It-Tielet Millennju—Se Jwettaq it-Tamiet Tiegħek?
IL-ĦIN qed jonqos. Arloġġ diġitali fuq il-faċċata taċ-ċentru kulturali taʼ Beaubourg f’Pariġi, Franza, qed juri n-numru taʼ sekondi li fadal. Se jkompli jgħodd il-ħin sa nofs il-lejl tal-31 taʼ Diċembru, 1999. F’dak il-ħin, se tiġri xi ħaġa li dehret darba biss fl-Era Komuni tagħna: id-dħul taʼ millennju ġdid, it-tielet millennju.
“Is-sena 2000 hija, b’xi mod, ‘l-iktar ġrajja mistennija’ fl-istorja umana s’issa,” jissuġġerixxi r-riċerkatur soċjali Bernward Joerges taʼ Berlin, il-Ġermanja. Għala stennija bħal din? Wara kollox, is-sena 2000 hija sempliċement data oħra fil-medda taż-żmien. Barra minn hekk, id-data hija rikonoxxota biss minn dawk li qed jużaw il-kalendarju tal-Punent. Skond il-kalendarju Islamiku, is-sena 2000 E.K. taħbat matul is-sena Islamika 1420; skond il-kalendarju Lhudi, 5760 A.M.
Imma f’intervista mal-ġurnal Svediż taʼ kuljum Dagens Nyheter, il-Professur Joerges jispjega: “Minħabba l-kolonjaliżmu u l-imperjaliżmu, il-kronoloġija Gregorjana tagħna, li tibda kif ġie ssoponut mit-twelid taʼ Kristu, saret iktar popolari f’ħafna partijiet tad-dinja.” Is-sena 2000 se tkun b’hekk marka taʼ epoka globali għal parti mhux ħażin tad-dinja. Igħid il-Professur Joerges: “In-nies kollha se jassoċjaw il-biografiji persunali tagħhom kif ukoll kull ħaġa oħra maʼ din il-ġrajja.”
Madankollu, ħafna wħud għandhom iktar f’moħħhom milli sempliċement jimmarkaw il-ħin.“Proġetti u programmi fuq skala kbira li jimmarkaw, jagħtu sinjifikat u jiċċelebraw lil din il-ġrajja diġà qed isiru f’kull sfera tal-ħajja u fuq kull livell soċjali,” isostni Joerges. Hu jżid li “mal-globu kollu, dawk l-organizzaturi li jipproġettaw bil-kbir u ‘organizzaturi tal-wirjiet’ qed joħolmu u jippjanaw ġrajjiet kbar.” Bassara oħra jgħidu li “se nifgaw fid-dulluvju taʼ kotba fuq is-seklu li għadda. Il-mezzi taʼ komunikazzjoni kollha se jiġġennu minħabba li se naqilbu l-millennju. Stazzjon tal-Ġermanja tal-Punent qed jippjana xandira taʼ 24 siegħa taʼ tlugħ ix-xemx differenti madwar l-art.”
Il-mezzi taʼ komunikazzjoni se jkunu żguri li jagħmlu plejtu sħiħ dwar l-aħħar tarbija li tit-wieled fl-1999 u l-ewwel waħda li titwieled fis-sena 2000. Ġurnalisti jkunu ħerqana biex jiskopru dawk il-ftit uħud li twieldu fis-seklu 19 biex jistaqsuhom kif iħossuhom li jkunu għexu fi tliet sekli u żewġ millenji! Xi wħud saħansitra jħossu li dan il-plejtu kollu dwar il-millennju se jiġġenera xorta taʼ isteriżmu tal-massa. Skond tbassir xejn m’hu sabiħ, mad-daqq taʼ nofs il-lejl taʼ dik is-Sena l-Ġdida, ħafna se jikkommettu suwiċidju.
Minkejja eċċessi ovvji bħal dawn, wieħed jistaʼ jifhem li din il-ġrajja se tkun affaxxinanti. Għal ħafna nies fid-dinja mimlija inkwiet tagħna, il-millennju l-ġdid huwa meqjus bħala xrara tama, bieb għal futur aħjar. Xi wħud iħarsu lejn ix-xjenza u t-teknoloġija biex jipproduċu futur li fih aħna se nieklu aħjar u ngħixu iktar, naħdmu inqas u noqogħdu iktar id-dar; fejn ir-‘robots’ se jeħilsuna minn xogħol taʼ dwejjaq; fejn fużjoni kkontrollata se tbiddel l-ilma f’likwidu li jħaddem il-magni. Jimmaġinaw futur taʼ Televiżjoni bl-olografu, telefon bl-istampa, magni tat-telekomunikazzjoni bil-kulur, u telefon li jittraduċi waqt li tkun qed titkellem. Joħolmu li se jesploraw il-Qamar, Mars, jew xi pjaneta oħra, biex jisfruttawhom.
Imma mhux kulħadd huwa daqshekk ottimist. Xi ftit minn dawk li jagħmlu r-riċerki jħarsu lejn il-millennju ġdid bħala li fih se jibda żmien taʼ li l-popolazzjoni tad-dinja tikber b’mod mhux ikkontrollat u taʼ kollass ambjentali. It-tniġġis tal-arja se jbiddel l-atmosfera tal-art f’serra mimlija fwar. Muntanji tas-silġ idubu u l-ibħra jogħlew, u jgħarrqu l-postijiet popolati u produttivi billi jittrasformaw miljuni taʼ kilometri taʼ wċuħ tar-rabaʼ f’deżerti. Huma jaraw minn qabel kollass ekonomiku dinji, instabbilità politika li se theżheż lill-gvernijiet u lis-soċjetajiet, delitti bla limitu, u l-agħar ħaġa, olokawst nukleari li jeqred il-ħajja umana kollha.
Il-bassara għandhom ħafna spekulazzjonijiet però ma tantx huma ċerti fejn għandu x’jaqsam il-millennju li riesaq. Sempliċement wisq fatturi li ma jistgħux jidhru huma involuti biex ibassru l-futur b’mod eżatt. Futurista professjonali jxebbah dan ma logħba taċ-ċess: “Qabel ma nilgħab li jkun imissni, nara kemm nistaʼ bil-quddiem iċ-ċaqliqiet taʼ wara. Imma wara li l-opponent tiegħi jilgħab, nerġaʼ nagħmel kollox mill-ġdid.”
Eżatt x’se ġġib magħha s-sena 2000, iż-żmien biss jistaʼ jgħidu. Dan ma jfissirx, iżda, li l-futur tiegħek irid ikun inċert. Il-Bibbja tipprovdi evidenza biżżejjed li aħna qegħdin qrib il-wasla taʼ millennju bil-wisq iktar sinjifikanti minn dak li se jibda f’inqas minn għaxar snin oħra. Dan il-millennju li qed joqrob se jgħaddi bil-kbir kull stennija umana! Dan xi jfisser eżatt? X’se jinvolvi? Aħna nistednuk biex tikkunsidra l-artiklu li jmiss tagħna u titgħallem x’għandha xi tgħid il-Bibbja.