Il-​Ħaġa Moħġaġa fil-​Bibbja Kif Inhi Relatata maʼ l-​Iskop t’Alla?

META ma tkunx taf x’inhi, allura tkun xi ħaġa; imma meta tkun taf x’inhi, allura ma tkun xejn. Din x’taħbat? Ħaġa moħġaġa.

Fis-soċjetà tant prattika tal-​lum, in-​nies għandhom it-​tendenza li jqisu l-​ifformar taʼ ħaġa moħġaġa, jew xarada, bħala logħob tat-​tfal, imma fl-​antik il-​ħaġa moħġaġa “kienet test taʼ l-​għerf,” josserva The Interpreter’s Dictionary of the Bible.—Qabbel Proverbji 1:5, 6.

Minflok ma stqarr ir-​rieda jew l-​iskop tiegħu ċar u tond, xi drabi Jehovah għal t’apposta oskura l-​qwiel profetiċi tiegħu, billi uża analoġiji, “qwiel oskuri” li joħolqu element taʼ misteru, jew xi ħaġa moħġaġa li tikkonfondik. (Salm 78:2, King James Version; Numri 12:8, The Emphasized Bible) Fil-​fatt, filwaqt li l-​kelma Ebrajka għal ħaġa moħġaġa hija wżata 17-il darba biss fil-​Bibbja, l-​Iskrittura hija letteralment ippakkjata bihom, kif ukoll bil-​proverbji.

Kwantità Kbira fil-​Bibbja

Jingħad li s-​Sultan Salamun kien kapaċi jsolvi saħansitra l-​iktar mistoqsija, jew ħaġa moħġaġa, diffiċli li kienu jġibulu. (1 Slaten 10:1, ara n-​nota taʼ taħt fin-​NW.) Dan ċertament li kien riżultat taʼ għerf mogħti minn Alla. Jekk hemm xi verità fir-​rapporti taʼ storjografi tal-​qedem li jgħidu li darba Salamun tilef kompetizzjoni tax-​xaradi li għamel mas-​Sultan Ħiram taʼ Tir, x’aktarx li dan ġara wara li tilef l-​ispirtu taʼ Jehovah bħala riżultat taʼ l-​apostasija tiegħu. L-​imħallef Sansun ukoll kien iħobb jivvinta x-​xaradi. Darba minnhom, bl-​għajnuna tal-​qawwa taʼ l-​ispirtu qaddis, permezz taʼ ħaġa moħġaġa rnexxielu jnissel il-​biżaʼ f’qalb l-​għedewwa t’Alla.—Imħallfin 14:12-19.

Iżda ħafna drabi, il-​ħaġa moħġaġa fil-​Bibbja hija relatata direttament maʼ l-​iskopijiet taʼ Jehovah. Per eżempju, ikkunsidra Ġenesi 3:15. Din il-​profezija, li hija l-​bażi tat-​tema tal-​Bibbja, fiha nfisha hija speċi taʼ enigma, “misteru [“sigriet sagru,” NW].” (Rumani 16:25, 26) Minbarra li ngħata viżjonijiet u rivelazzjonijiet soprannaturali, l-​appostlu Pawlu ra wkoll ċerti aspetti taʼ l-​iskopijiet t’Alla ‘mċajprin,’ jew letteralment, “espressjoni oskura.” (1 Korintin 13:12; 2 Korintin 12:1-4) U xi ngħidu għall-​ispekulazzjoni li ma tispiċċa qatt dwar in-​numru misterjuż tal-​bhima salvaġġa​—“sitt mija u sitta u sittin”—​li jiġi introdott f’daqqa waħda u mingħajr ebda spjegazzjoni f’Apokalissi 13:18? Min hu kapaċi jsolvi xi waħda minn dawn ix-​xaradi, u dawn liema skop jaqdu?

Inħollu s-​Sigrieti Sagri

Għal ħafna minna, il-​vista hija l-​iktar sens prezzjuż li għandna. Imma mingħajr id-​dawl, kważi kważi jkun għalxejn li nippossiedu l-​kapaċità li naraw. Tistaʼ tgħid li nkunu għomja. L-​istess jiġri fil-​każ tal-​moħħ tal-​bniedem. Dan għandu kapaċità taʼ l-​għaġeb li jqabbel il-​karatteristiċi, juża l-​loġika, u b’hekk isolvi affarijiet taʼ taħbil il-​moħħ. Madankollu, jeħtieġ xi ħaġa oħra biex inħollu s-​sigrieti sagri. Filwaqt li oħrajn għandhom mnejn joffru soluzzjoni għal xi ħaġa moħġaġa preżentata fil-​Bibbja, l-​Awtur tagħhom biss, Jehovah, dak Alla li jagħti d-​dawl, jistaʼ jirrivela x’ried ifisser bihom.—1 Ġwann 1:5.

Sfortunatament, il-​bnedmin taʼ spiss ikunu kburin u indipendenti wisq biex jistrieħu fuq Jehovah għat-​tweġibiet. Imbagħad hemm dawk li, affaxxinati bil-​misteru, fit-​tfittxija tagħhom għal xi ħaġa li tistimulahom intellettwalment imma mhux neċessarjament għall-​verità, fittxew soluzzjonijiet barra mill-​Kelma t’Alla. Per eżempju, il-​mistiċiżmu tal-​Lhud kif espress fil-​Kabala kkontempla s-​sinjifikat maġiku tan-​numri u l-​ittri taʼ l-​alfabet Ebrajk. Mill-​banda l-​oħra, l-​Injostiċi tat-​tieni seklu wżaw l-​Iskrittura Ebrajka u dik Griega biex jipprovaw jisiltu tifsiriet sigrieti minnhom.

Madankollu, dan it-​tiftix kollu kompla jgħarraqhom iktar f’riti jew superstizzjonijiet pagani u jressaqhom ’il bogħod mill-​verità divina. ‘Jekk id-​dinja hi mimlija bil-​ħażen,’ kienu jirraġunaw l-​Injostiċi, ‘allura l-​Ħallieq tagħha, Jaħweh, ma jistax ikun li hu Alla tajjeb.’ Hija din l-​aħjar konklużjoni li setgħu joffru? Kemm hu veru li l-​bnedmin jaraw biss sa mneħirhom! Mhux taʼ b’xejn li l-​appostlu Pawlu, biex jiġġieled l-​ideat apostati li iktar tard ġew żviluppati mis-​setet Injostiċi, ta twissijiet qawwijin bħal din fl-​ittri tiegħu: “Tmorrux lil hinn mill-​affarijiet li huma miktubin”!—1 Korintin 4:6, NW.

Dawl fuq il-​“Qwiel Oskuri”

Madankollu, dak Alla li jagħti d-​dawl għala għandu jitkellem bi “qwiel oskuri”? Il-​mod innifsu taʼ kif inhi fformata ħaġa moħġaġa huwa taʼ sfida għall-​immaġinazzjoni u l-​kapaċitajiet taʼ raġunar tagħna. Għalhekk, imferrxin fl-​Iskrittura bħal tiżjin delizzjuż f’ikla mill-​itjeb, dawn xi drabi ntużaw sempliċement biex iqajmu l-​interess taʼ l-​udjenza jew biex jagħmlu l-​messaġġ li jkun qed jiġi mwassal iktar ħaj. F’każi bħal dawn, normalment tingħata spjegazzjoni eżatt wara.—Eżekjel 17:1-18; Mattew 18:23-35.

Jehovah jagħti l-​għerf b’mod ġeneruż imma mhux lil kulħadd. (Ġakbu 1:5-8) Ikkunsidra l-​ktieb taʼ Proverbji, kollezzjoni ispirata taʼ ħafna qwiel taʼ taħbil il-​moħħ li xi wħud għandhom mnejn iqisuhom bħala xaradi. Biex nifhmuhom irridu ħafna ħin u meditazzjoni. Imma kemm nies huma lesti li jagħmlu dan l-​isforz? L-​għerf li fihom dawn il-​qwiel huwa aċċessibbli biss għal dawk li huma lesti li jħaffru għalih.—Proverbji 2:1-5.

B’mod simili, Ġesù uża t-​tixbihat biex jikxef l-​attitudni taʼ qalb dawk li kienu jisimgħuh. Ġemgħat kbar taʼ nies kienu jiffollaw madwaru. Kienu jieħdu pjaċir bl-​istejjer tiegħu. Kienu jogħġbuhom il-​mirakli li kien jagħmel. Madankollu, kemm minnhom kienu lesti li jbiddlu l-​istil taʼ ħajjithom u jsegwuh? X’kuntrast mad-​dixxipli taʼ Ġesù, li ripetutament kienu jipprovaw jifhmu t-​tagħlim taʼ Ġesù u minn jeddhom ċaħdu lilhom infushom biex isiru s-​segwaċi tiegħu!—Mattew 13:10-23, 34, 35; 16:24; Ġwann 16:25, 29.

Induru lejn id-​Dawl

“L-​interess fix-​xaradi,” josserva sors wieħed, “mid-​dehra ħabat fl-​istess żmien taʼ perijodi taʼ qawmien intellettwali.” Illum aħna għandna privileġġ tassew kbir li qed ngħixu fi żmien meta ‘feġġ id-​dawl’ għall-​poplu t’Alla. (Salm 97:11; Danjel 12:4, 9) Kapaċi aħna nistennew bil-​paċenzja sakemm Jehovah jirrivela l-​iskopijiet tiegħu skond l-​iskeda tiegħu? Iktar importanti minn hekk, naġixxu aħna fil-​pront biex inbiddlu ħajjitna meta nsiru nafu kif għandna nikkonformaw iktar bis-​sħiħ mar-​rieda rivelata t’Alla? (Salm 1:1-3; Ġakbu 1:22-25) Jekk nagħmlu hekk, Jehovah se jbierek l-​isforzi tagħna sabiex b’hekk, l-​istess bħalma nuċċali jirranġa vista mċajpra, l-​ispirtu qaddis iġibilna l-​istampa sabiħa taʼ l-​iskop divin kollha kemm hi ċara f’moħħna, u jkollna vista spiritwali iktar eżatta.—1 Korintin 2:7, 9, 10.

Tabilħaqq, il-​ħaġa moħġaġa fil-​Bibbja tfaħħar bil-​kbir lil Jehovah bħala Dak li “jikxef il-​misteri.” (Danjel 2:28, 29) Iktar minn hekk, hu Wieħed li “jistħarreġ il-​qlub.” (1 Kronaki 28:9) M’għandniex nissorprendu ruħna meta nsiru nafu li l-​kxif tad-​dawl tal-​verità divina dejjem kien progressiv. (Proverbji 4:18; Rumani 16:25, 26) Minflok ma nfittxu l-​għarfien taʼ l-​affarijiet profondi t’Alla permezz tal-​mistiċiżmu jew taʼ l-​għerf dgħajjef tal-​bnedmin li ma jwassluna mkien, ejja bil-​fiduċja kollha nduru lejn Alla Jehovah biex jitfaʼ d-​dawl tal-​verità fuq il-​“qwiel oskuri” tiegħu, billi jgħarraf l-​iskopijiet taʼ l-​għaġeb li għandu lill-​qaddejja leali tiegħu fiż-​żmien imwaqqat.—Għamos 3:7; Mattew 24:25-27.

[Sors taʼ l-​Istampa f’paġna 26]

Biblia Hebraica Stuttgartensia, Deutsche Bibelgesellschaft Stuttgart