“Sibt Dak Kollu li Kelli Bżonn”

SKOND rapport maħruġ mill-​Organizzazzjoni Dinjija tas-​Saħħa (WHO), huwa stmat li dan l-​aħħar id-​dipressjoni qed teffettwa lil iktar minn 120 miljun persuna madwar id-​dinja kollha. Kull sena, miljun persuna tikkommetti suwiċidju u bejn 10 u 20 miljun oħra jagħmlu attentati biex itemmu ħajjithom. X’għajnuna hemm għal dawk li jbatu bid-​dipressjoni? Il-​kura medika għandha mnejn ittaffi t-​tbatija, u l-​appoġġ emozzjonali huwa vitali. Iktar minn hekk, xi wħud li qed jesperjenzaw dan sabu iktar għajnuna fil-​pubblikazzjonijiet prattiċi tax-​Xhieda taʼ Jehovah li huma bbażati fuq il-​Bibbja, bħalma turi din l-​ittra li ġejja minn Franza.

“Ftit taż-​żmien ilu ma stajt nara l-​ebda raġuni għala kelli nibqaʼ ngħix. Tlabt lil Alla biex iħallini mmut. Ħassejtni daqslikieku kont mejta minn ġewwa. Tlabt ħafna lil Jehovah għad-​direzzjoni. Ukoll, iddeċidejt li naqra t-​2002 Yearbook of Jehovah’s Witnesses u fi tlett ijiem spiċċajtu. Ma nistax ma ngħidx kemm inkuraġġieni u kemm saħħaħli l-​fidi tiegħi.

“Għamilt xi ftit tar-​riċerka fir-​rivisti It-​Torri taʼ l-​Għassa u Stenbaħ!, u veru bqajt skantata! Kont ilni naqra dawn ir-​rivisti b’mod regulari għal iktar minn 15-il sena, imma qatt ma rrealizzajt kemm dawn l-​artikli huma verament inkuraġġanti u interessanti. Huma mimlijin imħabba​—kwalità li tant hi rari llum il-​ġurnata. Sibt dak kollu li kelli bżonn.”

Il-Bibbja tgħid: “Qrib il-​Mulej lejn dawk b’qalbhom maqsuma, jgħin lil dawk b’ruħhom mifnija.” (Salm 34:​19, [34:​18, NW]) Bla ebda dubju, dawk kollha li huma “qalbhom maqsuma” jew “b’ruħhom mifnija” jistgħu jsibu inkuraġġiment u tama għall-​futur fil-​Bibbja. Ix-​Xhieda taʼ Jehovah iqassmu letteratura bbażata fuq il-​Bibbja sabiex jgħinu lil dawk fil-​bżonn jibbenefikaw minn dan is-​sors taʼ faraġ li ġie ispirat b’mod divin.