Ix-​Xhieda taʼ Jehovah Għala Jibqgħu Jiġu Jħabbtulek?

IL-​PERSISTENZA li biha x-​Xhieda taʼ Jehovah jieħdu sehem fil-​ministeru minn dar għal dar hija magħrufa madwar id-​dinja. Xi wħud ma jistgħux jifhmu għala x-​Xhieda jibqgħu jmorru jħabbtulhom, speċjalment jekk qabel ftit li xejn ikunu wrew interess għall-​messaġġ tax-​Xhieda. Żewġ ittri mir-​Russja jgħinuna nifhmu r-​raġuni.

“Biex ngħid il-​verità,” tammetti Masha, tfajla taʼ 19-il sena minn Khabarovsk, “fil-​passat, lix-​Xhieda taʼ Jehovah kont nevitahom donnu kellhom il-​pesta.” Però, wara li qrat xi kopji tar-​rivisti pubblikati mix-​Xhieda, din biddlet l-​attitudni tagħha. “Dak kollu li qrajt verament kien interessanti u edukattiv,” tikteb Masha, “imma iktar importanti minn hekk, jgħinek tara d-​dinja minn lenti differenti. Bil-​mod il-​mod bdejt nifhem x’inhu l-​iskop tal-​ħajja.”

Svetlana, minn Ussuriysk, belt madwar 80 km lejn it-​tramuntana taʼ Vladivostok, kitbet: “Għadni kemm bdejt naqra It-​Torri taʼ l-​Għassa u Stenbaħ! Dawn ir-​rivisti huma verament bżonnjużi għall-​ġurnata taʼ llum. Nieħu pjaċir naqra l-​artikli kollha. Verament huma interessanti, informattivi, u edukattivi. Grazzi! Grazzi ħafna talli tinsabu f’din id-​dinja u talli tagħmlu dan ix-​xogħol ħanin u tant bżonnjuż.”

Ix-Xhieda taʼ Jehovah madwar id-​dinja kollha jieħdu bis-​serjetà l-​mistoqsija li tqanqal il-​ħsieb li staqsa l-​appostlu Pawlu: “[In-nies] kif jistgħu jisimgħu jekk ma jxandrulhomx?” (Rumani 10:14) Għala ma tiħux ftit minuti biex tismaʼ lix-​Xhieda meta jerġgħu jiġu jħabbtulek? Int ukoll għandek mnejn tieħu pjaċir bil-​messaġġ taʼ faraġ li hemm fil-​Kelma t’Alla, il-​Bibbja.