Il-​Meravilji tal-​Ħolqien taʼ Jehovah

‘Is-​Siġar tal-​Mulej Imxebbgħin’

ĠIELI sibt ruħek fil-​qalba taʼ xi masġar u rajt ir-​raġġi tax-​xemx jidħlu minn bejn is-​siġar twal u għoljin? Stajt tismaʼ t-​tħaxwix hekk kif iż-​żiffa bdiet tonfoħ minn qalb il-​weraq?—Isaija 7:2.

F’xi partijiet tad-​dinja, f’ċertu żmien tas-​sena, il-​weraq taʼ diversi siġar tarahom prattikament jixegħlu lewn aħmar, oranġjo, isfar, u lwien oħra. Tabilħaqq, ikun qisu l-​masġar qed jieħu n-​nar! Kemm jaqbel dan maʼ l-​istqarrija: “Infexxu għannu, muntanji, u l-​foresta b’kull siġra fiha.”—Isaija 44:23.a

Kważi terz mill-​art niexfa tal-​pjaneta tagħna huwa miksi bil-​foresti. B’mod meraviljuż, il-​foresti, jew l-​imsaġar, u l-​ħajja abbundanti li hemm fihom jigglorifikaw lid-​Disinjatur u l-​Ħallieq tagħhom, Alla Jehovah. “Faħħru l-​Mulej,” għanna s-​salmista ispirat, “[intom] is-​siġar tal-​frott u ċ-​ċedri kollha.”—Salm 148:7-9.

Il-ktieb The Trees Around Us (Is-Siġar taʼ Madwarna) jgħid li s-​siġar jipprovdu kemm il-​bżonnijiet materjali tal-​bniedem kif ukoll jaqtgħu x-​xewqa li hu għandu biex jara affarijiet sbieħ. Il-​foresti jipproteġu, isostnu, u jtejbu r-​riżorsi taʼ l-​ilma pur li għandu bżonn il-​bniedem. Is-​siġar jippurifikaw l-​arja wkoll. Permezz tal-​proċess meraviljuż tal-​fotosinteżi, iċ-​ċelluli tal-​weraq jibdlu d-​dijossidu karboniku, l-​ilma, il-​minerali, u d-​dawl tax-​xemx f’nutrimenti u ossiġnu.

Il-foresta hija kapulavur taʼ ġmiel u disinn. Is-​siġar ġganteski normalment huma l-​iktar ħaġa li timpressjona fil-​foresti. Jikbru f’nofshom hemm numru bla għadd taʼ felċi, ħażiż, pjanti li jikbru fuq oħrajn, arbuxxelli, u ħxejjex. Pjanti bħal dawn jiddependu mill-​ambjent li joħolqu dawn is-​siġar, jikbru fid-​dell li jagħmlu, u jassorbu l-​umdità li tipprovdi l-​foresta.

Lejn l-​aħħar tas-​sena, ġo foresti li fihom is-​siġar ikunu qed ibiddlu l-​weraq, jistgħu jaqgħu sa ħamsa u għoxrin miljun werqa f’ettaru wieħed t’art fil-​foresta. Dawn x’jiġri minnhom? L-​insetti, il-​fungi, id-​dud, u l-​organiżmi l-​oħra fl-​aħħar ibiddlu dan il-​materjal organiku kollu f’humus, ingredjent vitali għal ħamrija fertili. Iva, xejn ma jinħela hekk kif dawn il-​ħaddiema siekta jħejju l-​ħamrija biex terġaʼ tibda tkabbar.

Taħt il-​weraq nexfin, il-​ħamrija hi miżgħuda bil-​ħajja. Skond il-​ktieb The Forest (Il-Foresta), “sa 1,350 ħlejqa . . . jistgħu jinstabu fi spazju taʼ pied kwadru u pulzier fond, u dan ma jinkludix il-​biljuni taʼ organiżmi mikroskopiċi f’kull ponn ħamrija.” Barra minn hekk, il-​foresti huma mimlijin rettili, għasafar, insetti, u mammiferi. Min għandu jieħu l-​kredtu għal dan il-​ġmiel u l-​varjetà? Bix-​xieraq, il-​Ħallieq tagħhom jiddikjara: “Tiegħi huma l-​bhejjem [“tal-​foresta,” NW], eluf huma l-​bhejjem fuq l-​għoljiet tiegħi.”—Salm 50:10.

Xi annimali ġew maħluqa bl-​abbiltà taʼ l-​għaġeb li jgħaddu x-​xitwa kollha reqdin u jibqgħu ħajjin minkejja l-​kesħa tax-​xitwa u l-​perijodi twal taʼ nuqqas taʼ ikel. Madankollu, mhux l-​annimali kollha jorqdu xitwa sħiħa. Anki f’nofs ix-​xitwa, tistaʼ tara xi merħla ċriev jaqbżu f’xi għalqa. Iċ-​ċriev ma jorqdux xitwa sħiħa u ma jaħżnux ikel, imma jfittxu x’jieklu billi jnaqqru l-​friegħi żgħar u xi rimja tarija tas-​siġar, bħalma tistaʼ tara f’din l-​istampa mill-​Ġermanja li hemm fil-​bidu taʼ l-​artiklu.

Il-pjanti jissemmew ħafna fl-​Iskrittura. Skond kalkolu wieħed, il-​Bibbja ssemmi kważi 130 pjanta differenti, inkluż madwar 30 tip taʼ siġra. Meta kkummenta dwar kemm għandhom tifsir referenzi bħal dawn, il-​botanista Michael Zohary innota: “Anki f’kotba li m’humiex miktubin bħala referenza teknika, wieħed ma jsibx proporzjon daqshekk kbir taʼ referenzi għall-​pjanti li huma marbutin maʼ diversi aspetti tal-​ħajja, daqskemm jidhru fil-​Bibbja.”

Is-siġar u l-​foresti huma għotjiet meraviljużi mingħand Ħallieq kollu mħabba. Jekk qattajna xi ħin f’xi masġar, żgur li naqblu mal-​kliem tas-​salmista: “Jixbgħu bl-​ilma s-​siġar tal-​Mulej, iċ-​ċedri tal-​Libanu li hu ħawwel. Fihom ibejjtu l-​għasafar.”—Salm 104:16, 17.

[Nota taʼ taħt]

[Kaxxa/Stampi f’paġna 9]

Waħda mill-​iktar siġar tal-​frott impressjonanti li hemm fil-​Lvant Nofsani hija s-​siġra tal-​lewż. Kmieni fis-​sena—ħafna qabel siġar oħra—din tqum mir-​raqda li tkun fiha. Il-​Lhud tal-​qedem sejħu lis-​siġra tal-​lewż bħala dik li tqum, biex jirreferu għal fjuri li din toħroġ minn kmieni. Is-​siġra prattikament tqum miksija biż-​żahar delikati roża jew bojod.—Koħèlet 12:5.

Mid-​9,000 speċi t’għasafar li nafu bihom, kważi 5,000 huma klassifikati bħala taʼ l-​għana. L-​għanjiet tagħhom jiksru l-​ħemda tal-​foresta densa. (Salm 104:12) Per eżempju, l-​għasfur tal-​bejt taʼ l-​għana (Melospiza melodia) għandu għana ferriħija. Il-​Mourning warblers (Oporornis philadelphia), bħal dak li jidher fl-​istampa, huma għasafar żgħar taʼ l-​għana li huma mżejna bi lwien differenti verament sbieħ taʼ griż, isfar, u aħdar lewn iż-​żebbuġa.—Salm 148:1, 10.

[Stampa f’paġna 9]

Foresta fin-​Normandija, Franza