“Setgħu Ġew Meħlusin mill-​Ewwel”

GENEVIÈVE DE GAULLE, in-​neputija taʼ Charles de Gaulle, li kien president taʼ Franza, saret taf personalment lix-​Xhieda taʼ Ġeħova fil-​kampijiet tal-​konċentrament tan-​Nazi f’Ravensbrück, fit-​tramuntana tal-​Ġermanja. Hi kitbet il-​kliem t’hawn fuq f’ittra f’Awissu taʼ l-​1945.

In-​nies fil-​kamp tal-​konċentrament t’Auschwitz, fil-​Polonja, ġew liberati fis-​27 taʼ Jannar, 1945. Mill-​1996, fil-​Ġermanja din id-​data saret ġurnata taʼ tifkira għall-​vittmi tat-​Tielet Reich taʼ Hitler.

Waqt diskors uffiċjali li ta fis-​27 taʼ Jannar, 2003, Peter Straub, il-​president tal-​Parlament taʼ l-​Istat taʼ Baden-Württemberg, qal: “Dawk kollha li ġew persegwitati minħabba t-​twemmin reliġjuż jew politiku tagħhom, u li kienu lesti jieħdu l-​mewt minflok ma jċedu, jistħoqqilhom rispett kbir mingħandna, tip taʼ rispett li ma tistax tesprimih bil-​kliem. Ix-​Xhieda taʼ Ġeħova kienu l-​unika reliġjon li rrifjutaw għalkollox li jaqblu mal-​ħtiġijiet tar-​reġim taʼ Hitler: Huma ma kinux jgħollu idejhom biex isellmu lil Hitler. Huma rrifjutaw li jaħilfu l-​alleanza tagħhom mal-​‘Führer u l-​Istat,’ l-​istess bħalma rrifjutaw li jagħmlu xogħol militari. U t-​tfal tagħhom ma kinux jingħaqdu mal-​Moviment taż-​Żgħażagħ taʼ Hitler.”

Ġesù Kristu qal dan dwar is-​segwaċi tiegħu: “M’humiex parti mid-​dinja, bħalma jien m’iniex parti mid-​dinja.” (Ġwanni 17:16) Għalhekk, il-​waqfa li x-​Xhieda taʼ Ġeħova ħadu kienet biss minħabba r-​reliġjon. Straub kompla jgħid: “Ix-​Xhieda taʼ Ġeħova, li kellhom jilbsu trijanglu vjola fuq il-​ħwejjeġ tagħhom bħala priġunieri tal-​kamp tal-​konċentrament, kienu l-​uniċi wħud li setgħu jtemmu l-​martirju tagħhom. Kulma kien hemm bżonn kien li jiffirmaw dikjarazzjoni li fiha kienu juru li ċaħdu l-​fidi tagħhom.”

Ħafna mix-​Xhieda lanqas biss kien jgħaddilhom minn moħħhom li jagħmlu dan. Għalhekk, madwar 1,200 minnhom mietu matul il-​perijodu tan-​Nazi. Mitejn u sebgħin ruħ inqatlu għax oġġezzjonaw minħabba l-​kuxjenza tagħhom. Huma mhux sempliċement qalu l-​kliem taʼ l-​istqarrija li ġej imma wettquh: “Jeħtieġ li aħna nobdu lil Alla bħala ħakkiem iktar milli lill-​bnedmin.”—Atti 5:29.

Bħalma qal Ulrich Schmidt, president tal-​Parlament taʼ l-​Istat tar-​Rhine-Westphalia tat-​Tramuntana, ix-​Xhieda taʼ Ġeħova ma kinux xi nies straordinarji. Meta rrefera għad-​diskors tiegħu, il-​browxer Landtag Intern sejħilhom ‘nies ordinarji li, minħabba li mxew fuq il-​kuxjenza tagħhom, ħadu waqfa soda għat-​twemmin reliġjuż tagħhom, urew kuraġġ bħala ċittadini, u opponew l-​ideoloġiji tan-​Nazi minħabba l-​konvinzjoni Kristjana tagħhom.’ Nistgħu nibqgħu ċerti li Alla Ġeħova jieħu pjaċir b’dawk li jibqgħu leali lejh f’ċirkustanzi diffiċli. Fi Proverbji 27:11 naqraw: “Kun għaref, ibni, u ferraħli qalbi, biex inkun nistaʼ nwieġeb lil min jgħajjarni.”

[Sors tal-​Istampa f’paġna 30]

Courtesy of United States Holocaust Memorial Museum