Pietru Jmur Għand Kornelju

DAK hu l-​appostlu Pietru bilwieqfa hemm, u hemm xi ftit mill-​ħbieb tiegħu warajh. Imma dan ir-​raġel għala qed imil quddiem Pietru? Għandu jagħmel hekk? Taf min hu?

Dan ir-​raġel hu Kornelju. Hu uffiċjal tal-​armata Rumana. Kornelju ma jafx lil Pietru imma ntqallu biex jistiednu fid-​dar tiegħu. Ejja naraw x’wassal għal dan.

L-​ewwel segwaċi taʼ Ġesù kienu Lhud imma Kornelju mhuwiex Lhudi. Iżda hu jħobb lil Alla, ikellmu fit-​talb, u jagħmel ħafna atti taʼ qalb tajba lin-​nies. Mela, darba waranofsinhar, jidhirlu anġlu u jgħidlu: ‘Alla ferħan bik u se jwieġeb it-​talb tiegħek. Ibgħat xi rġiel biex iġibu lil wieħed raġel jismu Pietru. Qed joqgħod f’Ġaffa fid-​dar taʼ Xmun li jgħix ħdejn il-​baħar.’

Mill-​ewwel Kornelju jibgħat xi rġiel biex isibu lil Pietru. L-​għada, meta l-​irġiel ikunu qorbu lejn Ġaffa, Pietru jkun fuq il-​bejt tad-​dar taʼ Xmun. Hemmhekk Alla jġiegħel lil Pietru jaħseb li qed jara liżar kbir nieżel mis-​sema. Fil-​liżar hemm kull xorta t’annimali. Skont il-​liġi t’Alla, dawn l-​annimali mhumiex nodfa biex jittieklu, imma leħen jgħid: ‘Qum Pietru. Oqtol u kul.’

Pietru jwieġeb: ‘Le. Jien qatt ma kilt dak li mhux nadif.’ Imma l-​leħen jgħid lil Pietru: ‘Tibqax issejjaħ mhux nadif dak li Alla issa jgħid li hu nadif.’ Dan kollu jiġri tliet darbiet. Waqt li Pietru qed jaħseb x’setaʼ jfisser dan, l-​irġiel li bagħat Kornelju jaslu d-​dar taʼ Xmun u jistaqsu għal Pietru.

Pietru jinżel isfel u jgħid: ‘Jien ir-​raġel li qed tfittxu. Xi tridu?’ Meta l-​irġiel jispjegaw li anġlu qal lil Kornelju biex jistieden lil Pietru f’daru, Pietru jaċċetta li jmur magħhom. L-​għada Pietru u l-​ħbieb tiegħu jitilqu biex imorru għand Kornelju f’Ċesarija.

Kornelju laqqaʼ flimkien lill-​qraba tiegħu u l-​ħbieb tal-​qalb. Meta jasal Pietru, Kornelju jiltaqaʼ miegħu. Hu jinżel u jmil ħdejn saqajn Pietru, kif tistaʼ tara hawn. Imma Pietru jgħid: ‘Qum; jien sempliċi bniedem.’ Iva, il-​Bibbja turi li mhuwiex tajjeb li wieħed imil u jqim lil raġel. Għandna nqimu lil Ġeħova biss.

Pietru issa jipprietka lil dawk li kienu miġburin. ‘Nistaʼ nara li Alla jaċċetta lil dawk kollha li jridu jaqduh,’ jgħid Pietru. U waqt li jkun qed jitkellem, Alla jibgħat l-​ispirtu qaddis tiegħu, u l-​irġiel jibdew jitkellmu b’lingwi differenti. Id-​dixxipli Lhud li ġew maʼ Pietru jistagħġbu b’dan għax huma ħasbu li Alla jiffavorixxi lil-​Lhud biss. Għalhekk dan jgħallimhom li Alla ma jħarisx lejn in-​nies taʼ razza waħda bħala li huma aħjar jew iktar importanti għal Alla min-​nies taʼ kull razza oħra. Mhijiex din xi ħaġa tajba li lkoll kemm aħna għandna niftakru?