“Kemm Hi Verament Qawwija l-​Kelma t’Alla!”

“IL-​KELMA taʼ Alla hi ħajja u qawwija.” (Lhud 4:12) Permezz tas-​sitt stejjer li ġraw veru u li nġabru minn madwar id-​dinja, it-​2003 Calendar of Jehovah’s Witnesses jagħti xiehda tal-​qawwa irreżistibbli li għandha l-​Kelma t’Alla. Taħt it-​titlu “Qabel u Wara,” il-​kalendarju wera kif ix-​xogħol edukattiv tax-​Xhieda taʼ Jehovah jgħin lin-​nies itejbu l-​morali tagħhom, jabbandunaw stili taʼ ħajja li huma taʼ ħsara, isaħħu l-​ħajja tal-​familja, u jikkultivaw relazzjoni persunali m’Alla.

Intbagħtu diversi ittri t’apprezzament dwar il-​kalendarju taʼ l-​2003. Dawn huma xi ftit mill-​kummenti:

“Għall-​Kristjani veri, dan il-​kalendarju jagħti prova li hawn oħrajn li bħalhom kellhom ġlieda iebsa għall-​fidi. Issa jistgħu jħarsu lejn ir-​ritratti taʼ wħud li għamlu bidliet u jżommuhom bħala tfakkira.”—Steven, mill-​Istati Uniti.

“Verament xtaqt nikteb dawn il-​ftit kelmiet biex nurikom kemm messli qalbi l-​kalendarju taʼ l-​2003. Lanqas qatt ma kien hemm kalendarju li għamel daqshekk impatt fuqi. Dawn ir-​rakkonti se jkunu parti mill-​affarijiet li se nibda nġorr fil-​basket meta noħroġ nippriedka sabiex lin-​nies inkun nistaʼ nurihom prova ħajja u impressjonanti taʼ kemm il-​Bibbja tistaʼ tinfluwenza lill-​individwi.”—Marc, mill-​Belġju.

“Dan il-​kalendarju verament qanqalni. Meta qrajt u rajt kif Jehovah irnexxielu jbiddel lil dawn l-​individwi kont tant emozzjonata. Minħabba f’hekk, komplejt nitħeġġeġ biex inkompli nagħmel bidliet f’ħajti. Issa iktar minn qatt qabel, inħossni parti mill-​fratellanza tagħna taʼ madwar id-​dinja.”—Mary, mill-​Istati Uniti.

“Ġesù kien imqanqal profondament meta ra l-​istat spiritwali mwiegħer li l-​folol kienu jinsabu fih. Grazzi talli imitajtu l-​eżempju taʼ Kristu billi ppubblikajtu r-​rakkonti li dehru fil-​kalendarju tagħna taʼ l-​2003. Qatt qabel f’ħajti ma kien hemm kalendarju li tant qanqalni li qabiżli d-​dmugħ.”—Cassandra, mill-​Istati Uniti.

“Meta kelli 11-il sena, bdejt inpejjep; iktar tard kont nieħu d-​drogi. Spiss kont naħseb biex intemm ħajti. Meta sirt naf lil Jehovah, ġejt megħjuna biex naqtaʼ dawn il-​vizzji. Dan il-​kalendarju hu verament importanti għalija. L-​eżempji taʼ ħuti rġiel u nisa minn madwar id-​dinja jsaħħuni. Issa naf li m’iniex waħdi f’din il-​ġlieda u li l-​iktar ħaġa importanti hi l-​imħabba għal Jehovah u s-​servizz tiegħi mill-​qalb għalih.”—Margaret, mill-​Polonja.

“Kemm hi verament qawwija l-​kelma t’Alla! Meta rċivejt il-​kalendarju taʼ l-​2003, ma stajtx inżomm il-​biki. Dawn l-​esperjenzi, flimkien maʼ l-​istampi, verament isaħħu l-​fidi.”—Darlene, mill-​Istati Uniti.

“Il-​mod taʼ ħajja li qabel kienu jgħixu xi wħud minn dawn jixbah ħafna l-​mod taʼ ħajja li kont ngħix jien. Jehovah tani s-​saħħa biex naqtaʼ vizzji li għalija kienu jidhru impossibbli li naqtagħhom. Grazzi ħafna taʼ dawn ir-​rakkonti ħajjin.”—William, mill-​Istati Uniti.