu tobogħdu* lil xulxin u tixxennqu għall-affarijiet taʼ ħaddieħor, imma tibqgħu b’xejn. Iva, intom tibqgħu tiġġieldu u bħallikieku qegħdin fi gwerra bejnietkom. Ukoll, jekk m’għandkom xejn, sinjal li għax ma titolbux. 3 U meta titolbu, ma tirċivux, għax titolbu bi skop ħażin biex tissodisfaw ix-xewqat egoisti tagħkom.

4 Ja wħud mhux leali,* ma tafux li l-ħbiberija mad-dinja tagħmilkom għedewwa m’Alla? Għalhekk, kull min irid ikun ħabib mad-dinja qed jagħmel lilu nnifsu għadu t’Alla. 5 Mhux taʼ b’xejn li l-Iskrittura tgħid: “Minħabba li għandna t-tendenza li ngħiru, aħna l-ħin kollu nixxennqu għal affarijiet differenti.” 6 Imma l-qalb tajba kbira t’Alla tgħinna negħlbu dawn ix-xewqat. Għalhekk l-Iskrittura tgħid: “Alla jiħodha kontra l-kburin, imma juri qalb tajba kbira mal-umli.”

7 Għalhekk, issottomettu ruħkom lejn Alla; imma iqfulu lix-Xitan, u hu jaħrab minnkom. 8 Ersqu qrib t’Alla, u hu jersaq qrib tagħkom. Naddfu lilkom infuskom mill-affarijiet mill-agħar li għamiltu, ja midinbin,* u żommu l-ħsibijiet tagħkom nodfa, ja indeċiżi. 9 Kunu miżerabbli, imdejqin, u ibku. Ħa jinbidel id-daħq tagħkom fi dwejjaq, u l-ferħ tagħkom f’niket. 10 Umiljaw ruħkom quddiem Ġeħova,* u hu jonorakom.

11 Ħuti, tibqgħux titkellmu kontra xulxin. Min jitkellem kontra ħuh jew jiġġudika lil ħuh ikun qed jitkellem kontra l-liġi u jiġġudika l-liġi. Issa jekk tiġġudika l-liġi, m’intix qed tagħmel dak li trid il-liġi, imma qed tagħmilha taʼ mħallef. 12 Alla biss hu Dak li Jagħmel il-Liġi u Mħallef, hu l-wieħed li jistaʼ jsalva u jeqred. Imma int min int biex tiġġudika lil ħaddieħor?

13 Xi wħud minnkom jgħidu: “Illum jew għada se mmorru f’din il-belt, inqattgħu sena hemmhekk, ninnegozjaw, u naqilgħu l-flus.” 14 Imma intom ma tafux x’se jiġri minnkom għada, għax intom bħal ċpar li jidher għal ftit u mbagħad jisparixxi. 15 Minflok, għandkom tgħidu: “Jekk Ġeħova* jrid, se nibqgħu ngħixu u nagħmlu hekk u hekk.” 16 Imma intom kburin u tiftaħru wisq. Dan il-ftaħir hu ħażin ħafna. 17 Għalhekk, jekk xi ħadd jaf jagħmel dak li hu sew u ma jagħmlux, ikun qed jagħmel dnub.

5 Intom is-sinjuri, isimgħu u ibku fuq li tibku minħabba l-inkwiet kbir li ġej fuqkom. 2 Il-ġid tagħkom tħassar u l-ħwejjeġ tagħkom kilithom il-kamla. 3 Id-deheb u l-fidda tagħkom issaddu, u s-sadid tagħhom se jkun xhieda kontrikom u se jiblagħkom. Dak li rfajtu se jsir bħal nar fl-aħħar jiem. 4 Il-ħaddiema li ħasdu l-għelieqi tagħkom jibqgħu jgħajtu għax ma tajtuhomx il-paga, u t-talb tal-ħassada għall-għajnuna wasal għand Ġeħova* tal-armati. 5 Intom għextu fil-lussu u għamiltu kulma xtaqtu. Kiltu u ħxintu bħal annimal għal jum il-qatla. 6 Intom ikkundannajtu u qtiltu lill-ġust.* Għalhekk hu* qed jiħodha kontrikom.

7 Aħwa, kunu paċenzjużi sakemm jerġaʼ lura l-Mulej. Aħsbu f’bidwi: hu jibqaʼ jistenna bil-paċenzja għall-prodott prezzjuż tal-art sakemm tagħmel l-ewwel u l-aħħar xita. 8 Anki intom uru paċenzja. Kunu determinati, għax il-Mulej daqt jiġi.

9 Aħwa, tgergrux* kontra xulxin ħalli ma tiġux iġġudikati. L-Imħallef kważi wasal.* 10 Aħwa, kunu bħall-profeti li tkellmu f’isem Ġeħova.* Huma batew b’mod inġust u ssaportew bil-paċenzja. 11 Lil dawk li ssaportew, aħna nqisuhom ferħanin.* Intom tafu kemm issaporta Ġob u smajtu kif Ġeħova* bierku, għax Ġeħova* jħobb ħafna* u ħanin.

12 Ħuti, fuq kollox tibqgħux taħilfu, la bis-sema, la bl-art, u lanqas b’xi ħaġa oħra. Imma ħallu “l-Iva” tfisser iva, u “l-Le,” le, ħalli Alla ma jiġġudikakomx.

13 Jekk hemm xi ħadd minnkom li qed ibati minħabba d-diffikultajiet, ħa jkompli jitlob. Jekk hemm xi ħadd ferħan, ħa jkanta s-salmi. 14 Jekk hemm xi ħadd marid fostkom, ħa jkellem lill-anzjani tal-kongregazzjoni, u dawn jitolbu għalih u jidilkuh biż-żejt f’isem Ġeħova.* 15 U t-talb li jgħidu bil-fidi se jfejjaq lill-marid,* u Ġeħova* se jerġaʼ jsaħħu. Ukoll, jekk ikun għamel xi dnubiet, Alla se jaħfirlu.

16 Għalhekk, ammettu d-dnubiet tagħkom ma’ xulxin u itolbu għal xulxin biex tfiqu. It-talb bil-ħniena tal-ġust hu t’għajnuna kbira.* 17 Elija kellu sentimenti bħal tagħna, imma meta talab bil-ħniena biex ma tagħmilx xita, m’għamlitx xita għal tliet snin u nofs. 18 Imbagħad reġaʼ talab, u għamlet ix-xita, u l-art tat il-prodott tagħha.

19 Ħuti, jekk xi ħadd fostkom jitlaq il-verità u ħaddieħor jgħinu jiġi lura, 20 kunu afu li dak li jgħinu jdur lura mill-iżbalji li kien qed jagħmel ikun qed isalvah* mill-mewt u jgħinu biex jinħafrulu d-dnubiet.