Speċjalista taʼ l-​Għajnejn Jiżraʼ Żerriegħa

X’għandhom x’jaqsmu l-​isforzi taʼ wieħed speċjalista taʼ l-​għajnejn fil-​belt taʼ Lviv, fl-​Ukraina, mat-​twaqqif taʼ kongregazzjoni tax-​Xhieda taʼ Jehovah bl-​ilsien Russu ġewwa l-​belt taʼ Ħajfa, fl-​Iżrael, li tinsab madwar 2,000 kilometru u diversi pajjiżi ’l bogħod? Din hija storja li turi kemm hi minnha l-​istqarrija tal-​Bibbja li nsibu f’Koħèlet 11:6: “Iżraʼ fil-​għodu ż-​żerriegħa tiegħek, u tagħtix mistrieħ lil idek fil-​għaxija, għax ma tafx liema tinbet.”

L-​ISTORJA tagħna tibda fl-​1990 meta Ella, żagħżugħa taʼ nisel Lhudi, kienet għadha tgħix fi Lviv. Ella u l-​familja tagħha kienu qegħdin iħejju biex jemigraw lejn l-​Iżrael. Ftit qabel it-​tluq tagħhom, Ella kellha appuntament maʼ speċjalista taʼ l-​għajnejn li nzerta kien wieħed mix-​Xhieda taʼ Jehovah. F’dak iż-​żmien ix-​xogħol tax-​Xhieda taʼ Jehovah kien projbit fl-​Ukraina. L-​ispeċjalista xorta waħda ħa l-​inizjattiva biex jaqsam maʼ Ella t-​twemmin tiegħu bbażat fuq il-​Bibbja. Issorprendiet ruħha meta qalilha li Alla għandu isem persunali. Din il-​ħaġa qajmitilha l-​kurżità u minn hemmhekk bdew diskussjoni sabiħa fuq il-​Bibbja.

Ella tant ħadet pjaċir bid-​diskussjoni li talbitu jkomplu jiddiskutu l-​ġimgħa taʼ wara, u jerġaʼ l-​ġimgħa taʼ wara dik. L-​interess tagħha kien qed jikber, imma kien hemm problema. Iż-​żmien biex jitilqu lejn l-​Iżrael kien qed joqrob bil-​ħeffa. Ella kien għad fadlilha tant x’titgħallem! Biex tibbenefika bis-​sħiħ miż-​żmien li kien għad baqaʼ, talbet li jkollha studju tal-​Bibbja kuljum sakemm tiġi biex issiefer. Għalkemm Ella ma komplietx l-​istudju mill-​ewwel malli waslet l-​Iżrael, iż-​żerriegħa tal-​verità kienet rabbiet l-​għeruq f’qalbha. Sa tmiem is-​sena kienet reġgħet bdiet tistudja l-​Bibbja bil-​ħrara.

Faqqgħet il-​gwerra fil-​Golf Persjan, u l-​Iżrael beda jiġi attakkat bil-​missili mill-​Iraq. Din kienet xi ħaġa fuq fomm kulħadd. Darba minnhom, waqt li kienet qed tixtri, Ella semgħet familja taʼ immigranti ġodda jitkellmu bir-​Russu. Għalkemm hi stess kienet għadha qed tistudja l-​Bibbja, Ella resqet lejhom u qasmet magħhom dak li twiegħed il-​Bibbja dwar dinja taʼ paċi. B’hekk, in-​nanna Galina, l-​omm Natasha, l-​iben Sasha (Ariel), u l-​bint Ilana lkoll bdew jattendu għall-​istudju tal-​Bibbja maʼ Ella.

Minkejja ħafna diffikultajiet, Sasha kien l-​ewwel membru tal-​familja li wasal biex tgħammed. Għalkemm kien student li ddistingwa ruħu, tkeċċa mill-​iskola minħabba l-​fatt li l-​kuxjenza Kristjana tiegħu ma ħallitux jieħu sehem f’taħriġ bi tħejjija għall-​militar, li hu parti obbligatorja mill-​kurrikulu taʼ l-​iskola. (Isaija 2:​2-4) Il-​każ taʼ Sasha spiċċa quddiem il-​Qorti Suprema f’Ġerusalemm, li bix-​xieraq ordnat li Sasha kellu jerġaʼ jiġi aċċettat lura l-​iskola biex itemm l-​istudji tiegħu. Il-​każ ngħata pubbliċità kbira mal-​pajjiż kollu. B’hekk, bosta nies fl-​Iżrael saru jafu dwar it-​twemmin tax-​Xhieda taʼ Jehovah.a

Wara li temm l-​iskola sekondarja, Sasha ntefaʼ full-time fix-​xogħol tal-​ministeru tax-​Xhieda taʼ Jehovah. Illum qed jaqdi bħala pijunier speċjali u anzjan fil-​kongregazzjoni. Oħtu ż-​żgħira Ilana ngħaqdet miegħu fix-​xogħol full-time. Kemm ommhom u kemm nannithom huma Xhieda mgħammdin. Iż-​żerriegħa li kien żeraʼ dak l-​ispeċjalista taʼ l-​għajnejn kienet għadha qed tagħti l-​frott!

Sadanittant, Ella kompliet tagħmel progress spiritwali u ma damitx ma bdiet tippriedka minn dar għal dar. Fl-​ewwel bieb li ħabbtet, Ella ltaqgħet maʼ Faina li ma kinitx ilha li waslet mill-​Ukraina. Faina kienet qed tbati minn dipressjoni. Iktar tard Ella saret taf li ftit qabel ma ħabbtet il-​bieb taʼ Faina, dik il-​mara mnikkta kienet talbet ’l Alla: “Ma nafx min int, imma jekk qed tismagħni, għinni.” Hi u Ella kellhom diskussjoni mqanqla. Faina staqsiet ħafna mistoqsijiet u t-​tweġibiet li ngħatat qisithom bir-​reqqa. Maż-​żmien ikkonvinċiet ruħha li x-​Xhieda taʼ Jehovah qed jgħallmu l-​verità mill-​Bibbja. Irranġat il-​programm taʼ studji tagħha fl-​università biex tkun tistaʼ tqattaʼ iktar ħin mal-​kongregazzjoni u fix-​xogħol taʼ l-​ippridkar, u f’Mejju taʼ l-​1994 Faina tgħammdet. Hi wkoll bdiet taqdi bħala pijuniera, u biex tmantni lilha nfisha sabet impjieg part-time fil-​qasam tal-​kompjuters.

F’Novembru taʼ l-​1994, waqt li kienet fuq ix-​xogħol taʼ l-​ippridkar, Ella f’daqqa waħda xejn ma ħassitha f’sikkitha. Marret l-​isptar fejn, wara li sarulha xi testijiet, saret taf li kellha ulċera fl-​imsaren li kienet qed tnixxi d-​demm. Sa fil-​għaxija l-​livell taʼ l-​emoglobina kien niżel għal 7.2. Wieħed mill-​anzjani fil-​kongregazzjoni taʼ Ella, li hu ċ-​chairman tal-​Hospital Liaison Committee (HLC) tal-​lokal, ta tagħrif lit-​tobba dwar għadd taʼ proċeduri mediċi li ma kinux jeħtieġu l-​użu tad-​demm.b L-​operazzjoni kienet suċċess mingħajr l-​użu tad-​demm, u Ella fieqet għalkollox.​—Atti 15:​28, 29.

Karl, il-​ġinekologu Ġermaniż taʼ nisel Lhudi li kkura lil Ella, baqaʼ impressjonat ferm. Imbagħad ftakar li l-​ġenituri tiegħu, li kienu baqgħu ħajjin wara l-​Olokawst, kienu jafu lix-​Xhieda taʼ Jehovah fil-​kampijiet tal-​konċentrament. Karl staqsa ħafna mistoqsijiet u, għalkemm kien okkupat ferm bix-​xogħol tiegħu bħala tabib, sab il-​ħin għal studju regulari tal-​Bibbja. Sas-​sena taʼ wara kien beda jattendi l-​laqgħat Kristjani taʼ kull ġimgħa.

X’irriżulta miż-​żerriegħa li nżergħet mill-​ispeċjalista taʼ l-​għajnejn? Diġà rajna x’ġara fil-​każ taʼ Sasha u l-​familja tiegħu. Rigward Ella, din issa qed taqdi fil-​ministeru bħala pijuniera speċjali. Bintha Eina, li għadha kif temmet l-​iskola sekondarja, qabdet hija wkoll il-​karriera bħala pijuniera. Faina wkoll qed taqdi bħala pijuniera speċjali. U xi ngħidu dwar Karl, il-​ġinekologu taʼ Ella? Dan illum huwa Xhud mgħammed u qed jaqdi bħala qaddej ministerjali. Mal-​pazjenti tiegħu u m’oħrajn qed jaqsam il-​qawwa li tfejjaq tal-​verità mill-​Bibbja.

Il-grupp żgħir taʼ immigranti li jitkellmu bir-​Russu li nbeda bħala parti mill-​Kongregazzjoni Ebrajka taʼ Ħajfa issa kiber u sar kongregazzjoni Russa żeluża b’iktar minn 120 pubblikatur tas-​Saltna. Parti minn din iż-​żjieda seħħet bis-​saħħa tal-​fatt li wieħed speċjalista taʼ l-​għajnejn fi Lviv ħa l-​opportunità biex jiżraʼ żerriegħa!

[Noti taʼ taħt]

[Mappa f’paġna 29]

UKRAINA

IŻRAEL

[Sors]

Mountain High Maps® Copyright © 1997 Digital Wisdom, Inc.

[Stampi f’paġna 30]

Ella u bintha, Eina

[Stampa f’paġna 31]

Grupp hieni taʼ Xhieda f’Ħajfa li jitkellmu bir-​Russu. Mix-​xellug għal-​lemin: Sasha, Ilana, Natasha, Galina, Faina, Ella, Eina, u Karl