IR-RIVELAZZJONI LI RĊIEVA ĠWANNI (L-APOKALISSI)

1 Din hi r-rivelazzjoni* minn Ġesù Kristu, li tah Alla, biex juri lill-qaddejja tiegħu l-affarijiet li żgur se jiġru dalwaqt. Ġesù bagħat lill-anġlu tiegħu, u ppreżentaha b’mod simboliku lili, il-qaddej t’Alla,* Ġwanni. 2 Jien tajt xhieda dwar il-kelma li ta Alla u dwar il-messaġġ li ta Ġesù Kristu. Iva, jien tajt xhieda dwar l-affarijiet kollha li rajt. 3 Ferħan hu min jaqra b’leħen għoli l-kliem f’din il-profezija u ferħanin huma dawk li jisimgħu u jobdu dak li hemm miktub fiha; għax iż-żmien li ntagħżel minn Alla daqt jasal.

4 Jien Ġwanni qed nikteb lis-sebaʼ kongregazzjonijiet fil-provinċja tal-Asja:

Jalla jkollkom qalb tajba kbira u paċi “mill-Wieħed li jeżisti, li eżista, u li ġej,” mis-sebaʼ spirti li qegħdin quddiem it-tron tiegħu, 5 u minn Ġesù Kristu, li hu “x-Xhud Leali,” “l-ewwel imwieled mill-mewt,” u “l-Mexxej tar-rejiet fuq l-art.”

Ġesù jħobbna u ħelisna mid-dnubiet tagħna permezz tad-demm tiegħu, 6 u għamilna rejiet* u qassisin għal Alla tiegħu li hu Missieru. Għalhekk, Ġesù ħaqqu l-glorja u l-qawwa għal dejjem. Ammen.

7 Hu se jiġi mas-sħab, u kulħadd se jarah, anki dawk li nifduh. In-nies* kollha tal-art se juru li jkunu mdejqin ħafna* minħabba fih. Iva, Ammen.

8 Alla Ġeħova* jgħid, “Jien l-Alfa u l-Omega,* il-Wieħed li jeżisti, li eżista, u li ġej, Dak li Jistaʼ Kollox.”

9 Jien ħukom Ġwanni u għandi sehem magħkom fil-persekuzzjoni, fis-saltna, u f’li nissaporti minħabba li jien dixxiplu taʼ Ġesù. Jien ġejt eżiljat fuq gżira jisimha Patmos talli qed nitkellem dwar Alla u nagħti xhieda dwar Ġesù. 10 Permezz tal-ispirtu qaddis, sibt ruħi f’jum il-Mulej, u minn warajja smajt leħen qawwi bħal dak taʼ trumbetta 11 u qalli: “Ikteb fi skroll dak li tara u ibagħtu lis-sebaʼ kongregazzjonijiet: f’Efesu, fi Żmirna, f’Pergamu, fi Tjatira, f’Sardi, f’Filadelfja, u f’Laodiċija.”

12 Jien dort biex nara min kien qed ikellimni, u meta dort rajt sebaʼ gandlieri tad-deheb, 13 u f’nofs il-gandlieri kien hemm xi ħadd bħal bin il-bniedem, u kien liebes libsa twila sal-għaksa u terħa tad-deheb madwar sidru. 14 Iktar minn hekk, xagħru kien abjad bħas-suf u bħas-silġ, għajnejh kienu bħal fjamma nar, 15 saqajh kienu jleqqu bħal ram mill-aqwa meta jdub fil-forn, u leħnu kien bħall-ħoss taʼ ħafna ilmijiet. 16 F’idu l-leminija kellu sebaʼ stilel, minn ħalqu kellu ħierġa xabla twila li taqtaʼ ħafna miż-żewġ naħat, u wiċċu kien qed jiddi bħax-xemx fl-aqwa tagħha. 17 Meta rajtu, waqajt ħdejn saqajh bħal wieħed mejjet.

U hu qiegħed idu l-leminija fuqi u qalli: “Tibżax. Jien l-Ewwel u l-Aħħar, 18 li kont ħaj u mitt, imma issa ħaj u se ngħix għal dejjem taʼ dejjem, u għandi ċ-ċwievet* tal-mewt u tal-Qabar.* 19 Għalhekk, ikteb dak li rajt, l-affarijiet li qed jiġru issa, u l-affarijiet li se jiġru wara dawn. 20 Is-sebaʼ stilel li rajtli f’idi l-leminija u s-sebaʼ gandlieri tad-deheb huma sigriet qaddis: Is-sebaʼ stilel jirrappreżentaw l-anġli* tas-sebaʼ kongregazzjonijiet, u s-sebaʼ gandlieri jirrappreżentaw is-sebaʼ kongregazzjonijiet.

2 “Lill-anġlu tal-kongregazzjoni f’Efesu iktiblu: Dan jgħid il-wieħed li għandu s-sebaʼ stilel f’idu l-leminija u li jimxi fost is-sebaʼ gandlieri tad-deheb: 2 ‘Jien naf x’għamilt, ix-xogħol tiegħek, kemm issaportejt, u li int ma tittollerax lin-nies ħżiena. Int għaddejt minn prova lil dawk li kienu jgħidu li huma appostli, imma ma kinux, u sibt li kienu giddibin. 3 Għalkemm int issaportejt ħafna diffikultajiet minħabba ismi, bqajt sod u m’għejejtx. 4 Minkejja dan, għandi dan kontrik: Int m’għadx għandek l-imħabba li kellek fil-bidu.

5 “‘Għalhekk, ftakar f’dak li tlift,* indem, u agħmel l-affarijiet li kont tagħmel fil-bidu. Jekk ma tindimx, jien se niġi u nneħħi l-gandlier tiegħek minn postu. 6 Imma għandek dan favur tiegħek: Int tobgħod l-affarijiet li jagħmlu s-setta taʼ Nikola, li anki jien nobgħodhom. 7 Min hu lest li jismaʼ, ħa jismaʼ dak li l-ispirtu jgħid lill-kongregazzjonijiet: Lil min jirbaħ id-dinja, jien se nħallih jiekol mis-siġra tal-ħajja, li hi fil-ġenna t’Alla.’

8 “U lill-anġlu tal-kongregazzjoni fi Żmirna iktiblu: Dan jgħid ‘l-Ewwel u l-Aħħar,’ li miet u reġaʼ ħa l-ħajja: 9 ‘Jien naf bit-tbatija u l-faqar tiegħek, imma int sinjur. Jien naf ukoll bid-dagħa* taʼ dawk li jgħidu li huma Lhud, imma mhumiex. Huma sinagoga taʼ Satana. 10 Tibżax mit-tbatija li dalwaqt se tgħaddi minnha. Ix-Xitan se jkompli jitfaʼ lil xi wħud minnkom il-ħabs sabiex tiġu ttestjati għalkollox, u se tkunu ppersegwitati għal għaxart ijiem. Agħti prova li int leali sal-mewt, u jien nagħtik il-kuruna tal-ħajja. 11 Min hu lest li jismaʼ, ħa jismaʼ dak li l-ispirtu jgħid lill-kongregazzjonijiet: Lil min jirbaħ id-dinja żgur li t-tieni mewt mhu se tagħmillu xejn.’

12 “Lill-anġlu tal-kongregazzjoni f’Pergamu iktiblu: Dan jgħid dak li għandu x-xabla twila li taqtaʼ ħafna miż-żewġ naħat: 13 ‘Jien naf fejn qed tgħix, jiġifieri fejn hemm it-tron taʼ Satana. Imma int leali lejja u baqaʼ jkollok fidi fija, anki fi żmien Antipa x-xhud leali tiegħi li nqatel fil-belt tagħkom, fejn jgħix Satana.

14 “‘Minkejja dan, għandi xi affarijiet kontrik: Li hemmhekk għandek min qed iżomm sod mat-tagħlim taʼ Balgħam, li għallem lil Balak kif ifixkel lill-Iżraelin, biex jieklu affarijiet issagrifikati lill-idoli u jagħmlu l-immoralità sesswali.* 15 Bl-istess mod, int ukoll għandek lil dawk li qed iżommu mat-tagħlim tas-setta taʼ Nikola. 16 Mela indem, inkella niġi għandek malajr u niġġieled kontrihom bix-xabla twila li toħroġ minn ħalqi.

17 “‘Min hu lest li jismaʼ, ħa jismaʼ dak li l-ispirtu jgħid lill-kongregazzjonijiet: Lil min jirbaħ id-dinja, jien se nagħtih ftit mill-manna l-moħbija, u nagħtih ċagħqa bajda, u fuqha se jkun hemm miktub isem ġdid li ħadd ma jkun jafu ħlief dak li rċivieh.’

18 “Lill-anġlu tal-kongregazzjoni fi Tjatira iktiblu: Dan jgħid l-Iben t’Alla, il-wieħed li għandu għajnejh bħal fjamma nar u saqajh bħal ram mill-aqwa: 19 ‘Jien naf x’għamilt, l-imħabba u l-fidi li għandek, u li taqdi lil Alla u li tissaporti ħafna diffikultajiet. U x-xogħol li qed tagħmel issa hu iżjed minn dak li għamilt fil-bidu.

20 “‘Minkejja dan, għandi dan kontrik: Int tittollera lil dik il-mara li hi bħal Ġeżabel, li ssejjaħ lilha nfisha profetessa. Hi qed tqarraq bl-ilsiera tiegħi bit-tagħlim tagħha, ħalli huma jagħmlu l-immoralità sesswali* u jieklu ikel issagrifikat lill-idoli. 21 Jien tajtha żmien biex tindem, imma hi mhix lesta li tindem mill-immoralità sesswali* li tagħmel. 22 Jien daqt nitfagħha f’qiegħ taʼ sodda, u lil dawk li jagħmlu adulterju magħha se nġegħelhom ibatu ħafna jekk ma jindmux mill-affarijiet li għamlu bħalha. 23 U jien se noqtol lit-tfal tagħha b’marda qerrieda, ħalli l-kongregazzjonijiet kollha jkunu jafu li jien il-wieħed li nfittex fil-ħsibijiet* u l-qalb, u se nagħti lil kull wieħed skont dak li jkun ħaqqu.

24 “‘Madankollu, lill-bqija li hemm fi Tjatira, li m’aċċettawx it-tagħlim taʼ Ġeżabel u li ma sarux jafu t-tagħlim falz li ġej minn* Satana, ngħidilhom dan: Mhu se nżidilkom ebda piż ieħor. 25 Però, żommu sod maʼ dak li għandkom sakemm niġi. 26 U lil dak li jirbaħ id-dinja u jagħmel dak li kkmandajt jien sal-aħħar, se nagħtih awtorità fuq il-popli, 27 bħalma jien irċivejt mingħand Missieri. Hu se jirgħahom b’virga tal-ħadid, ħalli jitfarrku bħal reċipjenti tal-fuħħar. 28 U se nagħtih l-istilla taʼ filgħodu. 29 Min hu lest li jismaʼ, ħa jismaʼ dak li l-ispirtu jgħid lill-kongregazzjonijiet.’

3 “Lill-anġlu tal-kongregazzjoni f’Sardi iktiblu: Dawn huma l-affarijiet li jgħid dak li għandu s-sebaʼ spirti t’Alla u s-sebaʼ stilel: ‘Jien naf x’għamilt, u għalkemm għandek reputazzjoni* li int ħaj, int mejjet. 2 Allura oqgħod attent u saħħaħ l-affarijiet li kważi mietu, għax rajt li int m’għamiltx l-affarijiet kollha li Alla jridek tagħmel. 3 Għalhekk, kompli żomm f’moħħok* dak li rċivejt u li smajt, ibqaʼ agħmlu, u indem. Għax jekk ma tqumx, se niġi bħal ħalliel, u int żgur mhux se tkun taf fi xħin se niġi.

4 “‘Minkejja dan, għandek xi wħud* f’Sardi li ma niġġsux il-ħwejjeġ tagħhom, u se jimxu miegħi lebsin ħwejjeġ bojod, għax jistħoqqilhom. 5 Iva, min jirbaħ id-dinja se jilbes ħwejjeġ bojod, u jien żgur ma nħassarlux ismu mill-ktieb tal-ħajja, imma se ngħid li nafu quddiem Missieri u quddiem l-anġli tiegħu. 6 Min hu lest li jismaʼ, ħa jismaʼ dak li jgħid l-ispirtu lill-kongregazzjonijiet.’

7 “Lill-anġlu tal-kongregazzjoni f’Filadelfja iktiblu: Dan jgħid dak li hu qaddis, li hu veru, li għandu ċ-ċavetta taʼ David, u li jekk jiftaħ bieb ħadd ma jistaʼ jagħlqu u jekk jagħlqu ħadd ma jistaʼ jiftħu: 8 ‘Jien naf x’għamilt, għalkemm m’għadx għandek qawwa, naf li int obdejt il-kelma tiegħi u li wrejt li int leali lejja.* Jien ftaħtlek bieb quddiemek li ħadd ma jistaʼ jagħlqu. 9 Dawk li huma mis-sinagoga taʼ Satana u li jgħidu li huma Lhud, imma mhumiex u qed jigdbu, se nġegħelhom jiġu, imilu ħdejn saqajk, u jkunu jafu li nħobbok. 10 Peress li ssaportejt bħalma għamilt jien, se nipproteġik fiż-żmien tal-prova meta niġi biex nittestja lin-nies kollha fuq l-art. 11 Jien ġej malajr. Għalhekk, ibqaʼ żomm sod maʼ dak li għandek ħalli ħadd ma jiħodlok il-premju* tiegħek.

12 “‘Lil min jirbaħ id-dinja, jien se nagħmlu kolonna fit-tempju t’Alla tiegħi, u xejn mhu se jneħħih minn hemm. Jien se nikteb fuqu l-isem t’Alla tiegħi, l-isem tal-belt tal-Alla tiegħi, li hi Ġerusalemm il-Ġdida li tinżel mis-sema mingħand l-Alla tiegħi, u l-isem il-ġdid tiegħi. 13 Min hu lest li jismaʼ, ħa jismaʼ dak li l-ispirtu jgħid lill-kongregazzjonijiet.’

14 “Lill-anġlu tal-kongregazzjoni f’Laodiċija iktiblu: Dan jgħid l-Ammen, ix-xhud leali u veru, il-bidu tal-ħolqien t’Alla: 15 ‘Jien naf x’għamilt, int bħal ilma fietel, la kiesaħ u lanqas sħun. Nixtieq li kieku kont bħal ilma kiesaħ jew sħun. 16 Imma peress li int bħal ilma fietel, la sħun u lanqas kiesaħ, jien se nobżqok minn ħalqi. 17 Int tgħid: “Jien sinjur, għandi ħafna ġid, u m’għandi bżonn xejn,” imma ma tafx li int imdejjaq, miskin, fqir, agħmi, u għarwien. 18 Għalhekk nagħtik parir li tixtri mingħandi deheb irfinut bin-nar biex issir sinjur, ħwejjeġ bojod biex oħrajn ma jarawkx għarwien u ma tistħix, u xi ħaġa* għal għajnejk biex tfiq u tara.

19 “‘Lil dawk kollha li jien inħobb, nikkoreġihom u niddixxiplinahom. Għalhekk, indem u aqdi lil Alla b’qalbek kollha. 20 Jien qiegħed quddiem il-bieb u qed inħabbat. Jekk xi ħadd jismaʼ leħni u jiftaħ il-bieb, se nidħol għandu u se nieklu flimkien filgħaxija. 21 Lil min jirbaħ id-dinja, jien se nħallih ipoġġi bilqiegħda miegħi fuq it-tron tiegħi, bħalma jien irbaħt id-dinja u poġġejt ħdejn Missieri fuq it-tron tiegħu. 22 Min hu lest li jismaʼ, ħa jismaʼ dak li l-ispirtu jgħid lill-kongregazzjonijiet.’”

4 Wara dan rajt bieb miftuħ fis-sema, u l-ewwel leħen li smajt kien bħal taʼ trumbetta. Dan qalli: “Itlaʼ hawn u nurik dak li se jiġri.” 2 Imbagħad ġie mill-ewwel fuqi l-ispirtu t’Alla u rajt tron fis-sema, u fuqu kien hemm xi ħadd bilqiegħda. 3 Il-Wieħed li kien bilqiegħda kien jidher bħal ħaġra tad-djaspru u ħaġra tas-sardju,* u mad-dawra tat-tron kien hemm qawsalla li kienet tidher bħall-iżmerald.

4 Madwar it-tron kien hemm 24 tron, u fuq dawn it-tronijiet rajt 24 anzjan* bilqiegħda lebsin l-abjad u b’kuruna tad-deheb fuq rashom. 5 Mit-tron kienu ħerġin sajjetti, ilħna, u ragħad. Quddiem it-tron kien hemm sebaʼ lampi tan-nar jaqbdu li jirrappreżentaw is-sebaʼ spirti t’Alla. 6 Quddiem it-tron kien hemm bħal baħar tal-ħġieġ li jidher qisu kristall.

Fin-nofs ħdejn it-tron u madwaru kien hemm erbaʼ ħlejjaq ħajjin mimlijin għajnejn fuq quddiem u wara. 7 L-ewwel ħliqa ħajja kienet bħal iljun, it-tieni bħal barri, it-tielet kellha wiċċ bħal taʼ bniedem, u r-rabaʼ kienet bħal ajkla ttir. 8 Kull waħda mill-erbaʼ ħlejjaq ħajjin kellha sitt iġwienaħ li kienu mimlijin għajnejn mad-dawra u minn taħt. Il-ħin kollu, lejl u nhar, huma jgħidu: “Qaddis, qaddis, qaddis hu Alla Ġeħova,* Dak li Jistaʼ Kollox, li eżista qabel, li jeżisti, u li ġej.”

9 Kull darba li l-ħlejjaq ħajjin jigglorifikaw, jonoraw, u jirringrazzjaw lill-Wieħed li qiegħed bilqiegħda fuq it-tron, il-Wieħed li jgħix għal dejjem taʼ dejjem, 10 l-24 anzjan jinżlu għarkopptejhom u jqimuh, jiġifieri lill-Wieħed li qiegħed bilqiegħda fuq it-tron u li jgħix għal dejjem taʼ dejjem. Huma jitfgħu l-kuruni tagħhom quddiem it-tron, u jgħidu: 11 “Ġeħova* Alla tagħna, int jistħoqqlok li tirċievi l-glorja, l-unur, u l-qawwa, għax int ħlaqt l-affarijiet kollha, u peress li ridt hekk, dawn bdew jeżistu u nħalqu.”

5 U fl-id il-leminija tal-Wieħed bilqiegħda fuq it-tron rajt skroll bil-kitba fuq iż-żewġ naħat.* Dan kien issiġillat sew b’sebaʼ siġilli. 2 U rajt anġlu b’saħħtu li b’leħen għoli kien qed jgħid: “Min jistħoqqlu jiftaħ l-iskroll u jkisser is-siġilli?” 3 Imma ħadd minn dawk fis-sema, fuq l-art, jew taħt l-art ma setaʼ jiftaħ l-iskroll jew jara x’hemm fih. 4 Jien tgħidx kemm bkejt għax ma kien hemm ħadd li jistħoqqlu jiftaħ l-iskroll jew jara x’hemm fih. 5 Imma wieħed mill-anzjani* qalli: “Tibqax tibki. L-Iljun tat-tribù taʼ Ġuda, dak mill-familja* taʼ David, rebaħ, u b’hekk se jiftaħ l-iskroll u s-sebaʼ siġilli.”

6 U rajt ħaruf wieqaf fin-nofs ħdejn it-tron, f’nofs l-erbaʼ ħlejjaq ħajjin, u f’nofs l-anzjani. Dan kien qisu ġie maqtul u kellu sebat iqrun u sebaʼ għajnejn, u dawn l-għajnejn jirrappreżentaw is-sebaʼ spirti t’Alla li ntbagħtu mal-art kollha. 7 F’daqqa waħda, ġie l-Ħaruf u ħa l-iskroll mill-id il-leminija tal-Wieħed bilqiegħda fuq it-tron. 8 Meta l-Ħaruf ħa l-iskroll, l-erbaʼ ħlejjaq ħajjin u l-24 anzjan niżlu għarkopptejhom quddiemu. Kull wieħed minnhom kellu arpa u skutelli tad-deheb mimlijin inċens. (L-inċens jirrappreżenta t-talb tal-qaddisin.) 9 Huma kantaw għanja ġdida u qalu: “Int jistħoqqlok li tieħu l-iskroll u tiftaħ is-siġilli tiegħu, għax qatluk u b’demmek xtrajt għal Alla nies minn kull tribù, lingwa,* poplu, u ġens, 10 u int għamilthom rejiet* u qassisin għall-Alla tagħna, u huma se jmexxu bħala rejiet fuq l-art.”

11 Jien rajt ħafna anġli li kienu madwar it-tron, madwar il-ħlejjaq ħajjin, u madwar l-anzjani, u smajt leħinhom. L-anġli kienu eluf t’eluf, anzi mijiet taʼ miljuni,* 12 u b’leħen għoli bdew jgħidu: “Il-Ħaruf li nqatel jistħoqqlu li jirċievi l-awtorità, il-ġid, l-għerf, is-saħħa, l-unur, il-glorja, u l-barkiet.”

13 U smajt kull ħliqa fis-sema, fuq l-art, taħt l-art, fil-baħar, u l-affarijiet kollha li hemm fihom jgħidu: “Ħa jingħataw it-tifħir, l-unur, il-glorja, u l-qawwa għal dejjem taʼ dejjem lill-Wieħed bilqiegħda fuq it-tron u lill-Ħaruf.” 14 L-erbaʼ ħlejjaq ħajjin bdew jgħidu: “Ammen!” u l-anzjani niżlu għarkopptejhom u bdew iqimu lil Alla.

6 U jien rajt il-Ħaruf jiftaħ l-ewwel wieħed mis-sebaʼ siġilli, u smajt wieħed mill-erbaʼ ħlejjaq ħajjin jgħid b’leħen qisu ragħad: “Ejja!” 2 U rajt żiemel abjad, u dak li kien riekeb fuqu kellu qaws. Lilu ngħatatlu kuruna, u hu mar jirbaħ lill-għedewwa tiegħu.

3 Meta fetaħ it-tieni siġill, jien smajt it-tieni ħliqa ħajja tgħid: “Ejja!” 4 U ħareġ żiemel ieħor aħmar, u lil min kien riekeb fuqu ngħatawlu xabla kbira u l-awtorità li jneħħi l-paċi minn fuq l-art biex in-nies joqtlu lil xulxin.

5 Meta fetaħ it-tielet siġill, jien smajt it-tielet ħliqa ħajja tgħid: “Ejja!” U rajt żiemel iswed, u dak li kien riekeb fuqu kellu miżien f’idu. 6 U smajt bħal leħen f’nofs l-erbaʼ ħlejjaq ħajjin jgħid: “Kilo* qamħ jiswa dinar,* u tliet kilogrammi xgħir* dinar; u ibżgħu għaż-żejt taż-żebbuġa u l-inbid.”

7 Meta fetaħ ir-rabaʼ siġill, jien smajt il-leħen tar-rabaʼ ħliqa ħajja. Din qalet: “Ejja!” 8 U jien rajt żiemel aħdar fl-isfar, u dak li kien riekeb fuqu kien jismu Mewt. U l-Qabar* kien miexi eżatt warajh. U lilhom ingħatatilhom l-awtorità fuq kwart tal-art, biex joqtlu b’xabla twila, b’nuqqas t’ikel, b’mard qerried, u b’bhejjem slavaġ.

9 Meta fetaħ il-ħames siġill, jien rajt taħt l-artal id-demm* taʼ dawk maqtulin minħabba li kienu jobdu l-kelma t’Alla u x-xhieda li taw. 10 Huma għajtu b’leħen għoli: “Sid taʼ Kollox,* l-Alla qaddis u veru, kemm se ddum biex tiġġudika lil dawk li jgħixu fuq l-art u biex tivvendika d-demm tagħna?” 11 U ngħatat libsa bajda lil kull wieħed minnhom, u ntqalilhom biex jistrieħu ftit ieħor, sakemm ikun hemm l-ammont kollu taʼ sħabhom l-ilsiera, jiġifieri ħuthom li kienu se jinqatlu bħalma nqatlu huma.

12 U rajtu jiftaħ is-sitt siġill, u seħħ terremot kbir. Ix-xemx swiedet bħal drapp tal-ixkora magħmul mis-suf,* il-qamar sar qisu demm, 13 u l-istilel waqgħu fl-art bħalma jaqaʼ tin mhux misjur minn siġra li taqlaʼ ħafna riħ. 14 U s-sema ma baqgħetx tidher bħal skroll li jiġi rrumblat, u kull muntanja u kull gżira tneħħew minn posthom. 15 Imbagħad ir-rejiet tal-art, l-uffiċjali taʼ pożizzjoni għolja, il-kmandanti militari, is-sinjuri, dawk b’saħħithom, kull ilsir, u kull persuna ħielsa nħbew fl-għerien u fost il-blat tal-muntanji. 16 U baqgħu jgħidu lill-muntanji u lill-blat: “Aħbuna u pproteġuna mill-Wieħed li qiegħed bilqiegħda fuq it-tron u mir-rabja l-kbira tal-Ħaruf, 17 għax wasal il-jum il-kbir tar-rabja tagħhom, u min jistaʼ jibqaʼ ħaj?”

7 Wara, jien rajt erbaʼ anġli weqfin fl-erbaʼ kantunieri tad-dinja. Huma kienu qed iżommu sod l-erbat irjieħ tad-dinja, ħalli ebda riħ ma jonfoħ fuq l-art, il-baħar, jew xi siġra. 2 U rajt anġlu ieħor tielaʼ minn fejn titlaʼ x-xemx* b’siġill tal-Alla l-ħaj. Hu għajjat b’leħen għoli lill-erbaʼ anġli li ngħatatilhom l-awtorità li jagħmlu ħsara lill-art u lill-baħar, 3 u qalilhom: “Sakemm inkunu għamilna siġill fuq moħħ l-ilsiera tal-Alla tagħna, tagħmlux ħsara lill-art, lill-baħar, jew lis-siġar.”

4 Jien smajt li l-ammont taʼ dawk li kellhom is-siġill kien 144,000. Dawn kienu minn kull tribù tat-tfal t’Iżrael:

9 Wara rajt folla kbira li ebda bniedem ma setaʼ jgħoddha, minn kull ġens, tribù, poplu, u lingwa.* Dawn kienu bilwieqfa quddiem it-tron u quddiem il-Ħaruf, lebsin l-abjad, u f’idhom kellhom friegħi tal-palm. 10 Huma baqgħu jgħajtu b’leħen għoli u jgħidu b’apprezzament kbir: “Alla tagħna, li qiegħed bilqiegħda fuq it-tron, u l-Ħaruf salvawna.”

11 L-anġli kollha kienu weqfin madwar it-tron, l-anzjani,* u l-erbaʼ ħlejjaq ħajjin, u huma niżlu għarkopptejhom wiċċhom ’l isfel u qiemu lil Alla. 12 Huma qalu: “Ammen! Kulħadd għandu jfaħħar, jigglorifika, jirringrazzja, u jonora għal dejjem taʼ dejjem lill-Alla tagħna li għandu l-għerf, l-awtorità, u s-saħħa. Ammen.”

13 Imbagħad, wieħed mill-anzjani staqsieni: “Min huma dawn li lebsin l-abjad u minn fejn ġew?” 14 Jien mill-ewwel għedtlu: “Int taf sidi.” U hu wiġibni: “Dawn huma dawk li baqgħu ħajjin wara ż-żmien taʼ tbatija kbira,* u ħaslu l-ħwejjeġ tagħhom u għamluhom bojod fid-demm tal-Ħaruf. 15 Hu għalhekk li qegħdin quddiem it-tron t’Alla, u qed iqimuh lejl u nhar fit-tempju tiegħu. Il-Wieħed bilqiegħda fuq it-tron se jipproteġihom.* 16 Huma mhux se jkunu iktar bil-ġuħ jew bil-għatx, u lanqas mhu se jinħarqu bix-xemx jew bis-sħana tikwi, 17 għax il-Ħaruf, li qiegħed ħdejn it-tron, se jirgħahom u jiggwidahom lejn għejun tal-ilma tal-ħajja. U Alla jixxottalhom kull demgħa minn għajnejhom.”

8 Meta l-Ħaruf fetaħ is-sebaʼ siġill, kien hemm il-kwiet għal madwar nofs siegħa fis-sema. 2 Jien rajt is-sebaʼ anġli quddiem Alla, u dawn ingħataw sebaʼ trumbetti.

3 Imbagħad ġie anġlu ieħor b’reċipjent tad-deheb fejn jaħarqu l-inċens. Hu qagħad ħdejn l-artal u ngħata ammont kbir taʼ inċens biex joffrih mat-talb tal-qaddisin kollha fuq l-artal tad-deheb li kien quddiem it-tron. 4 Id-duħħan tal-inċens li ħaraq l-anġlu telaʼ mat-talb tal-qaddisin quddiem Alla. 5 U l-anġlu mill-ewwel mela r-reċipjent tal-inċens bi ftit nar tal-artal u tefgħu fuq l-art. U kien hemm ragħad, ilħna, sajjetti, u terremot. 6 U s-sebaʼ anġli ppreparaw biex idoqqu s-sebaʼ trumbetti.

7 L-ewwel anġlu daqq it-trumbetta tiegħu. U mbagħad niżlu fuq l-art silġ u nar imħalltin bid-demm, u nħarqu terz mill-art, terz mis-siġar, u l-ħaxix kollu.

8 It-tieni anġlu daqq it-trumbetta tiegħu. U xi ħaġa bħal muntanja kbira taqbad intefgħet fil-baħar. Imbagħad terz mill-baħar sar demm, 9 terz mill-ħlejjaq tal-baħar mietu, u terz mill-vapuri tfarrku.

10 U t-tielet anġlu daqq it-trumbetta tiegħu. U stilla kbira taqbad bħal lampa waqgħet mis-sema fuq terz mix-xmajjar u l-għejun tal-ilma. 11 L-isem tal-istilla hu Assenzju.* U terz mill-ilma sar assenzju, u ħafna min-nies mietu minħabba li l-ilma sar morr.

12 Ir-rabaʼ anġlu daqq it-trumbetta tiegħu. U ddallmu terz mix-xemx, mill-qamar, u mill-istilel. U ma kienx hemm dawl matul terz tal-ġurnata u terz tal-lejl.

13 Jien rajt ajkla ttir fl-għoli u smajtha tgħid b’leħen għoli: “Ħażin, ħażin, ħażin għal dawk li jgħixu fuq l-art minħabba dak li se jiġri meta jinstemaʼ l-ħoss tat-trumbetti li se jdoqqu t-tliet anġli li fadal!”

9 Il-ħames anġlu daqq it-trumbetta tiegħu. U rajt stilla li kienet waqgħet mis-sema għal fuq l-art, u lilha* ngħatat iċ-ċavetta tad-daħla li tagħti għall-abbiss. 2 Din fetħet id-daħla li tagħti għall-abbiss, u minn hemm ħareġ duħħan bħal dak taʼ forn kbir, u minħabba fih, ix-xemx u l-arja ddallmu. 3 U mid-duħħan ħarġu ġurati għal fuq l-art, u lilhom ingħatatilhom l-istess awtorità li għandhom l-iskorpjuni fuq l-art. 4 Lilhom intqalilhom biex ma jagħmlux ħsara lill-ħaxix, lill-pjanti, jew lil xi siġra, imma biss lin-nies li m’għandhomx is-siġill t’Alla fuq moħħhom.

5 Lill-ġurati ma ngħatatilhomx l-awtorità biex joqtluhom, imma biex jaħqruhom għal ħames xhur, u l-moħqrija tagħhom kienet bħal tingiża taʼ skorpjun. 6 F’dak iż-żmien, in-nies se jipprovaw ifittxu mod kif imutu imma ma jkunux jistgħu jsibuh, se jixxennqu biex imutu imma ma jkunux jistgħu.

7 Il-ġurati kienu jixbhu liż-żwiemel lesti għall-battalja. Fuq rashom kellhom bħal kuruni tad-deheb, u wiċċhom kien bħal tal-irġiel, 8 imma xagħarhom bħal tan-nisa. Snienhom kienu qishom tal-iljuni, 9 u kellhom kurazzi tal-ħadid. Il-ħoss taʼ ġwinħajhom kien bħal dak tal-karrijiet li jitmexxew miż-żwiemel li jmorru għall-battalja. 10 Denbhom kien iniggeż bħal tal-iskorpjuni, u f’denbhom kellhom l-awtorità biex iweġġgħu lin-nies għal ħames xhur. 11 L-anġlu tal-abbiss kien re fuqhom. Bl-Ebrajk jismu Abaddon,* imma bil-Grieg Apolljon.*

12 L-ewwel gwaj għadda. Imma ġejjin tnejn oħra wara dan.

13 Is-sitt anġlu daqq it-trumbetta tiegħu. U smajt leħen mill-qrun tal-artal tad-deheb li hu quddiem Alla 14 jgħid lis-sitt anġlu li kellu t-trumbetta: “Ħoll l-erbaʼ anġli li huma marbutin ħdejn ix-xmara kbira Ewfrat.” 15 U l-erbaʼ anġli li kienu lesti għal dik is-siegħa, jum, xahar, u sena, inħallu biex joqtlu terz min-nies.

16 Jien smajt li l-armati tas-suldati biż-żwiemel kienu 20,000 għal 10,000.* 17 Fil-viżjoni, iż-żwiemel u dawk rekbin fuqhom rajthom hekk: Ir-rikkieba kienu lebsin kurazzi ħomor bħan-nar, blu bħall-ħaġra tal-ġjaċint, u sofor bħall-kubrit.* L-irjus taż-żwiemel kienu bħal tal-iljuni, u minn ħalqhom kien ħiereġ nar, duħħan, u kubrit. 18 Terz min-nies inqatlu b’dawn it-tliet kastigi, jiġifieri bin-nar, id-duħħan u l-kubrit li ħarġu minn ħalq iż-żwiemel. 19 Il-qawwa taż-żwiemel kienet f’ħalqhom u f’denbhom, għax denbhom kien bħal sriep li jigdmu* u bih bdew iweġġgħu lin-nies.

20 Imma l-bqija tan-nies li ma nqatlux bil-kastigi ma ddispjaċihomx minn dak li għamlu.* Huma baqgħu jqimu lid-demonji u l-idoli tad-deheb, tal-fidda, tar-ram, tal-ġebel, u tal-injam, li la jistgħu jaraw, la jisimgħu, u lanqas jimxu. 21 Huma ma ddispjaċihomx li qatlu, li għamlu l-ispiritiżmu, li għamlu l-immoralità sesswali,* u li serqu.

10 Jien rajt anġlu b’saħħtu ieħor nieżel mis-sema. Hu kien imdawwar fi sħaba, kellu qawsalla fuq rasu, wiċċu kien bħax-xemx, saqajh kienu bħal kolonni tan-nar, 2 u f’idu kellu skroll żgħir miftuħ. Hu tefaʼ siequ l-leminija fuq il-baħar u x-xellugija fuq l-art, 3 u għajjat b’leħen għoli bħal meta jgħajjat iljun. Meta għamel hekk, jien smajt l-ilħna tas-sebaʼ ragħdiet.

4 Meta s-sebaʼ ragħdiet tkellmu, jien kont se nibda nikteb dak li qalu, imma leħen mis-sema qalli: “Żomm sigriet* l-affarijiet li qalu s-sebaʼ ragħdiet, u tiktibhomx.” 5 L-anġlu li rajt bilwieqfa fuq il-baħar u fuq l-art għolla idu l-leminija lejn is-sema, 6 u ħalef bil-Wieħed li jgħix għal dejjem taʼ dejjem, li ħalaq is-sema, l-art, il-baħar, u kulma fihom, u qal: “Alla mhux se jistenna iktar. 7 Imma fiż-żmien li s-sebaʼ anġlu jkun se jdoqq it-trumbetta tiegħu, is-sigriet qaddis t’Alla żgur se jseħħ. Is-sigriet hu l-aħbar tajba li Alla qal lill-ilsiera tiegħu l-profeti.”

8 Il-leħen mis-sema reġaʼ kellimni u qalli: “Mur ħu l-iskroll miftuħ li qiegħed f’id l-anġlu li hu bilwieqfa fuq il-baħar u l-art.” 9 Jien mort għand l-anġlu u għedtlu biex jagħtini l-iskroll żgħir. Hu qalli: “Ħudu u kulu. Dan se jibqagħlek fuq l-istonku imma se ttiegħmu ħelu bħall-għasel.”* 10 Jien ħadt l-iskroll żgħir minn id l-anġlu u kiltu. It-togħma tiegħu kienet ħelwa bħall-għasel, imma baqagħli fuq l-istonku. 11 Imbagħad ingħatajt il-kmand: “Għandek terġaʼ tipprofetizza dwar il-popli, il-ġnus, il-lingwi,* u ħafna rejiet.”

11 Jien ingħatajt qasba qisha bastun* waqt li ntqalli: “Mur kejjel is-santwarju tat-tempju t’Alla u l-artal, u għodd lil dawk li qed iqimu fih. 2 Imma tkejjilx il-bitħa taʼ barra tas-santwarju tat-tempju, għax din ingħatat lill-popli u huma se jgħaffġu taħt saqajhom il-belt qaddisa għal 42 xahar. 3 Jien se nibgħat liż-żewġ xhieda tiegħi lebsin ħwejjeġ tal-ixkora biex jipprofetizzaw għal 1,260 ġurnata.” 4 Dawn huma rrappreżentati miż-żewġ siġriet taż-żebbuġ u ż-żewġ gandlieri. Huma qegħdin weqfin quddiem is-Sid tal-art.

5 Jekk xi ħadd ikun irid iweġġagħhom, joħroġ nar minn ħalqhom u jaħraq lill-għedewwa tagħhom. Jekk xi ħadd ikun irid iweġġagħhom, hekk se jinqatel. 6 Dawn għandhom l-awtorità li jagħlqu s-sema ħalli ma tagħmilx xita meta jkunu qed jipprofetizzaw, u għandhom l-awtorità li jbiddlu l-ilma f’demm u li jikkastigaw l-art b’kull mod u kemm iridu.

7 Meta jkunu lesti mill-ipprofetizzar, il-bhima salvaġġa li titlaʼ mill-abbiss se tiġġieled fi gwerra magħhom, tirbħilhom, u toqtolhom. 8 L-iġsma mejtin tagħhom se jkunu fit-triq il-prinċipali tal-belt il-kbira, li b’mod figurattiv tissejjaħ Sodoma u Eġittu, fejn ġie maqtul ukoll il-Mulej tagħhom fuq zokk. 9 U xi nies mill-popli, tribujiet, lingwi,* u ġnus se jħarsu lejn l-iġsma mejtin tagħhom għal tlett ijiem u nofs, u mhux se jħalluhom jindifnu. 10 Dawk li jgħixu fuq l-art se jifirħu u jiċċelebraw minħabba li mietu, u se jibagħtu rigali lil xulxin, għax dawn iż-żewġ profeti kienu jitturmentawhom bil-messaġġ tagħhom.

11 Wara t-tlett ijiem u nofs, Alla tahom il-ħajja* u qamu bilwieqfa. Dawk li rawhom tgħidx kemm beżgħu. 12 Iż-żewġ xhieda semgħu leħen għoli mis-sema jgħidilhom: “Itilgħu hawn.” U huma telgħu s-sema fi sħaba, u l-għedewwa tagħhom rawhom. 13 Dak il-ħin għamel terremot kbir, u għaxra fil-100 tal-belt waqgħet. Mietu 7,000 persuna bit-terremot, u l-kumplament bdew jibżgħu u gglorifikaw lill-Alla tas-sema.

14 It-tieni gwaj għadda. It-tielet gwaj ġej malajr.

15 Is-sebaʼ anġlu daqq it-trumbetta tiegħu. U nstemgħu ilħna għoljin mis-sema jgħidu: “Is-Saltna t’Alla u tal-wieħed li għażel biex ikun il-Kristu qed tmexxi fuq il-bnedmin, u hu* se jmexxi bħala re għal dejjem taʼ dejjem.”

16 U l-24 anzjan li kienu bilqiegħda fuq it-tron tagħhom quddiem Alla niżlu għarkopptejhom u qiemu lil Alla, 17 u qalu: “Nirringrazzjawk, Alla Ġeħova,* Dak li Jistaʼ Kollox, il-wieħed li jeżisti u li eżista, għax int użajt il-qawwa kbira tiegħek u bdejt tmexxi bħala re. 18 Imma l-popli tgħidx kemm irrabjaw, u int urejt kemm kont irrabjat magħhom, u wasal iż-żmien li int għażilt biex jiġu ġġudikati l-mejtin, biex tippremja lill-ilsiera tiegħek il-profeti, lill-qaddisin, u lil dawk li jirrispettaw ħafna lil* ismek, kemm il-kbar u kemm iż-żgħar, u biex teqred lil dawk li qed jeqirdu l-art.”

19 U nfetaħ is-santwarju tat-tempju t’Alla fis-sema, u fih rajt l-arka tal-patt. U kien hemm sajjetti, ilħna, ragħad, terremot, u silġ kbir.

12 Imbagħad dehret ġrajja* kbira fis-sema: Mara kienet liebsa ħwejjeġ ileqqu bħax-xemx, bil-qamar taħt saqajha, u fuq rasha kellha kuruna bi 12-il stilla, 2 u kienet tqila. Peress li kienet waslet biex twelled, hi kienet qed tgħajjat minħabba li kellha l-uġigħ tal-ħlas.

3 Dehret ġrajja oħra fis-sema: Rajt dragun kbir kulur in-nar li kellu sebat irjus u għaxart iqrun, u fuq l-irjus tiegħu kellu sebaʼ kuruni.* 4 U b’denbu kaxkar terz tal-istilel u waddabhom lejn l-art. Id-dragun baqaʼ wieqaf quddiem il-mara li kienet waslet biex twelled, ħalli meta twelled, jiblaʼ t-tarbija tagħha.

5 U hi welldet tifel, li għandu jirgħa lill-popli kollha b’virga tal-ħadid. U t-tifel tagħha nħataf u ttieħed għand Alla li kien fuq it-tron tiegħu. 6 Il-mara ħarbet lejn id-deżert. Hemm kellha post ippreparat minn Alla, u kienet se tingħata ikel għal 1,260 jum.

7 U faqqgħet gwerra fis-sema: Mikiel* u l-anġli tiegħu ġġieldu kontra d-dragun. Id-dragun u l-anġli tiegħu ġġieldu kontrihom 8 imma ma rebħulhomx,* u lanqas tħallew jibqgħu iktar fis-sema. 9 Għalhekk, id-dragun il-kbir twaddab ’l isfel lejn l-art. Hu s-serp oriġinali, il-wieħed li jissejjaħ Xitan u Satana, li qed iqarraq bl-art kollha. L-anġli tiegħu wkoll twaddbu ’l isfel miegħu. 10 Jien smajt leħen għoli fis-sema jgħid:

“L-Alla tagħna salva l-bnedmin, u ntweriet il-qawwa tiegħu. Is-Saltna tiegħu bdiet tmexxi u dak li għażel biex ikun il-Kristu qed juża l-awtorità tiegħu. Għax il-wieħed li kien jakkuża lil ħutna lejl u nhar quddiem Alla twaddab għal isfel. 11 U huma rebħulu grazzi għad-demm tal-Ħaruf u għall-messaġġ li xandru, u huma kienu lesti li jagħtu ħajjithom u jmutu. 12 Minħabba f’hekk, ifirħu intom li tgħixu fis-sema, imma ħażin għall-art u għall-baħar, għax ix-Xitan niżel għandkom u hu rrabjat ħafna peress li jaf li ftit żmien baqagħlu.”

13 Meta d-dragun irrealizza li ġie mwaddab lejn l-art, hu ppersegwita l-mara li welldet lit-tifel. 14 Imma lill-mara ngħatawlha żewġ ġwienaħ kbar t’ajkla, ħalli tkun tistaʼ ttir lejn id-deżert u tmur fil-post li kien ippreparat għaliha. Hemm se tingħata l-ikel għal tliet snin u nofs* ’il bogħod mis-serp.

15 U s-serp qalaʼ minn ħalqu ilma bħal xmara wara l-mara, biex jgħerreqha. 16 Imma l-art ġiet tgħin lill-mara. L-art infetħet u belgħet ix-xmara li d-dragun qalaʼ minn ħalqu. 17 Għalhekk, id-dragun irrabja ħafna għall-mara, u mar biex jagħmel gwerra kontra t-tfal* li kien baqgħalha, jiġifieri dawk li jobdu l-kmandamenti t’Alla u li ġew inkarigati biex jagħtu xhieda dwar Ġesù.

13 U hu* waqaf fuq ir-ramel tal-baħar.

U jien rajt bhima salvaġġa tielgħa mill-baħar. Din kellha għaxart iqrun u sebat irjus, u fuq il-qrun tagħha kellha għaxar kuruni,* imma fuq l-irjus tagħha kellha ismijiet li jidgħu* b’Alla. 2 Il-bhima salvaġġa li rajt kienet bħal leopard, imma saqajha kienu bħal taʼ ors u ħalqha bħal taʼ ljun. U d-dragun taha qawwa, tron, u awtorità kbira.

3 U jien rajt li waħda mill-irjus tagħha kienet imweġġgħa serjament, imma l-ferita fatali tagħha ġiet imfejqa. In-nies kollha tal-art kienu qed jammiraw il-bhima salvaġġa u marru warajha. 4 Huma qiemu lid-dragun, għax hu ta l-awtorità lill-bhima salvaġġa, u qiemu lill-bhima salvaġġa billi qalu: “Min hu bħall-bhima salvaġġa, u min jistaʼ jiġġieled kontriha?” 5 Il-bhima salvaġġa rċiviet l-awtorità biex titkellem b’arroganza u biex tidgħi, u ngħatat awtorità wkoll biex tagħmel dak li jogħġobha għal 42 xahar. 6 U fetħet ħalqha biex tidgħi kontra Alla, tidgħi b’ismu u bil-post fejn jgħix, jiġifieri b’dawk li jgħixu fis-sema. 7 Din tħalliet tagħmel gwerra kontra l-qaddisin u tirbħilhom, u ngħatat awtorità fuq kull tribù, poplu, lingwa,* u ġens. 8 U se jqimuha dawk kollha li jgħixu fuq l-art, li mill-bidu tad-dinja* isimhom ma kienx miktub fl-iskroll tal-ħajja tal-Ħaruf li ġie maqtul.

9 Min hu lest li jismaʼ, ħa jismaʼ. 10 Jekk xi ħadd għandu jmur il-ħabs, se jmur il-ħabs. Jekk xi ħadd joqtol bix-xabla,* għandu jiġi maqtul bix-xabla. Hu għalhekk li l-qaddisin għandhom bżonn jissaportu u jkollhom il-fidi.

11 Imbagħad rajt bhima salvaġġa oħra tielgħa mill-art, u din kellha żewġt iqrun bħal taʼ ħaruf, imma bdiet titkellem bħal dragun. 12 Din uriet li kellha l-istess awtorità li kellha l-ewwel bhima salvaġġa li kienet quddiem għajnejha. U din ġiegħlet lin-nies tal-art iqimu lill-ewwel bhima salvaġġa li kienet feruta serjament u ġiet imfejqa. 13 Din bdiet tagħmel mirakli* kbar quddiem in-nies, saħansitra tniżżel nar mis-sema għal fuq l-art.

14 Hi bdiet tqarraq b’dawk li jgħixu fuq l-art bil-mirakli li tħalliet tagħmel quddiem il-bhima salvaġġa. Din bdiet tgħid lil dawk li jgħixu fuq l-art biex jagħmlu statwa tal-bhima salvaġġa li ġiet feruta bix-xabla imma baqgħet ħajja. 15 It-tieni bhima salvaġġa ngħatat permess li tagħti l-ħajja* lill-istatwa tal-ewwel bhima salvaġġa. B’hekk l-istatwa setgħet titkellem u tagħti l-kmand biex joqtlu lil dawk kollha li ma jqimuhiex.

16 Din ġiegħlet lin-nies kollha, iż-żgħar u l-kbar, is-sinjuri u l-foqra, u l-meħlusin u l-ilsiera, jaċċettaw li ssirilhom marka fuq idhom il-leminija jew fuq moħħhom. 17 Min ma kellux il-marka ma setax jixtri jew ibigħ. Il-marka hi l-isem tal-bhima salvaġġa jew in-numru taʼ isimha. 18 Min għandu l-għaqal, ħa jikkalkula n-numru tal-bhima, għax hu numru li jirrappreżenta l-bnedmin,* u n-numru tagħha hu 666. Dawk biss li għandhom l-għerf se jifhmu dan.

14 Imbagħad rajt il-Ħaruf fuq il-Muntanja Sijon, u miegħu kien hemm 144,000 li kellhom ismu u isem Missieru miktubin fuq moħħhom. 2 Jien smajt ħoss ġej mis-sema bħal dak taʼ ħafna ilma u taʼ ragħad qawwi. Il-ħoss li smajt kien bħal dak taʼ kantanti li kienu qed idoqqu l-arpi tagħhom waqt li jkantaw. 3 Huma kienu qishom qed ikantaw għanja ġdida quddiem it-tron, l-erbaʼ ħlejjaq ħajjin, u l-anzjani.* Ħadd ma setaʼ jitgħallem din l-għanja ħlief il-144,000 li nxtraw mid-dinja. 4 Dawn ma niġġsux lilhom infushom man-nisa; fil-fatt huma verġni. Dawn jibqgħu jimxu wara l-Ħaruf kull fejn imur. Huma kienu l-ewwel uħud* mill-bnedmin li nxtraw għal Alla u għall-Ħaruf. 5 Dawn qatt ma qarrqu b’dak li qalu u huma bla difett.

6 Jien rajt anġlu ieħor itir fis-sema.* Hu kellu aħbar tajba li se tibqaʼ għal dejjem biex jippritkaha lil dawk li jgħixu fuq l-art, jiġifieri lill-ġnus, it-tribujiet, il-lingwi,* u n-nies kollha. 7 Hu kien qed jgħid b’leħen għoli: “Irrispettaw ħafna lil* Alla u agħtuh glorja, għax wasal iż-żmien biex jagħmel ġudizzju. Għalhekk qimu lill-Wieħed li għamel is-sema, l-art, il-baħar, u l-għejun tal-ilma.”

8 Imbagħad ġie t-tieni anġlu u qal: “Waqgħet! Waqgħet Babilonja l-Kbira, dik li ġiegħlet lill-popli jixorbu mill-inbid tagħha li jħajjarhom jagħmlu l-immoralità sesswali!”*

9 Imbagħad ġie t-tielet anġlu u qal b’leħen għoli: “Jekk xi ħadd iqim il-bhima salvaġġa u l-istatwa tagħha, u jirċievi marka fuq moħħu jew idu, 10 anki hu se jixrob mill-inbid t’Alla li hu r-rabja tiegħu. Alla jferraʼ dan l-inbid pur fit-tazza tar-rabja tiegħu. Min jixrob minn dan l-inbid se jiġi tturmentat bin-nar u l-kubrit* quddiem l-anġli qaddisin u l-Ħaruf. 11 Id-duħħan tan-nar li jitturmentahom* se jibqaʼ tielaʼ għal dejjem taʼ dejjem. Dawk li jqimu l-bhima salvaġġa u l-istatwa tagħha u li jirċievu l-marka t’isimha, se jibqgħu jiġu tturmentati lejl u nhar. 12 Hu għalhekk li l-qaddisin għandhom bżonn jissaportu. Dawn huma dawk li jobdu l-kmandamenti t’Alla u jżommu sod mal-fidi li għandhom f’Ġesù.”

13 Jien smajt leħen mis-sema jgħidli: “Ikteb dan: Ferħanin huma dawk li minn issa ’l quddiem imutu bħala dixxipli tal-Mulej. L-ispirtu jgħid, iva, ħa jistrieħu mix-xogħol iebes tagħhom, għax dak li għamlu mhux se jintesa.”*

14 Imbagħad rajt sħaba bajda u fuqha kien hemm bilqiegħda xi ħadd bħal bin il-bniedem, li kellu kuruna tad-deheb fuq rasu u minġel jaqtaʼ f’idu.

15 Anġlu ieħor ħareġ mis-santwarju tat-tempju u lil dak bilqiegħda fuq is-sħaba qallu b’leħen għoli: “Uża l-minġel tiegħek u aħsad, għax wasal iż-żmien tal-ħsad, u l-prodott tal-art sar.” 16 Dak li kien bilqiegħda fuq is-sħaba uża l-minġel tiegħu u ħasad il-prodott tal-art.

17 Anġlu ieħor ħareġ mis-santwarju tat-tempju fis-sema, u anki hu kellu minġel jaqtaʼ.

18 Mill-artal ħareġ anġlu ieħor li kellu awtorità fuq in-nar. Hu qal b’leħen għoli lil dak li kellu l-minġel jaqtaʼ: “Uża l-minġel tiegħek u aqtaʼ l-għenieqed tad-dielja tal-art, għax l-għeneb sar.” 19 L-anġlu uża l-minġel tiegħu u qataʼ d-dielja tal-art. Hu tefagħha b’kollox fil-post il-kbir fejn jintgħasar l-għeneb, li jirrappreżenta r-rabja t’Alla. 20 Id-dielja ntgħasret barra l-belt, u d-demm li ħareġ minnha għola sa ħalq iż-żwiemel u nfirex sa 1,600 stadju.*

15 U fis-sema rajt ġrajja* oħra li kienet kbira u tal-għaġeb, u fiha kien hemm sebaʼ anġli b’sebaʼ kastigi. Dawn huma l-aħħar kastigi, għax meta jispiċċaw Alla ma jibqax irrabjat.

2 U rajt xi ħaġa bħal baħar tal-ħġieġ imħallat bin-nar, u dawk li rebħu l-bhima salvaġġa u l-istatwa tagħha u li ma kinux immarkati bin-numru taʼ isimha, kienu weqfin ħdejn il-baħar tal-ħġieġ. Huma kellhom l-arpi t’Alla. 3 Bdew ikantaw l-għanja taʼ Mosè l-ilsir t’Alla u l-għanja tal-Ħaruf, u qalu:

“Alla Ġeħova* li Tistaʼ Kollox, dak li tagħmel hu kbir u tal-għaġeb. Re taʼ dejjem, int dejjem taġixxi b’mod ġust u li tistaʼ tafdah. 4 Ġeħova,* min mhux se jirrispettak ħafna u jigglorifika lil ismek? Għax int biss leali lejn in-nies tiegħek. Il-popli kollha se jiġu quddiemek u jqimuk, għax huma jaraw li int tiġġudika b’mod ġust.”

5 Wara dan rajt is-santwarju tat-tinda jinfetaħ fis-sema. Din it-tinda fiha x-xhieda t’Alla. 6 U mis-santwarju ħarġu s-sebaʼ anġli bis-sebaʼ kastigi. Dawn kienu lebsin ħwejjeġ tal-għażel nodfa u jleqqu, u kellhom trieħi tad-deheb madwar sidirhom. 7 Waħda mill-erbaʼ ħlejjaq ħajjin tat lis-sebaʼ anġli sebaʼ skutelli tad-deheb li kienu mimlijin bir-rabja tal-Alla li jgħix għal dejjem taʼ dejjem. 8 U s-santwarju mtela bid-duħħan minħabba l-glorja t’Alla u l-qawwa tiegħu, u ħadd ma setaʼ jidħol fih sakemm spiċċaw is-sebaʼ kastigi tas-sebaʼ anġli.

16 Jien smajt leħen għoli ġej mis-santwarju jgħid lis-sebaʼ anġli: “Morru ferrgħu s-sebaʼ skutelli tar-rabja t’Alla fuq l-art.”

2 L-ewwel wieħed telaq u ferraʼ l-iskutella tiegħu fuq l-art. In-nies li kellhom il-marka tal-bhima salvaġġa u li kienu qed iqimu l-istatwa tagħha, imtlew b’feriti taʼ wġigħ li ma jfiqux.

3 It-tieni wieħed ferraʼ l-iskutella tiegħu fil-baħar. Il-baħar sar bħal demm taʼ xi ħadd mejjet, u kull ħliqa ħajja fih mietet.

4 It-tielet wieħed ferraʼ l-iskutella tiegħu fix-xmajjar u l-għejun tal-ilma. U dawn saru demm. 5 Jien smajt l-anġlu li għandu awtorità fuq l-ilma jgħid: “Int Alla leali lejn in-nies tiegħek, il-Wieħed li jeżisti u li eżista. Int ġust minħabba li għamilt dawn il-ġudizzji. 6 Huma xerrdu d-demm tal-qaddisin u l-profeti, u b’hekk int tajthom jixorbu d-demm. Hekk ħaqqhom!” 7 U smajt leħen mill-artal jgħid: “Iva, Alla Ġeħova* li Tistaʼ Kollox, il-ġudizzji* tiegħek huma taʼ min jafdahom u ġusti.”

8 Ir-rabaʼ wieħed ferraʼ l-iskutella tiegħu fuq ix-xemx, u din tħalliet taħraq in-nies bin-nar. 9 U n-nies inħarqu bis-sħana kbira, imma huma dgħaw* bl-isem t’Alla, li għandu l-awtorità fuq dawn il-kastigi, u la nidmu u lanqas tawh glorja.

10 Il-ħames wieħed ferraʼ l-iskutella tiegħu fuq it-tron tal-bhima salvaġġa. U s-saltna tagħha ddallmet, u n-nies bdew jigdmu lsienhom bl-uġigħ. 11 Imma huma dgħaw bl-Alla tas-sema minħabba l-uġigħ u l-feriti tagħhom, u ma nidmux minn dak li għamlu.

12 Is-sitt wieħed ferraʼ l-iskutella tiegħu fix-xmara l-kbira Ewfrat, u l-ilma tagħha nixef biex tiġi ppreparata triq għar-rejiet li ġejjin minn fejn titlaʼ x-xemx.*

13 Minn ħalq id-dragun, il-bhima salvaġġa, u l-profeta falz rajt ħerġin tliet messaġġi mhux nodfa* li kienu qishom żrinġijiet. 14 Dawn il-messaġġi ġejjin mid-demonji u semgħuhom ir-rejiet kollha tal-art. Il-messaġġi għamlu mirakli* biex jiġbru r-rejiet għall-gwerra tal-jum il-kbir tal-Alla li Jistaʼ Kollox.

15 “Oqogħdu attenti! Jien ġej bħal ħalliel. Ferħan hu min jibqaʼ mqajjem u mlibbes, biex b’hekk ma jimxix għarwien u jistħi għax jarawh in-nies.”

16 Il-messaġġi li ġejjin mid-demonji ġabru lir-rejiet fil-post li bl-Ebrajk jgħidulu Armageddon.*

17 Is-sebaʼ wieħed ferraʼ l-iskutella tiegħu fl-arja. Malli għamel hekk, instemaʼ leħen għoli ġej mis-santwarju tat-tron, li qal: “Bil-lest!” 18 U kien hemm sajjetti, ilħna, u ragħad, u kien hemm terremot li tant kien kbir u mifrux li qatt ma seħħ bħalu minn mindu beda jeżisti l-bniedem. 19 Il-belt il-kbira nqasmet fi tlieta, u l-bliet tal-popli waqgħu. Alla ftakar f’Babilonja l-Kbira u taha t-tazza tal-inbid tar-rabja kbira ħafna tiegħu. 20 Ukoll, il-gżejjer kollha ħarbu u l-muntanji ma nstabux. 21 Imbagħad niżel silġ kbir fuq in-nies, u kull silġa kienet tiżen madwar talent.* In-nies bdew jidgħu b’Alla minħabba l-kastig tas-silġ, għax il-kastig għamel ħsara kbira.

17 Wieħed mis-sebaʼ anġli li kellhom is-sebaʼ skutelli ġie ħdejja u qalli: “Ejja ħa nurik il-ġudizzju li se jsir fuq il-prostituta l-kbira li toqgħod bilqiegħda fuq ħafna ilmijiet. 2 Ir-rejiet tal-art għamlu l-immoralità sesswali magħha, u n-nies sikru bl-inbid tagħha, li jirrappreżenta l-immoralità sesswali* tagħha.”

3 Hu uża l-qawwa tal-ispirtu qaddis biex jiħodni fid-deżert. Jien rajt mara bilqiegħda fuq bhima salvaġġa li l-kulur tagħha kien aħmar jgħajjat. Il-bhima kienet mimlija b’ismijiet li jidgħu* b’Alla u kellha sebat irjus u għaxart iqrun. 4 Il-mara kienet liebsa ħwejjeġ b’kulur vjola u aħmar jgħajjat, u deheb, ħaġar prezzjuż, u perli. F’idha kellha tazza tad-deheb mimlija b’affarijiet diżgustanti u b’affarijiet mhux nodfa tal-immoralità sesswali* tagħha. 5 Fuq moħħha kien hemm miktub isem misterjuż: “Babilonja l-Kbira, omm il-prostituti u l-affarijiet diżgustanti tal-art.” 6 Jien rajt li l-mara kienet fis-sakra bid-demm tal-qaddisin u tax-xhieda taʼ Ġesù.

Kif rajt dan bqajt imbellah ħafna. 7 Għalhekk, l-anġlu qalli: “Għala bqajt imbellah? Jien se ngħidlek il-misteru tal-mara u tal-bhima salvaġġa li qed iġġorrha, li għandha s-sebat irjus u l-għaxart iqrun: 8 Il-bhima salvaġġa li rajt kienet teżisti, imbagħad ma baqgħetx, imma daqt se titlaʼ mill-abbiss u tinqered. In-nies fuq l-art li isimhom ma kienx imniżżel fl-iskroll tal-ħajja mill-bidu tad-dinja,* se jibqgħu mistagħġbin meta jaraw kif il-bhima salvaġġa kienet teżisti, ma baqgħetx, u se terġaʼ tidher.

9 “Trid tkun għaref biex tifhem dan: Is-sebat irjus jirrappreżentaw sebaʼ muntanji, li fuqhom hemm il-mara bilqiegħda. 10 U hemm sebaʼ rejiet: ħamsa ma baqgħux, wieħed għadu, u l-ieħor għadu mhuwiex, imma meta jkun, se jibqaʼ għal ftit żmien. 11 Il-bhima salvaġġa li kienet teżisti u li m’għadhiex hi wkoll it-tmien re, imma din toħroġ mis-sebaʼ rejiet, u fl-aħħar mill-aħħar se tinqered.

12 “L-għaxart iqrun li int rajt jirrappreżentaw għaxar rejiet li għadhom ma ngħatawx saltna, imma se jingħataw awtorità bħala rejiet għal ftit żmien* mal-bhima salvaġġa. 13 Dawn għandhom l-istess ħsieb, għalhekk se jagħtu l-qawwa u l-awtorità tagħhom lill-bhima salvaġġa. 14 Dawn se jiġġieldu mal-Ħaruf, imma peress li hu s-Sid tas-sidien u r-Re tar-rejiet, il-Ħaruf se jirbħilhom. Anki l-imsejħin, il-magħżulin, u l-leali li hemm miegħu se jirbħulhom.”

15 L-anġlu qalli: “L-ilmijiet li rajt, li l-prostituta qiegħda bilqiegħda fuqhom, jirrappreżentaw in-nies, il-folol, il-ġnus, u l-lingwi.* 16 L-għaxart iqrun u l-bhima salvaġġa li rajt, se jobogħdu l-prostituta, jiħdulha kulma għandha, ineżżgħuha, jiklulha laħamha, u jaħarquha għalkollox bin-nar. 17 Għax Alla daħħlilhom f’moħħhom biex jagħmlu dak li jrid hu, jiġifieri li jagħmlu skont l-istess ħsieb li kellhom, billi jagħtu s-saltna tagħhom lill-bhima salvaġġa, sakemm jiġri dak li qal Alla. 18 U l-mara li rajt int tirrappreżenta l-belt il-kbira li tmexxi fuq ir-rejiet tal-art.”

18 Wara dan rajt anġlu ieħor nieżel mis-sema b’awtorità kbira, u l-art xegħlet bil-glorja tiegħu. 2 B’leħen sod għajjat: “Waqgħet! Babilonja l-Kbira waqgħet, u saret post fejn jgħixu d-demonji u post fejn jinħbew kull spirtu* ħażin* u kull għasfur maħmuġ u mibgħud! 3 Peress li dawk li jixorbu mill-inbid tagħha jiġu mħajrin jagħmlu l-immoralità sesswali,* il-popli kollha sikru bl-inbid tagħha, ir-rejiet tal-art għamlu l-immoralità sesswali magħha, u n-negozjanti* saru sinjuri bis-saħħa tal-ġid li akkwistat bla mistħija.”

4 U smajt leħen ieħor mis-sema jgħid: “Poplu tiegħi, oħorġu minnha jekk ma tridux tieħdu sehem fid-dnubiet tagħha u jekk ma tridux tirċievu l-kastigi tagħha. 5 Għax id-dnubiet tagħha lanqas tistaʼ tgħoddhom, u Alla se jiġġudikaha għall-affarijiet ħżiena* li għamlet. 6 Pattuhielha tal-affarijiet ħżiena li għamlet lil oħrajn, iva pattuhielha doppju għal dak li għamlet. Fit-tazza li ħalltet l-inbid fiha, ħalltulha d-doppju għaliha. 7 Daqskemm faħħret lilha nfisha u għexet fil-lussu li akkwistat bla mistħija, daqstant ieħor għandkom iġġegħluha tbati u tibki. Għax f’qalbha tibqaʼ tgħid, ‘Jien immexxi bħal reġina, m’iniex armla, u qatt mhu se nibki.’ 8 Għax f’ġurnata waħda se jiġu l-kastigi tagħha: il-mewt, il-biki, u l-ġuħ. Alla Ġeħova* se jaħraqha għalkollox bin-nar, għax hu l-wieħed li se jiġġudikaha, u hu b’saħħtu.

9 “Ir-rejiet tal-art li għamlu l-immoralità sesswali* magħha u li għexu magħha fil-lussu li akkwistat bla mistħija, se jibku u juru li huma mdejqin ħafna* minħabba fiha meta jaraw id-duħħan tagħha hi u tinħaraq. 10 Peress li jibżgħu li jbatu bħalha, mill-bogħod jgħidu, ‘X’ħasra, x’ħasra li ġralek hekk! Int kont belt kbira, il-belt b’saħħitha taʼ Babilonja. Imma f’daqqa waħda ġie l-ġudizzju tiegħek.’

11 “Ukoll, in-negozjanti tal-art jibku u huma mdejqin minħabba fiha, għax ħadd mhu jixtri l-affarijiet kollha li qed ibigħu: 12 deheb, fidda, ħaġar prezzjuż, perli, għażel fin, drapp vjola, ħarir, u drapp aħmar jgħajjat; u kull ħaġa magħmula minn injam ifuħ, mill-avorju, mill-injam prezzjuż, mir-ram, mill-ħadid, u mill-irħam; 13 kif ukoll kannella, ħwawar mill-Indja, inċens, żejt ifuħ, inċens abjad, inbid, żejt taż-żebbuġa, dqiq fin, qamħ, baqar, nagħaġ, żwiemel, karrijiet, ilsiera, u nies* għall-bejgħ. 14 Iva, il-frott mill-aqwa li kont tixtieq int,* m’għadux tiegħek, u l-ikel mill-aqwa u l-affarijiet sbieħ tiegħek sparixxewlek darba għal dejjem.

15 “In-negozjanti li biegħu dawn l-affarijiet u li saru sinjuri minn fuqha se jibqgħu ’l bogħod għax jibżgħu li se jbatu bħalha u se jibku u juru li huma mdejqin. 16 Huma jgħidu, ‘‘X’ħasra, x’ħasra li dawn l-affarijiet ġraw lil din il-belt il-kbira! Hi kienet liebsa ħwejjeġ tal-għażel fin, vjola, u ħomor jgħajtu, u ħafna deheb, ħaġar prezzjuż, u perli, 17 imma f’daqqa waħda sparixxa dan il-ġid kollu.’

“U kull kaptan taʼ vapur, kull persuna li tivvjaġġa bil-baħar, il-baħrin, u dawk kollha li xogħolhom jiddependi mill-baħar, qagħdu ’l bogħod 18 waqt li ħarsu lejn id-duħħan tagħha hi u tinħaraq, u qalu, ‘Liema belt hi bħall-belt il-kbira?’ 19 Huma tefgħu t-trab fuq rashom, għajtu, bkew, u ħassewhom imdejqin, u qalu, ‘X’ħasra, x’ħasra li dawn l-affarijiet ġraw lil din il-belt il-kbira! Permezz tal-ġid tagħha dawk kollha li kellhom vapur saru sinjuri, imma f’daqqa waħda spiċċat fix-xejn!’

20 “Intom li qegħdin fis-sema u intom il-qaddisin flimkien mal-appostli u l-profeti għandkom tkunu ferħanin b’dan, għax Alla ġġudikaha għal dak li għamlitilkom!”

21 U anġlu b’saħħtu refaʼ ġebla bħal ġebla kbira taʼ mitħna u waddabha fil-baħar u qal: “Il-belt il-kbira, Babilonja, se titwaddab bl-istess ħeffa, u qatt mhu se terġaʼ tidher. 22 F’Babilonja mhux se jerġaʼ jinstemaʼ l-ħoss tal-kantanti li jdoqqu l-arpa, tal-mużiċisti, taʼ dawk li jdoqqu l-flawt, u taʼ dawk li jdoqqu t-trumbetti. Fiha mhux se jkun hemm iktar nies tas-sengħa, u mhux se jinstemaʼ iktar il-ħoss taʼ xi ġebla tal-mitħna. 23 Fiha mhux se jerġaʼ jiddi d-dawl taʼ lampa, u mhu se jinstemaʼ l-ebda leħen t’għarus u għarusa. Dan se jiġri għax in-negozjanti tagħha kienu l-iktar nies importanti fuq l-art u għax il-popli kollha tfixklu minħabba li n-nies tagħha għamlu l-ispiritiżmu. 24 Iva, din il-belt instabet ħatja tal-qtil tal-profeti u tal-qaddisin u taʼ dawk kollha li nqatlu b’mod vjolenti.”

19 Wara dan smajt leħen għoli qisu taʼ folla kbira fis-sema. Huma qalu: “Faħħru lil Jah!* L-Alla tagħna hu Dak li Jsalva, glorjuż, u b’saħħtu ħafna, 2 għax il-ġudizzji tiegħu huma taʼ min jafdahom u ġusti. Għax hu ġġudika l-prostituta l-kbira li ħassret l-art bl-immoralità sesswali* u vvendika ruħu minnha talli qatlet l-ilsiera tiegħu.” 3 U smajthom jgħidu għat-tieni darba: “Faħħru lil Jah!* Id-duħħan tagħha waqt li qed taqbad jibqaʼ tielaʼ għal dejjem taʼ dejjem.”

4 U l-24 anzjan u l-erbaʼ ħlejjaq ħajjin niżlu għarkopptejhom u qiemu lil Alla li joqgħod bilqiegħda fuq it-tron, u qalu: “Ammen! Faħħru lil Jah!”*

5 Ukoll, ġie leħen mit-tron u qal: “Faħħru lill-Alla tagħna, intom l-ilsiera kollha tiegħu kbar u żgħar u li tirrispettawh ħafna.”*

6 U jien smajt bħal ħoss taʼ folla kbira, taʼ ħafna ilmijiet, u taʼ ragħad qawwi. Huma qalu: “Faħħru lil Jah,* għax Ġeħova* l-Alla tagħna, li Jistaʼ Kollox, beda jmexxi bħala re! 7 Ejja nifirħu ħafna u nagħtuh glorja, għax wasal iż-żwieġ tal-Ħaruf, u l-mara tiegħu ppreparat lilha nfisha għal dan. 8 Iva, hi ngħatat permess li tilbes ħwejjeġ tal-għażel fin, nodfa, u jleqqu, għax l-għażel fin jirrappreżenta l-affarijiet ġusti li għamlu l-qaddisin.”

9 Hu qalli: “Ikteb: Ferħanin huma dawk li ġew mistiedna għall-ikla taʼ filgħaxija taż-żwieġ tal-Ħaruf.” Qalli wkoll: “Dal-kliem li qal Alla hu veru.” 10 Għal dan jien inżilt għarkopptejja biex inqimu. Imma hu qalli: “Oqgħod attent! Tagħmilx hekk! Jien sempliċement ilsir bħalek u bħal ħutek li għandhom ix-xogħol li jagħtu xhieda dwar Ġesù. Qim lil Alla! Għax l-iskop tal-profeziji hu li tingħata xhieda dwar Ġesù.”

11 Rajt is-sema tinfetaħ, u kien hemm żiemel abjad. U dak li kien riekeb fuqu kien jismu Leali u Veru, u kien jiġġudika u jiġġieled b’mod ġust. 12 Għajnejh huma bħal fjamma nar, u fuq rasu għandu ħafna kuruni.* Fuqu għandu miktub isem li ħadd ma jafu ħliefu. 13 Hu liebes ħwejjeġ imċappsin* bid-demm, u ismu hu: Il-Kelma t’Alla. 14 L-armati tas-sema kienu warajh fuq żwiemel bojod, u kienu lebsin għażel fin, abjad, u nadif. 15 Minn ħalqu kienet ħierġa xabla twila taqtaʼ li biha se jikkastiga lill-popli, u hu se jirgħahom b’virga tal-ħadid. Iktar minn hekk, hu jagħsar l-għeneb li hemm fil-post fejn jintgħasar l-għeneb tal-Alla li Jistaʼ Kollox. Il-post jirrappreżenta r-rabja kbira ħafna tiegħu. 16 Fuq ħwejġu, iva, fuq koxxtu, għandu isem miktub: Ir-Re tar-rejiet u s-Sid tas-sidien.

17 Jien rajt ukoll anġlu wieqaf fix-xemx, u hu għajjat b’leħen għoli lill-għasafar kollha tas-sema u qalilhom: “Ejjew hawn, inġabru f’daqqa għall-ikla l-kbira taʼ filgħaxija t’Alla, 18 biex tieklu l-laħam tar-rejiet, tal-kmandanti militari, tal-irġiel b’saħħithom, taż-żwiemel u taʼ dawk li jirkbu fuqhom, u l-laħam taʼ kulħadd, tal-ħielsa u l-ilsiera, u taż-żgħar u l-kbar.”

19 U rajt il-bhima salvaġġa, ir-rejiet tal-art, u l-armati tagħhom miġburin flimkien biex jiġġieldu kontra l-wieħed li kien riekeb fuq iż-żiemel u l-armata tiegħu. 20 Il-bhima salvaġġa nqabdet, u magħha nqabad ukoll il-profeta falz li kien jagħmel il-mirakli* quddiemha u li bihom qarraq b’dawk li rċivew il-marka tal-bhima salvaġġa u b’dawk li kienu jagħtu qima lill-istatwa tagħha. Waqt li l-bhima salvaġġa u l-profeta falz kienu għadhom ħajjin, ġew imwaddbin fl-għadira tan-nar li taqbad bil-kubrit.* 21 Imma l-bqija nqatlu bix-xabla twila li kienet ħierġa minn ħalq il-wieħed li kien riekeb fuq iż-żiemel. U l-għasafar kollha mtlew b’laħamhom.

20 U rajt anġlu nieżel mis-sema biċ-ċavetta tal-abbiss u b’katina kbira f’idu. 2 Hu ħataf id-dragun, is-serp oriġinali li hu x-Xitan u Satana, u rabtu għal 1,000 sena. 3 Imbagħad waddbu fl-abbiss u għalaq u ssiġilla d-daħla tiegħu, ħalli ma jkunx jistaʼ jkompli jqarraq bil-popli sakemm jispiċċaw l-1,000 sena. Wara dan, għandu jiġi meħlus għal ftit żmien.

4 U jien rajt tronijiet, u dawk bilqiegħda fuqhom ingħataw awtorità biex jiġġudikaw. Iva, rajt id-demm* taʼ dawk li ġew maqtulin* għax taw xhieda dwar Ġesù u tkellmu dwar Alla, u taʼ dawk li ma qimux il-bhima salvaġġa u l-istatwa tagħha u li ma rċivewx il-marka fuq moħħhom u fuq idhom. Huma ħadu l-ħajja u mexxew bħala rejiet mal-Kristu għal 1,000 sena. 5 Dan hu l-ewwel irxoxt. (Il-bqija tal-mejtin ma ħadux il-ħajja sakemm spiċċaw l-1,000 sena.) 6 Ferħanin u qaddisin huma dawk li għandhom sehem fl-ewwel irxoxt. Fuq dawn it-tieni mewt m’għandhiex awtorità, imma huma se jkunu qassisin t’Alla u tal-Kristu, u se jmexxu bħala rejiet miegħu għall-1,000 sena.

7 Meta jgħaddu l-1,000 sena, Satana jiġi meħlus mill-ħabs. 8 Hu se joħroġ u jqarraq bil-popli li qegħdin fl-erbaʼ kantunieri tal-art, jiġifieri Gog u Magog, biex jiġborhom flimkien għall-gwerra. L-ammont tagħhom hu daqs ir-ramel tal-baħar. 9 Huma nxterdu mal-art kollha u dawru l-kamp tal-qaddisin u l-belt għażiża. Imma niżel nar mis-sema u ħaraqhom. 10 U x-Xitan li kien qed iqarraq bihom ġie mwaddab fl-għadira tan-nar u l-kubrit, fejn kien hemm diġà l-bhima salvaġġa u l-profeta falz. Huma se jiġu tturmentati* lejl u nhar għal dejjem taʼ dejjem.

11 U jien rajt tron kbir abjad u l-Wieħed bilqiegħda fuqu. L-art u s-sema ħarbu minn quddiemu, u ma nstabux iktar. 12 U rajt il-mejtin, il-kbar u ż-żgħar, weqfin quddiem it-tron, u nfetħu skrolli. Imbagħad infetaħ skroll ieħor, l-iskroll tal-ħajja. Permezz tal-affarijiet li kien hemm miktubin fl-iskrolli, il-mejtin ġew iġġudikati skont dak li għamlu. 13 Il-baħar, il-mewt, u l-Qabar* taw lura l-mejtin li kien hemm fihom, u dawn ġew iġġudikati individwalment skont dak li għamlu. 14 Il-mewt u l-Qabar* ġew mitfugħin fl-għadira tan-nar. Din tirrappreżenta t-tieni mewt. 15 Anki dawk li ma kellhomx isimhom miktub fil-ktieb tal-ħajja ġew mitfugħin fl-għadira tan-nar.

21 Jien rajt sema ġdida u art ġdida, għax is-sema u l-art taʼ qabel spiċċaw, u l-baħar m’għadux jeżisti. 2 Rajt ukoll il-belt il-qaddisa, Ġerusalemm il-Ġdida, nieżla mis-sema fejn hemm Alla. Hi bħal għarusa liebsa sabiħ biex tilqaʼ lir-raġel li se tiżżewweġ. 3 Imbagħad smajt leħen għoli mit-tron jgħid: “It-tinda t’Alla se tkun fost il-bnedmin, u hu se jgħix magħhom, u huma jkunu l-poplu tiegħu. Alla stess se jkun magħhom. 4 Hu se jixxottalhom kull demgħa minn għajnejhom, u ma jkunx hemm iżjed mewt, dwejjaq, biki, u wġigħ. Alla se jneħħi l-affarijiet kollha li ġegħluna nbatu.”*

5 Il-Wieħed bilqiegħda fuq it-tron qalli: “Jien qed nagħmel kollox ġdid.” Qalli wkoll: “Ikteb, għax dan il-kliem hu taʼ min jafdah* u veru.” 6 U qalli: “Dan il-kliem diġà seħħ! Jien l-Alfa u l-Omega,* il-bidu u t-tmiem. Lil kull min hu bil-għatx se nagħtih jixrob b’xejn mill-għajn tal-ilma tal-ħajja. 7 Kull min jirbaħ lid-dinja se jiret dawn l-affarijiet, u jien inkun l-Alla tiegħu, u hu jkun it-tifel tiegħi. 8 Imma dawk li jibżgħu, li m’għandhomx fidi, li huma diżgustanti, il-qattiela, li jagħmlu l-immoralità sesswali,* li jagħmlu l-ispiritiżmu, li jqimu l-idoli, u l-giddibin kollha, se jiġu mitfugħin fl-għadira li taqbad bin-nar u l-kubrit.* Din tirrappreżenta t-tieni mewt.”

9 Wieħed mis-sebaʼ anġli li kellhom is-sebaʼ skutelli li kienu mimlijin bl-aħħar sebaʼ kastigi ġie ħdejja u qalli: “Ejja ħa nurik l-għarusa, li se tkun il-mara tal-Ħaruf.” 10 Għalhekk, hu uża l-qawwa tal-ispirtu qaddis u ħadni fuq muntanja kbira u għolja. Hu wrieni lil Ġerusalemm, il-belt il-qaddisa, nieżla mis-sema fejn hemm Alla. 11 Din il-belt għandha l-glorja t’Alla u tiddi bħall-iktar ħaġra prezzjuża, bħal ħaġra tad-djaspru li tleqq daqs il-kristall. 12 Din kellha sur kbir u għoli u 12-il bieb b’anġlu maʼ kull wieħed, u fuq il-bibien kien hemm minquxin l-ismijiet tat-12-il tribù t’Iżrael. 13 Kien hemm tliet bibien fil-Lvant, tlieta fit-Tramuntana, tlieta fin-Nofsinhar, u tlieta fil-Punent. 14 Is-sur tal-belt kellu wkoll 12-il ġebla tal-pedament, u fuqhom kien hemm l-ismijiet tat-12-il appostlu tal-Ħaruf.

15 Dak li kien qed ikellimni kellu qasba tad-deheb biex ikejjel il-belt, il-bibien, u s-sur tagħha. 16 Il-belt kienet kwadra, u t-tul u l-wisaʼ tagħha kienu ndaqs. Hu kejjel il-belt bil-qasba u kienet 12,000 stadju;* it-tul, il-wisaʼ, u l-għoli tagħha kienu ndaqs. 17 Hu kejjel ukoll is-sur tagħha, li kien 144 kubitu,* skont il-kejl tal-bnedmin. Dan hu l-istess kejl li uża l-anġlu. 18 Is-sur kien magħmul mid-djaspru, u l-belt mid-deheb pur bħal ħġieġ ċar. 19 Il-pedamenti tas-sur tal-belt kienu mżejnin b’kull tip taʼ ħaġar prezzjuż: l-ewwel pedament kien djaspru, it-tieni żaffir, it-tielet kalċedonju, ir-rabaʼ żmerald, 20 il-ħames sardoniċi, is-sitta sardju, is-sebaʼ krisolitu, it-tmienja berill, id-disaʼ topazju, l-għaxar krisoprasu, il-ħdax ġjaċint, u t-tnax ametist. 21 Ukoll, it-12-il bieb kienu 12-il perla. Kull bieb kien magħmul minn perla. It-triq prinċipali tal-belt kienet magħmula minn deheb pur bħal ħġieġ ċar.

22 Fil-belt ma rajtx tempju, għax Alla Ġeħova* li Jistaʼ Kollox u l-Ħaruf huma t-tempju tagħha. 23 Il-belt ma kellhiex bżonn id-dawl tax-xemx u l-qamar, għax kellha l-glorja t’Alla tiddi fuqha, u l-lampa tagħha kienet il-Ħaruf. 24 Il-popli se jimxu permezz tad-dawl tagħha, u r-rejiet tal-art se jigglorifikawha. 25 Il-bibien tagħha mhux se jingħalqu, għax il-ġurnata mhux se tispiċċa u l-lejl mhux se jeżisti. 26 Il-popli se jigglorifikaw u jonoraw il-belt. 27 Imma kulma hu mniġġes u kull min jagħmel dak li hu diżgustanti u jqarraq żgur li mhux se jidħol fiha. Se jidħlu dawk biss li huma miktubin fl-iskroll tal-ħajja tal-Ħaruf.

22 Hu wrieni xmara tal-ilma tal-ħajja, li kienet ċara daqs il-kristall. Din kienet ħierġa mit-tron t’Alla u tal-Ħaruf, 2 u kienet tgħaddi min-nofs it-triq prinċipali. Fuq kull naħa tax-xmara kien hemm siġar tal-ħajja li jagħmlu l-frott kull xahar, 12-il darba fis-sena. U l-weraq tas-siġar kienu tajbin biex ifejqu l-popli.

3 U mhux se jkun hemm iktar saħta. It-tron t’Alla u tal-Ħaruf se jkunu fil-belt, u l-ilsiera t’Alla se jqimuh. 4 Huma se jaraw wiċċu, u ismu se jkun fuq moħħhom. 5 Ukoll, il-lejl mhux se jibqaʼ iktar, u mhux se jkollhom bżonn id-dawl tal-lampa jew tax-xemx, għax Alla Ġeħova* se jitfaʼ d-dawl fuqhom, u huma se jmexxu bħala rejiet għal dejjem taʼ dejjem.

6 Hu qalli: “Dan il-kliem hu taʼ min jafdah* u veru. Iva, Ġeħova,* l-Alla li jitkellem permezz tal-profeti, bagħat lill-anġlu tiegħu biex juri lill-ilsiera tiegħu l-affarijiet li se jiġru dalwaqt. 7 Ġesù jgħid: ‘Jien ġej malajr. Ferħanin huma dawk kollha li jobdu l-kliem tal-profezija taʼ dan l-iskroll.’”

8 Jien, Ġwanni, kont smajt u rajt dawn l-affarijiet. Meta smajthom u rajthom, inżilt għarkopptejja biex inqim l-anġlu li kien urieni dawn l-affarijiet. 9 Imma hu qalli: “Oqgħod attent! Tagħmilx hekk! Jien sempliċement ilsir bħalek, bħal ħutek il-profeti, u bħal dawk li jobdu l-kliem taʼ dan l-iskroll. Qim lil Alla.”

10 Hu qalli wkoll: “Tissiġillax il-kliem tal-profezija taʼ dan l-iskroll, għax iż-żmien li ntagħżel hu qrib. 11 Min mhux qed jagħmel l-affarijiet sewwa, ħa jkompli ma jagħmilx l-affarijiet sewwa, u min hu maħmuġ, ħa jkompli jkun maħmuġ; imma min hu sewwa, ħa jkompli jagħmel is-sewwa, u min hu qaddis, ħa jkompli jagħmel dak li hu qaddis.

12 “Alla jgħid: ‘Jien ġej malajr, u se nagħti lil kull wieħed skont dak li għamel. 13 Jien l-Alfa u l-Omega,* l-ewwel u l-aħħar, il-bidu u t-tmiem. 14 Ferħanin huma dawk li jaħslu l-ħwejjeġ tagħhom, ħalli jkollhom id-dritt jieklu l-frott tas-siġar tal-ħajja u jidħlu fil-belt mill-bibien tagħha. 15 Barra hemm il-klieb,* dawk li jagħmlu l-ispiritiżmu, li jagħmlu l-immoralità sesswali,* li joqtlu, li jqimu l-idoli, u kull min iħobb il-gideb u jigdeb.’

16 “‘Jien, Ġesù, bgħatt lill-anġlu tiegħi biex jagħti xhieda lilkom dwar dawn l-affarijiet għall-benefiċċju tal-kongregazzjonijiet. Jien mill-familja* taʼ David u dixxendent tiegħu, u l-istilla taʼ filgħodu li tiddi.’”

17 L-ispirtu u l-għarusa jibqgħu jgħidu: “Ejja!” u kull min jismaʼ ħa jgħid, “Ejja!” u kull min hu bil-għatx ħa jiġi; u kull min jixtieq ħa jieħu l-ilma tal-ħajja b’xejn.

18 Ġesù jgħid: “Jien qed nagħti xhieda lil kull min qed jismaʼ l-kliem tal-profezija taʼ dan l-iskroll: Jekk xi ħadd iżid maʼ dan, Alla se jżidlu l-kastigi li huma miktubin f’dan l-iskroll. 19 U jekk xi ħadd ineħħi xi ħaġa mill-kliem tal-iskroll taʼ din il-profezija, Alla mhux se jħallih jiekol mis-siġar tal-ħajja jew jidħol fil-belt qaddisa, li dwarhom hemm miktub f’dan l-iskroll.

20 “Jien li nagħti xhieda dwar dawn l-affarijiet ngħid, ‘Iva, jien ġej malajr.’”

Jien, Ġwanni, għedtlu: “Ammen! Ejja Mulej Ġesù.”

21 Jalla l-Mulej Ġesù juri qalb tajba kbira mal-qaddisin.