Il-​Ġlieda Kontra l-​Faqar Battalja Mitlufa?

IT-​TURISTI li jżuru l-​kwartieri ġenerali tal-​Ġnus Magħquda fil-​Belt taʼ New York imorru jaraw il-​Kamra tal-​Kunsill Ekonomiku u Soċjali. Fis-​saqaf tal-​gallerija pubblika jistgħu jaraw pajpijiet u katusi mikxufin. Il-​gwida turistika tispjega: “Dan is-​saqaf li baqaʼ ma tlestiex, jitqies b’mod ġenerali bħala tfakkira simbolika li x-​xogħol ekonomiku u soċjali tal-​Ġnus Magħquda ma jispiċċa qatt; dejjem hemm iktar x’isir biex ikomplu jitjiebu l-​kundizzjonijiet li jgħixu fihom in-​nies tad-​dinja.”

Għalkemm il-​Kunsill jaħdem iebes biex iwettaq l-​impenn siewi tiegħu, li jinkuraġġixxi livell ogħla t’għajxien għal kulħadd, donnu li din il-​biċċa xogħol m’hi se tispiċċa qatt. Taʼ interess, matul il-​ministeru tiegħu fuq l-​art fl-​ewwel seklu E.K., Ġesù Kristu qal: “L-​Ispirtu tal-​Mulej fuqi, għax hu kkonsagrani. Bagħatni . . . nwassal il-​bxara t-​tajba lill-​fqajrin.” (Luqa 4:​18) X’kienet din il-​“bxara t-​tajba” li wassal? Il-​messaġġ dwar is-​Saltna li Alla Jehovah, li hu “kenn għall-​fqir fid-​dwejjaq tiegħu,” se jwaqqaf b’Ġesù Kristu bħala s-​Sultan tagħha. X’se twettaq din is-​Saltna? Isaija pprofetizza: “Jagħmel il-​Mulej taʼ l-​eżerċti għall-​popli kollha . . . mejda b’ikel fin, mejda bi nbejjed ħelwa, b’laħam imsemmen bil-​mudullun, u nbejjed fini. Jeqred il-​mewt għal dejjem, jixxotta Sidi l-​Mulej id-​dmugħ minn fuq kull wiċċ.”​—Isaija 25:​4-6, 8.

Tixtieq issir taf iktar dwar kif is-​Saltna t’Alla se ‘ttejjeb il-​kundizzjonijiet li jgħixu fihom in-​nies tad-​dinja,’ sabiex ma jkunx hemm iktar min ikun fil-​bżonn? Ara hawn taħt biex tara kif jistaʼ jkollok għalliem kwalifikat li jiġi jżurek biex jurik iktar x’tgħid il-​Bibbja fuq kwistjonijiet bħal dawn.